ሃፑክ 8 ¹ ሳውልዻ ቱምና ከኒሼንካ እስጢፋኖስ ። {ዋኬንካ ውር ጊታይካ ይሁኔኔ ላልዬኔ} ከሹ እጝ ከኦካ ቶኦካ ይሁኔን እን ኣኔን ኢየሩሳሌም ዋክኔን ታቺ ናሹጛ፤ ከሐዋርያታንዻ እንቃ ውር ጊታይካ ይሁኔን ፓይላ ጊታይካ ይሁዳዬ ካጎብሼንካ ሰማሪያዬ ፓይላ ላልያ፤ ² ውር ጊታይ ቁዋቅትሽ ከክያጃካ መንፈስዻ ቱቱካ እስጢፋኖስ፤ ፕርዻ ጎቆራ ካሎን። ³ ዬ ሳውል ቶኦካ ቁሜን ካይሲዬን ቁሜኔ ናሹጛ፤ ሁሉክ ኦጉዋይካ ቶኦዬ ጎም ጁማኔ ሃኣጛኔ ኣኔን ቶኦካ ቁሜን ዾቅሼን። ⁴ ጊታይ ላልሜንዻ ከኦግታይ ፓይላ ክሊህዬና ከክያጃ እንካ ባሪዮ፤ ⁵ ፊልጶስዻ ጎብ ሃምካ ከተማ ክየምካ ሰማሪያዬ ሜይሼያ እንግን ናንዳካ ክርስቶስ። ⁶ ዛርሲ ጁዋኑዻ ዋዬ እን ፊልጶስ ሃሳወዬ ጌዬ ዹዋልሺኔን ሹቃሹቃ ጊታይ ሻሞጝ፤ ጋይኬ ሻን ክየሜ ጋኔን ዋዬን። ⁷ ጊታይካ ጮዩጝ [መናፍስትዻ] ኡቹኬ ኣኔንኬ ኦካ ውር ጁዋኑ ቱሌን፤ ውር ጁዋኑ ጊታኬና ማር ጃሌኔ ኤላኔ ባይሻ፤ ⁸ እን ናሹጝኬ እንዻ ከኦካ ከተማ እን ማቲያ ዋዛ ታቺ። ⁹ ኣይባዬ ከሌሜንካ ይጝ ከኦካ ከተማ እጝ ቱዎጝ ኣሽክዬን ሞራዬ [ኣሽዬን] ውርካ ሰማሪያ ፓይላጝ፤ ኣና ውር ክየም ኬና ሺጜ ሲሞን፤ እሺዻ ኣኔን እሺ ኤምኑ ከውር ታቺ ኮሜን። ¹⁰ ውር ፓይላ ጊታይ ቦኬ ሃንታዬ ሌይ ኣይ ታታቻን፤ ውር እን ከቁዋቅቲ ሺጜን እን ጊባጆጝ ሃቁዋቅቲካ ሃሳዋ ኔኒ ሺጝ እያይኔ ጋኔን ከሻን ዋይሺኔን፤ ¹¹ ቦኬ ሹ ጁዋኑዬ ከዋድማካ ሞራ ናንዳካጝ ዻዹጝኔ እንግኑጝ ጋይ እሺ ቃቦ ጊዬይዬ ጋኔን ዻዬን። ¹² ኣይባዬ ፊልጶስ ሜይሼ እንግን ናንዳካ ባሪዮዬ ጌጳሞካ ባሪዮዬ ናንዳካ ሮጝካ ኢየሱስ ክርስቶሱጝ ጋምኒያ ከክያጃካ ባሪዮ ቦወን ጊዬይ ዱቅያ ጁማኔ ሃኣጛኔ፤ ¹³ እሺ ሲሞን ካኒ ሺዺኬኔ ኣምኒዬ ዱቅያ፤ ዻዬ ፊልጶስዻዬ ኩያ፤ ጌይ ዹዋልሺኔን ጊታይ ኣሽክዬዬ ኦኬ ሹቃ ጊታይኔ ዻዹጝኔያ። ¹⁴ ሐዋርያታንዻ ጊታይ ኣኔን ኢየሩሳሌም ውርካ ሰማሪያ ኣምኒ ክያጃካ ባሪዮዬ ከሹ እን ዋዮጝ፤ ይዕሲሼያ ጴጥሮሴ ዮሐንሴ ሃሚን ጊዬዩጝ። ¹⁵ እንግንዻ ከሹ እን ሄክሼ ሰማሪያጝ ካቦወ መንፈስ ቅዱሱጝ ይሁሼና ውርካ ሰማሪያ፤ ¹⁶ ናንዳካ ኦ ከሹዋን ጊታይ ዱቅያ ከሮጝካ ኢየሱስ ታቺ እን ዬ መንፈስ ቅዱስ ካኒ ጎብሼኬን እንግን ክየም ክየም። ¹⁷ ዬ ጴጥሮሴ ዮሐንሴ ጋይሼያ እንግን ቡዋ ጊዬይ፤ እንግንዻ ቦዋ መንፈስ ቅዱስ። ¹⁸ ሲሞንዻ ከሹ እን ሐዋርያታን ጋይሼ እሺ ቡዋ ጊዬዩጝ ጌይ እንካ ጋዬ እሺ መንፈሴ፤ ቡልሼ እንግን ቢሬዬ ዋይሼ እንግን እያጝ፤ ¹⁹ ውር ጊታካጝ ሃኣይሼ ቡዋ ናኑጝ ፓይላ ካቦወ መንፈስ ቅዱሱጝ ኣይ ኣንዻ ጌጳሞጝ። ²⁰ ዬ ጴጥሮስ ሺጝ እያጝ፤ ኣይኔንካ ባሪዮ የቃቢያ ከቢሬ ኡዋሩጜኔ፤ ካይባ እኔ ቢሬ ኑኑዬ ከጋጝ/ ²¹ ሻን ኑኑ ከኦካ ሌሜንካ ባሪዮ ናንዳካጝ ማሬ ኣኩሉክ ኣዬኑጝ፤ እን ከኦካ [ድርሻካ] ዋድማጝ የኣኔኬን ባልካ ባሊ። ²² ካንዻ ናንዳካ ክያጃ ጋራጝ ኑኑጝ ሁሉክ ይሁኔን፤ ይሁንቴባ ታቺ እንዻ፤ ከቃቦጝ ካሻን ኑኑጝ ዋይሼባ እን ካሺዺባ፤ ²³ ናንዳካ ኦ የቆቂኬ ኦኬ ጅቄዬ የቁሜንኬ ሰንሳላካ ሴሶዬ ሃጌይባዬ። ²⁴ ሲሞንዻ ዋሼ ዋይሼ እንግን ከኦግታይ የሜይቴ ኣን ክየምጵንዻ ካማር ኣን ሄክሼኔ ይሁሼን ኣን ታቺ እኑጝ። ²⁵ ጴጥሮሴ ዮሐንሴ ክሊህኔ ክያጃካ ታቺ እኔ ዹዋልሺኔ ሃሳዋጝ ጩዋ፤ ክሊዬን ክያጃ ሹቃ ከኦካ ጶሮክ ጁዋኑካ ሰማሪያዬ፤ ዋክሼያ እያጝካ ኢየሩሳሌም። ²⁶ ውርካ ኤርጎካ ታቺ እንዻ ዋይሼ ፊልጶስ፤ ከዻርካ [ቶጉ] ከኦካ ኢየሩሳሌም ሃምካ ጎብሼ [ጋዛጝ] ካምባ ከጉዋር እንካ ቦናጝ፤ ²⁷ እሺዻ ናሹጜ ኩያ» እየዎ ታቺካ ኢትዮጵያ [ባለሟልካ ህንደኬዬ] እን ኣይ ታቺካ ሆድማሞካ ኣንቲቲ ፓይላ ጌያ ውርካ ኢትዮጵያ ክየም፤ ውር እንዻ ናንዳካ ይሁኔን ኩንሼያ እያጝካ ኢየሩሳሌም። ²⁸ ዋኬዻጝ ኡፌ [ኡኩሊዬ] ኣኔን ወርቀትካ ውርካ ቶካ ባሪዮ ኢሳይያስ ኮመን። ²⁹ [መንፈስዻ] ዋይሼ ፊልጶስ ካምባ ኦካ ኡኩሉጝ ዲያው። ³⁰ ፊልጶስዻ ይሪካ ኩያ ሃምካ ኡኩሉጝ፤ ውር እንዻ ኮመን ወርቀትካ ውርካ ቶካ ባሪዮ ኢሳይያሴ ዋይሼ እሽ፤ ኣይባዬ እን የኮሞጝ የጶቅሲባይ? ³¹ ውር እንዻ ሺጝ ውር ኬና ሜይሼ ኣን ሹቃ ማር ኣኔኔ ሃሻሚ እያን ካጶቅሲዮጝ፤ እሺዻ ካሌፌ ሃሚን ካኡኩሊዬ ካኡፎጝ ይወና ፊልጶስ። ³² ባል እጝ ውር እን ኮሜዻ ሃይዕጝ፤ ከማድር ዻውሼያ ሃምካ ኒቄኑጝ፤ ምያንካ ማድራንዻ ካቆቤ ኦካ ሌሜንካ [ሻላን] ሹዩጝ፤ ካኒ ቡልኬን ቶግ ጊዬይ እያይ። ³³ ከእሺ ኤምኑ ጎብሼን [ቆካዺያ ከቡልኔን]፤ ዻቆ ኔኒዻ ቡልኬ ዳሊ ክያኒዬ፤ ሃኒን ካቻሊሼ ጊታይ ጅሼ ሜይሼኑጝ? ³⁴ ውር እንዻ ዋሼ ዋይሼ ፊልጶስ፤ ውር እንካ ቶካ ባሪዮጝ ሃሳወ ይጝ ሃናንዳካ ኒን? ሃናንዳካ እሺ ኤምኑ ሞ፤ ናንዳ ውር እንቃ? ባንዞ ሜይሼ ኣንባ፤ ³⁵ ፊልጶስዻ ቡላ ቶግ ኔኒ፤ ከኦካ ካርሲካ ባልካ ኦካ ባልካ ወርቀት እጜ ናንዳካ ኢየሱስ ሜይሼና ክያጃ ሹቃ። ³⁶ ጋኔንባ ከጃሌን ክያንዻዬ ሄክሻ ኦይን ሙዋ ኣኖጝ፤ ውር እንዻ ሺጝ እየዎ ሙዋ ኣኔባ ኦጝ፤ ኣኪ ካማሬ ዱቅኔን ኦኬና ካሃርጌ ኣን ኣና ኦ? ³⁷ ፊልጶስዻ ሺጝ፤ የኣምኒያ ካሎን ከሻን ኑኑያጝ የቻሊባ ዱቅኔን፤ ውር እንዻ ሺጝ፤ ኢየሱስ ክርስቶስ ኣዬ ውዋካ ባሪዮጝ ሃኣምኒባዬ ዋሼያ እሺ። ³⁸ ካሪቤ ኡኩሊዻጝ ሜይሼያ እሺ። ከኦይን እንግን ዻዋን ጎባ ሃምካ ሙዋጝ፤ ፊልጶስዻ ዱቅያ ውር እጝ። ³⁹ ከሹ እን ኳቴ ሙዋ ክያንዻጝ [መንፈስካ ታቺ እን ጎም ፊልጶሴ ቦኩዬያ፤ ውር እንዻ ጩዋ ካኒ ጌይኬን እሺ፤ ኣይባዻዬ ከዋዛ ካርሲያ ጃሌን ኔኒ። ⁴⁰ ዬ ከኦይን ጩዋ ፊልጶስ ጌዬና ከኦካ ኣዛጦን ሌይ ሃምካ ሄክሼ ቂሳርያጝ፤ ኦካ ከተማ ጊታይ ሳጊዬ ፓይላ ኣኔን ክያጃ ሹቃ ሜይሺኔን።