ሃፑክ 9 {ኣምኒዬንካ ሳውል} ¹ ዬ ሳውል ካንዻ ውርካ ዻይኔንካ ታቺ እን ኒሼኔ [ቦውዬኔ] ኩያ ሃምካ ታታቻንካ ውርካ ቃሹጝ፤ ² ጊታይ ዻዬ ጉዋርካ ታቺ እን ኣይን ጁሙጝ ኣይን ሃኣጙጝ ጌያ ሃሚንያጝ ካቁሞጝ ካቻሊዬ እያጝካ ኢየሩሳሌም ቦሼኑጝ ካጋዬ ቶኦካ ይሁኔብ ጊታይ ኣኔን ደማስቆ ወርቀቱጝ ይወና ታቺ እንካ ውርካ ቃሹጝ። ³ ደማስቆ ሄክሼን ሺዺዬ ዺታኮጝ ኦሜሌል ሉጉድ ከፎላ ጌያ ከኦካ ማራ ኔኒ ሜሌል፤ ⁴ እሺ ቡዳ ዳሊ ክያኒ፤ ከሹ እንዻ ናቅዲ ኬና ሺጝ ሳውል፣ ሳውል፥ ሃናንዳካ ኦ የዋኬ ኣኑጝ፤ ዋያ? ⁵ ሳውዻ ሺጝ ታቹጝ ዮ፤ እን የኣይ ኒን? እሺዻ ሺጝ እያጝ፤ ሃኣንያጝ ሃኣይ ኢየሱስ እን የዋኮጝ። ⁶ ካንዻ ናሹጜ ሁሉኳ ሃምካ ከተማ እኑጝ፤ እን ካሁሉኩሼ እን ኣሽክዬኑጝ ሜይሼ እንባ። ⁷ ውር ጊታይ ኣኔን ከሳውልዻ ፓዬኑጝ ዋይባ ናቅዲዬ ከሹ እን ማሬ ውር ክየምጵንዻ ጌዬኑጝ፤ ጎም ቶግ ጊዬይ ጎራ። ⁸ ሳውዻ ናሹጝኬ ኦይ ቡዴዬ ሻም ካርቡ ኔኒ ዋጭያጝ ካኒ ቻሊኬን ኦኬ ክየምጵንዻ ጌዬን፤ ዬ ውራን ጎም ቡዋ ኔኒዬ ጊያኒሼ ዾቅሼያ ደማስቆ፤ ⁹ ሹ ጂያንዻ ካርቡ ኔኒ ማቲያ ሙሙዾ፤ ካኒ ዱምኬን ሩቡዬ ሙዋዌ። ¹⁰ ከኦካ ደማስቆዻ ኣና ውርካ ዻይኔን ኬና ሺጜ ሐናኒያ፤ ታቺ እንዻ ከሹካ ሺጝ ሐናኒያዬ ሺዋ እሺዻ ታቹጝ ዮ፤ ዮዎ/ ¹¹ ታቺ እንዻ ዋይሼ እሺ እያጝ ናሹጜ ከጉዋር እን ሺጜ [ታሱጝ] ካምባ ሃምካ ቶኦካ ውር እን ሺጜ ይሁዳጝ፤ ኦይንዻ ውር ክየም ኬና ሺጜ ሳውልካ ጠርሴስ ኣኔን ይሁኔኔ ዎሽ እንባ፤ ¹² ናንዳካ ኦ ውር እን ሺጜ ሐናንያ ካካም ሃሚን እሺ ኣኔዬ ካኣይሼ ቡዋዌ ካሻሜ ካርቡ ኔኒ ዋጩጝ ጌያ ከሹካ። ¹³ ሐናኒያዻ ዋሼ ሺጝ እያጝ፤ ታቹጝ ዮ፤ ውሩጝ ይንጌ ከውርካ ይሁኔን ጊታይ ኣኔን ኢየሩሳሌም ቦሼ ኦኬ ጋራ ኬና ኣኔን እያኑጝ ሃዋይያ ከኦካ ውር ጁዋኑ፤ ¹⁴ ኩኔ ዮጝ ውር ጊታይ ሺወን ሮጝ ኑኑ ፓይላ ካቁሜን ቦዋ ከኦካ ውርካ ቃሽ ጌጳሞዬ ጊያ። ¹⁵ ታቺ እንዻ ዋይሼ እሺ እያጝ፤ ካምባ ውሩጝ ከኦካ ሌሜንካ ውር ጊታይ ማር ይሁኔኔ ታታቻኔ ፕርዻ ከኦካ ሌሜንካ ዛርሲካ እስራኤል ካናሬ ሮጝ ናኑጝ ሃኣንቲቲ ኬና ናኒ ጊድዬ፤ ¹⁶ ኣንዻ ናንዳካ ሮጝ ናኒ ካጌዬ ጋሎ ኬና ኣይ ኣያኑጝ ሃዹዋልሼ እሺባ። ¹⁷ ሐናንያዻ ኩዬ ሁሉካ ቶኦ እን ክያጆጝ፤ ኣይሼ ኦካ ሳውልዻ ቡዋዌ ሺጝ፤ ጪኔ ናኒ ሳውል ዮ፤ የኩኒ ዮጜ ኢየሱስ ታቺ እን ዹዋልሼ እን ጉዋር ክያኑጝ፤ ካሻሜ ካርቡ ኑኑ ዋጬ ካቆቁሼ እን ከመንፈስ ቅዱሱጝ ይዕሲያ ኣን» ዋይሼ እሺ እያይ። ¹⁸ ይሪካ ከኦካ ካርቡካ ሳውል ኦኬና ሙኔን ሹቱቱና ፓቄና፤ ፕር እንቃ ቻሊያ ጌዬን፤ ናሹጜ ዱቅዬናዻ፤ ¹⁹ ኣም ዳዓኖዬ ቁዋቅትሻ። {ሳውል ከኦካ ደማስቆዬ ኢየሩሳሌሜ} ሳውል ከውርካ ዻይኔን ጊታይ ኣኔን ደማስቆጝ [ኡፓ ሹ ጁዋኑ]። ²⁰ ይሪካዻ፤ ኢየሱስ ኣዬ ውዋካ ባሪዮጝ ካሪሲያ ኦጉዋይካ ቶኦካ ይሁኔን ክሊህኔን። ²¹ ጊታይ ዋይዻ ፓይላ ከዻዹጝኔን ሺጝ፤ ውሩጝ ከኦካ ኢየሩሳሌም ውር ጊታይ ሺወን ሮጝ ይኑጝ ማር እን ኣኔን ካይሲዬኔንኪ? ፕርዻ ኩኔ ዮጝ ሃጊታይ ኣኔን ኦጝ ቁሜ ሃምካ ታታቻንካ ውርካ ቃሽ ቦሼኔኒ? ²² ዬ ሳውል ቁዋቅትሼ ኩያ፤ ናንዳካ ውርካ ኣይሁድ ጊታይ ቆቤን ደማስቆዻ እሺ ኢየሱስ ኣዬ ክርስቶሱጝ ቦኩኔ [ሜርሜሬ] ኣኔን ቶግ ጊዬይ ጎምሺሼን። ²³ ከሹ ጁዋኑዻ ጩዋ፤ ውርካ ኣይሁድ [ቻልኪሜና] ካሳውል ኒሼን። ²⁴ ዬ እሺ እባጃ ቃቦ ጊዬይ፤ እንግንዻ ናንዳካ ኒሼ ሃፑካ ከተማ እጝ ጋኔን ከሹሼ ምክሬ ባኬን፤ ²⁵ ዬ ውር ጊታይ ዻዬ ጆሌ እሹጝ ከኦካ ካርምካ ከተማ አጝ ቡል እሺ ከፑልታዬ ጎብሻ [ከቅርጫት]። ²⁶ ሳውልዻ ከሹ እን ኩኔ ኢየሩሳሌሙጝ፤ ታማ ከውር ጊታይካ ዻይኔን ዎርምኔን፤ ዬ እሺ ከኣኩሉክ ናንዳካጝ ማሬ ውርካ ዻይኔን ኣዬኔ ናንዳካጝ ማሬ ኣምኒዬኑጝ ፓይላ ሪግሼና። ²⁷ ካኣይባዬ በርናባስ ቦወ ቦሼያ ሃምካ ሐዋርያታን፤ ሳውልዻ ኣኔንባ ጃሌን ክያኒዬ ሻም እያን ጌዬ ታቺ እኔ ታቺ እን ሻም እያን ሃሳውኖጝ፤ ፕርዻ ደማስቆ ሻም እያን ናሹጜ ክሊህኔ ከሮጝካ ኢየሱሱጝ ሜይሼያ እንግን። ²⁸ ዬ ሳውል ኡፓ ከእንግን፤ ከኢየሩሳሌምዻ ሺሪዬን ኣኔን ከሮጝካ ታቺ እን ናሹጜ ሃሳውኔን። ²⁹ ከውርካ ኣይሁድ ጊታይ ፓዬንኬ ፔንካ ግርክዻ ሃሳውኔዬ ኣኔን ዜርምኔን፤ ዬ እንግን ናንዳካ ኒሼን ጋን ዎሼን። ³⁰ ጪኒጌን ኔኒዻ ከሹ እን ግባጄ ይኑጝ፤ ጎብሼ እያጝካ ቂሳርያዬ ይዕሲሼያ እያጝካ ጠርሴሱጝ። ³¹ ከሹ እን ከኦካ ይሁዳ፤ ከኦካ ቶኦካ ይሁኔን እን ኣኔን ገሊላዬ ሰማርያዬ ካርሲያ ከሹቃ ኡፌን፤ ቁዋቅትሻዻ፤ ፕርዻ ከባሪዮ ሪግሺኔን ከዋኬ ጆሌኔ ሌምዬንካ መንፈስ ቅዱሴ ጁዋንትሼ ኩያ ከኮመን። {ኤንያዬ ዶርቃዬ} ³² ጴጥሮሳዻ ከሹ እን ሺሪዬ ከፔን ሌይ ፔኑጝ፤ ጎባ ውርካ ይሁኔን ጊታይ ኣኔን ባልዳጝ ቶዬን። ³³ ኦይንዻ ጌያ ውር ክየም ኬና ማር ጃሌኔ ኡጜኔ ጆል ካራም ክያኒጵን ቦን ሎንካይ ኬና ሺጜ ኤንያ። ³⁴ ጴጥሮስዻ ሺጝ፤ ኤንያ ዮ፤ ኢየሱስ ክርስቶስ ባይሺሽ እንባ፤ ናሹጜ ጃክ ዻፓ ኑኑ፤ ኤንያዻ ናሹጛ ይሪካ። ³⁵ ጊታይ ቆቤን ባልዳዬ በሰሮናዬ ፓይላ ጌይ እሺዬ ዋክሼያ ሃምካ ታቺ እን። ³⁶ [ከኦካ ኢዮጳ እን ሺጜ ጣቢታ] ኣና ውርካ ዻይኔን ክየም፤ ሆኮልካ ሮጝ ኔኒዻ ሺጝ ዶርቃ እያጝ፤ እሺዻ ከሹ ጮል ከቁዋቅቲ ኣሽክዬን ኦኬ ሹቃዬ ኬልሺዬን ኩፓኔ ሃኬና ኡፒ። ³⁷ ከሹ እንዻ ዴሜኔ ኣርሻ፤ ውርዻ [ኡዋን ሩዋ ኔኒዬ ጋጁጛ ኦካ ቶኦ እን ኣኔን ቆፓናጝ] ³⁸ ባልዳዻ ከኦካ ኢዮጳ ናንዳካጝ ኣዬ ዲያውጝ፤ ውር ጊታይካ ዻይኔን ጴጥሮስ ኣኒኔ ባልዳ ከሹ እን ዋዮጝ፤ ይዕሲ ውር ዻወ ሺጝ ባንዞ ኩዋባ ይሪካ ሃም ጉዋዩዬ ይወና። ³⁹ ጴጥሮስዻ ናሹጜ ኩያ ከእንግን፤ ከሹ እን ሄክሼ ሃሚንዻ ቡልሼያ እሺ ሃምካ ቶኦ እን ኣኔን ቆፓና ክያኒዻጝ፤ ዳልሳንዻ ፓይላ ዶርቃ ከሹዋን ጊታይ ኣኒኔ ከእንግን [ቀምስ ጊታይ] ኣሽክሼ እንግኔ ኣፓላዬ ዹዋልሼ እሺዬ ቆብ ማራ ኔኒዬ ጋኔን ኦቆሬን። ⁴⁰ ጴጥሮስዻ ቡል እንግን ፓይላ ከቶኦ ቱዎጜ ቶኬ ኩዋምኔ ኦቆራ፤ ሁቡኔ ቶይ ሃሚን ኔኒዬ ሺጝ ጣቢታ ዮ፤ ናሹጝጋ እሺዻ ሻማ ካርቡ ኔኒ ዋጭ፤ ከሹ እን ጌዬ ጴጥሮስዻ ናሹጜ ኡፓ፤ ⁴¹ እሺዻ ጎም ቡዋ ኔኒዬ ቲታ፤ ሺው ውር ጊታይካ ይሁኔኔ ዳልሷኔ ኣያ እንግን ከዻቆ ኔኒ እያይ። ⁴² ዳቢ እንዻ እባጄና ከኦካ ውርካ ኢዮጴ ፓይላ፤ ውር ጁዋኑዻ ኣምኒያ ከታቺ እን። ⁴³ ጴጥሮስዻ ከውር ክየም ኬና ሺጜ ስምዖን እን [ጉቁዬን ዾልቲ] ኡፓ ኦካ ኢዮጴ ሹ ጁዋኑ።