7 और हूँ बणअ परमेश्वरे अनुग्रहे तेऊ दाने साबै, ज़ुंण शक्तिए प्रभावे साबै मुल्है दैनअ, तेऊ सुसमाच़ारो सेबक। 8 मूल्है ज़ुंण सोभी पबित्र लोगा का होछ़ै का बी होछ़अ आसा, हुअ इहय अनुग्रह कि हूँ होरी ज़ाती का मसीहे अगम्य धनो सुसमाच़ार शणांऊं। 9 और सोभी लै एसा गल्ला प्रकाशित करूं कि तेऊ भेदो प्रबन्ध किज़ै आसा, ज़ुंण सोभिए सृजणहार परमेश्वरा दी शुरू ओर्ही गुप्त थिय। 10 ताकि ऐबै विश्वासीए मंडळी करै, परमेश्वरो नाना प्रकारो ज्ञान, तिन्नां प्रधाना और ज्ञानी दी, ज़ुंण स्वर्गैे स्थाना दी आसा, प्रगट होए। 11 तेसा सनातन मनसे साबै ज़ुंण तेऊ म्हारै प्रभू यीशू दी पूरी की ती। 12 ज़ेथ दी हाम्हां तेऊ दी विश्वास डाहणैं करे हियाब और भरोस्सै नेळ एछणैंओ आधिकार आसा। 13 तेहीता हूँ अरज़ करा कि ज़ुंण क्लेश थारी तैणीं मुल्है आसा लागै दै हंदै, तेते कारण निं हिम्मत छ़ाडी, किल्हैकि तेथ आसा थारी महिमां। 14 तैहीता हूँ तेऊ बाप्पू सेटा ज़ाह्नू टेका, 15 ज़ुंणीं स्वर्गै और पृथूई दी हरेक घरानेओ नांअ डाहअ कि 16 सह आपणीं महिमे दौलते साबै एऊ दाना दैए कि तम्हैं तेऊए आत्मां करै आपणैं भितरी मनुष्यत्ब दी शक्ति पाई करै बलबंत होए। 17 और विश्वासा करै मसीह थारै दिला दी बसे कि तम्हैं प्रेंमा दी ज़लैळिए और आथरी लाई करै, 18 सोभी पबित्र लोगा संघै भली भांती समझ़णेंए शक्ति पाऐ; कि सह केतरअ लाम्मअ, केतरअ बिरलअ और सह केतरअ डुघअ आसा। 19 और मसीहे प्रेंमों बी तम्हां का थोघ लागे ज़ुंण ज्ञाना का आजू आसा, कि तम्हैं परमेश्वरे सारी भरपूरी करै परिपूर्ण होए।
20 ऐबै ज़ुंण इहय शक्तिी आसा, कि म्हारी बिनती और समझ़ा का सका सह कई ज़ादअ करी, तेसा शक्तिए साबै जुण हाम्हां दी काम करा, 21 विश्वासीए मंडळी दी, और मसीह यीशू दी तेऊए महिमां लोळी तम्हां बिच़ै पोस्ती दर पोस्ती तैणीं जुगै-जुगै हंदी रही। आमीन॥