¹ Amman iyu, yaganaucin, na dəmu dlama rama na kun kakə ndawa wara na Nunuwa Səku a kunakshi bai, amman kakə ndawa wara a kunu təka, kakə kulaɓaɓin i kunu Masipu. ² Na dəɓa kun na anyi baya na bari kun tləwi bai, gaɗa kwa bata kiɗa tləwi bai, harr gususku yaye kwa bata bai. ³ Atəro gusku yaye kwa kunuk təka.Inde gusku yaye kwa ta gəshi kwa gamɗaya i gadava kun nən, kane gusku yaye kwa kunu təka bai, kwa rakan ke i kunu kaktla ndawa? ⁴ Gaɗa ɗagai a ramo ma "Iyu na aku Bulus," ɗagai ke da ram maya, "Iyu na aku Apollas," kane kwa mbasu təkakwina bai? ⁵ To Apollas nən tai? Bulus ke aci tai? Guzaɓcin ne wara kwa bari jirewa da rikshi, tikekshi ke Səku bardi ci wana. ⁶ Iyu na dlam zəm, Apollas ke da bari amm, amman a tlatlu nən Səku. ⁷ Gaɗa kasən, baci zəgəm na baci bari amm, akshi mak bewam bai. Amman a tlatlun Səku. ⁸ Baci zəgəm gu na baci bari amm gu, makshi gayi, tike a gənyi na nuba gəri kalkal na wana wara aci dlamu. ⁹ Atəro ja ndak wana Səku, kun ke mbasu kam Səku, ləmak Səku ke. ¹⁰ Gaɗa herr Səku harr na dlamənga gwanik baci ləma, nampa shi ləmau, ɗagai ke dampi ləma i ɗau. Se nən tawanke da nkalci na kakə wara aci ampi ləmau. ¹¹ Atəro na nən wara a dəmu mpik shi ləma dama bai na wara nda mpau, wato Yeso Masipu. ¹² Gusku kasau ro tike mpa ləma i ɗa kə səkur gu na zinariya, ko na azurpa, ko na guguyak wara na tumanja, ko na dəm, ko na azəm, ko na luma, ¹³ wana gəri a paraktangara, gaɗa gafo tən a dina ashir gəri. Atəro nda tatka gəri i kunu aka. Akau ke a kaktla na bəlan wana wara tike dlamu. ¹⁴ Nən tawanke wara wana gəri dlamən gara bəlan nən, a gənyi na tumanja gəri, ¹⁵ amman nən tawanke wara wana gəri bakən garan, a dlama na asar, amman aci na aɗagəri a katən gəri, sede ka aci vure da gadva aka. ¹⁶ Kane kwa zəga bai kun wunduwa Séku, Nunuwa Səku ke dambasu a kuna kun? ¹⁷ Nən wara dləmtə wunduwa Səku kwaya, Səku a dləmta na aci. Atəro wunduwa Səku na aipu bai, kun ke kaseənu ¹⁸ Nən wan da ləvata aɗagəri bai, ɗagai a kunakun a lawangu ka aci baci asən i zaman təku nən, da dlɓan gəri "kakaɓu" gaɗa da dlaɓi baci asən. ¹⁹ Atəro asən duniyatku kakaɓukwina i rik Səku. Atəro da tarna maya, "Aci a jəba na nda asən i kunu munafukkwinakshi". ²⁰ Kasən ke wam, Məgənyi zəgana kuraram nda asən vadku". ²¹ Gaɗa kasən, nən wan dakəma adla iɗak ndawa bai. Gaɗa atəro tanke kukun, ²² ko Bulus, ko Apollas, ko Kepas, ko duniya, ko aro, ko mutu, ko bi gususku, ko be wara ani i kəma. Mak kukun. ²³ Kun ke kə Masipu, Masipu ke kə Səku.