¹ Ndade dija rama kun ma na wanak nyən kə tapai ii gadava kun, zada wanak nyəm kə tapai wara ndaa kasakta na atu bai ko i kunuk nda buuka barik jirewa. Labar wara ndade dija atəne, harr wara ɗagai da kunakun a maka ama afuk gəri. ² Kwa kəma adla ke tlpar! Kwa dlaɓa na gəshi aiwa bai? Aci baci dlama bitku, dolle ndaaji na aci da kunakun. ³ Atəro ko naɗa gayi nakun ii kunuk təka bai, amman naɗa gayi nakun ii kunuk Nunuwa Səku, na dlam na hagata səram ii baci dlama wana təku, ka na riwu. ⁴ Lakwtu wara kwa cicpunakun ii kunuk dləgun Məgənyi Yeso, nunuwa ganai aɗa gayi nakun ii kunu kərmai Məgənyi Yeso, na dlam na hagata səram ii warau. ⁵ Na dlam kasau gaɗa na ɗəvarə na warangu ii Ləspər gaɗa nda ɗayi na təkau, gaɗa nunuwa gəri da kaci ii gafa Məgənyi. ⁶ Kəmak adla kun dlam bəlan bai. Par kwa zəga bai yisti rap ɗagai a dləmta na mak be wara nda ləmamiyu? ⁷ A ciriɓtina na aɗakun dari gamanak yisti, gaɗa kwa dlaɓi nakun kararak ləmamiya kə gurasa wara na yisti bai. Atəro nda dlamna sanam Masipu, matkam gwamak wa kə ngumuri. ⁸ Gaɗa kasən, wa dalma ngəmurawa na gamanak yisti bai, yisti kə muwa na kə kəmangar. I sərən sutku, wa dlama ngəmurawa na sənasən wara na yisti bai kə irr'i bəlan na jirewa ke. ⁹ Na tarni kun i kunuk sakwtu ganai maya kwa nəpka aɗa kun na nda tapi bai. ¹⁰ Na rama na nda tapi kə duniya təku bai, ko nda kənama, ko nda katləm, ko nda zata garəm, gaɗa kapən kwa ɓəri na akshi se kwaivu duniya təku. ¹¹ Amman gususku kasau na tarne kun maya kwa nəpka aɗa kun na nən wara nda ɗaura gəri ma yagana ko ama wara nda ɗaura ma yagana i kunu Masipu amman aa mbasu i kunu tapai, ko baci kənama, ko baci zata garəm, ko baci shiyak ndawa, ko baci sa, ko baci katləm, ko bikta kwa ta na nəntən bai. ¹² Gaɗa na dukuk dlama hagata nana i ndawa wara bari jirewa bai? Sərən kasau, kwaa dlama hagata i ndawa wara barna jirewan kun bai? ¹³ Amman a dlama hagata ii ndawa wara bari jirewa bin Səku. "Aa dina na munufuk gənən da kuna kun"