21 ¹ ತರುವಾಯಮೂ ನೂತನಾಕಾಶ ಮ೦ಡಲವನೀ ನೂತನಭೂಮ೦ಡಲ್ನೀ ಸೂಸೀ . ಮೊದಲಿ೦ಚ ಆಕಾಶಮ೦ಡಲ್ಮೂ ಮೊದಲಿ೦ಚ ಭೂಮ೦ಡಲ್ಮೂ ಲೇಕು೦ಡ ಪಾಯಾ .ಇ೦ಕ ಸಮೂದ್ರಮೂ ಲೇದು . ² ಕಾಕುಂಡ ಪರಿಶ್ದುದ ಪಟ್ಟಣಮ್ ಮೈನಾ ಕೊತ್ತ ಯೆರಸಲೇಮ್ ಪರಲೋಕಮ್ನಿಚ್ಚ ದೇವುಡು ಬಳೀಯೀ೦ಚ ದಿಗೀ ವಾಚದನೀ ಸೂಸ್ತಿ ; ಅದೀ ತಾನ್ ಮೊಗುಡುಗ್ಕೊಸರಮೂ ಅಲ೦ಕ್ರತಮೂ ಮೈನಾದೀ ಮದಲಗಿತ್ತಿಲಕ ಶೃ೦ಗರಮೂ ಆಯಾ . ³ ಇದೀ ಕಾಕುಂಡ ಸಿ೦ಹಾಸನಮೂ ಒಳ್ಗ ವಾಚ್ಚಿ ಮಹಾ ಶಬ್ಬಮೂ ನಾಕ್ಕಿ ಇನ್ಬಡಿಚ್ಚೆ ಅದೀ - ಇಗೋ ದೇವುಡು ನಿವಾಸಮೂ ಮನುಷ್ಯಲಾ ಉ೦ಡೆ ; ಆತುಡು ವಾಳ್ ಜೋತ್ಲಾ ವಾಸಮು ಸೇಸ್ತಾಡು , ವಾಳ್ ಆತಡುಕ್ಕಿ ಪ್ರಜೆಲೈಉ೦ಟರೂ ; ದೇವುಡು ತಾನೇ ವಾಳ್ ಜೋ೦ತ್ಲಾ ಉ೦ಟಾಡು , ⁴ ಕಣ್ಣೀರುನೀ ಒರಸುತಾಡು . ಇ೦ಕ ಮರಣಮೂ ಲೇದು , ಇ೦ಕ ದುಃಖಮ್ ಕಾನಿ ಗೋಳಾಟಮೂ ಕಾನೀ ಕಷ್ಟಮೂ ಕಾನೀ ವು೦ಡಲೇದು ; ಮೊದಲ್ ವುಂಡಿನ್ದೆಲ್ಲಾ ಲೇಕು೦ಡ ಪಯಾ ಅನೀ ಸೋಪ್ಪಿ . ⁵ ಅಪುಡು ಸಿ೦ಹಾಸನಮೂ ಮೀ೦ದ ಕುಚ್ಕ ವುಂಡೋಡು - ಇಗೋ ಎಲ್ಲವಾ ಕೋತಿದ್ದಿ ಸೇಸ್ತ ಅನೀ . ಮಲ್ಲಿ ಒ೦ಕಡು ನಾಕೀ - ದಿನೀ ರಾಯೀ ; ಈ ಮಟ್ಲನೀ ನ೦ಬತಕ್ಕಮೈನಾ ಸತ್ಯಮೂ ಆಯಾನವೀ ಅನೀ ಸೋಪ್ಪಿ ⁶ ಸಿ೦ಹಾಸನಮೂ ಮೀ೦ದ ಕುಚ್ಕ ವುಂಡೋಡು - ಎಲ್ಲಮೂ ನೆರವೇರೆ ನಾನೆ ಆದಿಯೂ ಅಂತ್ಯಮೂ ಪ್ರಾರ೦ಭಮೂ ಸಮಾಪ್ತೀಮೂ ಐನಾನು ದಾಹಮ್ ವುಂಡೋಡ್ಕಿ ಜೀವಾಜಲ ಬುಗ್ಗೆನಿಂಚ ಕ್ರಯಮೂ ಲೇನಾಟ್ಕ ತಾಗೇಕಿ ಇಸ್ತಾನು. ⁷ ಹೋ೦ದೊಡು ಇವುಟ್ಲಿಂಚ ಬಾಧ್ಯಮೂ ಐತಾಡು ; ನಾನು ವಾಡ್ಕಿ ದೇವುಡು ಐನಾನು, ವಾಡ್ ನಾಕಿ ಕೊಡಕ್ ಐನಾಡು . ⁸ ಅಯ್ತೆ ಹೇಡಿಲು , ನ೦ಬಿಕೆಲೆ೦ನಟೋಳು , ಅಸಹ್ಯಮೈನ್ ದಾಟ್ಲಾ ಸೇರು೦ಡೋಳು , ಕೊಲೆಗಾರಲು , ಜಾರಲು , ಮಾಟಗಾರಲು , ವೀಗ್ರಹಾರಾಧಕಲು , ಎಲ್ಲಾ ಸುಳ್ಳುಗಾರಲು ವುಲ್ಕಿ ಸಿಕ್ಕ ಪಾಲು ಆಗ್ಗಿ ಗ೦ಧಕಲು ಉರ್ಸಟ್ಟ ಸರ್ವೇ ; ಅದೀ ರೋ೦ಡನೆ ಮರಣಮೂ ಅನೀ ನಾಕಿ ಸೊಪ್ಪೇ . ⁹ ಕೊನೆ ಯೋಡು ಉಪದ್ರವಲಿ೦ಚ್ಚ ನಿ೦ಡೀನ ಯೋಡು ಪಾತ್ರೆಲು ಪುಟ್ಕನು೦ಡ ಯೋಡು ಮ೦ದಿ ದೇವದೂತಲು ಒಕ್ಕಡು ವಾಚ್ಚಿ ನಾ ತೋಡು ಮಟ್ಲಡ್ತ - ರಾ ಯಜ್ಞದ ಕುರಿಯಾತುಡ್ಕಿ ಪೆಡ್ಲಮ್ ಅಯ್ಯೇತಕ್ಕ ಮದಲಗಿತ್ತಿನೀ ನೀಕಿ ಸೂಬಿಸ್ತಾನು ಅನೀ ಸೋಪ್ಪೇ . ¹⁰ ದೇವುಡು ಆತ್ಮವಶಮೈ ನನ್ನಿ ಎತ್ತರಮೈನಾ ಪೇ೦ದ್ದ ಬೆಟ್ಟಕ್ಕಿ ಎತ್ಕನೀ ಪಾಯೀ ಯೆರೂಸಲೇಮ್ ಅನೆ ಪರಿಶುದ್ಧ ಪಟ್ಟಣಮ್ಕಿ ದೇವುಡು ತೇಜಸ್ ವುಳ್ಳದೈಯ್ಯಿ ಪರಲೋಕಮ್ನಿಚ್ಚ ದೇವುಡು ತೋಟ್ ಯೀ೦ಚ ದಿಗೀ ವಚ್ಚದಾನೀ ನಾಕಿ ಸೂಬಿಚ್ಚೆ . ¹¹ ಪಟ್ಟಣಮ್ ಪ್ರಕಾಶಮೂ ಅಮೂಲ್ಯ ರತ್ನ ಪ್ರಕಾಶ೦ಕ್ಕಿ ಸಮಾನಮೂ ಅಯ್ಯು೦ಡೆ . ಥಳಥಳಚ್ಚ ವಜ್ರಮೋ ಅನೇ ರೀತಿ ಕಮಡೀ೦ಚ್ಚೆ . ¹² ಆ ಪಟ್ಟಣಕ್ಕಿ ಎತ್ತರಮ್ ಐನಾ ಪೇದ್ದ ಪ್ರಾಕಾರಮ್ ವು೦ಡೆ ; ದಾ೦ಕಿ ಪನ್ನೆ೦ಡು ಹೆಬ್ಬಾಗಿಲು ವು೦ಡೆ ; ಆ ವಾಕ್ಲಿ ಹತ್ರ ಪನ್ನೆ೦ಡು ಮ೦ದಿ ದೇವದೂತುಲ್ ವುಂಡ್ಲಿ ; ಅವುಟ್ಲು ಮೀ೦ದ ಇಸ್ರಾಯೇಲ್ಯುಲಾ ಪನ್ನೆ೦ಡು ಕುಲಲಾ ಪೇರುಲು ರಾಸು೦ಡೆ . ¹³ ಪೂರ್ವಮೂ ದಿಕ್ಕಕಿ ಮೂಡ್ ವಾಕ್ಲಿಲು , ಉತ್ತರದಿಕ್ಕಿಕಿ ಮೂಡ್ ವಾಕ್ಲಿಲು , ದಕ್ಷಿಣದಿಕ್ಕಿಕಿ ಮೂಡ್ ವಾಕ್ಲಿಲು , ಪಶ್ಚಿಮದಿಕ್ಕಿಕಿ ಮೂಡ್ ವಾಕ್ಲಿಲು ವು೦ಡೆ . ¹⁴ ಪಟ್ಟಣಮ್ ಪ್ರಾಕಾರಕ್ಕಿ ಪ೦ನ್ನೆಡು ಅಸ್ತಿವಾರಮೂ ವು೦ಡೆ ; ಅವುಟ್ಲಕ್ಕಿ ಮೀ೦ದ ಯಜ್ಞದ ಕುರೀಯಾದಾತುಡು ಪಾನ್ನೆ೦ಡು ಮ೦ದಿಲು ಅಪೋಸ್ತಲ್ ಪೇರು ಉ೦ಡೆ. ¹⁵ ನಾ ತೋಡು ಮಟ್ಲುನೀ ಆಡ್ತಾವುಂಡ್ನೋಡು ಆ ಪಟ್ಟಣಮ್ನೀ ದಾನ್ ವಾಕ್ಲಿಲಾ ದಾನ್ ಪ್ರಾಕಾರಮೂ ಅಳತೆ ಸೇಸೆಕಿ ವಾಡ್ ಸೇತ್ಲಾ ಚಿನ್ನಮೂ ಅಳತೆ ಕೋಲ್ನೀ ಪುಟಕ್ನೀ ಉ೦ಡೆ . ¹⁶ ಪಟ್ಟಣಮೂ ಚಚ್ಚೌಕ ಅಯಿನ್ದಿ ; ದಾನ್ ಉದ್ದಮೂ ದಾನ್ ಅಗಲ೦ತ ವು೦ಡದೀ .ವಾಡ್ ಆ ಪಟ್ಟಣಮೂನೀ ಕೋಲ್ನಿ೦ಚ್ಚ ಅಳತೆಸೇಸ್ಸೇ ; ಅಳತೆಯೂ ಪನ್ನೆ೦ಡು ನೂರು ಮೈಲಿ ಆಯಾ . ದಾನ್ ಉದ್ದಮೂ ಅಗಲಮೂ ಎತ್ತರಮೂ ಸಮಮೈ ವು೦ಡೆ . ¹⁷ ದಾನ್ ಪ್ರಾಕಾರಮೂ ಅಳತೆ ಸೇಸ್ಸೇ ; ಅದೀ ನೂರ ನಾಲ್ಪಯೀ ನಾಲ್ಕೂ ಮೊಳಂ ಅಯಾ ; ಈ ಲೆಕ್ಕಕಿ ಮನುಷ್ಯುಡ ಮೊಳ ಅಂಟ್ಟೆ ದೇವದೂತುಡ ಮೊಳ . ¹⁸ ಆ ಪ್ರಾಕಾರಮೂ ಸೂರ್ಯಕಾ೦ತಶಿಲೆಯೀ೦ಚ ಕಟ್ಟಲ್ಪಟೆ . ಪಟ್ಟಣಮೂ ಶುದ್ಧ ಗಾಜುಲಕ ವುಂಡ ಸೋಸಿನಾ ಬ೦ಗಾರಮೂ . ¹⁹ ಪಟ್ಟಣಮೂ ಪ್ರಾಕಾರಮೂ ಅಸ್ತಿವಾರಲು ಸಕಲ ವಿಧಮೈನಾ ರತ್ನಮ್ನಿಚ್ಚ ಅಲ೦ಕೃತ ಮೈಯು೦ಡೆ . ಮೊದಲು ಅಸ್ತಿವರಮೂ ವಜ್ರಮೂ , ರೋಡ್ನೆದೀ ವ್ಯೆಡೂರ್ಯಮೂ , ಮೂಡನೆದೀ ಪಚ್ಚೆ , ನಾಲ್ಕೂನೇದೀ ಪದ್ಮರಾಗಮೂ , ²⁰ ಐದನೇದೀ ಗೋಮೇದಕ , ಆರ್ನೆದೀ ಮಾಣಿಕ್ಯಮೂ , ಏಳನೇದೀ ಪೀತರತ್ನಮೂ , ಎ೦ಟನೇದೀ ಬೇರುಲ್ಲಮೂ , ಒ೦ಭತ್ತನೇದೀ ಪುಷ್ಯರಾಗಮೂ , ಪದ್ನೆದಿ ಗರುಡಪಚ್ಚೆ , ಹನ್ನೊ೦ದನೇದೀ ಇ೦ದ್ರನೀಲ , ಪನ್ನೆ೦ಡುನೇದೀ ನೀಲಸ್ಪಟಿಕ. ²¹ ಪನ್ನೆ೦ಡು ಹೆಬ್ಬಾಗಿಲೊ ಪನ್ನೆ೦ಡು ಮುತ್ತುಲೈಯು೦ಡೆ ; ಒ೦ಕ್ಕೊಕ ವಾಕ್ಲಿ ಒ೦ಕ್ಕೊಕ ಮುತ್ತೀನಿ೦ಚ್ಚ ಸೇಸು೦ಡೆ . ಪಟ್ಟಣಮೂ ಬೀದಿಯೂ ಸ್ವಚ್ಚಮೈ ಗಾಜುಲಕ ವುಂಡ ಸೋಸಿನಾ ಬ೦ಗರಮ್ ಅಯ್ಯುಂಡೆ . ²² ಪಟ್ಟಣಮೂಲಾ ನಾಕೀ ದೇವಾಲಯಮ್ನೀ ಸುಡ್ಲೆದು . ಯದ್ಗು ಅಂಟ್ಟೆ ಸರ್ವಶಕ್ತಡು ಐನಾ ದೇವುಡು ಐನಾ ಕರ್ತಡು ಐನಾ ಯಜ್ಞದ ಕುರಿಯಾತುಡು ದಾನ್ ದೇವಾಲಯಮ್ ಐನಾರೂ . ²³ ಪಟ್ಟಣ೦ಕ್ಕಿ ಏಲುಗುನೀ ಇಚ್ಚದಾನ್ಕಿ ಸೂರ್ಯಡು ಕಾನಿ ಚ೦ದ್ರಡು ಕಾನಿ ವೊದ್ದು . ದಾನ್ಕಿ ದೇವುಡು ಪ್ರಭಾವಮೂ ಏಲುಗು ಇಚ್ಚೆ ; ಯಜ್ಞದ ಕುರಿಯಾದಾತುಡು ದಾನ್ ದೀಪಮೂ . ²⁴ ದಾನ್ ಏಲಗು ನೀ೦ಚ ಸರ್ವಜನಾ೦ಗಲು ಸ೦ಚಾರಮೂ ಸೇಸ್ತರು ; ಭೂರಾಜಲು ವಾಳ್ ವೈಭವನೀ ಗಾನ್ಕಿ ಎತ್ಕನೀ ವಸ್ತಾರು . ²⁵ ದಾನ್ ವಾಕ್ಲಿನೀ ಹೇಲಗ್ಲಾ ಮುಚ್ಚಲೆದು ; ರಾತ್ರಿ ಮಾತ್ರ ಗಾನ್ ಲೇದು . ²⁶ ಜನಾ೦ಗುಲಾ ವೈಭವಮೂ ಘನಮೂ ಗಾನ್ಕಿ ವಾಸ್ತವೀ . ²⁷ ದಾನ್ಟಾಲ ಹೊಲಸ್ ಅಯ್ಯಿಂದಿ ಒ೦ಕ್ಟಿ ಸೇರೇ ಲೇದು . ಅಸಹ್ಯಮೈದ್ದಾನಿ , ಸುಳ್ಲಾದನ್ನಿ ನಡಿಪಿಚ್ಕೋಡು ಸೇರೆಲೇದು ; ಯಜ್ಞದ ಕುರಿಯಾದಾತುಡು ಜೀವಬಾಧ್ಯುಲಾ ಪಟ್ಟಿಲಾ ಯೋಳೊಳ ಪೇರು ರಾಸೀ೦ದೋ ವಾಳ್ ಮಾತ್ರ ಸೇರ್ತರೂ .