1
म्हणुआं जो खुस करणे वाळेयां सांई दसणे तांई सेवा मत करो,अपण मसीह रे दास रे सांई मन कने परमेश्वर री मर्जी पर चलो,
2
ते तिस सेवा जो म्हणुआं री नी अपण परमेश्वर री जाणी करी सच्चे दिल कने करो।
3
किजोकी तुसी जाणदे की जे कोई जदेया कम्म करगा चाए नौकर हो या अजाद,प्रभू का तिय्यां ई पाणा।
4
हे मालकों, तुसी बी धमकियां दैणा छड्डी करी तिन्हेरे कने तैसा ई बर्ताव करो; किजोकी तुसी जाणदे की तिन्हेरा ते तुसां रा स्वामी सर्वग बिच है,ते से कुसकी रा पक्ष नी करदा।
5
इस तांई प्रभू बिच ते तिन्हेरी सक्ति रे असर बिच ताकतवर बणो।
6
परमेश्वर रे सारे हथियार बन्नि लेयो की तुसी सैतान री चाल्लां सामणे खड़ी सको।
7
किजोकी असां ई ए लड़ाई खून ते मासं कने नी है अपण प्रधानां कने,ते अधिकारियां कने ते इस ससांर रे न्याहरे रे हाकमां कने ते तिस दुष्टता री आत्मिक सेना कने है जे आसमान बिच है।
8
इस तांई परमेश्वर रे सारे हथियार बन्नि लेयो की तुसी बुरे दिनां बिच सामणा करी सको,ते सारा किछ पुरा करी के टिके रेइ सको।
9
इस तांई सच कने अपणी कमर बन्नि करी,ते धार्मिकता री झिलम पाई करी,
10
ते पैरां बिच मेल रे शुभ-भसेख रे तैयारी रे जुत्ते पाई करी,
11
ते इन्हा सारेयां कने भरोसे री ढ़ाल लेइ करी टिकी रेयो जिस कने तुसी तिस दुष्ट रे सारे बखदे होए तीरां जो बुझाई सको।
12
ते छुटकारे रा टोप, ते आत्मा री तलवार जे परमेश्वर रा वचन है,लेइ लो।
13
हर वेल्ले ते हर तरिक्के कने आत्मा बिच प्रार्थना,ते विनती करदे रेयो ते इस तांई जागदे रेयो की सारे पवित्र लोक्का ताईं लगातार तांई विनती करेया करो।
14
ते मेरे तांई बी की मेरे जो बोलने से वेल्ले इदेया प्रबल वचन दित्ता जाए की मै हिम्मत कने शुभ-भसेख रा राज़ दस्सी सकां,
15
जिस तांई मै जंजीर कने जकड़े रा राजदूत है ते ए बी की मै तिसेरे बारे बिच जदेया मेरे जो चाएदा हिम्मत कने बोल्लां।
16
तुखिकुस,जे प्यारा भाई ते प्रभू बिच भरोसे जोग्गा सेवक है,तुसां जो सारी गल्लां दसगा की तुसी बी मेरी हाल्त जाणो की मै किय्यां रैंह्दा,
17
तिसजो मै तुसां का इस तांई भेज्जे रा है की तुसी असां री हाल्त जो जाणो ते से तुसां रे मनां जो सातिं देय।
18
परमेश्वर पिता ते प्रभु मसीह जी रे पास्से का भाईयां जो सातीं ते भरोसे कने प्यार मिले।
19
जे असां रे प्रभु यीशु मसीह कने सच्चा प्यार करदे,तिन्हा सारेयां पर दया हुंदी रेय।
20
मसीह यीशु जी रे दास पौलुस ते तीमुथियुस रे पास्से का, सबनी पवित्र मह्णुआं रे नां जेह्ड़े मसीह यीशु जी अन्दर होई करी फिलिप्पी अन्दर रैह्न्दे, अध्यक्षां ते सेवक समेत।
21
म्हारे पिता परमेश्वर ते प्रभू यीशु मसीह जी रे पास्से का तुसां जो अनुग्रह् ते सान्ति मिलदी रेह्यो।
22
मैं जिस-जिस बेल्ले बी तुसां जो याद करदा, ताँ-ताँ अपणे परमेश्वर रा सुकर करदा;
23
ते जाँ बी कदी तुसां सबनां तांई प्राथना करदा, ता हमेसा खुसी कने प्राथना करदा।
24
इधेरे तांई कि तुसी पैह्ल्ले दिन का लेई करी अज्ज तांई खुसखबरी जो फलाणे अन्दर मेरे कने रेह्रे ।