इफिसियों 2
1
और तेऊ किऐ तम्हैं बी जिंऊंदै, ज़ुंण आपणैं अपराधा और पापा दी मूँऐं दै थियै।
2
ज़ेथ दी तम्हैं पैहलै एऊ संसारे रिती दी और सरगे अधिकारे राज़ै अर्थात तेसा आत्में साबै च़ला थियै, ज़ुंण आझ़काल्ला बी आज्ञा नांईं मनंणैं आळै बिच़ै करा काम।
3
एथ दी बताऊआ थियै हाम्हैं बी सोभ कै सोभ पैहलै आपणैं शारीरे लालसा दी धैळी, और शरीर और मनें मनसा करा तै पूरी। और होरी लोगा ज़िहै तै स्वभावाई का क्रोधे संतान।
4
पर परमेश्वर ज़ुंण दया करनेंओ सेठ आसा, आपंणैं तेऊ महान प्यारे कारण ज़ेता करै तेऊ हाम्हां लै प्रेंम किय।
5
ज़धू हाम्हैं अपराधे कारण मुंऐं दै थियै, ता हाम्हैं कियै मसीह संघै ज़िऊंदै ( अनुग्रह करै ई आसा थारअ उध्दार हुअ द )।
6
और मसीह यीशू दी तेऊ संघै झ़ैऊई करै बशैळै स्वर्गैीय ज़ैगा दी तेऊ संघै।
7
कि सह आपणीं क्रिपा करै, ज़ुंण मसीह यीशू दी आसा हाम्हां लै, आजू एछणैं आळै बगतै आपणैं अनुग्रहो असीम धन रहैऊए।
8
किल्हैकि विश्वासा दी आसा अनुग्रहा करै ही थारअ उध्दार हुअ द, अह निं तम्हां का आथी पर अह आसा परमेश्वरो दान।
9
अह निं आथी कर्में कारण हुअ द, इहय निं होए कि कोई घमंड करे।
10
किल्हैकि हाम्हैं आसा तेऊए बणांऐं दै; और मसीह यीशू दी आसा तिन्नां भलै कामां लै सृजै दै ज़ुंण परमश्बरै पैहलैई आसा हाम्हां लै करना लै त्यार कियै दै।
11
तैहीता एसा गल्ला डाहा आद कि तम्हैं शारीरिक रिती दी आसा होरी ज़ातीए, (और ज़ुण लोग आप्पू लै शरीरा दी हाथा करै कियै दै खतनै करै बोला तिन्नां लै खतनैं आळै, और तिंयां बोला तम्हां लै बिंणा खतनै आळै)।
12
तम्हैं लोग थियै तेऊ बगतै मसीहा का ज़ुदै और एस्त्राईले परजे पदबी का ज़ुदै कियै दै और प्रतिज्ञे बाचे भागी बी नांईं तै आथी, और तम्हैं तै आशाहीन और संसारा दी थियै ईश्बरा का दूर।
13
पर ऐबै ज़ुंण तम्हैं दूर थियै, मसीह दी हुऐ मसीहे लोहू करै नेळ।
14
किल्हैकि सहैई आसा म्हारअ मेल, ज़ुंणी दूहै किऐ एक, ज़ुंण ज़ुदै करनैं आळी दुआल बिच़ै ती, सह पाई ढोळी।
15
और आपणैं शरीरा दी बैर, अर्थात- सह बिधी-बधान, ज़ेते आज्ञा, बिधीए रीति दी थी, तिंयां पाई मटाऊई, कि दूही करै आप्पू दी एक नंऊंअ मांह्णू बणांईं करी करै मेल कराऊऐ।
16
और क्रूसा दी सह बैर नाश करी करै एता करै दूहीऐ एक देह बणांईं करै हुअ परमेश्वरा संघै मेल।
17
और तेऊ प्रभू एछी करै, ज़ुंण तम्हैं दूर थियै, और ज़ुंण नेळ थियै, दूही का शणांऊंअ शांतीओ सुसमाच़ार।
18
किल्हैकि तेऊई करै पुजा हाम्हैं दानें एक आत्मां दी पिता परमेश्वरा सेटा।
19
तैहीता ऐबै निं तम्हैं परदेसी और मुसाफर रहै, पर ऐबै हुऐ पबित्र लोगे साथी और स्वदेशी और परमेश्वरे घराने।
20
और प्रेरित और भबिष्यबगते आथरी दी आसा च़िणें दै ज़सरै कुंणेंओ पाथर प्रभू यीशू मसीह आप्पै आसा।
21
ज़ेथ दी सारी च़णाई संघा मिली करै प्रभू दी एक पबित्र मांदर बणां।
22
ज़ेथ तम्हैं बी आसा आत्मां करै परमेश्वरे निबास स्थान हणां लै एकी मेटा दी च़िणैं दै।