7 अतै अऊँ प्रमात्में रै तैस अनुग्रह रै दानां रै मताबक, जैडा कि तसेरी सामर्थ रै असरा रै मताबक मिन्जो दितुरा, तैस सुसमांचारा रा सेवक बणू। 8 मिन्जो पुर जैडा कि सबी पवित्र मणु मन्ज सबी थऊं हल्के थऊं हल्का हा, एह अनुग्रह भुआ, कि अऊँ गैर यहूदी जो मसीह यीशु रा सो सुसमांचार हणाऊ जैतिओ कि कोई नापी ना सकदा। 9 अतै अबै एहा गप्पा जो सबी तिकर पजऊँ कि तैस भेदा रा प्रबन्ध कै हा, जैडा कि सबी मन्ज सृजणहार प्रमात्में रा आदि काल थऊं गुप्त थू। 10 तांजे अबै कलीसिया थऊं प्रमात्में रा कैईआ किस्मां रा ज्ञान, तिआं प्रधाना अतै अधिकारी पुर, जैडा कि स्वर्गिय जगह मन्ज हिन, प्रकट करया गच्छा। 11 तैसा सदा काल री मनसा सितै, जैड़ी कि तिनी इन्दै मसीह यीशु मन्ज करी थी। 12 जैत मन्ज असु जो तैस पुर विस्वास रखणैं सितै हिम्मत अतै भरोसे सितै नेड़ै इणैं रा अधिकार हा। 13 ऐत तांई अऊँ विनती करदा कि जैडा कळेश तुसु तांईं मिन्जो भुच्छू करदा, तठेरी बजहा थऊं हिम्मत मत छड़ा, क्जोकि तिआं मन्ज तुन्दी महिमा हा। 14 अऊँ ठेरी बजहा थऊं तैस पिता प्रमात्में रै साम्हणैं घुटनै टेकदा, 15 जैत सितै स्वर्गा अतै धरती पुर हर अक्क घरानै रा नां रखआ गाहन्दा। 16 कि सो अपणी महीमा रै धनां रै मताबक तुसु जो दान देय्आ, कि तुसै तसेरी आत्मां सितै अपणै अन्द्रिऐं मणु मन्ज सामर्थ पाई करी बलवन्त भुन्दै गच्छा। 17 अतै वस्वास सितै मसीह तुन्दै दिला मन्ज वास करा कि तुसै प्यार मन्ज जड़ पकड़ी करी अतै नियूआं पाई करी। 18 सब पवित्र मणु सोगी भली-भांति समझणैं री शक्ति पान, कि तसेरी चौड़ाई, लम्बाई, ऊचाई अतै डुगिआई कैतणी हा। 19 अतै मसीह रै तैस प्यारा जो जाणी सकन जैडा कि ज्ञान थऊं दूर हा, कि तुसै प्रमात्में री सारी भरपुरी तिकर परिपूर्ण भुच्ची गच्छा।
20 अबै जैडा कि तूणां सामर्थी हा, कि इन्दी विनती अतै समझा थऊं कई गुणां ज्यादा कम करी सकदा, तैसा सामर्थ रै मताबक जैड़ी कि असु मन्ज कम करी सकदी हा। 21 कलीसिया मन्ज, अतै मसीह यीशु मन्ज, तसेरी महिमां पीढ़ी थऊं पीढ़ी मन्ज जुगा-जुगा तिकर भुन्दी रेय्आ। आमीन।