1
ऐबे हाँऊ जूण प्रभु ना बोनुआ दा सा तुसा ना प्रार्थना केरा सा, कि जूणी बुलाह्टा ना तुसे शादे ती, तेन्ढी चाल चला l
2
मतलब सारी दीनता, होर नम्रता सेंघे, होर धीरज रखिया एकी-दूजे री गल्ला सहन केरा l
3
होर मेल-मिलाप रखिया आत्मा री एकता रखणै री कोशिश केरा l
4
एक ऐ शरीर सा, होर एक ऐ आत्मा, जेंडै तुसे जूण शादे ती आपणै शादणै पांधे एक ऐ आश सा l
5
एक ऐ प्रभु सा, एक ऐ बशाह, एक ऐ बपतिस्मा l
6
होर सेभी रा एक ऐ परमेश्वर होर बापू सा, जूण सेभी पांधे, होर सेभी मौन्झे, होर सेभी आंधरे सा l
7
पर आसा सेभी बे मसीह रे दाना रे अनुसार अनुग्रह मिलु सा l
8
तेबैता सो बोला सा, सो उथड़ै ना चढ़ु, होर गुलामी बोनिया नेई, होर माँणहु बे दान धीने l
9
तेइरे चढ़ने ना, होर कि मिला सा सिर्फ ऐ, कि सो धौरती हेठे री जगह ना भी उतरु ती l
10
होर जूण उतरु ऐ सो ऐ सा जूण सारे सर्गा ना भी झाँऊ उझे चढ़ु, कि सेभ किच्छ पुरा केरे
11
होर तेइए केतरे बे प्रेरित बणाईया, होर केतरे बे भविष्यद्वक्ता बणाईया, होर केतरे बे सुसमाचार शनाणु आए ठहराईया, होर केतरे बे हेर- शुण केरणु आए होर केतरे बे उपदेशक ठहराईया धीने l
12
जूणी ना पवित्र लोका सिद्ध होले, होर सेवा रा कौम हो, होर मसीह रा शरीर उन्नति पाला l
13
जेबे तकर कि आसे सेभ बशाह होर परमेशवरे रे बेटे री पहचाना ना एक नी होले, होर एक सिद्ध माँणहु नेई बणले, होर मसीह रे पुरे डील-डोला तकर नेई बढ़ले l
14
ताकि आगे बे आसे शौरू नेई रौहले, जूण माँणहु री ठग-बिद्या होर चलाकी न तिन्हा री भ्रमा री युक्ति होर उपदेशा री, हर एक तिन्हा री गल्ला पीछे ओरे-पोरे घमाईया सी l
15
बल्कि प्यारा ना सच्चाई ना होण्डदे-होण्डदे, सेभी गल्ला ना तेई ना जूण सिर सा, मतलब मसीह ना बढ़दे रोहा l
16
जूणी ना सारा शरीर हर एक जोड़ा री मजती सेंघे मिलिया, होर गठ-जोड़ केरिया तेई प्रभावा रे अनुसार जूण हर भागा रे परिणामा ना होआ सा, आपणै आपा बे बढ़ासा, कि शरीर प्यारा न बढ़दा रोहे
17
तेबैता हाँऊ ऐ बोला सा, होर प्रभु ना तुसा बे सावधान केरा सा कि जेण्डै अन्यजाति लोका आपणै मना री बेकार रीती पांधे चला सी, तुसे ऐबे भी तेंडै मता चलदे l
18
किबैकि तिन्हे री बुधि निहयारी हुई सा, होर तेसा अज्ञानता री बजह ना जूण तिन्हा रे मना ना सा होर तिन्हे रे कठोर मना री बजह ना ते परमेश्वरा रे जीवना ना अलग केरे सी l
19
होर ते शुन होइया बुरे कौमा ना पौड़े सी, कि सेभी तरह रे बुरे कौम लालचा सेंघे केरले l
20
पर तुसे मसीह री एण्ढी शिक्षा नेई पाई l
21
बल्कि तुसे सच ना तेई री शुणी, होर जेण्डा यीशु ना सच्च सा, होर तेई न सिखाउदें भी सी l
22
कि तुसे पिछले चाल-चलना रे पराणे माँणहु बे जूण भरमाणु आई इच्छा अनुसार खत्म होन्दा रोहा सा, उतारिया शेटा l
23
होर आपणै मना रे आत्मिक स्वभावा ना नऊऐ बणदे जा l
24
होर नऊऐ माँणहु बे लात, जूण परमेश्वरा रे अनुसार सच्चाई री धार्मिकता, होर पवित्रता ना बणाऊदां सा l
25
एता बजह ना झूठ बोलणा छोड़ीया हर एक आपणै पड़ोसी सेंघे सच्च बोला, किबैकि आसे आपु ना एकी-दूजे रे अंग सी l
26
झिक ता केरा, पर पाप मता केरदे, धियाड़ा उडणै तक तुसा री झिक नेई लोड़ी रोही l
27
होर ना शैताना बे मौका देआ l
28
चोरी केरणु आ भी चोरी नेई केरे, बल्कि शोभले कौम केरने री तेंइए आपणै हौथा ना मेहनत केरे, सो तेबे कि अगर कोई बे जरूरत होली ता तेई आगे देणै बे किच्छ होला l
29
कोई गंदी गल तुसा रे मुँहा ना नेई लोड़ी निकती, पर जरुरता रे मताबक सो ऐ जूण उन्नति री तेंइए शोभली सा, ताकि तेसा गला ना शुणनु आए पांधे अनुग्रह हो l
30
होर परमेश्वरा री आत्मा बे दुःख मता देंदे, जूणीना तुसा पांधे छुटकारे रे रोज़ा री तेंइये छाप धीनी सा l
31
सेभी तरह री कडवाहट, होर प्रकोप, होर झिक, होर कलह, होर निन्दा, सेभ बैरभाव समेत तुसा ना दूर केरै लोड़ी l
32
पर एकी-दूजे पांधे कृपा, होर करुणामय बणा, होर जेण्डै परमेशवरे मसीह ना तुसा रे सारे अपराध माफ़ केरे, तेंडै तुसे भी एकी दूजे रे अपराध माफ़ केरा l