1
ते सबनां रे इक्क ई परमेश्वर ते पिता हिन्, जेह्ड़े सबनां रे उप्पर ते सबनां रे मन्झाट्टे ते सबनां रे अन्दर हिन्।
2
अपण असां बिच का हर इक जो मसीह जी रे दान रे नाप रे साब्बे अनुग्रह् मिल्लेरा है।
3
इधेरे तांई से बोलदा : “से उच्ची जगह् पर चढ़ेया ते कैदियाँ जो बह्न्नी लित्तेया गेया, ते मह्णुआं जो दान दित्ते गे।”
4
तिसेरे चढ़णे कने, होर कै मिलदा, सिरफ ऐ ई कि से धरती री हेठली जगह् पर उतरदा बी थिया।
5
ते जेह्ड़ा उतरी गेया एह् सेई है जेह्ड़ा सारे अम्बरा का उप्पर चढ़ी बी गेया कि सब किछ परिपूरण करो।
6
तिनिए थोड़े जह्णेयाँ जो प्रेरित ठैह्राई करी, ते थोड़े जह्णेयाँ जो भविस्यवाणी करणे वाळे ठैह्राई करी, ते थोड़े जह्णेयाँ जो खुसखबरी सुनाणे वाळे ठैह्राई करी, ते थोड़ेयाँ जो दिख-रिख करणे वाळे ते उपदेस दैणे वाळे ठैह्राई करी देई दित्तेया,
7
जिस कने पवित्र मह्णु सिद्ध होई जान ते सेवा रा कम्म कित्तेया जाओ ते मसीह जी रे सरीर री उन्नती होई सको,
8
जाँ तांई कि असी सारे रे सारे भरोस्से ते परमेश्वर रे पुत्तर री पैह्चाण अन्दर इक नी होई जान्, ते इक सिद्ध मह्णु नी बणी जान ते मसीह जी री पूरी ड़ील-ड़ौल तांई नी बधि जान्।
9
ताकि असी अग्गे का बच्चे नी रैह्न जेह्ड़े मह्णुआं री ठग-विद्दा ते चलाक्की कने, तिन्हेरे वैह्म री कोसिसां रे ते उपदेस रे हर इक झोंके कने उटकाए ते वरे-परे घुमाए जान्।
10
अपण प्यार अन्दर सच्चाई कने चली करी सबनी गल्लां अन्दर तिस अन्दर जेह्ड़ा सर है, मतलब कि मसीह जी अन्दर बधदे जान्,
11
जिस कने सारा सरीर, हर इक जोड़ री मदद कने किठ्ठे मिलि करी ते किठ्ठे गठि करी, तिस असर रे साब्बे जेह्ड़ा हर इक अंग रे ठीक-ठीक कम्म करणे रे जरिए तिस अन्दर हुन्दा, अपु जो बधान्दी कि से प्यार अन्दर उन्नती करदी जाओ।
12
ईधेरे तांई मैं ऐ बोलदा ते प्रभू अन्दर आग्रह् करदा कि जिह्याँ होरसी जाती रे मह्णु अपणे मने री अनर्थ रीत पर चलदे, तुसी अज्ज का बाद फिरी इह्याँ मत चलो।
13
किजो कि तुन्हेरी बुधि अग्गे न्ह्यारा होई गेरा है, ते तिस अज्ञानता री वजह् कने जेह्ड़ी तिन्हा अन्दर है ते सख्त मनां रे होणे री वजह् कने से परमेश्वर री जिन्दगी का बखरे कित्तेया गेरे हिन्;
14
ते से सुन्न होई करी लुच्चे कम्मा अन्दर लगी रे रे हिन् कि हर किस्मे रे गन्दे कम्म लालच कने करन।
15
अपण तुसां ने मसीह जी री इदेह्ई सिक्सा नी है लित्तेरी।
16
अपण तुसां ने सच्ची तिन्हेरी ई सुणी ते, जदेह्या यीशु जी रे बारे अन्दर सच्ची गल्ल है, तिस अन्दर ई सखाए बी गे
17
कि तुसी पिछले चाल-चलन रे पुराणे मनुष्यत्व जो जेह्ड़ा भटकाणे वाळी मरजियाँ रे साब्बे भ्रष्ट हुन्दा जान्दा, उतारी रख्खो
18
ते अपणे मन रे आत्मिक स्वभाव अन्दर नोए बणदे जाओ,
19
ते नोए मणुआई जो पाई लेयो जेह्ड़ा परमेश्वर रे अनुरूप सच्च री धार्मिकता ते पवित्रता अन्दर बणाया गेरा है।
20
इधेरे तांई झूठ बोलणा छड्ड़ी करी सब जह्णे अपणे पड़ोसी कने सच्च बोल्लेया करो, किजो कि असी अपु-मिते इक-दुज्जे रे अंग हिन्।
21
लैह्र ता करो, अपण पाप मत करो; सूरज ड़ुबणे तांई तुसा ऱा गुस्सा बी खतम होई गेरी होणा चाहिन्दी,
22
ते नां ई सैह्तान जो मोक्का देयो।
23
चोरी करणे वाळा फिरी चोरी नां करो, अपण नेक कम्म करणे अन्दर अपणे हथ्थां कने मैह्नत करेया करो, इधेरे तांई कि जिस जो जरूरत हो तिस जो दैणे तांई तिसका किछ होए।
24
कोई गन्दी गल्ल तुसा रे मुह्आं का नां निकळो, अपण जरूरत रे साब्बे सेह्ई निकळो जेह्ड़ी उन्नती तांई सबका बधिकरी हो, ताकि तिस कने सुनणे वाळेयाँ पर अनुग्रह् होए।
25
परमेश्वर रे पवित्र आत्मा जो दुख मत दियो, जिस कने तुसा पर छुटकारे वाळे दिन तांई छाप दित्तेया गेरी है।
26
सबनी किस्मे री कड़वाह्ट, ते प्रकोप ते लैह्र, ते कह्ळा, ते निन्दा, सारे बैर-भाव समेत तुसा का दूर कित्ते जान्।
27
इक-दुज्जे पर रैह्म दिल अते करुणामय होओ, ते जिह्याँ परमेश्वर ने मसीह जी अन्दर तुसा रे गुनाह् माफ कित्ते, तिह्याँ ई तुसी बी इक-दुज्जे रे गुनाह् माफ करो।
28
इस तांई खरे बच्चेयां सांई परमेश्वर रे पिच्चे-पिच्चे चलो,
29
ते प्यार बिच चलो जिय्यां मसीह ने बी तुसां कने प्यार कित्ता,ते असां तांई अप्पु जो सुखदाई खुसबू ताईं परमेश्वर रे सामणे चढ़ाई दित्ता।
30
जिय्यां पवित्र लोक्कां तांई सही है, तिय्यां तुसां बिच व्यभिचार ते कुसकी तरिक्के रे बुरे कम्म या लालच री गल्ल-बात बी ना हो;
31
ते ना बेसर्मी, ना बेफकुफी री गल्लां, ना मजाक री; किजोकी ए गल्लां खरी नी लगदी, बल्कि धनवाद ई सुणेया जाए।
32
किजोकी तुसी ए जाणदे की कुसकी व्यभीचारी या खराब म्हणु,या लालची म्हणु जे मुर्तीपूजा रे बराबर है मसीह ते परमेश्वर रे राज बिच मिरास नी।