9 अबै ठेरा कै मतलब हा कि “सो उपर चढ़ू" बस तूणां कि सो धरती री निचली जगहा मन्ज भी उतरी गो? 10 अतै जैडा धरती री निचली जगहा मन्ज उतरी गो सो सारै स्वर्गा मन्ज भी चढ़ी गो, कि सबी किछा जो पूरा करा। 11 अतै तिनी कैईआ जो भविष्यवक्ता ठरोऊ, अतै कैईआ जो सुसमांचार हुणांऐं बाळै नियुक्त करै अतै कैईआ जो हेर-हुण करनै बाळै अतै उपदेशक बणाई करी दि दिता। 12 जैत सितै पवित्र मणु सिद्व भुच्ची गाहन अतै सेवा रा कम करेय्आ गच्छा अतै मसीह यीशु री देह कलीसिया उन्नत भोआ। 13 जैहणै तिकर कि असै सबी रै सब वस्वासी अतै प्रमात्में रै पुत्रा री पछैण मन्ज अक्क ना भुच्ची गाहन अतै अक्क सिद्व मणु ना बणी गाहन अतै मसीह रै पूरै डील-डोल तिकर ना बधी गाहन। 14 तांजे असै अगा जो बच्चै ना रैहन जेड़ै कि मणु री ठग विधया अतै चलाकी सितै तआंरी युक्ति अतै उपदेसा री हर अक्क बयार मन्ज उड़दै गाहन्दै अतै एरा-उरा घुमाआ गाहन्दै हिन्न। 15 बल्कि सच्चाई मन्ज प्यारा सितै चलदै, सबी गप्पा मन्ज जैड़ी कि तिआं मन्ज अगो हिन्न मसीह मन्ज बढ़दै गाहन। 16 जैत सितै सारी देह हर अक्की जोड़ा री मददा सितै अक्की दुऐ सोगी मिली करी अतै अक्की दुऐ सितै गहठी करी तैस असर रै मताबक जैडा कि हर हिस्सै रै कारण तैस मन्ज भुन्दा, अपणै आपा जो बधान्दी हा, कि सो प्यार मन्ज उन्नति करदी गच्छा। 17 ऐत तांईं अऊँ बल्दा, कि अतै प्रभु मन्ज तुसु जो जगान्दा कि जिआं गैर विस्वासी मणु अपणै मनां री अनर्थ रीती पुर चलदै हिन्न, तुसै अज्जा थऊं लैई करी फिरी ऐसा मत करा। 18 क्जो कि तिआं री बुद्वी नैहरी भुच्ची गछूरी हा अतै तैस अज्ञानता री बजहा थऊं जैड़ी कि तिआं मन्ज हा अतै तयारै मनां री कठोरता री बजहा थऊं सो प्रमात्में री जिन्दगी थऊं अलग करी दितुरै हिन्न। 19 अतै सो सुन भुच्ची करी, लुचपन मन्ज लगी गछूरै हिन्न, कि सबी किस्मां रै गन्दै कम लालसा सितै करू करन। 20 पर तुसै ता मसीह री ऐसी शिक्षा ना पाई। 21 बल्की तुसै ता सच-मुच तसेरी ही हुणी अतै जिआं यीशु मन्ज सच्चाई हा तिआं ही तैस मन्ज तुसै सिखाऐ भी गै। 22 कि तुसै अपणै चाल-चलन जो जैडा कि मणु रैपुराणै स्भाव जो जैड़ी कि भरमाणैं बाळी अभिलासा रै मताबक भ्रष्ट भुन्दा गाहन्दा, खोली फैंका। 23 अतै अपणैं मनां रै आत्मिक स्वाभ मन्ज नोऐं बणदै गच्छा। 24 नोऐं स्भाव जो पाई लेय्आ, जैडा कि प्रमात्में रै मताबक सच्चाई री धार्मिकता हा अतै पवित्रता मन्ज रचुरा हा।
25 ऐत तांईं झूठ बलणां छड़ड़ी करी हर कोई अपणै पड़ैही सितै सच्च बल्ला, क्जो कि असै सब अप्पु मन्ज अक्की दुऐ रै अंग हिन्न। 26 गुस्सा ता करा, पर पाप मत करा: धैड़ा घरिन्दै तिकर तुन्दा गुस्सा ना रेय्आ। 27 अतै ना शैतान जो मौका देय्आ। 28 चोरी करनै बाळा फिरी चोरी ना करा, बल्की भले कमा करनै मन्ज अपणै हथा सितै मेहन्त करा, ऐत तांईं कि जसेरी एह मंशा भोआ, तैस बलै दीणैं जो कुछ भोआ। 29 कोई गन्दी गप्प तुन्दै मुँहा थऊं ना निकळा, पर जरूरता रै मताबक सो ही निकळा जैडा कि उन्नति तांईं उत्तम भोआ, तांजे तैस थंऊँ हुणनै बाळै पुर अनुग्रह भोआ। 30 अतै पवित्र आत्मां जो शोकित मत करा, जसेरी तुसु तांईं छुटकारै रै धैड़ै री छाप दितुरी हा। 31 सबी किस्मां री कड़वाहट अतै प्रकोप अतै क्रोध अतै कलह, अतै निन्दा सब बैरभाव समेत तुसु थऊं दूर करै गाहन। 32 अतै अक्की दुऐ पुर कृपालु, करुणामय अतै जिआं प्रमात्में मसीह मन्ज तुन्दै अपराध माफ करुरै हिन्न तिआं ही अक्की दुऐ रै अपराध माफ करा।