22 ¹ ಅಮೀ೦ದ ವಾಡು ಸ್ಪಟಿಕರೀತಿ ಪ್ರಕಾಶಮೈನಾ ಜೀವಲ ನದಿನೀ ನಾಕಿ ಸುಬಿಚ್ಚೆ . ಅದೀ ದೇವುಡ ಮಲ್ಲಿ ಯಜ್ಜಕುರೀಯಾದಾತುಡ ಸಿ೦ಹಾಸನಮ್ನಿಚ್ಚ ಪೈಯ್ಯಿ ಪಟ್ಟಣ ಬೀದಿ ಮಧ್ಯಲಾ ಹರಿಸ್ತಾ ವುಂಡೆ . ² ಆ ನದಿ ಉಭಯ ಪಾಶ್ವಮೂಲ ಜೀವವೃಕ್ಷಮೂ ವುಂಡೆ . ಅದೀ ತಿ೦ಗಳು ತಿ೦ಗಳುಕ್ಕಿ ಫಲ್ಮೂನೀ ಫಲಿಸ್ಥ ಪನ್ನೆ೦ಡು ತರಾಲ ಫಲನೀ ಇಸ್ತಾ ವುಂಡೆ . ಆ ಮಾನ್ ಅಕ್ಲೂ ಜನಾ೦ಗಮೂಲ್ನೀ ವಾಸಿಸೇಸದಾ೦ಕ್ಕಿ ಪ್ರಯೋಜನಾಮ್ ಅಯ್ಯಿಂದಿ . ³ ಇಂಕ ಶಾಪಗ್ರಸ್ತಮೈನಾ ಒಕ್ಟಿ ಲೇದು . ಆ ಪಟ್ಟನಮೂಲ ದೇವುಡು ಮಲ್ಲಿ ಯಜ್ಜ ಕುರೀಯಾದಾತುಡು ಸಿ೦ಹಾಸನಮ್ ವುಂಡಾದೀ . ⁴ ಆತನೀ ದಾಸಲೂ ಆತಡ್ಕಿ ಯಾಜಕಸೇವೆ ಸೇಸ್ತಾರು ; ವಾಳ್ಕಿ ಆತುಡ ಮುಖದರ್ಶನಮೂ ಐತದೀ . ವಾಳ್ ಅಣೆಮಿಂದ ಆತುಡ ಪೇರು ವುಂಟಾದೀ . ⁵ ಇ೦ಕ ರಾತ್ರಿ ವುಂಡಲೆದು ವಾಳ್ಕಿ ದೀಪ ಏಲುಗು ಸೂರ್ಯುಡ ಏಲುಗು ಒದ್ದು ; ದೇವುಡೈನಾ ಕರ್ತುಡೆ ವಾಳ್ಕಿ ಏಲಗು ಇಸ್ತಾಡು ; ವಾಳು ಯುಗಯುಗಾ೦ತರಮ್ಲಾನು ಆಳ್ತಾರು . ⁶ ಆ ಮೀ೦ದ ವಾಡು ನಾಕೀ - ಈ ಮಟ್ಲೂ ನ೦ಬತಕ್ಕಮೈನಾ ನೀಜಮೈನವೀ ; ಪ್ರವಾದಿಲ ಆತ್ಮಲ್ನೀ ಪ್ರೇರೇಪೀ೦ಚ್ಚೆ ದೇವುಡೈನಾ ಕರ್ತುಡು ಬಿರ್ನಾ ಸ೦ಭವಿಚ್ಛತಕ್ಕ ಸ೦ಗತಿಲ್ನೀ ತಾನ್ ದಾಸುಲ್ಕಿ ತಿಳಿಯಪಡಿಚ್ಚೆಕಿ ತನ್ ದೂತುಡ್ನಿ ಅಪ್ಪಿಂಚ್ಚೆ . ⁷ ಇಗೋ ಬೀರ್ನಾ ವಾಸ್ತನು . ಈ ಪುಸ್ತಕಮ್ಲಾ ರಾಸುಂಡ ಪ್ರವಾದನೆ ಮಾಟುಲ್ನಿ ಕೈಗೊನ್ನಿ ನಡಿಸೋಡು ಧನ್ಯಡು ಅನೀ ಸೋಪ್ಪೆ . ⁸ ಈ ಸ೦ಗತಿಲ್ನೀ ಈನೀ ಸೂಸ್ನೋಡು ಯೋಹಾನುಡು ಅನೆ ನಾನೇ . ನಾನು ಈನಿ ಸೂಸ್ನಪ್ಡು ಈ ಸ೦ಗತಿಲ್ನೀ ನಾಕಿ ಸೂಬಿಚ್ಚಿನಾ ದೇವದೂತುಡ್ಕಿ ನಮಸ್ಕಾರಮ್ ಸೆಯ್ಯಲಾ ಅನಿ ವಾಡ್ ಪಾದಾ೦ಕ್ಕಿ ಪಡ್ತಿ . ⁹ ವಾಡು ನಾಕಿ - ಸೇಯ್ಯದು ಸೂಡೀ ; ನಾನು ನೀಕೂ ಪ್ರವಾದಿಲ್ ಅಯ್ಯುಂಡ ನೀ ಸಹೋದುರುಲ್ಕಿ ಈ ಪುಸ್ತಕಮೂಲಾ ರಾಸೀನಾ ಮಾಟ್ಲೂನೀ ಕೈಕೊ೦ಡು ನಡೆಸೋಳು ಜೋತ್ಲಾ ದಾಸುಡ್ ಐನಾನು ; ದೇವುಡ್ಕಿ ನಮಸ್ಕಾರಮ್ ಸೇಯ್ಯಿ ಅನೀ ಸೊಪ್ಪೇ . ¹⁰ ಇದೀ ಕಾಕು೦ಡ ವಾಡ್ ನಾಕಿ - ಈ ಪುಸ್ತಕಮ್ಲಾ ಪ್ರವಾದನವಾಕ್ಯಲ್ನೀ ಗುಪ್ತಮೈಯ್ಯಿ ಪೆಟ್ಟದು ; ಇವಿ ನೆರವೇರೆ ಸಮಯಮೂ ಸಮೀಪಮೈನ್ದೀ . ¹¹ ಅನ್ಯಾಯಮೂ ಸೇಸೊಡು ಇ೦ಕ ಅನ್ಯಾಯಮ್ ಸೈನೀ ; ಮೈಲಿಗೆಐನಾಡು ತನ್ನಿ ಇ೦ಕ ಮೈಲಿಗೆಸೆಸ್ಕೊನೀ ; ನೀತಿವ೦ತುಡು ಇ೦ಕ ನೀತಿನೀ ಅನುಸರಿಚ್ನಿ ; ಪವಿತ್ರುಡು ತನ್ನಿ ಇ೦ಕ ಪವಿತ್ರಮ್ ಸೇಸ್ಕೊನೀ . ¹² ಇಗೋ ಬೀರ್ನಾ ವಾಸ್ತನು ; ನಾನು ಪ್ರತಿಯೋಕುಡ್ಕಿ ವಾಡ್ವಾಡ್ ನಡತೆ ಪ್ರಕಾರಮೂ ಇಚ್ಚತಕ್ಕ ಪ್ರತಿಫಲಮೂ ನಾನ ಸೇತ್ಲಾ ವು೦ಡದೀ . ¹³ ನಾನೆ ಆದಿ , ಅ೦ತ್ಯಮೂ , ಮೊದಲನೆಯೋಡು , ಕಡೆಯೋಡು , ಪ್ರಾರ೦ಭಮೂ ಸಮಾಪ್ತೀಯೂ ಐನಾನು . ¹⁴ ತಮ್ ನಿಲುವ೦ಗಿನೀ ಕಡೀಕನೋಳು ಧನ್ಯಲು ; ವಾಳ್ಕಿ ಜೀವವೃಕ್ಷ ಹಕ್ಕು ವು೦ಟಾದೀ ವಾಳು ವಾಕ್ಲಿಯಿಂಚ್ಚ ಆ ಪಟ್ಟಣಮ್ ಲೋಕಿ ಸೇರ್ತಾರು . ¹⁵ ಕುಕ್ಕುಲ್ಲಕ ವುಂಡೋಳು , ಮಾಟಗಾರುಲೂ , ಜಾರುಲು , ಕೊಲೆಪಾತ್ಕುಲು , ವಿಗ್ರಹಾರದುಕುಲು , ಸುಳ್ಳಾಯಿನ್ದಾನೀ ಪ್ರೀತಿ೦ಚ್ಚಿ ನಡುಸೋಳ್ ಅಂದ್ರೂ ಹಾತರ್ ವುನ್ಟಾರು ಅನೀ ಸೊಪ್ಪೇ . ¹⁶ ಯೇಸು ಅನೆ ನಾನು ನಾ ಸಭೆಲ್ನೀ ಪ್ರಯೋಜನ್ ಅರ್ಥಮೈಯ್ಯಿ ಈ ಸ೦ಗತಿ ವಿಷಯ್ಮುಲಾ ಮೀಕೀ ಸಾಕ್ಷಿ ಸೊಪ್ಪೆಕೊಸ್ಕರಮೂ ನಾ ದೂತುಡ್ನಿ ಅ೦ಪೀಸ್ತಿ . ನಾನು ದಾವೀದುಡ್ ವ೦ಶಮ್ ಅನೆ ಬುಡಮ್ನಿಚ್ಚ ಪೂಟ್ಟೀನಾ ಚಿಗುರು ವಾಡ್ ಸ೦ತತಿ ಉದಯ ಸೂಚಕಮೈನಾ ಪ್ರಕಾಶಮ್ ವುಳ್ಳ ನಕ್ಷತ್ರಮೂ ಐನಾಡು . ¹⁷ ಆತ್ಮುಡು ಮದಲಗಿತ್ತಿ - ರಾ ಅನ್ಟಾರು . ಇನ್ನೋಡು - ರಾ ಅನ್ನಿ . ಬಾಯಾರು೦ಡೋಡು ರಾನೀ. ಇಷ್ಟಮ್ ವುಂಡೋಡು ಜೀವಜಲನೀ ಕ್ರಯಮ್ ಲೇಕುಂಡ ಸೀಸ್ಕೊನ್ನಿ . ¹⁸ ಈ ಪುಸ್ತಕ ಪ್ರವಾದನಾ ವಾಕ್ಯಲ್ನಿ ಇನ್ನೆ ಪ್ರತಿಯೋಕುಡ್ಕಿ ನಾನು ಸೊಪ್ಪೇ ಸಾಕ್ಷೀ ಹೆಮಂಟ್ಟೆ - ಇವುಟ್ಲುಕಿ ಯೌವಡೈತ್ನೂ ಜ್ಯಾಸ್ತಿ ಮಾಟ್ಲುನೀ ಹೇತ್ಕೊಚಿ ಹೇಸ್ತೆ ದೇವುಡು ವಾಡ್ ಮೀ೦ದ ಈ ಪುಸ್ತಕಮ್ಲಾ ರಾಸುಂಡ ಉಪದ್ರವಲ್ನೀ ಎತ್ಕೋಚ್ಚಿ ಹೇಸ್ತಾಡು . ¹⁹ ಯೌವಡೈತ್ನೂ ಈ ಪ್ರವಾದನಾ ಪುಸ್ತಕಮ್ಲಾ ವುಂಡ ಮಾಟ್ಲುಲಾ ಒ೦ಕಟೀ ಐತ್ನೂ ಸೀಸ್ಕೊನಿ ಇಸ್ಪೆಟ್ತೆ ಈ ಪುಸ್ತಕಮ್ಲಾ ರಾಸುಂಡ ಪರಿಶುದ್ದ ಪಟ್ಟಣಮ್ಲನೂ ಜೀವವೃಕ್ಷಮ್ಲಾನೂ ವಾಡ್ಕಿ ವುಂಡ ಪಾಲ್ನಿ ದೇವುಡು ಸಿಸೇಸ್ತಾಡು . ²⁰ .ಈ ವಿಷಯಮ್ಲಾ ಸಾಕ್ಷಿ ಸೊಪ್ಪೋಡು - ನಿಜಮೈಯ್ಯಿ ಬಿರ್ನಾ ವಸ್ತಾಡು ಅನಿ ಸೊಪ್ತಾಡು . ಅಟ್ಟೆ ಕಾನೀ ಕರ್ತುಡ್ ಐನಾ ಯೇಸುವೇ , ರಾ . ²¹ ಕರ್ತುಡ್ ಐನಾ ಯೇಸುವಿನ ಕೃಪೆ ಅಂದ್ರೂ ಜೋತ್ಲನೂ ವು೦ಡ್ನಿ . ಆಮೆನ್ .