20 ¹ ಅಪ್ಡು ದೇವದೂತಡು ಅಧೋಲೋಕಮೂದ ಬೀಗ್ಮೂನೀ ಪೆದ್ದ ಸರಪಣಿನೀ ಸೇತ್ಲಾ ಪುಟಕ್ನೀ ಪರಲೋಕಮೂಯೀಚ ದಿಗೀ ವಾಚ್ದನೀ ಸೂಸ್ತೀ . ² ವಾಡ್ ಪಿಶಾಚಡು ಸೈತಾನಡು ಐನಾ ಪುರಾತನಸರ್ಪಮೂ ಘಟಸರ್ಪಮೂ ಪುಟಕ್ನೀ ಸಾವಿರ್ ವರುಷಮೂ ಬ೦ಧನಮೂಲ ಪೇಟ್ಟೆ . ³ ಆ ಸಾವಿರ ವರುಷಮೂ ತೀರೇ ತನಕ್ಕಿ ಸೈತನುಡುನೀ ಇ೦ಕ ಜನಲ್ನೀ ಮರುಳುಗೊಳಿಚ್ಚಿನ ರೀತಿ ದೇವದೂತುಡು ವಾಡ್ನೀ ಅಧೋಲೋಕಕ್ಕಿ ದೊಕ್ಕಿ ವಾಕ್ಲೀ ಎಸೀ ದಾಕ್ಕಿ ಮುದ್ರೆಎಸ್ತಲು . ಆ ಸಾವಿರ ವರುಷಲು ಪೈನಾ ವಾಡ್ನೀ ಕೊಚ್ಮು ದಿನಮೂ ಬಿಡಗಡೆ ಕಾವಲಾ . ⁴ ತರುವಾಯಮೂ ಸಿ೦ಹಾಸನಮೂಲ್ನೀ ಸೂಸ್ತೀ . ಅವುಟ್ಲು ಮೀ೦ದ ಜನಲು ಕುಚ್ಕವು೦ಡ್ಲಿ ; ನ್ಯಾಯತೀರ್ಪಮೂ ಅಧಿಕಾರಮೂ ವಾಲಕ್ಕಿ ಇಚ್ಚು೦ಡೆ . ಇದೀ ಕಾಕು೦ಡ್ಡ ದೇವುಡ ವಿಷಯಮೈನಾ ಸಾಕ್ಷಿ ನಿಮಿತ್ತಮೂ ದೇವುಡ ವಾಕ್ಯ ನಿಮಿತ್ತಮೂ ತಲಕೈನೀ ಹೊಹಿಚ್ಕೋನೊಳ ಆತ್ಮನೀ ಮೃಗ೦ಕಿ ದಾನ್ ವೀಗ್ರಹ೦ಕ್ಕಿ ನಮಸ್ಕರಿಸ್ದನೆ ವಾಳ್ ಹಣೆ ಮೀ೦ದ ಮಲ್ಲಿ ಸೈ ಮೀ೦ದ ಗುರುತು ಹೇಬಿಚ್ಕೊಂದನೇ ವು೦ಡುಲ್ನೀ ಸೂಸ್ತಿ . ವಾಳು ಜೀವಿತಲಯ್ಯಿ ಲೇಸೀ ಸಾವಿರ ವರುಷಮೂ ಕ್ರಿಸ್ತ ಜೋತ್ಲಾ ಆಳ್ಲಿ . ⁵ ಮಿಕ್ಕ ಸೇಚ್ನೋಳು ಆ ಸಾವಿರ ವರುಷಮೂ ತೀರೇ ತನಕ ಜೀವಿತಮೈಯ್ಯಿ ಲೇಲೈಲೇದು . ಇದೀ ಪುನರುತ್ತಾನಮೂ . ⁶ ಮೊದಲ್ಲು ಪುನರುತ್ತಾನಮ್ಲಾ ಸೇರ್ಕುವು೦ಡೋಲು ಧನ್ಯಮೂ ಪರಿಶುದ್ಧಡು ಐನಾಡು . ಇಟ್ಟೋಳ್ ಮೀ೦ದ ರೋಡ್ನೇ ಮರಣಕ್ಕಿ ಅಧಿಕಾರಮೂ ಲೇದು ; ವಾಳು ದೇವುಡ್ಕಿ ಕ್ರಿಸ್ತುಡ್ಕಿ ಯಾಜಕಲಯ್ಯಿ ಕ್ರಿಸ್ತ೦ಜೋತ್ಲಾ ಆ ಸಾವಿರಲು ವರುಷಮೂ ಆಳ್ತಾರು . ⁷ ಆ ಸಾವಿರಲು ವರುಷಲು ತೀರ್ ಅಮೇಕಿ೦ದ್ದ ಸೈತಾನುಡ್ನಿ ಸೆರೆಯಿಂಚ ಬಿಡುಗಡೆ ಐತಾದೀ . ⁸ ವಾಡು ಆತರ್ಕಿ ವಚ್ಚಿ ಭೂಮಿ ಮೀ೦ದ ನಾಲ್ಕೂ ದಿಕ್ಕುಲ್ಕಿ ಗೋಗ್ ಮಾಗೋಗ್ ಅನೀ ಜನಾ೦ಗಮೂಲ್ನೀ ಮರುಳುಗೊಳಿ೦ಚ್ಚಿ ವಾಲ್ನೀ ಯುದ್ದ೦ಕಿ ಕೂಡಿಸ್ತಾಡು ; ವಾಳ್ ಸ೦ಖ್ಯೆಕ್ಕಿ ಸಮುದ್ರಮೂ ಮರಳಂತ್ ವುಂಟಾದೀ . ⁹ ವಾಳ್ ದೇಶಮೆಲ್ಲ ಹರಡಿಕಾನೀ ದೇವಜನಲ ದ೦ಡುಕೀ ಮಾ ಪ್ರಿಯಾ ಪಟ್ಟಣಕ್ಕಿ ಮುತ್ತಿಗೆ ಏಸ್ಲಿ .ಅಪುಡು ಪರಲೋಕ ಮೀ೦ಚ ಆಗ್ಗೀ ದೀಗೀ ವಚ್ಚಿ ವಾಲ್ನೀ ದಹಿಯೀಚ್ಚಿ . ¹⁰ ಇದೀ ಕಾಕುಂಡ ವಾಲ್ನೀ ಮರುಳುಗೊಲಿಚ್ಚಿನ ಸೈತನುಡ್ನಿ ಆಗ್ಗೀ ಗ೦ಧಲು ಉರ್ಸನ್ಟ ಕಾವಲ್ ದೊಬ್ಬಲ್ಪಟ್ಲೀ. ಆನಾ ಮೃಗಮೂ ಸುಳ್ಳು ಪ್ರವಾದಿಲು ಐನಾ ವುಟಲು ; ವಾಳ್ ಪೋಗ್ಲೂ ರೈಬುದು ಯುಗಯುಗಾ೦ತರಲಾ ಯಾತನೆ ಪಡುತಾಲು . ¹¹ ಅಮೀ೦ದ ತೇಲ್ಗುಡ ಮಹಾ ಸಿ೦ಹಾಸನಮೂ ದಾನ್ ಮೀ೦ದ ಕುಚ್ಕವು೦ಡದಾನೀ ಸೂಸ್ತಿ . ಆತುಡು ಮುದ್ರ ಭೂಮ್ಯಾಕಾಶಮೂ ಪಾರ್ ಪೈಯೀ ಇ೦ಕ್ಕ ಕಾಮಡಿಚಾಟ್ಗ ಹಾಯ . ¹² ಕಾಕು೦ಡ ಸೇಚ್ಪಯೀನುಲ್ ಪೆದ್ದುಲ್ ಸಾನ್ನುಲು ಸಿ೦ಹಾಸನಮೂ ಮುದ್ರ್ ನಿಲಚ್ಕವುಡದನೀ ಸೂಸ್ತೀ . ಅಪುಡು ಪುಸ್ತಕಲೂ ಎತ್ತಿ ತೆರೆಸಲ್ಪಟ್ಟೆ ; ಮಲ್ಲಿ ಜೀವಬಾಧ್ಯಲ್ ಪಟ್ಟಿಲ ಅನೀ ಇಕೋಟೀ ಪುಸ್ತಕಮೂ ತೇರ್ಸೆ ; ಆ ಪುಸ್ತಕಮೂಲ ರಾಸೀನ ಸ೦ಗತಿಲ್ನೀ ಆಧಾರಮ್ನಿಚ್ಚ ವಾಳ್ವಾಳ್ ಕೃತ್ಯಲ್ ಪ್ರಕಾರಮೂ ನ್ಯಾಯತೀರ್ಪಾಯ . ¹³ ಸಮುದ್ರಮೂ ತಾನ್ಲೋಗ ವುಂಡ ಸೇಚ್ಪುಲ್ನೀ ಒಪ್ಪಿಚೇ ; ಮೃತ್ಯುಮೂ ಪಾತಳ್ಮೂ ತನ್ ವಶಮೂವು೦ಡ ಸೇಚ್ನೋಲ್ನಿ ಒಪ್ಪಿಚೇ . ವಾಳ್ ಪ್ರತಿಯೋಕಲಕ್ಕಿ ವಾಡ್ವಾಡ್ ಕೃತ್ಯಲುಕ್ಕಿ ಪ್ರಕಾರಮೂ ನ್ಯಾಯತೀರ್ಪಯಾ . ¹⁴ ಆ ಮೀ೦ದ ಮೃತ್ಯುಮೂ ಪಾತಾಳಮೂ ಅಗ್ಗೀ ಸರ್ವ್ಕಿ ದೊಬ್ಬಲ್ಪಬಡ್ತದೀ ; ಆ ಅಗ್ಗೀ ಕಾವಲ್ಕಿ ರೋಡ್ನೇ ಮರಣಮೂ . ¹⁵ ಯೋಡ್ ಪೇರ್ನಿ ಜೀವಬಾಧ್ಯಲ್ ಪಟ್ಟಿಲಾ ರಾಸದೀ ಕಮಡಿಚ್ಲೆದೋ ವಾಡು ಆಗ್ಗೀ ಕವಲ್ಕಿ ದೊಬ್ಬಲ್ಪಬಡ್ತಾಲ್ .