¹ Jesus na banda longese va tungu a mudiba. Piti a baate ni ya dinge ndè. Na nagh ghutso mbunge, na tsaghela. Piti a baate ya bade va tungu mudiba. ² Ndè na longichi bo mamba makunu ghutso makókóma, na lèle lo ndé. ³ yóghani : muvédi na yende ghu vada. ⁴ Va ndè nianzenge tsanga, lekabe léna ni la raghe mu tung' a ndjila, ba niódi ba yada ni ba tchade bivèdi biotchi. ⁵ A léna lekaba ni la raghe mu yulu mamani, lo le sa bóghe vè; mu lekembi la mikengi. ⁶ Niange yi póla bio ni bia kanini mu lekembi la mikengi. ⁷ A lena lekaba ni la ragha ghutso matsendèle. Matsèndele ma bógha, bivèdi ni bia kuada. ⁸ A léna lekaba, ni la ragha mu toto yiyibue, bivèdi bibógha ni bia bóte milonda mia kunu. ⁹ Ndè na lèle ndé: Wulidi na matchui mu yógha ka yógha. ¹⁰ Va Jésa a bade ka ndè pénza, baate ni ba yade ghu yibakese ndè bona baduki béndi ba lekumi ma bole, ni ba fule ndè bo sópela besa kókóma muène ¹¹ Ndè na yaghela bo ndé: ghu lidi béna, bimuili bia buyumune bua Nzembi, ba vède béna, to ghuli bakima ba yambele na bo ndile ghutso makókóma. ¹² Bo na bakengese, basamone vè, na ba yógha, to ba sa tchikese vè. Muti bo ba ka ghèle bitsèghili, na mu ba ka boghole bo mabi. ¹³ Ndè na lèle bo ndé : Béna le sa yóghese kókóme muène vè? Ka buni béne leki tóghe yóghese mana makókóme? ¹⁴ muvèdi a nianze tsanga mabighe ma Nzèmbi. ¹⁵ Tsange yi ya raghe mu tungu a ndjila yo yilidi ngana mabighe ma Nzèmbi, va ba mane mo yogha diable a ka yade tinatine ghu yi mase. ¹⁶ Lekabe le la raghe mu yulu ma mamani, la fuane baate ba ba chinge mabighe ma Nzembi na ngombo. ¹⁷ To ba ba salidi na mikengi mu chitese mitéma mu lekese li mambe ma mamono ma yade, bo ba ka tamene lebioghe; a ni makese ma bo ba raghe. ¹⁸ Lekabe li la raghe ghutso matsendele, le lidi ngana baate ba ba yoghe mabighe ma Nzembi. ¹⁹ To matase ma bulongo, na kutu, na lenunngi, na mambe makima ma ningele ghutso mitéma mia bo, mabigha ma sa bote milonde vè. ²⁰ Tsanga yi ya raghe mu tot yi yibue yi lidi ngana baata ba yoghe mabighe ma Nzembi, ba ka lèle mo ghuts mitéma, bo ba ka bota milonde, a bana makumi matate, a bana makumi masamene, a bana mukama. ²¹ Jesus na lèle bo ndé : Ba tsome pagha ghutso nzo mu sueghe yo ghutso mulumbu vo ghu tchina tengi ? Ba tembe yo va yulu kandeghe mu muese yiyalela. ²² Muti le sa salidi na tchambe la musuèghe lesaka bise mbedi póla vè, bi ba sade ghu musuèghe chikele chikele ndile pole mbedi. ²³ Wu lidi na matchui mu yógha, a yógha. ²⁴ Ndè na balèle ndé : Yirambelani mu mamba ma béne layógha. Chétse chi Wè yèleghe ni chi baka yèleghe wè muène, ni ba buèse kiti buèse. ²⁵ Muti wu lidi na bio, ni ba wu ba ka buese vède, na wu salidi na bio vè, ni ba póka kiti mua ndji yi ndè lidi na yo. ²⁶ Na ba lèle ndé; Buyumune buo Nzèmbi bu lidi ka ngana mutu wa nianze tsange mu toto ²⁷ Ndè na bade na bungósa a sa ka tchikese bu yo ya mène vè. ²⁸ Mu toto yo muène tsomi bimba bia mène bimba , tsovana bivèdi na bio bi ka mènè, bi ka bogha, bi ka funde tsovana bi ka bóta milónda. ²⁹ Ti milonda mi ma yèlè, va kèti avana ndè bonge ka mbédi mu kèse bivédi muti lekèse la tole milonda le matodo. ³⁰ Ndè na lèle ndé: To bésa mabéna naki la fuanese buyumune bua Nzèmbi? Kokome ka yini leki toghani lèle mu sópele mabighe muène? ³¹ Buyumune bua Nzèmbi bu lidi ngana mulónde wa ndógha sévéné. Ndè lutili bukèghe ghutso milónda miótchi mia mu toto ³² Va ba mane ndè vada, ndè ka bógha, ndè mana bógha, a ka lótele miti miótchi mia ghutso nungi. Bitaka bi la bi la bika funde mumbata ndè, bika nènè , ba niódi ba ka tónge manzo ma bo. ³³ Jesus a yambelenge na baata ba ndè lèlenge mabighe ma Nzèmbi ndile ghutso makókóma ma bo ba toghenge u yóghesa. ³⁴ Ndè yambelenge ghutso makókóma. To va ndè badenge bóna baduki bèndi, ndè sópelenge bo makókome muène. ³⁵ Letsughu muène, na mukolo Jesus na lèle bo ndè: Wókani ngule mudiba yèna; mbungu ya bade ba ma niangela. Jesus na nagha bóna ba duki bèndi. ³⁶ Bo ni ba niaghe piti a baata, ni ba yènde ghu mutéma mudiba. Ma mbungu mana ni maduke bo. ³⁷ Mukunge mfuamfuandèvè na yade ghu yulu mudiba, mungeba a ghobenge mu mbungu; mambe ni ma ningele ghutso mbungu, mo na base yo. ³⁸ Jesus a bade a lase chole ghu mutsuè mbunge, a sóke mutsuè va yulu yipóndena. Bo ni ba sole ndè chole, na lèle ndè bo : A kumu wè sa monè ti bésa ka kuade la kuade vè? ³⁹ Jésus na sógha, na kambeghe mudiba, na kubese levógha na mingeba. Na lèle mubu a vè na ngulu,na levogha ndé: bade lingi. Levógha ni la kubu. ⁴⁰ Jesus na léle ba duki bèndi ndé: muki béna lélidi na bomo? Béne ka lebioghe vè? ⁴¹ Bo ni l ba mono bomo. Ni ba yambelenge mfuechi a bo muène bó: A wu Mutu wu levoghe na mingéba ba yimbesa?