¹ है शौरुओ, प्रभु न आपणै- आपणै आमा-बापू रै आज्ञाकारी रोहा, किबैकि ऐ ठिक सा l ² आपणी आमा होर बापू रा आदर केरा ( ऐ पहला हुक्म सा, जूणी सेंघे वायदा भी सा ) ³ कि तेरा भला होला, होर तू धौरती पांधे बोहु रोज ज़िंदा रोहेला l ⁴ होर ओ शौहरू आले ओ, आपणै शौहरू बे झिक मता दिलांदे, पर प्रभु री शिक्षा, होर चेतावनी देंई देईया तिन्हा रा पालन-पोषण केरा l ⁵ है दासो, जूणा शरीरा रे मुताबिक ता तुस्सा रै स्वामी सी, आपणे मना री सिधाई सेघे डौरदे, होर कौम्दे, जेंडे मसीह री, तेंन्डे तिन्हा रा भी हुक्म मना l ⁶ होर माँणहु बे खुश केरणु आले साही रिहाणै री तेंइये सेवा मता केरदे, पर मसीह रै दासा साही मना सैघे परमेश्वरा री इच्छा पांधे चलदे रौहा l ⁷ होर तेस्सा सेवा बे माँणहु री नेई, बल्कि प्रभु री सोचिया शोभले मना सैघे केरा l ⁸ किबैकि तुस्सा बे पता सा, कि जे कोई जेंडा शोभला कौम केरा सा, चाहे दास होला, चाहे आज़ाद, प्रभु ना तेंडा ऐ मिलणा l ⁹ होर ओ स्वामियो, तुस्से भी धमकिया छौड़िया, तिन्हा सेंघे ऐण्डा व्यवाहर केरा, कि तुस्सा बै पता सा कि तुसा रा होर तिन्हा रा दुई रा स्वामी स्वर्गा ना सा, होर सो कोई रा पक्ष नेई केरदा l ¹⁰ ऊँई री तेंईये, प्रभु न होर तेई री शक्ति रै प्रभावा न मजबूत होंदे जा l ¹¹ परमेश्वरा रै सारे हथियार बोहना, कि तुस्से शैताने री सारी युक्ति रा सामना केरने री तेंइए खड़े रोही सके l ¹² किबैकि आसा रा मल्लयुध्द मांस होर लोहू रा नेई आथी, बल्कि प्रधान होर अधिकारी सेंघे, होर ऐई संसारा रे निहयारे रे हाकमा सेंघे, होर तेई दुष्टा री सेना सेंघे सा जूण आकाशा ना सा l ¹³ तेबै ता परमेश्वरा रे सारे हथियार बोहना, कि तुस्से बुरे धियाड़े न सामना केरी सकले, होर सेभ किच्छ पुरा केरिया खड़े रोही सका सी l ¹⁴ जूण सच्चाई न आपणी कमर कशिया, धार्मिकता री झिल्म लाईया l ¹⁵ होर जोंघा ना मेल-मिलापा री तयारी रे बुट लाईया, ¹⁶ होर तिन्हा सेभी मौन्झे बशाह री ढाल लेइया मज़बुत रोहाले ताकि तुस्से तेई दुष्टा रे औगी साही भौक्दे तिरा बे शेई सकले। ¹⁷ होर उधारा रा टोप, होर आत्मा री तलवार जूण परमेश्वरा रा वचन सा,लेआ l ¹⁸ होर हर बोक्ते होर हर तरह न आत्मा न प्रार्थना होर विनती केरदे रोहा, होर तेबे ता बीऊदे रोहा, कि सेभी पवित्र लोका री तेंइए लगातार प्रार्थना केरदे रोहा l ¹⁹ होर मेरे तेंइए भी, कि मुम्बे बोलदे बोक्त एन्डे वचन मिले, कि हाँऊ हिम्मता सेंघे सुसमाचारा रा भेद देसणु, जूणी री तेंइए हाँऊ शागली न बोनुहुन्दा राजदूत सा l ²⁰ होर ऐ भी कि हाँऊ तेई रे बारे न जेंडा कि मुम्बे लोड़ी हिम्मती सेंघे बोलणु l ²¹ होर तुखिकुस जूण प्यारा भाई होर प्रभु न बशाह रै काबल सेवक सा तेई एजिया तुस्सा वे सेभ गल्ला दसणी, कि तुस्सा बे भी पता लागला कि हाँऊ केन्डी तरहे रोहा साl ²² सौ मैं तुस्सा हाग्गे तेबे भेजू सा, कि तुस्से आसा री दशा जाणले, होर सौ तुस्सा रे मना बे शान्ति देला l ²³ परमेश्वर बापू होर यीशु मसीह री तरफा न भाई लोका बे शान्ति होर बशाह सेंघे प्रेम मिलला l ²⁴ जूण आसारे प्रभु यीशु सेंघे सच्चा प्यार रखा सी, तिन्हा सेभी पांधे अनुग्रह होन्दा रोहला l