ሃፑክ 27 {ቦሼያ ጵውሎስ ከጋጊ እያጝካ ሮም} ¹ ካፓይሺቴ እያጝካ ኢጣሊያ ከሹ እን ቱምዮጝ፤ ጳውሎሴ ውር ዶክ ጊታይካ ቁሜኔ ሃምካ ውርካ ፓር እን ኣይ ቢቲካ ቢታኑጝ፤ ጋያ ታቺካ ዽብ እን ሺጜ ዩልዮስ። ² ናሹጝኬ ኣድርሚጢሴ ሃምካ ማራካ ጎብሼንካ ኛፓስካ እስያ ሃሻዋ ጋጊ ጊታይ ፓይ [ወዶቦች] ሃካርሲያያ ጃሌንካ ኛፓስ፤ ውር እንካ መቄዶኒያ ኡፌ ኣኔን ተስሎንቄ ኣርስጥሮኮስጳ ኣኔንኬ ኡዋው። ³ ከሹ እን ዻይሾጝ ሃሄክሻ ሲዶናዬ፤ ዩልዮስዻ ጳውሎስ ክያጃ ሹቃ ዹዋልሺኔን ኩይ ሃምካ ናሺዺ ኔኒዬ ካጌዬ ኬልሾጝ ናሺሼያ። ⁴ ጩዋ ሃናሹጛ ከኦይኔ ሃፓያኬ ኛፓሴ፤ ፑጉ ናንዳካጝ ቶኩኔ ሌሜን ጉዋዩጝ፤ ሃኬልቅምንቴ ጎልዻካ ቆጵሮሴ ሃሳጊያያ። ⁵ ሃቁዋልንቴ ኛፓስ እን ኣኔን ኪልቅያዬ ጵንፍልያጝ ጩዋ ሃሄክሻያ ፔንካ ሉቅያ ራቅ እን ሺጜ ሙራጝ። ⁶ ጩዋ ታቺ እንካ ዽብ ጋጊካእስክንድርያ እን ኩይ ኢጣሊያዬ ሃክሼያ ኡዋው። ⁷ ሹ ጁዋኑ ሃፓያ ፓሌ ሃሄክሻያ ክራካ ቀኒዶስ ከጋሎ፤ ፑጉዻ ካፓይቴ እያጝካ ሌሜን ከሹ እን ሃርጌ ኡዋውጝ፤ ሃሻማኬ ቋጩርካ ሳልሙናዬ ሃላችሚናኬ ቀርርጤሴ ሃፓያያ። ⁸ ሃጎማ ማራማራዻዬ፤ ሃም ኦካ ቋጩርካ በላሲያጝ ሃሄክሻያ ሃምካ ፔን እን ከጋሎ ኣይ ሹቃጝ። ⁹ ሹዋጵሽ ሹ ጁዋኑዬ ናንዳካጝ ሳስክዬ ሹካ ቶሮንዽዬኑጝ፤ ከጋጊ ፓዬን ማቲ ኦኬ ጋራዬ ጊያ ጳውሎስ ሺጝ፤ ¹⁰ እየው ውር፤ ጃሌን ኣዬ ጋራጝ፣ ከኦካ ጋጊዬ ኣንቲቲ ጊታይ ሃክሼዬ ፕር ኣይን ከኡዋዻጝ ካሄክሺሼ ኦኬ ጋራ ታቹጝ ጌያና ኦናኒዬ ኣጅሺሻ እንግን። ¹¹ ዬ ታቺ እንካ ዽቡጝ ከኦካ ክሊማካ ጳውሎስ ሳጊ ዋይ ክያጃካ ውር እን ቁዋል ጋጊዬ ኤምኑካ ጋጊዬ። ¹² ባርጊንዻ ሃሚን ሳስክዬን ናንዳካጝ ዴንታ እን ማሬ ባሺ ኣዬኑጝ፣ ውር ጁዋናን ቃቢ እን ካፓያ ዱንኪዬ ፔን እን ሺጜ ፈንቄዬ ካካርሲዬ ጃሌን ጊዬዩጝ ሜይሼና ቱምዬን ጊዬይ፤ ራቅ እንዻ ሃኬና ጌዬንኬ ቀርጤስ ቶጉዬ ታጝ ሹሽ ዴቄዬ ታጝ ሹሽ ቱሌዬ ከዻርካ ታጝ ዴቄዬ። {{ሄሌቄንካ ኛፓስ}} ¹³ ፑጉ ዳዲ እንካ ቶጉጝ ከሹ እን ፑጎጝ እንግን ዋሽኬ እን ቃቢዬዬ ቡጭ ሙዎል እንካ ዾዮኬ፣ ጎም ማራካ ቀርጤሴ ፓያ። ¹⁴ ዬ ካኒ ጌይኬን ጁዋንዻ ካፔ፣ እን ሺጜ ካጋጉጝ ሳይሌ ቁዋቃ ናሹጝኬ ኦይካ ጎልዹዬ ኩንሼያ እንግን ካሎን። ¹⁵ ጋጊ እንዻ ናንዳካጝ ጎሜኬ ሄሌቆኑጝ ካይቅሼ ሃምካ ፑጉጝ ካኒ ቻሊኬን፤ ዬ ሃኦይዳ ጉዋሬ ሃላቺሚንቴያ ፑጉ። ¹⁶ ሃላቺሚንቴ ጎልዹ ዺታኬ እን ሺጜ ቄዳዬ ከሳጊዬን ዻቆካ ጋጊ እን ዻዓሺዬን ከዻቾ ጁዋኑ ሃቻሊያያ ጋጊ ዻዓሺዬን። ¹⁷ ጁጁሬ ቡልሼ ጋጊ እን ጳላሹጝ ጩዋ ጋጊ ካማር ላልምኔኔ ቁማ ማራማራ ኔኒ ከካያ፤ ከእን ሺጜ ስርቲስ ራቅ እን ኣይ ይያጩጝ ካማርኬ ጋጊ ኩዬ ዮቄኔ ናንዳካጝ ሪግሺኖጝ፣ ሃቺሺ ሻሪካ ጋጊዬ ከእያይ ናሺዮጝ ካማር ዮቄኔ ሻማ። ¹⁸ ሄሎቄን ናንዳካጝ ዻቺሼ እንግኑጝ፤ ከዻም ቦው ኣንቲቲ ጊታይ ሃክሼ ጋጊ ክያኒዬ ካርሲያ ሙዋ ክያኒ ኡፑትሼን፤ ¹⁹ ከሹ እንካ ማክንሳዻ፤ ሻሪ እንካ ጋጉጝ እንካ ሌፔኔ እንካ ጎቤኑጝ ቁሜን ኔኒ ቡልኬ ቡዋ ጊዬይዬ ፓቅሼያ ኛፓስ ክያኒ። ²⁰ ሹ ጁዋኑ ናንዳካጝ ማሬ ሹሼ ቢሊዬ ጌዬን ቻሊዬኔ ፑጉ ናንዳካጝ ቁዋቅሼ ኡዋውጝ ቃቦ እን ኣኔ ካዻቆ ፓይላ ናንዳካጝ ካይዮ፤ ²¹ ውራን ማር ሩቡ ኣሜኔ ቆቤ ሹ ጁዋኑጝ ጩዋ፤ ጳውሎስ ዾር ጫቃን ጊዬይዬ ሺጝ እያጝ፤ እየው ውር ዮ፤ እን ሃሜይሼ እየው ዋንቲ የዋይሺንቴያ ኣንያጝ፣ ከቀርጤስ የማራ ናሹጜንያጝ ኦኬ ጋራዬ ካዮዬ ሄክሽኬን ኡዋው። ²² ኣይን ጋኑጝ ይህ/ ሃጋጊ ዬ ከኦጉዩ ናፒሲ ክየምጵንዻ ካህኬኔ። ²³ ከምክር ናካ ጊያጎጝ፣ እን ኣይ ኔኒዬ ባሪዮ እን ሃይሁኔዬ ውርካ ኤርጎ እን ይዕሲዮጝ ዾር ኦካ ቋጩር ናኒዬ፤ ²⁴ ሺጝ ጳውሎስ ዮ፤ ኦይ ሪግሺኔን፤ ከዾሬ ኦካ ማሪካ ቄሳሩጝ ሁሉኩሼ እንባ፤ ዻቆካ ውር ጊታይ ፓይኬ እንዻ ባሪዮ ዻዓሺያ ዋይሼ ኣን እያይ። ²⁵ ዬ እየው ውር ዮ፤ ይህ/ እሺ ከእያይ ሜይሼ ኣኑጝ ካኣዬ እያይ ሃኤርሜንባ ከባሪዮዬ። ²⁶ ካኣይባዬ፤ ካቦሼ ኡዋው ኦካ ጎልዹ ክየሜ ካፓቅሼ ኡዋው ኦይኑጝ ሺዽኬን። ²⁷ ከምክር እንካ ታጵ ኦይድሳጝ ከኦካ ኛፓስካ ኣድርያ ሃቡቢና ዮጜ እያጜ፤ ከምክር ጫቃን ውር ጊታይካ ጋጉጝ ዋሽኬ ኦኮኑጝ ሄክሼ ዳሊዬ፤ ²⁸ ካያ እንካ ሄክንሲዬኑጝ ፓቅሼ ዱቡዬ ቶያጝ ቱላቲካ ሙዋ ቱላቲሽ ሚትር ኦይታሜ ጌያ፤ ፕር ከሹ ጩዋዻ ፓቅሼያጝ ቱላቲ ኔኒ ማቲያ ሚትር ማካንታም። ²⁹ ካማር ሃምካ ራቅካ ባይ ቡዴኔ ሪግሼኔ፤ ከታካ ሁርካ ጋጊ ሃንቺሺያ ኦይን ሳሪዬ ኣሁር፤ ካሃሪሼዻ ጋኔን ይሁኔን። ³⁰ ውር ጊታይካ ዋሽኬ ኦኮኑጝ ፓቅሼ ኦይንካ ቶሊ ሌሜኔ፤ ጎብሽ ጋጊ ዽኒ እኔ ታማ ዾቄን። ³¹ ጳውሎስዻ ዋይሼ ታቺ እንካ ዽቤ ፓፃኗኔ፤ ውራን ጊታጝ ማራ ጋጊ ክያኒ ካፍ ጌዬንያጝ እየውዻ የቻሊያኬን ዻቄን። ³² ከሹ እን ፓፃኗን ቃጪጭ ካያኔ ጋጊ ዽታኬ እን ካሙሬ ጋጊ ክያኒዬ ካሺዽዮጝ ጎቼያ። ³³ ሌይ ሃም ሺጜ ሃሪሼንዻ፤ ውር ፓይላ ካኣም ዳዓኖዬ ጳውሎስ ሺጝ እያጜ ይወና እንግን፤ ሹ ታጵ ኦይድ ፓሲ ሻን ጉዩ ኑሼኔ የኣማኬን ኦኬ ክየምጵንዻዬ ቆቢሻያ ቶሮንዽዬን ጉዩ፤ ³⁴ ዬ ጋን ናንዳካጝ ቁዋቅትሼ እየው ከኣምቴ ሩቡጝ ሃይወንያ እየው፣ ከኦካ ጫቃን ጉዩ ኣይን ከኦካ ጪራሽካ ሹቦ ኔኑጝ ውር ክየምጵንዻ ኬናካ ዱም ኣኔኬኔ። ³⁵ ሺጜ እንዻ ጩዋ፤ ቦው ባላሻዬ ከኦካ ማሪካ ፓይላ ይሁሼና ባሪዮ፤ ጩክዻዬ ካርሲያ ኣሜን። ³⁶ እንግን ፓይላ ካሽ ቃው እንግኔ ቦው ባላሻ እኔ ጋማ። ³⁷ ከኦይካ ጋጉጝ እንግን ፓይላ ጋይ ውር ዽብ ክየሜ ሶጳታም ላዌ። ³⁸ ጋሜ ናዓሼዻጝ ጩዋ ቦው ሲንዲዬ ከሙዋ ክያኒ ፓቅሼን ዴጪቲካ ጋጊ እን ሻማ ባዶ። ³⁹ ከሹ እን ሃሪሼዻ፤ እን ሄክሼ ሃምካ ዳሉጝ ካኒ ጊባጅኬን፤ ኣይባዬ ጌይ ማራማራካ ኛፓስ ክያኒ ጩዎኑካ ይያጪዬ፤ ሺጝ የቻሊያያጝ ካጁጁሬ ጋጊዬ ካሄክሺሼ ሃሚኑጝ ቱምያ። ⁴⁰ ጩዋ ቃጩጭ ኦግታና ቶሊዬ ፓቅሼ ኛፓስ ክያኒዬ ፓያ፤ ካያ እንካ ይባይዻ ቡላ ከሹ እን፤ ሻሪ እንካ ታካ ሌሜንዻ ናንዳካ ፑጉ ሻም ዴጌ ፓይሼያ ሃምካ ማራካ ኛፓሱጝ። ⁴¹ ኣይባዬ ጋጊ ሙኔ ይያጪዬ፤ ዱማ ዳሊ፤ ሃፑክ እንካ ታካ ሌሜንዻ ያይጪ ሻዌ ሺጝ ሃቱልኬን፤ ሃፑክ እንካ ታካ ሁርዻ ናንዳካጝ ሄሌቆን፤ ሙሬ ካሎኑጝ ካርሲያ ጩጩኩኔን። ⁴² ፓፃኗንዻ ከኦካ ውርካ ቁሜን ክየምጵንዻ ታማ ሮኬ ዻቄንያጝ ቱምያ ኒሼን። ⁴³ ዬ ታቺ እንካ ዽቡጝ ጳውሎስ ካዻቆጝ ናንዳካጝ ዎሾጝ፤ እን ቃቢዬዻ ካማር ሙኒኔኔ ሃርጌያ እንግን፤ ጊታይ እባጅ ሮኬንዻ ካቃልኬ ኦካ ጋጊዬ ካሌሜ ከኦካ ኛፓሴ ካኳትሼ እያጝካ ዳሉጝ፤ ⁴⁴ ፕር ጊታይ ሺዺዻ ከኣንቲታን ወይ ከጋጊ እን ጩጩኬን ካቁም እንግኔ ካቱሌጝ ሜይሼና። ከጉዋር እን ውር ፓይላ ሄክሻ ከሹቃ ዳሊ።