¹ पौलुसे तरफा का ज़ुंण परमेश्वरे इछा करै यीशू मसीहो प्रेरित आसा; तिन्नां सोभी पबित्र और विश्वासी लोगे नांओंऐं च़िठी ज़ुंण इफिसुसै आसा। ² म्हारै पिता परमेश्वर और प्रभू यीशू मसीहा का लोळी तम्हां लै दया और शांती भेटदी रही। ³ म्हारै प्रभू यीशू मसीहे परमेश्वरो आसा धन्याबाद ज़ुंण पिता बी आसा कि तेऊ दैनीं हाम्हां लै मसीह दी स्वर्गैीय ज़ैगा दी सोभी प्रकारे आत्मिक आशीषा (किल्हैकि हाम्हैं मिलै मसीह संघै)। ⁴ ज़िहै तेऊ हाम्हैं संसारे उत्तपती का पैहलैई एते तैणीं शादै कि हाम्हैं तेऊ नेळ रहीकरै तेऊए झ़ूरी करै पबित्र और धर्मीं होए ⁵ और तेऊ शादै भलै मनें झ़ूरी करै आप्पू लै हाम्हैंई आपणीं मरज़ी दी ताकि हाम्हैं यीशू मसीह बाती तेऊए गोद ल्ऐ दै शोहरू होए, ⁶ ताकि तेऊए तेसा दया महिमे स्तुति होए, ज़ुंण तेऊए प्यारै शोहरू करै हाम्हां लै मुफ्त दैनीं। ⁷ हाम्हां भेटअ तेऊदी तेऊए लोहू करै‌ छ़ुटकारअ, अर्थात – अपराधे माफी भेटी तेऊए तेसा दया करै ⁸ ज़ुंण तेऊ सारै ज्ञान और समझ़ा संघी हाम्हां लै भरी-भरी दैनीं। ⁹ तेऊ भांऊंअ आपणैं दिला मनों भेद हाम्हां का खोज़णअ ज़ुंण तेऊ आपणैं मनैं ती ठाह्निं दी। ¹⁰ परमेश्वरे ती एही योजना कि ज़ेभै ठीक बगत एछे, तेभै ज़ुंण किछ़ स्वर्गै आसा, और ज़ो कुछ़ पृथूई दी आसा, सोभ किछ़ मसीह दी कठा करे।

¹¹ तेऊई दी, ज़सा दी हाम्हैं बी तेऊए मनसा जुण तेऊए आपणीं इछा करै सोभ किछ़ करा, पैहलै ही च़ुनी करै मिरास बणें। ¹² कि हाम्हैं ज़ुंणीं पैहलै ई का मसीहा दी आशा डाही ती, तेऊए महिमां दी स्तुतिए कारण होए। ¹³ और तेऊई दी तम्हैं बी; ज़ांऊं तम्हैं सच्च़ाईओ बच़न शुणअ ज़ुंण थारै उध्दारो सुसमाच़ार आसा, और ज़ेथ दी तम्हैं विश्वास किय, प्रतिज्ञा की दी पबित्रात्में छ़ाप लागी। ¹⁴ सह आसा तेऊए मोलै ल्ऐ दै मांह्णूंए छ़ुटकारै लै म्हारी मिरासो बयानअ, कि तेऊए महिमें स्तुति होए। ¹⁵ तैहीता हूँबी तेऊ विश्वासो समाच़ार शुणीं करै ज़ुंण तम्हां लोगा बिच़ै प्रभू दी आसा, और जुंण प्यार सोभी पबित्र लोगा दी प्रगट आसा। ¹⁶ हूँ नि तम्हां लै धन्यबाद करनअ छ़ाडदअ, और हमेशा करा हूँ तम्हां आपणीं प्राथणांं दी आद, ¹⁷ कि म्हारै प्रभू यीशूओ परमेश्वर ज़ुंण महिमों पिता आसा, तम्हां आपणीं बछ़ैणां दी, ज्ञान और प्रकाशे आत्मां दैए। ¹⁸ और थारै मनें आच्छी लोळी ज्योतिर्मय हुई, ताकि तम्हां का थोघ लागे कि तेऊए शादणें केही आशा ह्आ, और पबित्र लोगा बिच़ै तेऊए मिरासे महिमों धन किहअ आसा। ¹⁹ और तेऊए शक्ति हाम्हां बाखा तेऊए शक्तिए प्रभावे तेऊ कामें साबै, ज़ुंण विश्वास करा, केतरी महान आसा। ²⁰ ज़ुंण तेऊ मसीहे बारै किय कि प्रभू यीशू मूंऐं दै बिच़ा का ज़िंऊंदअ करी करै स्वर्गैिय ज़ैगा दी आपणीं दैहणीं बाखा बशैळअ, ²¹ सोभी प्रकारे प्रधानता, अधिकार, शक्ति, प्रभुता और हरेकी नांओंआ का परैंदै, ज़ुंण नां सिधअ एऊ लोका दी पर आजू एछणैं आळै लोका दी बी सह नांअ लणअ। ²² और सोभ गल्ला की तेऊए पैरा हेठै और सह दैनअ सोभी गल्ला दी शिरोमणीं बणांईं करै विश्वासीए मंडळी लै। ²³ अह आसा तेऊए देह और तेऊए परिपूर्णता, ज़ुंण सोभी दी और सोभै गल्ला पूरी करा।