¹ तेबै प्यारे, शौहरू री साही परमेश्वरा पिछे चैलणु आळै बणा l ² होर प्यारा न चला, जेंडे मसीहे भी आसा सेंघे प्यार केरू, होर आसा री तेंइए आपणै आपा बे सुखदाई सुगंध बणीया परमेश्वरा सामणै भेंट केरिया बलिदान केरु सा l ³ होर जेंडा पवित्र लोका री तैईऐ शोभला सा, तेंडा तुस्सा न व्यभिचार, होर कोई भी तरह रे बुरे कौम, या लालचे री गल्ला तक नेई लोड़ी हुई l ⁴ होर ना र्शमिदा री, होर ना मूढ़ता री गल्ला री, ना मजाके री, किबैकि ऐ गल्ला ठीक नी होन्दी, पर तुस्सा न हमेशा धन्याबाद ही शुणुआ लोड़ी l ⁵ किबैकि तुस्सै जा़ंणा सी, कि लोई व्यभिचारी, या अशुध्द माँणहु, या लालची माँणहु री, जूण मूर्ति पूजा रै बराबर सा, मसीह होर परमेश्वरा रे राज्य न मीरास नेई l ⁶ कोई तुस्सा बै बेकारा री गल्ला न धोखा नेई देला, किबैकि इन्हा गल्ला री बजह न परमेश्वरा री झिक आज्ञा नी मनणु आले लोका पांधे भड़का सा l ⁷ तेबै ता तुसे तिन्हा रे सेंघी मौता बणदे l ⁸ किबैकि तुसे जूण पहले निहयारे न ती, पर ऐबे प्रभु न ज्योति सी, होर ऐबे ज्योति री सन्ताना साही चला l ⁹ किबैकि ज्योति रा फौल सेभी तरहा री भलाई, होर धर्मिकता, होर सच्चाई सा ) l ¹⁰ होर ऐ पता लाई लेया, कि प्रभु बे कि शोभला लागा सा l ¹¹ होर निहयारे रे नाशमान कौमा न हिस्सेदार मता बणदे, पर तिन्हा बै समझाऐ केरा l ¹² किबैकि तिन्हा रे गुप्त कौमा री चर्चा केरना भी शर्मऐ री गल सा l ¹³ पर जेतरे कौमा री तेईऐ समझाऐ केरा सी, तै सेभ ज्योति न प्रगट होआ सी, किबैकि जे सेभी किच्छा बे प्रगट केरा सा, सो ज्योति सा l ¹⁴ ऐसा बजह न सो बोला सा, ओ सोणु आलैओ जागा, होर मुंऐदे न जिन्दे हो, ता मसीह री ज्योति तो पांधे चमकली l ¹⁵ तेबै ता ध्याना ना हेरा, कि कैंडी चाल-चला सी, निर्बुधि लोक री साही नेई बल्कि बुद्धिमान लोका री साही चला l ¹⁶ होर मौके बे किमती समझा, किबैकि धियाड़े बुरे सीl ¹⁷ ऐसा बजह न निर्बुधि मता होऐ, पर ध्याना लाईया समझा, कि प्रभु री इच्छा कि सा ? ¹⁸ होर दाखरसा न मतवाले मौता बणदे, किबैकि ऐता न लुचपन होआ सा, पर आत्मा न परिपूर्ण होंदे जा l ¹⁹ होर आपु न भजन होर स्तुतिगान होर आत्मिक भजन गाऐ केरा, होर आपणै-आपणै मना न प्रभु रे सामणै गांदे होर कीर्तन केरदे रोहा l ²⁰ होर हमेशा सेभी गल्ला री तेंइए आसारे प्रभु यीशु मसीह रै नाँ न परमेश्वर पिता रा धन्याबाद केरदे रोहा l ²¹ होर मसीहा रै डोरा ना एकी-दूजे रे अधीन रोहा l ²² है लाड़ियो, आपणै-आपणै लाड़े रै एन्डे अधीन रोहा जेंडे प्रभु रै l ²³ किबैकि लाड़ा लाड़ी रा मुंड सा, जेंडा कि मसीह कलीसिया रा मुंड सा, होर आपु ऐ शरीरा रा उद्धार कर्ता सा l ²⁴ पर जेंडे कलीसिया मसीह रे अधीन सा, तेंडे लाड़ी भी हर गल्ला न आपणै-आपणै लाड़े रै अधीन रोहाली l ²⁵ है सेभे लाड़े, आपणी-आपणी लाड़ी सेंघे प्यार केरा, जेंडा मसीहे भी कलीसिया सेंघे प्यार केरिया आपणी जांन भी कलीसिया बे धिनी l ²⁶ कि तेस्सा बै वचना रै दुआरा, पाणी न नहाईया शुद्ध केरिया पवित्र बणाये l ²⁷ होर तेसा बे एक एण्डी तेजस्वी कलीसिया बनाईया आपु आगे खडी केरे, जूणी ना कोई दोष, ना झुर्री, ना कोई एण्डी चीज हो, बल्कि पवित्र होर निर्दोष हो l ²⁸ एंडी तरहे जरूरी सा, कि लाड़ा आपणी-आपणी लाड़ी सेंघे आपणै शरीरा बराबर प्यार केरे, जूण आपणी लाड़ी ना प्यार केरा सा, सो आपणै आपा ना प्यार करा सा l ²⁹ किबैकि कोइए कड़ी भी आपणै शरीरा ना दुश्मनी नेई केरी, बल्कि तेई रा पालन-पोषण केरा सा, जेंडा मसीह भी कलीसिया सेंघे करा सा l ³⁰ तेबे कि आसे तेइरे शरीरा रे अंग सी l ³¹ एता बजह ना माँणहु आपणै आम्मा-बापू बे छौड़िया आपणी लाड़ी सेंघे मिलिया रोहणा, होर तिन्हा एक तन होणा l ³² ऐ राज ता बडा सा, पर हाँऊ मसीह होर कलीसिया रे बारे ना बोला सा l ³³ पर तुसा मौन्झे हर एक आपणी लाड़ी ना आपु बराबर प्यार रखेइत, हपर लाड़ी भी आपणै लाड़े री डोर बुझे l