इफिसियों 2
1
अतै तिनी तुसु जो भी जिन्दा करू, जेड़ै कि अपणै अपराधा अतै पापा री बजहा थऊं मरूरै थीऐ।
2
जैत मन्ज तुसै पैहलै ऐस संसारा री रीति पुर अतै अम्बरा रै अधकारा रै हाकमां मतलब कि तैसा आत्मां रै मताबक चलदै थिऐ, जैड़ी कि हल्ली तिकर भी आज्ञा ना मनणैं बाळै मन्ज कम करू करदी हा।
3
इआं सबी मन्ज असै भी पैहलै अपणै शरीरा री अभिलासा मन्ज दिन बितान्दै थिऐ अतै जिस्मां अतै मनां री मनसा जो पूरी करदै थिऐ अतै होरी मणु सांईं ही क्रोध बाळै सभावा री औलाद थिऐ।
4
पर प्रमात्मां जैडा कि दया रा धनी हा अपणै तैस बड़ै प्यारा री बजहा थऊं जैत सितै कि तिनी असु सितै प्यार करू ।
5
जैहणै कि असै अपराधा री बजहा थऊं मरूरै थीऐ ता असु जो मसीह सितै जिन्दा करू (अनुग्रह सितै ही तुन्दा उद्वार भछूरा)।
6
अतै मसीह यीशु सोगी उठालू अतै स्वर्ग मन्ज बठाली दिता।
7
कि सो अपणी तैसा कृपा सितै जैड़ी कि मसीह यीशु मन्ज असु पुर हा, ईणैं बाळै टैंमा मन्ज अपणै अनुग्रह रा असीम धन दस्सा।
8
क्जोकि विश्वासा री बजहा थऊं ही अनुग्रह सितै तुन्दा उद्वार भछुरा अतै एह तुन्दी तरफा थऊं ना बल्कि प्रमात्में रा दान हा।
9
ना कि कर्मां री बजहा थऊं ऐसा ना भोआ कि कोई घमण्ड़ करा।
10
क्जोकि असै तसेरै बणऊरै हिन्न अतै मसीह यीशु मन्ज तिआं भलै कमां तांईं रचुरै हिन्न जिआं जो प्रमात्में पैहलै थऊं ही असु जो करनै तांईं त्यार करूरा हा।
11
ऐत तांईं याद रखा कि तुसै जेड़ै कि जिस्मानी तौर पुर गैर यहूदी हिन्न (अतै जेड़ै मणु जिस्मां मन्ज हथा सितै करुरै खतनै सितै खतनैं बाळै अप्पु जो खतनै बाळै बल्दै हिन्न अतै सो तुसु जो बिनां खतनै बाळै बल्दै हिन्न)।
12
तुसै मणु तैस टैमैं मसीह थऊं अलग अतै इस्त्राइल री प्रजा रै पद थऊं अलग करूरै अतै प्रतिज्ञा री वाचा रै भागी ना थिऐ अतै आशाहीन अतै संसारा मन्ज बिना प्रमात्में रै थिऐ।
13
पर अबै मसीह यीशु मन्ज तुसै जेड़ै कि दूर थिऐ मसीह रै खूनां री बजहा थऊं नेड़ै भुच्ची गछुरै हिन्न।
14
क्जोकि सो ही इन्दा मेल हा जिनी दूनी जो अक्क करी दिता अतै अलग करनै बाळी दिवारा जो जैड़ी कि बिचा मन्ज थी ढ़ाई दिता।
15
अतै अपणै जिस्मां मन्ज मतलब कि सो व्यवस्था जठेरी आज्ञा विधि-विधानां पुर थी मिटाई दिती कि दुनी थऊं अपणै मन्ज अक्क नोआं मणु पैदा करी-के मेल कराई देय्आ।
16
अतै क्रसु पुर बैर-विरोधा जो नाश करी-के ऐति सितै दूनी जो अक्क देह बणांईं करी प्रमात्में सितै मलाई देय्आ।
17
अतै तिनी ईच्ची करी तुसिओ जेड़ै कि दूर थिऐ अतै जेड़ै कि नेड़ै थीऐ दूनी जो मेल-मिलाप रा सुसमांचार हणाऊ।
18
क्जोकि तसेरी बजहा थऊं ईन्दी दूनी री अक्क आत्मां मन्ज पिता प्रमात्मां बल्लै पंहुच भुन्दी हा।
19
ऐत तांईं अबै तुसै विदेशी अतै मुसाफिर ना रै पर पवित्र मणु सोगी स्वदेशी अतै प्रमात्में रै घराने रै भुच्ची गै हिन्न।
20
अतै प्रेरिता अतै भविष्यवक्ता री नियूआं पुर जठेरा कि कूणैं रा पत्थर मसीह यीशु अप्पु ही हा, बणी गछूरै हिन्न।
21
जैस मन्ज सारी रचनां अक्क दुऐ सितै मिली करी प्रभु मन्ज अक्क पवित्र मन्दिर बणदी गाहन्दी हा।
22
जैत मन्ज तुसै भी आत्मां री बजहा सितै प्रमात्में रा वास भूणैं तांईं अक्की दुऐ सितै बणांआ गाहन्दै हिन्न।