^{1 2 3} 1 ನಂಬಿಕೆ ನಿರೀಕ್ಷಿಸುರಾಯಿಲಾತ ನಿಜ ಲಕ್ಷಣನೂ ಕಾಂಗದೆ ಇಕ್ಕಿರಂತಯಲತ ನಿದರ್ಶನನು ಅಯಿದು, 2 ಬೆರಯ್ಯ ನಂಬಿಕೆಯಿಂಡೆ ನಲ್ಲ ಸಾಕ್ಷಿಲಾತ್ತೆಯಿ ಹೊಂದುಸುನು, 3 ನಂಬಿಕೆಯಿಂಡೆ ಲೋಕು ದವ್ರತ ವೋಕುಯಿಂಡೆ ನಿರ್ಮಿತವಾಸುನು ಇಂಡು ನಂಬುರು ತಿಲ್ಜುಗೊಂಡಿಕ್ಕಿರತಿಂಡು ಕಂಗಾರಂತದು ದೃಶ್ಯ ವಸ್ತುಲಿಂಡು ಉಂಟಾಗುಲ್ಲಯಿಂಡು ನಂಬ್ರು ಗ್ರಹಿಸರೋ ⁴ 4 ನಂಬಿಕೆಯಿಂಡೆ ಹೆಬೇಲನು ಕಾಯಿನನತ ಯಜ್ನತಕ್ಕಿಂತ ಅತಿ ಶ್ರೇಷ್ಠ ವಾಯಿಕ್ಕಿರ ಯಜ್ನತ ದವ್ರುಕು ಸಮರ್ಪುಸುಸು, ಅತ್ರ ಮೂಲಕ ಅದು ನಿತಿವಂತನು ಇಂಡು ಸಾಕ್ಷಿ ಹೊಂದುಸು,: ಅದು ಶತ್ತಿಕ್ಕಿರಾದಾಯಿಂದೆಕೆನು ಅತ್ರಿಂಡು ಇನ್ನು ವಸೆತ್ತಾದು, ^{5 6} 5 ಹನೋಕನು ಮರಣತ ಅನುಭವಿಸದೆ ಹೊನಾದು ನಂಬಿಕೆಯಿಂಡೆ , ಅತ್ತ ದವ್ರು ಅತ್ತುಗೊಂಡು ಹೋಯಿಕ್ಕಿರತಿಂಡು ಅದು ಎತ್ಗು ಸಿಕುಲ್ಲ; ಅತ್ತ ಅತ್ತುಗೊಂಡುಹೊಗಾರತಕ್ಕಿಂತ ಮುನ್ನೆ ದವ್ರತ್ತೆಯಿ ಮೆಚ್ಚಿಸುರಾದಾಯಿಂಚು ಇಂಡು ಸಾಕ್ಷಿ ಇದು, 6 ಅನೇಕೆ ನಂಬಿಕೆಯಿಲ್ಲದೆ ದವ್ರತ್ತೆಯಿ ಮೆಚ್ಚಿಸರಾದು ಅಸಾದ್ಯ; ಯಂತ್ಗು ಇಂಡೆಕೆ ದವ್ರುಂಚುಗು ವಾರ್ರಾದು ದವ್ರು ಇದು,ತನ್ನತ್ತೆಯಿ ಜಾಗ್ರತೆಯಿಂಡು ದವ್ವುರಾಯಿಲಿಕಿ ಪ್ರತಿಫಲತಾ ತರಾದು ಇಂಡು ನಂಬುರಾದು ಅವಶ್ಯ. ⁷ 7 ನಂಬಿಕೆಯಿಂಡೆ ನೋಹಾನು ಇನ್ನು ಕಾಂಗಾರಂತ ವಿಷಯವಾಯಿ ದವ್ರಿಂಡು ಎಚ್ಚರಿಸಲ್ಪಟ್ಟು ಭಯಗ್ರಸ್ತನಾಯ್ಯಿ ತಟ ಉಟಾಯಿಲಿತಾ ರಕ್ಷಣೆತ್ಕ್ಕಾಯಿ ನಾವೆಯತ್ತೆಯಿ ಸಿದ್ದ ಸೆಂಚು; ಅತ್ರಿಂಡು ಅದು ಲೋಕತಯಲಾತ್ತೆಯಿ ಖಂಡಿಸಿ ತರುವಾಯ ನಂಬಿಕೆಯಿಂಡು ಉಂಟಾಗುರ ನಿತಿಕಿ ಬಾದ್ಯನಾಸು, ^{8 9 10} 8 ನಂಬಿಕೆಯಿಂಡೆ ಅಬ್ರಹಾಮನು ಅಗುಸ್ಸಪ್ಪೋರು ವಿದೆಯನಾಯಿ ತಾನು ಭಾದ್ಯವಾಯಿ ಹೊಂದುಬೇಕಾಯಿಂದ ಜಾಗಿಕಿ ಹೊಸು; ತಾನು ಹೋಗುರಾಂತ ಜಾಗಿಕಿ ಹೊಸು,ತಾನು ಹೋಗುರಾ ಜಾಗ ಎದು ಇಂಡು ಗೊತ್ತಿಲ್ಲದೇ ಹೊಸುನು, 9 ನಂಬಿಕೆಯಿಂಡೆ ಅದು ವಾಗ್ದನತ ದೇಶತಕೋರು ಅನ್ಯದೇಶತ್ಕೊರು ಇಂದಕ್ಕನಿ ಗುಡಾರಲುಕೋರು ಇಂದುಗೊಂಡು ಪ್ರವಾಸಿಯಾಯಿಂಚು, ಅದೇ ವಾಗ್ದನತ ಭಾದ್ಯರಾಯಿಂದ ಇಸಾಕ ಯಕೊಬರಂಟಿ ಗುಡಾರಲುಕೊರು ವಾಸವಾಯಿಂಚು, 10 ಯಂತ್ಗು ಇಂಡೆಕೆ ದವ್ರು ಯಂತ ಕಟ್ಟುರಾತನು ಸೇಯ್ಯಿರಾತನು ಅಯಿದೋ ಅಸ್ತಿವಾರಗುಳ್ಳ ಅ ಪಟ್ಟಣತೊಸ್ಕರ ಅದು ಎದುರು ಪಾಕುತಿಂಚು. ^{11 12} 11 ಇದಲ್ಲದೆ ಸಾರಳುನೂ ಸಹ ವಾಗ್ದಾನ ಸೆಂದಿಕ್ಕಿರಂತತ್ತ ನಂಬುತಕ್ಕರಾಂತದು ಇಂಡು ತಿರ್ಮಾನಿಸಿ ತಾನುಕು ವಯಸ್ಸು ಅಯಿಂದೆಕೆನು ನಂಬಿಕೆಯಿಂಡು ಗರ್ಭವತಿಯಾಗುರುಕು ಶಕ್ತಿ ಹೊಂದಿ ಒಂಡು ಮವ್ವುನು ಪೆಚ್ಚುಸು; 12 ಅತ್ರಿಂಡು ಮೃತಪ್ರಯನಾಯಿಂದ ಒಂಡುಯಿಂಡು ಆಕಾಶಾತ ನಕ್ಷತ್ರಲಾಂತೆ ಗುಂಪುಗುಂಪುಯಿನು ಸಮುದ್ರ ತಿರತ್ಕೊರು ಇಕ್ಕಿರ ಉಸುಕುತರಾನು ಅಸಂಖ್ಯವಾಯಿ ಪರ್ದುಸುನು, ^{13 14} 13 ಇಯಿಗದ್ದಿನು ವಾಗ್ದನತ ಫಲತ ಹೊಂದದೆ ಅಯಿಲಾತ್ತೆಯಿ ತೂರಿಯಿಂಡು ಪಾತು ನಿಶ್ಚಯತಿಂಡು ಅಪ್ಪಿಗೊಂಡು ನಂಬಿಕೆ ಇಕ್ಕಿರಂತಯ್ಯ ಅಯ್ಯಿ ಶತ್ತುಸುನು; ತಂಗ ಭೂಮಿಮೆನಿ ಪರದೆಶತಯಿಲಿನೂ ಪ್ರವಾಸಿಲಿನೂ ಅಯಿರೋ ಇಂಡು ಒಪ್ಪಿಗೊಂಡುಸ್ಸುನು, 14 ಇಂಥ ವೋಕುಲಾ ವಸೆತ್ತರಾಯ್ಯ ತಂಗ ಒಂಡು ದೇಶತ ದವ್ವುರಂಗಯಿಂಡು ಸ್ಪಷ್ಟವಾಯಿ ವ್ಯಕ್ತಪಡಿಸಾನು. ^{15 16} 15 ತಂಗ ವಂದಿಕ್ಕಿರ ದೇಶತಮೆನಿ ಕರಾಣಕೆ ಮನಸ್ಸಚ್ಚಿಂದೆಕೆ ತಿರಿಗಿ ಅಯಿಲಿಕಿ ಆಟಗು ಹೋಗುರುಕು ಅವಕಾಶ ಇಂಚು, 16 ಅನೇಕೆ ಇಪ್ಪೋರು ಅಯಿಗ್ಯ ಪರಲೋಕ ಇಂಗಿರ ಉತ್ತಮದೇಶತ ಹಾರೈಸರ ಅಯಿನೂ;ಅತ್ರಿಂಡು ದವ್ರು ಅಯಿಲಿತ ದವುರು ಇಂಗಿಪಿಚ್ಚಿಕ್ಕಿರುಕು ನಾಚಿಕೆ ಪಡಾದೆ ಅಯಿಲಿಕೊಸ್ಕರ ಒಂಡು ಪಟ್ಟಣತ ಸಿದ್ದಸೆಂದಿದು, ^{17 18 19} 17 ಅಬ್ರಹಾಮನು ಶೋದಿತನಾಯಿ ನಂಬಿಕೆಯಿಂಡೆ ಇಸಾಕನತ್ತೆಯಿ ಸಮರ್ಪಿಸುಸು;ಆ ವಾಗ್ದನಲಾತ್ತೆಯಿ ಹೊಂದಿಗೊಂಡಿಕ್ಕಿರ ಅದು ತಟ ಒಂಡೇ ಮವ್ವುನತ್ತೆಯಿ ಸಮರ್ಪಿಸುಸು, 18 ಅತ್ರ ವಿಷಯತ್ಕೊರು ಇಸಾಕನುಕೋರೆ ನಿಟ ಸಂತತಿ ಕರೆಯಲ್ಪಡಾದು ಇಂಡು ಸೋನ್ನಲ್ಪಟ್ಟುಸು, 19 ತಟ ಮಾವ್ವುನತ್ತೆಯಿ ಶತ್ತಯಿಲಿಕೋರಿಂಡು ದವ್ರು ಅದ್ದಿಪಿಚ್ಚು ಸಮರ್ಥನಾಯಿದು ಇಂಡು ಎಣಿಸಿದು,ಸತ್ತಯಿಲಿಕೊರಿಂಡು ಜಿವಿತನಾಯಿ ವಂದಿಕ್ಕಿರತರ ಅತ್ತತ್ತೆಯಿ ಉಪಮಾನವಾಯಿ ಹೊಂದಿದು. ^{20 21 22} 20 ನಂಬಿಕೆಯಿಂಡೆ ಇಸಾಕನು ಮುನುಕು ವರ್ರಾಂತ ವಿಷಯಲಿಕೊರು ಯಾಕೊಬನತ್ತೆಯಿ ಏಸಾವನತ್ತೆಯಿ ಅಶಿರ್ವದುಸೂಸು, 21 ನಂಬಿಕೆಯಿಂಡೆ ಯಾಕೊಬನು ಸಾಗಾಂದು ಯೋಸೆಫನಾತ ರಂಡು ಮಕ್ಕಿಲಾತ್ತೆಯಿ ಅಶಿರ್ವದುಸುಸು;ತಟ ಕೋಲುಮೆನಿ ಒರಗಿಗೋಂಡೆ ದವುರತ್ತೆಯಿ ಆರಾಧನೆ ಸೆಂಚು, 22 ಯೋಸೆಫಾನು ಸಗಾಂದು ನಂಬಿಕೆಯಿಂಡೆ ಇಸ್ರಾಯೇಲುತಾ ಮಕ್ಕಿಗ್ಯ ಹೊರುಡುರಾ ಬಗ್ಗೆ ನಂಬಿಕೆಯಿಂಡೆ ವಸ್ಸೆತ್ತಿ ತಟ ಯಮುಕುಲಾತ ವಿಷಯತ್ಕೊರು ಅಪ್ಪಣೆಕುಡ್ತೂಸು. ^{23 24 25 26} 23 ಮೋಶೆ ಪರ್ದ್ದಪ್ಪೋರು ಕೂಸು ಸುಂದರವಾಯಿಕ್ಕಿರತ್ತ ಅದ್ಗ ತಾಯಿ-ದೊಪು ಪಾತು ಅರಸನತ ಅಪ್ಪಣೆತ್ಗು ಬಿತ್ಗಾದೆ ನಂಬಿಕೆಯಿಂಡೆ ಅತ್ತತ್ತೆಯಿ ಮೂಡುಮಾದು ಮುಚ್ಚಿ ಅಚ್ಚುಸುನು, 24 ಮೋಶೆ ಬೆರಾದುನ್ನಪ್ಪೋರು ಪರೋಹನ ಮಗಲುತಾ ಮವ್ವು ಇಂಗಿಪಿಚ್ಚಿಕ್ಕಿರಾದು ಮಾನಯಿಂಡಾದು ನಂಬಿಕೆಯಿಂಡೆ, 25 ಸ್ವಲ್ಪನಾಲು ಪಾಪಬೊಗಲಾತ್ತೆಯಿ ಅನುಭವಿಸಿರತ್ತಕ್ಕಿಂತ ದೇವಜನರಂಟಿ ಕಷ್ಟತ ಅನುಭವಿಸರತ್ತೆ ಪೆರಿಕಿಗೊಂಡು ಸ್ಸುನು, 26 ಐಗುಪ್ತತ್ಕೊರು ಇಕ್ಕಿರ ಐಶ್ವರ್ಯತ್ಕ್ಕಿಂತ ಕ್ರಿಸ್ತನತ ವಿಷಯವಾನ ನಿಂದೆನೆ ಹೆಚ್ಚಾನ ಐಶ್ವರ್ಯ ಇಂಡುಗೊಂಡುಸುನು;ಯಂತ್ಗು ಇಂಡೆಕೆ ಪ್ರತಿಪಲತ ಬಹುಮಾನತ ಅದು ಗೌರವಸೂಸು, ^{27 28} 27 ನಂಬಿಕೆಯಿಂಡೆ ಅದು ಅರಸನತ ರೌದ್ರತ್ಗೂ ಬಿತ್ಗಾದೆ ಐಗುಪ್ತ ದೇಶತ ಉಟ್ಟೋಡುಸು ಯಂತ್ಗು ಇಂಡೆಕೆ ಅದು ಅದೃಶ್ಯನಾಯಿಕಿರಾತನತ್ತೆಯಿ ದೃಷ್ಟಿಸರಾದೋ ಇಂಗಿರಂತೆ ದೃಡಚಿತ್ತನಾಯಿಂಚು,ಇ 28 ಸ್ರಾಯೇಲರತ ಚೊಚ್ಚಲ ಮಕ್ಕಿಲತ್ತೆಯಿ ಸಂಹರಿಸರಾದು ಅಯಿಲಾತ್ತೆಯಿ ಮುಟ್ಟರಕನಿ ಅದು ಪಸ್ಕತುನೂ ರಗುತಪ್ರೋಕ್ಷಣೆಯತ್ತೆಯಿ ಆಚರಿಸಾನದು ನಂಬಿಕೆಯಿಂಡೆ ^{29 30 31} 29 ,ನಂಬಿಕೆಯಿಂಡೆ ಇಸ್ರಾಯೇಲಾರು ನೋಡ್ದಾ ಭೂಮಿ ದಾಟುನುಕನಿ ಯಾರ್ರ ಸಮುದ್ರುತ ದಾಟುಸುನು;ಐಗುಪ್ತ ದೇಶತಯ್ಯ ಅತ್ತ ದಾಟುರುಕು ಪ್ರಯತ್ನ ಸೆಂದಪ್ಪೋರು ಮುಳುಗಿ ಶತ್ತುಹೊಸುನು, 30 ನಂಬಿಕೆಯಿಂಡೆನೇ ಅಯಿಗ್ಯ ಅಗುನಾಲು ಯೆರಿಕೊವತ ಗ್ವಡಲಾತ್ತೆಯಿ ಸುತ್ತಿನ್ನಪ್ಪೋರು ಅದು ಬೂಚು, 31 ನಂಬಿಕೆಯಿಂಡೆನೇ ರಹಾಬಳು ಇಂಗಿರಾ ಸೂಳೆ ಗೂಢಚಾರರಲಾತ್ತೆಯಿ ಸಮಾಧಾನವಾಯಿ ಸೇರಿಸಿಗೊಂಡು ನಂಬರಾಯಲಾಂಟಿ ಸೇರಾದೆ ನಾಶವಾಗದೇ ಉಳಿಚು. ^{32 33 34} 32 ಇನ್ನು ಯಂತ ಸೋನ್ನುರುದು?ಗಿಡಿಯೋನ್ ಬಾರಕ್ ಸಂಸೋನ್ ಎಪ್ ಥ ದಾವಿದ್ ಸಮುವೆಲ್ ಮತ್ತೆ ಪ್ರವಾದಿಲಿತಾ ವಿಷಯವಾಯಿ ಸೋನ್ನುರುಕು ನನ್ಕು ಸಮಯ ಸಾಲುದಿಲ್ಲ, 33 ನಂಬಿಕೆ ಮುಖಾಂತರ ಅಯಿಗ್ಯ ರಾಜ್ಯಲಾತ್ತೆಯಿ ಸ್ವಾಧೀನ ಸೆಂದುಗೊಂಡುಸುನು;ನಿತಿಯತ್ತೆಯಿ ನಡಿಪ್ಪಿಚ್ಚುಸುನು;ವಾಗ್ದಾನಲಾತ್ತೆಯಿ ಪಡ್ಜುಸುನು;ಸಿಂಹಲಾತ ವಾಯಿತ್ತೆಯಿ ಕಟ್ಟುಸುನು, 34 ನೆರ್ಪುತಾ ಬಲತ ಅಮುಸುಸುನು;ಕೊಡ್ಲಿತವಾಯಿಂಡು ತಪ್ಪಿಸಿಗೊಂಡುಸ್ಸುನು;ನಿರ್ಬಲರಾಯಿಂದೆಕೆನೂ ಬಲಿಷ್ಠರಾಸುನು;ಯುದ್ದತ್ಕೊರು ಪರಾಕ್ರಮಶಾಲಿಗ್ಯಸುನೂ; ಪರರತ ದಂಡುಲಾತ್ತೆಯಿ ಓಡಿಪಿಚ್ಚುಸುನು, ^{35 36 37 38} 35 ಪಂಬುಳಯ್ಯ ಶತ್ತೊಯಿಂದ ತಂಗುಲುಜಾಯಲಾತ್ತೆಯಿ ಪಗಿಪಿಚ್ಚುಗೊಂಡುಸ್ಸುನು; ಕೆಲವುರು ತಂಗ ಯಾತನೆ ಹೊಂದಾಂದು ಶ್ರೇಷ್ಟ ಪುನರುತ್ಥಾನತ ಹೊಂದರಾತ್ಕೊಸ್ಕರ ಬಿಡುಗಡೆ ಮಾನ ಇಂಡುಸ್ಸುನು, 36 ಕೆಲವರು ಅಪಹಾಸ್ಯ ಕೂರಡೆಲಾತಪೆಟ್ಟು ,ಅಂಬೋ,ಇನ್ನು ಬೇಡಿ ಸೇರೆಮಾನೆ ಇಯಿಲಾದ್ದಿನು ಅನುಭವಿಸುಸುನು, 37 ಕೆಲವುರತ್ತೆಯಿ ಕೆಲ್ಲುಪೇಟಿ ಕೊಂಡುರುಸುನು;ಇನ್ನು ಕೆಲವುರತ್ತೆಯಿ ಗರಗಸತಿಂಡು ಅರ್ತು ಕೊಂಡುರುಸುನು ಕೆಲವುರುತಯ್ಯಿ ಪರಿಶೋದುಸುಸುನು;ಕೆಲವುರತ್ತೆಯಿ ಕೊಡ್ಲಿಯಿಟ್ಟು ಕೊಂಡುರುಸುನು;ಕೆಲವುರು ಕೊರತೆ ಹಿಂಸೆ ಬಾಧೆ ಅನುಭವಿಸಿ ಆಡು ಕುರುಬಾಡುಲಾತ ತೊಲುತಾ ಉಡಿತಿಗೊಂಡು ಅಲ್ಜುಸುಸುನು, 38 ಇಂಥಯಿಲಿಕಿ ಈ ಲೋಕ ಯೋಗ್ಯವಾಯಿಕ್ಕಿರದಲ್ಲ; ಅಯಿಗ್ಯ ಭೂಮಿತ ಕಾಡು ಗಟ್ಟು ಗವಿ ಕುಣಿಲಿಕೊರು ಅಲಿರಾಯ್ಯ ಅಯಿಂಚುನು.