¹ Lakwtu wara nade i ri kun, yaganaucin, nade na zəgayak rama ko asən bai lakwtu wara na dlam wagərma bik jirewa wara da dəɓsa i ɗak Səku (Lakwtu wara na dlam saida i ɗa Səku). ² Gaɗa nampadu i gəshi ganai nazəga be wambai lakwtu wara na ɗa gayi na kun, se Yeso Masipu rugəri, wara nda dləga ci. ³ Na ɗa gayi nakun i kun taskinkwina, i kunu kalau na gafaka tlapar. ⁴ Sakwtu ganai na wagərma wara na dlamau na təlam asən wara a tlatle kun ankal bai. Sərən kasən, ramau de da parakta dari Nənəwa Səku na kərmai, ⁵ gaɗa barək jirewa kun da dlaɓa i kunuk asən nəngaiwa bai, amman i kunu kərmai Səku. ⁶ Gusku kasau ja dlama rama asən i ndawa wara garɗənakshi i kunu ramak Səku, amman i kunu asən duniya təku bai, ko kə nda garva kə zaman təku bai, wara a nutanakshi. ⁷ Sərən kasən, ja dlamak rama asən Səku i kunu jirewa wara da dəɓsak, i kunu asən wara da dəɓsa wara Səku mpau tən nda dlamu zaman kərmai wa bai. ⁸ Na baci garva kə zaman təku wam bai wara zəga asən tuku, gaɗa da dlaɓa akshi na asən tuku i lakwtu nən, da akshi dləgə Məgənyi wara Səku saksaktu bai. ⁹ Amman kakə wara da tarna, "Be wara dã ika bai, wara aguɗ kəma bai, na gəshi wara tumantu bai," be wara Səku sapəratu i ndawa wara ntutaci. ¹⁰ Jandu təku be wara Səku paraktiwa da rik Nunuwa gəri. Nunuwa Səku ro a bəɗiya tanke, harr wara pəɗəm kə Səku. ¹¹ Atəro a zəgi rama kunu gənən nən tai, se nunuwa warau wara a kunu gəri? Kasən ke, go nən wara a lawan na be pəɗəm kə Səku, se Nunuwa Səku. ¹² Atəro wa gənu nunuwa kunuk duniya bai, amman Nunuwa wara deu dari Səku, gaɗa wa zəgi be wara nda bari wa tlapar da rik Səku. ¹³ Wa rama bitku mak təlam wara asən nəngaiwa a dumu gugzo bai, amman be wara Nunuwa Səku a gugze wa. Nunuwa Səku a parakta təlam kə Nunuwa Səku na asən kə Nunuwa Səku. ¹⁴ Nən wara na Nunuwa Səku bin a gənyi be wara deu dari Nunuwa Səku bai. Atəro akshi ari gəri kakaɓukwina. Aci a dumu sanutakshi bai gaɗa a paraktakshin Nunuwa Səku. ¹⁵ Nən wara na Nunuwa Səku nən a dlama na kagala i be tawanke, amman aci a dəɗa kagala ndawa ɗagai wambai. ¹⁶ "A dəmuna zəgi bi gəshi Məgənyin tai, wara harr da ɗawaci da dlam baya?" Amman wa na gəshi zada kə Masipu.