तीतुस 3
1
लोका बै याद केराई, कि हाकिम होर मुखिया रै अधिन रौहीत, होर तिन्ने रै हुक्म मनीत, हौर हर एक खरे कौमे री तेईऐ त्यार रौहित ।
2
कौसी बै बदनाम मौति केरित; झगड़ा केरनु आले नी होले: पर शौभली आदती आले होले, होर सेभी माहणु सैघे बेड़े प्यारा सैघै रौहले ।
3
किबेकि आसे भी पेहले, निर्बुद्धि, होर हुक्म नी मनणु आले, होर गलतफैमी न पौडु हुन्दे ती, होर रांग रंगे री अभिलषा न हौर सुख विलासै री गुलामी न ती, होर बैरभावा, हौर
4
पर जेबे आसारै उद्धारकर्ता परमेश्वरे री क्रिपा, होऱ माहणु पेन्दे तेईरा प्यार प्रगट हुआ ।
5
ता तेईऐ आसारा उद्धार केरु: होर ऐ धर्मा रै कौमा रै मुताबिक नेई, जौ आसे आपु केरे सी, पर आपणी दया रै मुताबिक सा, नौआ जन्म, हौर पवित्र आत्मा रै दुआरा नौऊंआं बणाणे रै दुआरा हुआ सा ।
6
जुण तेईऐ आसारै उद्धारकर्ता यिशु मसिहा रै दुआरा आसा पेन्दै बोहु बड़ी आशीष धिनी री सा ।
7
जुणी री बजा न आसे तेई रै अनुग्रहा सेघे धर्मी बणीया, हमेशा री जिन्दगीं री आशा रै मुतबिक पुत्र अधिकरी बणे ।
8
ऐ गल सच सा, हौर हाऊ चाहा सा, कि तु इन्ना गल्ला रै बारे न हिम्मती सैघै बोलले तेबे कि जुणा परमेश्वरा बै मन्ना सी, ते खरे-खरे कौमा न लागी रौहाणे न ध्यान रखा सी: ऐ गल्ला खरी, हौर माहणु रै फाईदे री सी ।
9
पर मुर्खता री बैहसा न, हौर खान्दाना रै, हौर बैर विरोध, होर तिन्ना झगड़े न, जौ कनुन रै बारे न बचिया रौहे; किबेकि ते निष्फल हौर बेकार सी ।
10
कौसी पाखंडी बै ऐक दुई बार समझाई बुझाईया तेई न आंगी रौहे l
11
ऐ जाणीया कि ऐंढा माहणु भटकुन्दा सा, होर आपणै आपा बै दोषी मनिया पाप केरदा रौहा सा l
12
जैबै हाँऊ तौ आगै अरतिमास या तूरखिकुसा बै भेजनू, ता मुंह हागै निकुपुलिस ऐणे री कोशिश केरीत्: किबैकी मैं तौखे सर्दी न रौहणै री सोची सा l
13
जेनास सथापना केरणु आळै होर अप्पुलोसा बै कोशिश केरिया आगे पजेरित्, किबैकी तिन्हा बै कोई चीजा री कमी नेई हुई लोड़ी l
14
होर आसरे लोका जरूरता बै पूरा केरने री तैंईये शोभले कौमा न लागी रौहणा सीखे, ता बिना कौमें मता रौहंदे l
15
मेरे सेभी सेंघी रा तौबे नमस्कार होर ज़े बिश्वासा रै बजाह न आसा सेंघे झुरी रखा सी, तिन्हा बै नमस्कार l तुसा सेभी पेंधे अनुग्रह होन्दा रौहला l