^{1 2} 1 ಕ್ರಿಸ್ತನು ನೋಗುಲ್ನ ಸ್ವತಂತ್ರವಾಯಿ ಸೇದಿದು.ಆತ್ಕುರು ಸ್ಥಿರವಾಯಿ ನಿಲನ್ಗೋ; ದಾಸತ್ವತ ನೋಗತ್ಕುರು ತಿರ್ಗಿ ಸಿಕ್ಕಿಹೊಟ್ಗುಮಾನಂಗ. 2 ಇಗೋ ,ಪೌಲಯಿಂಕ್ರ ನಾನು ನಿಂಗುಲ್ಕು ಸೊಂರದಿಂಡೆಕೆ,ನಿಂಗ ಸುನ್ನತಿ ಸೇನ್ದುಗೊಂಡೆಕೆ ಕ್ರಿಸ್ತನಿಂಡು ನಿಂಗುಲ್ಕು ಎಂದ ಪ್ರಯೋಜನಯಿಲ್ಲ. ^{3 4} 3 ಯೆಂತಿಗಿಂಡೆಕೆ ಸುನ್ನತಿ ಸೇಚ್ಕುರ ಪ್ರತಿಯೊಂಡಲು ನ್ಯಾಯಪ್ರಮಾಣ ಹದ್ದಿನು ಕೈಕೊಳ್ಳುರತ್ಕುರು ಇರೋ ತಿರ್ಗಿ ಪ್ರಮಾಣತಿಂಡು ಸೋನರೆ. 4 ನಿಂಗುಲ್ಕುರು ಯೇದನ ನ್ಯಾಯ ಪ್ರಮಾಣತಿಂಡು ನೀತಿವನ್ತರಗುರ್ದುಯಿಂಡು ಆಲ್ಕಿ ಕ್ರಿಸ್ತನಿಂಡು ಯೇದು ಪ್ರಯೋಜನವಗ್ದಿಲ್ಲ; ನಿಂಗ ಕೃಪೆಯಿಂಡು ಬುದಾವರಯಿರಂಗ. ^{5 6 7 8} 5 ನಂಗನೆಕ್ಯ ಆತ್ಮತಿಂಡು ನಂಬಿಕೆಯಿಂಡು ನೀತಿಯಿಂಡು ನಿರೀಕ್ಷೆಕಯಿ ಎದುರುಪಾಕರೋ . 6 ಯೆನ್ತಿಗಿಂಡೆಕೆ ಯೇಸು ಕ್ರಿಸ್ತನ್ಕುರುಯಿಕ್ರ ಸುನ್ನತಿಯಾನೆಕು ಪ್ರಯೋಜನಯಿಲ್ಲ ,ಅಗ್ದೆಯಿಂದೆಕು ಪ್ರಯೋಜನಯಿಲ್ಲ .ಪ್ರೀತಿಯಿಂಡು ಪನಿಸೈರಾದು ನಂಬಿಕೆಯಿಂಡೆ ಪ್ರಯೋಜನವಕ್ದು . 7 ನಿಂಗ ನಾಳುಗೂ ಓಡ್ತಯಿರಂಗ, ನಿಂಗ ಸತ್ಯತ್ಗು ವಿದೇಯಾರಗುರ್ಕನಿ ಯೇದು ನಿಂಗುಲ್ನ ತಡೆಸೇನ್ಚುನು . 8 ಈ ಪ್ರೇರೇಪಣೆ ನಿಂಗುಲ್ನ ಅಗ್ಸತಿಂಡುವಂದದಲ್ಲ. ^{9 10} 9 ಸ್ವಲ್ಪೋ ಪುಲ್ಪಿಂಡು ಕಣೆಕದ್ದಿ ಪುಲ್ಪಕದ್ದು. 10 ನಿಂಗ ಬೇರೆ ಅಬಿಪ್ರಯಾನ ಪುಡಿಕಿಮಟಾಂಗಾಯಿಂಡು ಕರ್ತನ್ಕುರು ನಿಂಗುಲ್ನ ಕುರಿತು ನಂಕು ಭಾರವಾಸೆ ಇದು. ಆನೇಕೆ ನಿಂಗುಲ್ಕುರು ಕಳವಳಪಡಸ್ರದು ಯೆದನೆಕು ಸರಿನೆ ತಟ್ಟ ದಂಡನೆನ ಅನುಬಾವಿಸಾಕ್ನು. ^{11 12} 11 ಅನದೆಮ್ಬಿಮಾರೆ, ನಾನ್ಯೆಕ್ಯೋ ಸುನ್ನತಿಯಾಗುರ್ದುಯಿಂಡು ಇನ್ನೂ ಸಾರುರದನೇಕೆ ಇನ್ನು ನಂಕು ಹಿಂಸೆಯಾಗ್ರದುಯೆಂತುಗು ? ಆ ಪಕ್ಷತ್ಕುರು ಶಿಲುಬೆಯಿಂಡು ಉಂಟಾನ ಆಪೆಕ್ಷ ನಿಂಡ್ರು ಹೋಸೆ?. 12 ನಿಂಗುಲ್ನ ಕಳವಳಪಡ್ಸಗ್ಯ ಬೇರೆಯಾಗ್ರದೆ ನಟ್ಟು ಇಷ್ಟ. ^{13 14 15} 13 ಅನ್ನದೆಮ್ಬರೇ, ನಿಂಗ ಸ್ವತಂತ್ರವಗುರ್ದಿಂಡು ಹಾಗ್ಸಿಕ್ರಗ್ಯಾರಯಿರಂಗ .ಸ್ವತಂತ್ರನ ಶರೀರತ್ಗು ಬಳಸುದೆ ಪ್ರಿತಿಯಿಂಡು ವಂಡಲ್ಕುವಂಡಲು ಸೇವೆ ಸೈಯಾಂಗೋ. 14 ನಿಟ್ಟು ಅಕ್ಕಪಕ್ಕತಲ್ಯನ ನಿಂಗುಲ್ಕಾನಿ ಪ್ರೀತಿಸು ಇಂಗ್ರ ವಂಡೇ ಓಕುಂಡೆ ನ್ಯಾಯಪ್ರಮಾಣ ಅದ್ದಿ ನೇರವೆರಿದು. 15 ಆನೇಕೆ ನಿಂಗ ವಂಡಲ್ಕುವಂಡಲು ಕಾಡ್ಸು ಮಿಗ್ರಗ್ಯಾರನೇಕೆ ವಂಡಲ್ಕುವಂಡಲು ನಾಶವಕ್ರಂಗ, ಎಚ್ಚರವಾಯಿರಂಗೋ. ^{16 17 18} 16 ನಾನು ಸಾಂಡ್ರದೇದಿನ್ಡೆಕೆ ,ಆತ್ಮನ ಅನುಸಾರಿಸಿ ನಾಡ್ದುಗೊಂಗೋ; ಅಪೋದು ನಿಂಗ ವಡ್ಮತ ಅಸೇತರ ಯೇಮನು ನೆರವೆರ್ಸುಮಾಟಾಂಗಾ. 17 ವಡ್ಮುತ ಆಸೆ ಆತ್ಮತ್ಗು ವಿರುದ್ದವಾಯಿದು. ಆತ್ಮ ವಡ್ಮತ್ಗು ವಿರುದ್ದವಾನದು. ನಿಂಗ ಸೈಯಿರ್ದುಯಿಂಡಿಕ್ರತಾಯ ಸೈದೆ ಇದು ವಂಡುಕುವಂಡು ವಿರೋದ್ದವಾನದು. 18 ಆನೇಕೆ ನಿಂಗ ಆತ್ಮತಿಂಡು ನಡ್ದುಗುರಗ್ಯನೇಕೆ ನ್ಯಾಯಪ್ರಮಾಣತ್ಗು ಅದಿನರಲ್ಲ. ^{19 20 21} 19 ವಡ್ಮತ ಕಾರ್ಗ್ಯಾಗ ಸ್ವಷ್ಟವಾಯಿ ಕಂಗಾಕು; ಅದು ಎಂದಯಿಂಡೆಕೆ –ವ್ಯಬಿಚಾರ ಜಾರತ್ವ ಅಶುದ್ದ ಬಂಡುತನ. 20 ವಿಗ್ರಹಾರದನೆ ಮಾಟ ಹಗೆತನ ಮತಬೇದ ಹೊಟ್ಟೆ ಕಿಚ್ಚು ಜಗಳ ಒಳಸಂಚು ಭಿನ್ನಾಬಿಪ್ರಾಯಗ್ಯ. 21 ಅಸೂಯೇ ಕೊಲೆಗ್ಯ ಕುಡುಕುತನ ದುಂದೌತನ ಇಗ್ಯದಿನು; ಇಂಥ ಕೃತ್ಯ ಸೈರಗ್ಯ ದೌರ ರಾಜ್ಯತ್ಗು ಬಾದ್ಯರಾಗುದಿಲ್ಲನು ನಾನು ನಿಂಗುಲ್ಕು ಮುನ್ನೇ ಸೋನಕಾನಿ ಇಪೋದು ಸೋನಾರೆ. ^{22 23 24} 22 ಆನೇಕೆ ಆತ್ಮನ ಫಲು ಯೆಂದಯಿಂಡೆಕೆ –ಪ್ರೀತಿ ಸಂತೋಷ ಸಮಾದಾನ ದೀರ್ಘ ಶಾಂತಿ ವಿನಯ ಸದ್ಗುಣ ನಂಬಿಕೆ 23 ಸಾತ್ವಿಕತ್ವ ಮಿತವ್ಯಯ ಇಂಥಲ್ಯ; ಇತ್ಕುರು ವಿರೋದ್ದವಾಯಿ ನ್ಯಾಯ ಪ್ರಮಾಣಯಿಲ್ಲ. 24 ಕ್ರಿಸ್ತಂಗ್ಯ ತಂಟ್ಟ ವದ್ಮುನ ಅಲ್ಯ ಆಸೆ ದುರಾಸೆಯಿಂಡು ಶಿಲುಬೇಕಿ ಹೊಟ್ಟಿನು. ^{25 26} 25 ನಂಗ ಅತ್ಮನ್ಕುರು ಜೀವಿಸ್ರದನೇಕೆ ನಂಗುಲು ಆತ್ಮ ಕುರು ನಡ್ದಗೋಮು. 26 ನಂಗ ವ್ಯರ್ಥವನ ಹೋಗಲಿಕೆನ್ನ ಆಸೆಪಡ್ದೆ ವಂಡಲ್ಕುವಂಡಲು ಕೆಣಕ್ದೆ ವಂಡಲ್ಮೆನಿ ಹೊಟ್ಟೆ ಕಿಚ್ಚುಪಡ್ದೆ ಇಕೋಮು.