तीतुस 2
1
पर तु ऐण्डी गल्ला बोले केर, ज़े खरी शिक्षा रै लायक सी ।
2
मतलब खापरै मर्द, हौशियार होर गम्भीर हौर संयमी होले, होर तिन्ना न विश्वास होर प्रेमा न होर धिरजा न पक्के होले ।
3
ऐण्डि तराह खापरी बेटड़ी रा चाल चलन भी पवित्र लोका साही होला, दोष लाणु आली नेई; पर शौभली गल्ला सिखाणु आली होली ।
4
ताकि ते जुआन बेटड़ी बै चताऊणी देन्दी रौहली, कि आपणे लाड़े होर बाल बच्चे सैघे झुरी रखली ।
5
होर संयमी, पतिव्रता, घौरा रा कौम काज़ केरनु आली, खरी होर आपंणे आपणे लाड़े रै आधीन रौहणु आली, कि परमेश्वरे रै वचना री निन्दा नेई लोड़ी हुई ।
6
ऐण्ढी तरहा तू ज़ुआन मर्धा बै बी समझ़ा कि ते सँयमी होलै।
7
सेभी गल्ला न आपणे आपु बै खरै कौमे रा नमुना बणा: तेरी शिक्षा शौभली हौर गमभीर
8
होर ऐण्डा खरा हुआ लोड़ी, कि कोई बुरा नेई बोली सकला; जुणी सैघै कोई विरोधी आसा पेन्दे दोष लाणे रा मौका नी पाईया शर्मिन्दा होला ।
9
नौकरा बे समझा की सौ आपणै-आपणै मालिका रै आधिन रौहित, हौर सेभी गल्ला न तिन्ना बे खुश रखले, होर उलटा जवाप नी देले ।
10
चोरी चलाकी मौता केरे; पर सेभी गल्ला न पुरे विश्वासी निकल्ले, कि ते सेभी गल्ला न आसारे उद्धरकर्ता परमेश्वरे री शिक्षा बे शौभा देला ।
11
किबेकि परमेश्वरे रा अनुग्रह प्रगट सा, ज़े सेभी माहणु री मुक्ति री बजा सा ।
12
हौर आसा बे याद दिला सा, कि आसे अभक्ति होर संसारे री अभिलाषा न मन फेरिया ऐई युगा न संयमी होर धर्मा सेघै भक्ति री जिनदगी बिताले ।
13
हौर तेस्सा धन्य अाशा री अर्थात आपणे महान परमेश्वरे होर उद्धारकर्ता यीशु मसिहा री महीमा रै प्रगट होणे रा इन्तजार केरदे रोहा सी ।
14
जुणिऐ कि आसारी तेईए आपणा बलिदन केरु, कि आसाबे सेभी प्रकारै रै अधर्मा ना छुड़ाल, होर शुद्ध केरिया आपणी तेईऐ एक जाति बणाले जौ खरे-खरे कौमा न सरगर्म होली ॥
15
पुरे अधिकरा सैघै इन्ना गल्ला बोलित हौर समझाई हौर सिखानदे रौहित: कोई तुस्से तुच्छ नी लोड़ी बुझे ॥