2 इन्दै पिता प्रमात्मां अतै यीशु मसीह री तरफा थऊं तुसु जो अनुग्रह अतै शान्ति मुळदी रेय्आ। 3 इन्दै प्रभु यीशु रै पिता प्रमात्में रा धन्यावाद भोआ, कि तिनी असु जो मसीह मन्ज स्वर्गीय जगहा मन्ज सब किस्मां री आशीष दितुरी हा। 4 जिआं कि तिनी असु जो ऐस संसारा री सृष्टी थऊं पैहलै ही चुणी लैऊरा, कि असै तसेरै नेड़ै प्यारा मन्ज पवित्र अतै निर्दोष भून। 5 अतै अपणी ईच्छा री सैहमती सितै असु जो अपणै तांईं पैहलै थऊं ही ठरोऊरा, कि यीशु मसीह री बजहा थऊं असै तसेरै लेपालक पुत्र भून। 6 कि तसेरै तैस अनुग्रह री महिमां री स्तुति भोआ, जैडा कि तिनी असु जो प्यारा सितै सेंत मेंत दितुरा। 7 असु जो तैस मन्ज तसेरै खूनां री बजहा सितै छुटकारा जठेरा मतलब कि अपराधा री माफी, तसेरै तैस अनुग्रह रै धना रै मताबक मुळुरी हा। 8 जैतिओ तिनी सारै ज्ञान अतै समझ सितै असु पुर बहुतायत सितै करूआ। 9 कि तिनी अपणी समझा रा भेद तैसा सहमती सितै असु जो दसुरा जैतिओ तिनी अपणै आपा मन्ज ठाणी लैऊरा थू। 10 कि टैंमां रै पूरै भूणैं रा इन्ना बन्दोबस्त भोआ कि जैडा किछ स्वर्गा मन्ज हा अतै जैडा किछ धरती पुर हा तैस सबी किछा जो मसीह यीशु रै नां सितै कठेरा।
11 तैस मन्ज ही जैस मन्ज असै भी तसेरी मनसा सितै जैडा कि अपणी इच्छा रै मताबक सब किछ करदा, पेहलै थऊं ठराई करी मिरासी बणैं। 12 कि अहै जिन्यै पैहलै थंऊ ही मसीह पुर उम्मीद रखूरी थी, तसेरी महिमा री स्तूति री वजह बणा 13 अतै तैस मन्ज जैहणै तुसै सच्चाई रा वचन हुणु, जैडा कि तुन्दै उद्वार रा सुसमाचार भी हा अतै जैत पुर तुसै विश्वास भी करूरा, प्रतिज्ञा करुरी पवित्र आत्मां री छाप लगुरी हा। 14 सो तसेरै मोल लेऊरै मणु रै छुटकारै तांईं इन्दी मिरास रा बयाना हा कि तसेरी महिमा स्तुति भोआ। 15 ठेरी बजहा हा कि अऊँ भी तैस विश्वासा रा समाचार हुणाई करी जैडा कि तुसु मन्ज मसीह यीशु पुर हा अतै सबी पवित्र मणु पुर प्रकट हा। 16 तुसु तांईं धन्यावाद करनां ना छड़दा अतै अपणी प्रार्थनां मन्ज याद करदा। 17 कि इन्दै मसीह यीशु रा प्रमात्मां जैडा कि महिमां रा पिता हा, तुसु जो अपणी पछैण देय्आ अतै ज्ञान अतै प्रकाशन रा आत्मा देय्आ। 18 अतै तुन्दै मनां री हाख्री खुलन कि तुसै जाणी लैन कि तसेरै हैदणैं सितै किनी आशा भुन्दी हा अतै पवित्र मणु मन्ज तसेरी मीरास री महिमां रा धन किनां हा। 19 अतै तसेरी सामर्थ इन्दी तरफ जैडै विस्वास करदै हिन्न, कतूणी महान हा, तसेरी शक्ति रै असरा रै ऐस कमा रै मताबक। 20 जैडा कि तिनी मसीह यीशु रै बारै मन्ज करू, कि तिनी तैस जो मरूरै मणु थऊं जिन्दा करी के र्स्वगा मन्ज अपणी सज्जी कनारी 21 सबी किस्मां री प्रधानता, अधिकार, सामर्थ, प्रभुता, अतै हर अक्की नां थऊं उपर जैडा कि ना सिर्फ ऐस लोक मन्ज हा पर ईणैं बाळै लोक मन्ज भी लैणां, तयांरै मन्जै बठालू। 22 अतै सब किछ तसेरै पैरा थलै करी दिता: अतै तैस जो सबी चीजा पुर शिरोमणि ठराई करी कलीसिया रै हबालै करी दिता। 23 एह तसेरी देह हा अतै तसेरी परिपूर्णता हा जैडा क सबी मन्ज सब किछ पूरा करदा।