1
कोई तुसां जो बेकार री गल्लां बिच धोखा ना देय,किजोकी इन्हा ई गल्लां री वजह कने परमेश्वर रा गुस्सा आज्ञा ना मनणे वाळेयां पर भड़कदा।
2
इस तांई तुसी तिन्हेरे सहभागी मत बणो।
3
किजोकी तुसी पैल्ले न्याहरे थिये अपण अवे परमेश्वर बिच रौसनी हिन,अते रौसनी री औलाद सांई चलो
4
(किजोकी रौसनी रा फल सारी तरिक्के री भलाई,ते धार्मिकता,ते सच है)।
5
ते ए परखो की परमेश्वर जो क्या पसंद आदां।
6
न्याहरे रे हारे रे कम्मां बिच सहभागी मत बणो,बल्की तिन्हा पर तान्ना मारों।
7
किजोकी तिन्हा रे लुके रे कम्मां री गल्लां बी सर्म री गल्ल है।
8
अपण जिन्नि गल्लां पर तान्ना मारेयां जादां से सारे रौसनी पर प्रगट हुदें,किजोकी जे सारा किछ प्रगट करदा से रौसनी है।
9
इस वजह कने से बोलदा“हे सोणे वाळे,जाग ते मुर्देयां बिच का जी उठ तां मसीह री रौसनी तुसां पर चमकणी।
10
इस तांई ध्यान कने दिख्खो की कदेइ चाल चलदे:बेफकुफां सांई नी अपण समजदारां सांई चलो।
11
मोक्के जो बहुमुल्य समजो,किजोकी दिन बुरे हिन।
12
इस तांई बेफकुफ मत बणो,अपण ध्यान कने समजो की परमेश्वर री क्या मर्जी है।
13
दाखरस कने मतवाल्ले मत बणो अपण आत्मा कने भरदे जाओ,
14
ते आपस बिच भजन ते स्तुतीगान ते आत्मिक गीत गाया करो,ते अपणे-अपणे मनां बिच परमेश्वर रे सामणे गादें ते किर्तन करदे रेयो।
15
ते हमेसा सारी गल्लां तांई असां रे प्रभू यीशु मसीह रे नां कने परमेश्वर पिता रा धनवाद रेयो।
16
मसीह रे डर कने इक्क-दुए रे नेड़े रेयो,
17
हे लाड़ियों अपणे-अपणे लाड़ेयां रे इदेय थल्ले रेयो जिय्यां प्रभू रेय।
18
किजोकी लाड़ा लाड़ी रा सिर है जिय्यां मसीह कलिसीया रा सिर है ते अप्पु ई सरीर रा छुटकारा करदा।
19
अपण जिय्यां कलिसीया मसिह रे थल्ले तिय्यां ई लाड़ीया बी हर गल्ल बिच अपणे अपणे लाड़ेयां रे थल्ले रैह्ण।
20
ओ लाड़ेयों, अपणी-अपणी लाड़ियां कने प्यार रखो जिय्यां मसीह ने बी कलिसिया कने प्यार करी के अप्पु जो तिस तांई देई दित्ता।
21
की तिसजो वचन रे जरिए जल रे सनान कने साफ करी के पवित्र बणाए,
22
ते तिसजो इक्क इदेइ तेजस्वी कलिसीया बणाई करी अपणे नेड़े खड़ा करे जिस बिच ना कलंक ना झुर्ड़ि ना कोई इदेइ गल्ल हो बल्कि पवित्र ते बेकसुर हो।
23
इसी तरिक्के कने खरा है की लाड़ा अपणी लाड़ी कने अपणे सरीर सांई प्यार करे।जे अपणी लाड़ी कने प्यार रखदा,से अप्पु कने प्यार करदा,
24
किजोकी कुसकी ने कदी अपणे सरीर कने नफरत नी कित्ति बल्की तिसेरा पालन-पौषण करदा,जिय्यां मसीह बी कलिसीय कने करदा।
25
इस तांई की असी तिन्हेरे सरीर रे अगं हिन।
26
“इस तांई म्हणु अपणे माँ-प्यो जो छड्डी करी अपणी लाड़ी कने मिळा रैहन्गा, ते से दोन्नो इक्क तन हुगें।
27
ए राज़ ता बड्डा है, अपण मै इत्ते मसीह ते कलिसीया रे बारे बिच बोलदा।
28
अपण तुसी बिच का हर इक्क अपणी लाड़ी कने अपणे सांई प्यार रख्खे,ते लाड़ी बी अपणे लाड़ा रा डर मन्ने।
29
ओ बच्चेयों, परमेश्वर बिच अपणे माँ-प्यों रे आज्ञाकारी बणों,किजोकी ए खरा है;
30
अपणे माँ ते प्यो रा आदर कर(ए पैल्ला हुक्म है जिस कने वादा बी है)
31
की तेरा भला हो,ते तू धरती पर मते दिनां तांई जिन्दा रेय।;
32
ओ बच्चे वाळेयों, अपणे बच्चेयां जो रीस ना दुआओ,अपण परमेश्वर री शिक्षा ते चितौणी दिदें होए तिन्हेरा पालन-पौषण करौं।
33
हे नौकरों, जे लोक इस दुनिया बिच तुसां रे माळक हिन, अपणे मन रे सिद्देपन कने डरदे ते कबंदे होए जिय्यां मसीह री तिय्यां ई तिन्हेरा हुक्म मन्नों।