¹ Janci kwa mi ja kasau, kakə guzaɓcin Masipu na ndak jiba asir səku ke. ² Kasu ke, ndanci nda wana ke da dlaɓə na jirewa. ³ Amman i riganai, be gangam ne kwa dlama ni hagata, ko i shariyaram zada kə ndawa. Atəro na dlama hagata i aɗa ga bai. ⁴ Na zəga bai ko iyu na bik rama i aɗaganai, amman sutku tatkə bai ma i na aipu. A dlama ni hagata nən Məgənyi. ⁵ Gaɗa kasən, kwa dlama hagata bai kapən lakwtu, kapən Məgənyi da katai. Aci a parakta na be wara da dəɓsa a kunuk aiwakwina mak. A bazarta na mak be wara da dəɓsa a kunu gəshi, wate tike a bina sapərata da rik səku. ⁶ To yaganaucin, na mpi duvu təku mak iɗa ganai na Apollas gaɗa kun, gaɗa da rija kwa gugza aɗak rama tuku wara ram maya " Kwa nuta be wara nda tarnu bai." Dlamən gara kasən gaɗa karr ɗagai da tlatlə aɗa gəri da tatki ka ɗagai rəma na ɗagai. ⁷ To da kurak nən tai a gadava kun na ndo gafkai? Kun na tam wara nda bari kun i vatku bai? Nda bari kun i vatku nən, ɗawun tam kwa kəma adla ka nda dlam kasən bai? ⁸ Kwa bana be wara mak kwancu! kwa dlamu nakun nda ləman! kwa dlamu nakun nda garva - aɗa gayi na ja ke bai! Jirewa, dlakwi ganai atəne kwa dlam garva, gaɗa wa dlam garva aɗa gayi nakun. ⁹ Ii lawan ganai, ja ndak wanyi, Səku sərmi naja kakə ndawa wara nda wudi dikshi hagata tək. Ja dlamə naja bi lawan i duniya, i rik malekawaɗ, na ndawa ke. ¹⁰ Ja dlaɓu naja kakaɓawaɗ gaɗa Masipu, amman kun nda asən i kunu Masipu. Ja taskin amman kun nda awayau. Ndaa lawan ja na saksakta bai, kun kwa nda saksakta. ¹¹ Harr i lakwtutku, ja kəmu maya na gəji, ja na kacum bəlalmin bai, ja sa dadak tlapar, zam ja dlaɓu naja na wunduwawin bai. ¹² Ja dlam kabine tlapar, jaa wana na amija. Lakwtu wara nda bari ja bone, jaa barkawatau. Lakwtu wara ndaa dlame ja kabine, jarɗə naja i miyau. ¹³ Lakwtu wara nda nanga ja, jaa rama na gəshi gayi. Ja dlaɓə, kuru gusku yaye nda mana ja ka tluma kə duniya na be wara mak kə ɓəne. ¹⁴ Naa tarne bitku mak gaɗa na zhiwə kun bai, amman gaɗa na dlami kun ɗaɗam kakə kutli ganai bik ntuta. ¹⁵ Ko kun na ndak jiba kun dubu guma i kunu Masipu yaye, kun na afafkin gawa bai. Atəro iyu na dlmən ga afuk kun i kunu Masipu Yeso da rik wazək. ¹⁶ Gaɗa kasen, na ɗaura kun kwa dlaɓi nda gugza na be wara na dlamau. ¹⁷ Be ɗawu kenan na wane Timoti i rikun, wunga bi ntuta na baci dlamak jirewa i kunu Məgənyi. A tanadikun duvu kunu Masipu, kakə wara na gugzekshi i rawanke na kunu Susu Magita tawanke. ¹⁸ Amman gusku kasau, ndo gafkai a kunakun dlam nakshi nda kəma adla, akshi a dlamau ka nade i rikun bai. ¹⁹ Amman nani iri kun go sukwakuya, Məgənyi ntutə nən. Kasən ke na lawan kunu ramak nda kəma adlakshi rankata, naiki kərmai shi ke. ²⁰ Atəro Garva Səku arɗi i aɗa rama rugara bai, amman na kərmai cam. ²¹ Kwan cu tam? Nani na zawa iri kun ra nani na ntuta na nunuwa kə ankal?