¹ Jesus a mate ghu Capernaum, na yende ghu bole buendi, Nazareth. Ba duki bendi ni ba yende bonabo. ² Mu letsughu la pigha, ndè na ningele ghutso nzo Nzembi, na longisi baate. Baate bakunu ba bayonghe ndè ni ba base na ngombo. Ni ba fulsenge, bo ndè buyedi na bungudi ghuni a baghe mu sade bimuila? ³ Bo ni ba lèlenge bo: Ndè sa li wa tsole miti vè, muana Marie na bane ba nguendi Jacques, Jose, Jude na Simon? Bakédi bendi nabo ba sali na besa béne vè? Bo ni ba funze ndè. ⁴ Jesus na lèle bo ndé: cho yimbuli cha muene: baate ba ngule kima ba na ba bighi ba mambe bakima ba ghobichi mè, to a ghu bole bu ba bote mè vè! Na moni ngagha mè, na bate ba ba tsaghele ghutso ma nzo ma besa, ba sa ghobichi mè vè. ⁵ Ni mu lo, ndè na boghe baata bakè, a sa ba toghe sade imuile ti imoch vè. ⁶ Ndè na mo paghe mu bunono bua mitema mia bo. ⁷ Letsughu lemochi, ndè na tede ba duki bendi ba lekumi na bole, ndè na lèle bo: me ni tchindghe béna bole, boli, ghu yilonghichi mu bitchighe bikima.Ndè na vè bo le nianghe la funze maniugni ma mabi mumbata bate. ⁸ Ndè na lebele bo mu luata ba pondo na bonghe mitungu mu mugnale. Ndè na léghe bo mu bo biela na ma penghe ma tète biele muene, na badole ba mugnale. ⁹ Ndè na ba leghe bo mu bonghe bilueti bikima bia ghèle. ¹⁰ ndè na ba lebele bo ndé: ti be lemagningele ghutso musenge, mutu a tede bena mu yende ghu nzo ndè; yendagni. Tchiadagni, lassagni ghutso nzo muene, kuanga na va be leka mate mussenge muene. ¹¹ Ti na yitchighe chi bate ba bise bene yoghele, kobelagni mufunde wa mu mile mia bena va bena leki mate yitchighe muene. Aghone gni lèle ghuati bo ba sa yeki béne vè. ¹² Va yula vane ba duki bendi ba yende mu bitchighe bi ndè tchindeghe bo. Bo ni ba longichi na lèlenge baate ti: badagni na mutchima mabi ma béna, na bonghe butoma bua tube mabi ma bo, tsovana Nzembi a ka boghele béna. ¹³ Bo gni bafunzenghe na magnugni ma mabi makuna ma baate, ni ba ghodenge bo mèdi, bo ba boghe bo. ¹⁴ Mu lekesse muene, kumu Herode Antipas a ba ma yoghe ma Jesus a sadenge muti bate ba kunu ba yambelenge. Bakè ba lèlenge mu mbata Jesus: ndè ni Jean Baptiste, a sughi va fueshia ba bakua. Léni lebande li ndè li na ngudia Nzembi mu sade bimuila. ¹⁵ Bana ba lèlenge bo Jesus ngè mubighia mambe wa kale Eli wu Nzembi a lèle ndè na yighabegha.Bakima ba lèle bo tsiavè Jesus ndi ngane ba bighe ba mambe ba ba bade va lekesse la tsomi. ¹⁶ Va kume tsengue Herode Antipas ayoghe ma baate ba lèlenge ndè, na tasenge ndé: Mutu wa sade bimuile a toghe ba Jean! Ni mulo mè fule ba ghodi bène mu yikese ndè mutsue, to ndè na ba soghe! ¹⁷ Lekese lemochi ni la vioghe, mambe ma motchi ki ma sa yidi vè, Herode na kuele Hérodias, sabone ndè bade mukedia muana nguendi Philippe. ¹⁸ Jean a sa roke na longishe Hérode: Mabighe ma Nzembi ma sa chingesse wè mu kuele mukedia muangua wè vè, va ndè lidi moyi vè. To Hérodias a tondenge tète Jean ghutso tsughu, Hérode na tchindeghe ndè muèmne baghodi bendi ghu mbogha Jean. Bo gni ba kuate Jean, ni ba tète ndè ghu tsughu. ¹⁹ To Hérodias a bandenga ndi letase lakale péle na Jean. To ndè na saghenge mutu mu kuate ndè. To ndè a sa toghe lo vè, muti va Jean a bade ghu nzo tsughu Hérode akèlenge ndè vale na ndè. ²⁰ Hérode a sabona muti ndè badenge na bome bua Jean, ndè yabenge ndé ndè mutu wa songena, wa vaghele niuta ndè na Nzembi. Kuma tsenge, matase gni ma yonge mu tchiambe muene, a sa ba yabe bu ndè mbè sade mu lovè, muti ndè tondenge yoghe ndè. ²¹ Va letsughu la mukungui Herode wa biléme biotsi a tonde, ndé na tède bivondabia ghu mungémba ndè, na bia va mitsue mia baghodi, na bivonde bia mu mala ma lekesa la Galilée, ni ba yade ghu tchiade na sade mayayi bonabo. ²² Lekese la tchiada leto, muana Herodias wa mukase, na ningele ghu kéna mu kumua tsenge bona ba ndè tède. Hérode bona ba ndè veghele ba tonde. Hérode na lèle wa mukase: Fule mè biotchi bi wè tonde, mè ni vè wè. ²³ Ndè na ba lèle ndè: Biotchi bi wè ka vonde mè, mè ni vède wè bio, ti na ghu bade ipèchi chia buyumune buemè, ti wè fule mè. ²⁴ Va keti vane muana Hérodias wa mukase na yende ghu mbogha nguendi. Ndè na lèle nguendi motsi ma kumuatsenge a lèle ndè. Na fulu nguendi: Mè ka biki mè ki fule ndè? Nguendi na kale ndè: Fule kumuatsenge a vède wè mutsue Jean Baptiste! ²⁵ Tina muane mukase na ningele ghutso nzo kungsughu. Na yende ghu mbogha kumuatsenge na lèle ndè: Mè to mé wè tome mutu, mu yikèse mutsue Jean Baptiste, a tsuale mè ndè vatso ipèlè. ²⁶ Kumuatsenge na bade ndi ka nimena va ndè yoghe ma ndè fule, muti ndè yabenge ndé Jean a ba mutu wa yèbenè. To ndè a sa toghe bise bi ndè fule ndè vè, muti ndè bade a masade pengini ya vède ndè peti bi ndè mbé fule ndè, na ba ndè veghelè a ba ba ma yoghe lo. ²⁷ Tso va ni va kumuatsenge a tome mutu mu yende ghu yikese mutsue Jean mu tsuale ndè ghuli muane mukase. Mutu na yende ghu nzo tsughu, na kese mutsue Jean. ²⁸ Ndè na sosa mutsue va tso ipèlè, na yade na ndè, na vède muane mukase. Wona na béta ndè ghu mbogha nguendi. ²⁹ Va ba duki ba Jean ba yoghe mambe ma mavioghe, bo ni ba yende ghu yibonge niutu a Jean ghu nzo tsughu, ni ba kunde ndè. ³⁰ Ba duki ba Jesus, botchi ba lekumi na bolè, ni ba mate ghu bo ba yende. ³¹ Bo ni ba lèle ndè bi bo ba sade na bi bo ba longhichi baate. Jesus na lèle bo: Wokagni nèmè ghu ghuavè na baate, lebadagni besa bene penza, levomagni mua pesa! Ndè lèle bo boné muti baate mfuabovè ba yadenge, na ghabeghenge, pati Jesus na baduki bendi ba sa ba baghenge lekese la tchiade na sade pèti yikumbu vè. ³² Avana, bo ni ba yende vale mu mbungu, ghu yitchighe chi mutu a sa bade vè. ³³ To bakune ba mone ghu bo ba yende. Boni ba bayade bo Jesus bone ba duki bendi ba yabenge na ngulu yi bo ba yendenge. ³⁴ avane ka ni va bo batsuame ghu Jesus bona baduki bendi ba yendenge. Bo ba todelo baduki ketia tsomi. Va Jesus bona ba duki bendi ba soteghenge ghutso mbungu, Jesus na talele pitia bate. Na mone tingha bo, muti bo ba bade ngane mandobe mama sali na mukéli. Tsovana na longhichi bo mambe ma kumu. ³⁵ Na mungumbi, baduki bendi ni ba yende ghuli ndè, bo na lèle ndè: cho yitchighe chiavè na baate, mane lekese le malota. ³⁶ Tchindeghe baate mu male mamali va pedi musengue na ba bola mu sombe bo muène bia tchia. ³⁷ To ndè na kale ndé: bashiyeve, vèdagni bo bia tchiade bé muenè. Bo ni ba yaghele ndè bo: Besa lechitoghe sombe mapè ma mbili mu bongelepitia baate yiyohi vè. Besa ka mu yisombe mapè na makumi mana ma badole, tso le ka vède bo bia tchiada? ³⁸ Ndè na kale bo: Bitini bia mapè kue bena lelidi na bio? Yendagni, béna lekengese. Bakengese, ni ba lèlè bo besa ndi mapè ma tane tane na batchui bole. ³⁹ Ndè na tome baduki bendi mu tsaghese piti a baate mu yula bimba. ⁴⁰ Ni mulo baate ni batsaghele mu makungui makungui. ⁴¹ Jesus na bonge bitigni bia mapè bi tane na batchui ba bole. Ndè na chimbele mise ghu yulu, na chighe Nzembi mu lo. Tsovana na bokle mapè bitini bitini, na vède baduki bendi mu kabele bate. ⁴² Mute-mute na tchiade lendi lekabe nachi ndè yotegha. ⁴³ Baduki ni ba kokese ma tighe ma mapè na batsui ni babase lekumi na mapondji mole. ⁴⁴ Gua ba mitochini mitane mia babaghela ba batsia mapè na batsui. Ba sa range bakase na baane vè. ⁴⁵ Va yula vana, Jesus na lèle baduki bendi mu bonge mbungu mu tsuame ghu Bethsaida, wu lidi va tungu a mubu wa vè na ngulu wa Galilée. Jesus na tsaghele vane, na tsamene pitia baate ya bade vane. ⁴⁶ Va yula panze pitia baate, na yende ghu yule mukongo ghu yi bondo. ⁴⁷ Na mungumbi, mbungu ya baduki bendi, ya bade ghu mutema mubu wa vè na ngulu, Jesus na sale ndè penza ghu ngulu. ⁴⁸ Jesus na mone levogha la kubesenge mbungu a baduki bendi mu yende. Ni mulo, nde kukele ghu pedia bo mu tèle va yulu mamba va bushi a ba ki yifundu. Na tondenge lote bo. ⁴⁹ Bo ba mone ndè yende mu yula a mamba, ni ba tase bo ka mukuyi. ⁵⁰ Va boba talele ndè bome ni bua kuate bo, to ndè na yambele ndé: Sosagni mitema, ya monagni bomo, awo mè. ⁵¹ Ndè na naghe ghutso mbungu, na tsaghele bona baduki bendi, levogha ni lafuada. Bo ba ghembe mu bi ndè sade. ⁵² Nabonati bo bamone bu Jesus a fugnile mapè na batchui, bo ba sa tsikese bungudi buendi ngana bu ba toghele bada bona bo. ⁵³ Va yula va bo ba sabeghe muvova wa vè na ngulu wa Galilée mu mbungu, bo ni ba sote ghu Génézareth. Bo ni baghade mambunge ma bo vane. ⁵⁴ Va ketia va pole mu mbungu, baate ni ba dighele Jesus. ⁵⁵ Avane ka ni va bo ba yende mu bitchighe bia kese yéne yotchi, mu yi lèle baate ti: Jesus vaneva lidi.A bana, ni ba tsualenge babeda mu yula matengui ma bo, mu bitchighe biotchi bi bo bayoghe tsanga Jesus. ⁵⁶ Mu bitchighe biotchi va ndè polenge, mu tso mala, mu misenge, voki mutso madèkè, baate ni ba sosenge babéde mu bitchighe bi ba sadenge mikungi. Bo ba bondenge ndè mu chingese bo mu bembe ndile lepèpi la lengoyi lendi. Botchi ba ba bembenge ndè ni ba bèleghenge.