1
मतलब ऐ है कि मसीह यीशु जी अन्दर खुसखबरी रे जरिए होरसी जात वाळे मह्णु मीरास अन्दर साझी, ते इक्क ई सरीर रे ते प्रतिज्ञा रे हेस्से-दार हिन्।
2
मैं परमेश्वर रे अनुग्रह् रे तिस दान रे साब्बे, जेह्ड़ा तिसेरी सामर्थ रे असर रे साब्बे मिन्जो दित्तेया गेरा है, तिस खुसखबरी रा सेवादार बणेया।
3
मेरे पर जेह्ड़ा कि सबनी पवित्र मह्णुआं अन्दर हल्के का बी हल्का है, एह् अनुग्रह् होया कि मैं होरसी जातियाँ जो मसीह जी रे अगम्य धन री खुसखबरी सुणां,
4
ते सबनां पर ऐ गल्ल जाहिर करां कि तिस भेद रा प्रबन्ध कै है, जे सबनां जो बनाणे वाळे परमेश्वर अन्दर सुरू का ई लुके रा थिया।
5
ताकि अवे कलीसिया रे जरिए, परमेश्वर रा नेक-बनेक्का ज्ञान तिन्हा प्रधानां अते अधिकारियाँ पर जेह्ड़े स्वर्गीय जघा अन्दर हिन, प्रकट कित्तेया जाओ।
6
तिस सनातन मरजी रे साब्बे जेह्ड़ी तिनिए असां रे प्रभू मसीह यीशु जी अन्दर कित्ती थी।
7
जिस अन्दर असा जो तिन्हा पर भरोस्सा करणे कने हिम्मत ते भरोस्से कने परमेश्वर रे नेड़े आणे रा हक्क है।
8
इधेरे तांई मैं छन्दे करदा कि जेह्ड़ी कह्ळा तुसां तांई मिन्जो होया करदे हिन, तिन्हेरी वजह् कने हिम्मत मत छड्ड़ो, किजो कि तिन्हा अन्दर तुसां री महिमा है।
9
मैं इधेरे ई तांई तिस पिता रे सामणे घुटने टेकदा,
10
जिस कने स्वर्ग ते धरती पर, हर इक घरान्ने रा नां रख्खेया जान्दा,
11
कि से अपणी महिमा रे धन रे साब्बे तुसां जो एह् दान देयो कि तुसी तिसेरी आत्मा कने अपणे अन्दरले मनुष्यत्व अनदर समर्थ पाई करी ताकतवर हुन्दे जाओ;
12
ते भरोस्से कने मसीह तुसां रे मनां अन्दर बसन कि तुसी प्यार अन्दर जड़ पकड़ी करी ते नेव पाई करी,
13
सबनी पवित्र मह्णुआं रे समेत खरा करी समझणे री ताकत हासिल करन कि तिसेरी चौड़ाई, ते लम्बाई, ते उंचाई, ते डुग्गाई कितणी है,
14
ते मसीह जी रे तिस प्यार जो जाणी सको जेह्ड़ा ज्ञान का परे है कि तुसी परमेश्वर री सारी भरपूरी तांई परिपूर्ण होई जाओ।
15
अवे जे इदेह्या समर्थी है कि असा री विनती ते समझ का बी कितणा ई जादा कम्म करी सकदा, तिस समर्थ रे साब्बे जेह्ड़ी असां अन्दर कम्म करदी,
16
कलीसिया अन्दर ते मसीह यीशु जी अन्दर तिसेरी महिमा पीढ़ी का पीढ़ी तिक्कर जुगां-जुगां भर हुन्दी रेह्यो। आमीन।
17
इधेरे तांई मैं जेह्ड़ा प्रभू अन्दर कैदी है तुसां का छन्दे करदा कि जिस बुलाह्ट कने तुसी सद्दे गेरे थिये, तिस जोग्गी चाल चलो,
18
मतलब कि, सारी दीनता ते निम्मते होई के, ते सबर करी के प्यार कने इक-दुज्जे री सैह्ई लेयो;
19
ते मेल रे बन्धन अन्दर आत्मा री एकता रखणे री कोसिस करो।
20
इक्क ई सरीर है, ते इक्क ई आत्मा है; जिह्याँ तुसा जो जेह्ड़े सद्देया गेरे थिये, अपणे सद्दे जाणे कने इक्क ई उम्मिद है।
21
इक्क ई प्रभू जी हिन्, इक्क ई भरोस्सा है, इक्क ई बपतिस्मा है,