ሃፑክ 26 ¹ ኣግርጳዻ ዋይሼ ጳውሎስ፤ «ናንዳካ እን ኤምኑ ከሃሳውኖጝ ናሺሼያ እን» ከሹ እን ጳውሎስ ቲት ቡዋ ኔኒዬ ሺጝ እያጜ ሃሳዋ ክያጃካ ዳርኔን፣ ² ቢቱጝ ኣግርጳ ዮ፤ ውርካ ኣይሁድ ካሲሲኔን እን ቦሼ ኣን ፓይላ ሹጝ ኦካ ማሪ ኑኑ ዋሼንካ ክያጃካ ዻርኔን ሃቻሊዬ ሃሳወኑጝ ሃኮምሼ ኣን ኤምኑ ከውርካ ባሊ፤ ³ ይንዻ እን ካሎን ሳጊ ዱሲዬንካ ውርካ ኣይሁዴ ዜርማዬ ፓይላ ናንዳካጝ የእባጆጝ፤ ዬ ከዶንሺዬ ዋይሺኔ ኣኑጝ ሃይወንያ እን። ⁴ ካኒ እባ ካርሲኬ ናሳሞ ናኒዬ፤ ኣይን ኦካ ፔን ናኑጝ ኣይን ኢየሩሳሌሙጝ ሃሻም እያን ሃኡፎጝ ውርካ ኣይሁድ ፓይላ እባጃ፤ ⁵ ፕርዻ ካርሲኬ ሹ ጁዋኑዬ ናንዳካጝ ጊባጄ ኣኑጝ ከኦካ ይሁኔን ጉዋዩ ካሎን ከውር ጊታይ ኣይ ጁዋኑጝ ሃኣኔን ቱዎጜ ሃኣይኬ ውርካ ፈረሳውያን ክየምጵኔ ሃኡፎጝ ካሃሳዎጝ ጋይ ጊታኬና ካናሺያጝ ቻሊባ ክያጃ ጊዬይ ኣይኔን። ⁶ ካንዻ ሃካሲሲዬኔ ክያጃ እን ሃኩኔ ኦጙጝ፣ ባሪዮ ከክያጃ እን ሁሉኩሼ ባባኑጝ ሃናንዳካጝ ሃቃቢዮጝ። ⁷ ነጋዴ ጉዋዩ ታጵላማን ከምክሬ ሹሼ ዋድምሼ ባሪዮ ከሻኔ፤ ሙኔንዻያጝ ቶዬን ቃቦ እን ጋሊዬዻ ሃይዕጝ። ቢቱጝ ዮ፤ ውርካ ኣይሁድ ካሲሲዬ ኣኑጝ ሃናንዳካ ቃቦ እን። ⁸ ኣይባዬ የሻምያ ባሪዮ ከኦኮኑጝ ካማሬ ጊታይ ኣርሺ ቲቴን ቻሊዬኔ የኮምቶጝ ሃናንዳካ ኦ? ⁹ ኣይን ኣንዻ ሮጝካ ኢየሱስ እንካ ናዝሬቱጝ ከጉዋር እን ቻሊዮጝ ካሚኖጝ ሃቱምዬ ጊያ። ¹⁰ ሃኣሽክዬ ኢየሩሳሌሙጝ ሃእን፤ ሃቦኬ ኦካ ታታቻንካ ውርካ ቃሽ ጌጳሞዬ ሃቁምሺሽያ ውር ጊታይ ይሁኔ ጆል ባሪዮ ጁዋኑ፤ ካእንግን ኒሼንዻ ሃቱምያ፤ ¹¹ ካዻብሺሺዬ እንግንዻ ሹ ጁዋኑ ኦጉዋይካ ቶኦካ ይሁኔን ሃሺሪዬ፤ ካሃሳው ክያጃካ ይሪኔኔ ሃኣኔን እንግን ጊዲጊዲ ሻሜን፤ ሃማንሽዻዬ ሌይ ሃምካ ፔን ጊታይ ጌዬን ኬከተማ ሹኑኩጝ ሃዻዬዬ ሃኣኔን እንግን ዋኬን። ¹² ከእያይ ሹ ክየም ሃቦኬ ኦካ ታታቻንካ ውርካ ቃሽ ጌጳሞዬ ኤርጎዬ ከሹ እን ሃኩይሼ ደማስቆጝ፤ ¹³ ቢቱጝ ዮ፤ ከቲፓ ሃኣኔንባ ጉዋር ክያኒዬ፤ ኦኬ ሜሌል ኬና ሳጊኬ ኦካ ሹሽ ከኦናኒዬ ባይዳን ናኒዬ ላሉጝኬ ፎላዬ ሃጌይያ፤ ¹⁴ ኡዋው ፓይላ ሃቡዳያ ዳሊ ክያኒ፣ ዋይሼ ኣን ከቶካ ዕብራይስጥ፣ እያጝ ሳውል፣ ሳውል፤ ሃናንዳካ ኦ የዋኬ ኡዋውጝ? ፓሩጝ ኬልሺዬን ጊያምኔን ጁዋንቲሼባ እን» ሃዋይያ ናቅዲ ኬና ዋይሼ ኣን እያይ። ¹⁵ ኣንዻ ሃሺጝ፣ ታቹጝ ዮ፤ እን የኣይ ኒን። «ታቺ እንዻ ዋይሼ ኣን እያጝ፤ ኣን ሃኣይ ኢየሱስ እን የዋኮጝ። ¹⁶ ጋንዻ ናሹጜ ዾርባ ከጃፍ ኑኑ፤ ናንዳካ ኣንዻ እን የቶዬዬ ናንዳካጝ ካዹዋልሼ እን ኦይን ኣኔን ሌሜኑጝ ካማቲዬ ውርካ ዋድማዬ ማኙጝ ካጌጳሲዬ እኑጝ ሃኩኒያ። ¹⁷ ከዛርሲ ኑኑዬ ሃምካ ዛርሲ ጊታይ ሃይዕሲዬ እኔ ሃባይሺሽ እንባ፤ ¹⁸ እንዻ የቦውባ ካርቡ ጊዬይ፤ ከሃምካ ድምጉ ሃምካ ሜሌሉጝ፤ ከሃምካ ጌጳሞካ እጁጝ የዋሼባ እንግን ሃምካ ባሪዮጝ፤ እንግንዻ ጌይባ ሺዕሺዬንካ ሴሶ፣ ከክያጃ ናኒዻ ኣምኒዬን ከኦካ ጫቃንካ ጊታይ ይሁሺኖጝ ጌይባ ሆርምኔን። ¹⁹ ኣኪ፤ ቢቱጝ ኣግርጳ ዮ፤ ከሹካ እን ሃጌዬኬ ፎላጝ ሃካና ሺጝኬን ሃኣሽኪኬን፤ ²⁰ ኣይባዬ ከሌሜንካ ውር ጊታይ ቆቤን ደማስቆዬ፤ ዻይሼያጝ ከኢየሩሳሌሜ ከይሁዳዬ ጊታይ ኣኖጝ ፓይላ፤ ጩዋ ናንዳካ ዛርሲ ካሁሉክ ይሁኔኔ ካዋክሼ ሃምካ ባሪዮዬ፤ ካዹዋልሺኔ ካርቡካ ይሁኔንዻዬ ሃሜይሼንያ። ²¹ ውርካ ኣይሁድ ጎሜ ኣን ከቶኦካ ይሁኔን ክያኒዬ ዎሼ ኒሴኑጝ ሃናንዳካ ክያጃ እን። ²² ኬልሾካ ባሪዮ ሌይ ኣይ ሹጝ ማርሼ ኣን ቶዬኑጝ፤ እየዎ፤ ሃዾር ኦጜ ናንዳካ ዺኒ እንዻ ናንዳካ ታቺ እንዻ ሃኪሊዬንባ፣ ማቲባ ውርካ ቶካ ባሪዮዬ ሙሴዬ ሺጛ ሙኔንባያጝ ክየምጵንዻ ሃካና ክያጅኬን፤ ²³ ይንዻ ክርስቶስ ካጌዬ ጋሎዬ ከኣርሼን ክያኒ ካኣዬ ሌሜኔ ካናሹጞጝ ናንዳካ ዛርሲዬ ኣሕዛቤ ሃእን ካክሊዬ ኦሜሌሉጝ። ²⁴ ፊስጦስዻ ቱሚ ሃሳዋካ ጳውሎስ ኦይኔ ሻም ናቅዲ ኔኒ ዼጌ ሺጝ እያጝ፤ ጳውሎስ ዮ፤ የጌርሺኔያ ሹቦ ኑኑ፣ ጁዋንቲካ እርርሲዬን ኑኑ ጮይሻ እን። ²⁵ ዬ ጳውሎስ ሺጝ እያጜ ዋሻ፤ ይን ጎቢዬ ፊስጦስ ዮ፤ ይን ሃሃሳዎጝ ሃኣኩሉኬ ሊኪዬ ዬማር ጪዩዬን። ²⁶ ክያጃጝ ሃሃሳዎጝ ቢቲ እን እባጃዬ፤ ከኦካ ማሪ ኑኑ ከሻን ጋዛ ሃሃሳወንባ፤ ፕርዻ ማሬ ኦኬና ጋሽክዬ ከራሼን ኣዬኑጝ፤ ከኦካ ክያጃጝ ክየምጵንዻ ካማሬ ራሺኔኑጝ ሃኣይ ኣኩሉክ። ²⁷ ቢቱጝ ኣግርጳ ዮ፤ ውር ኬና ውር ኬና ካኤርምኔ ክያጃካ ውርካ ቶካ ባሪዮ ኣኔኬኒ ኤ? ጋን፣ ካጋምኒዮጝ ሃእባጅያ። ²⁸ ኣግርጳዻ ዋይሼ ጳውሎስ፤ የዋሽኬ ኦኮኑጝ ከሻሜ ኣን እያጝ ውርካ ባሪዮኪ? ²⁹ ጳውሎስዻ ሺጝ፤ ኣይንኬ ባዶጝ ኣይንኬ ጁዋኑጝ፤ ማር እንጵኔን ሺጝ ናንዳካ ጊታይ ዋይሼን ኣኑጝ ፓይላ፤ ከኦካ ሰንሳላጝ ቁሜ ኣን እንቃ ካማቲዬኬ ኣኑጝ ሃይወንባ ባሪዮ። ³⁰ ከኦይን ጩዋ ቢቲ እንዻ፣ ታቺ እንካ ፔንዻ፣ በርኒቄምዻ፣ ከውር ጊታይ ቆቤ ጋዬኬ ጋጝዻ ናሹጛ፤ ³¹ ቱሌ ፓዬዻ፤ ሺጝ ውሩጝ ኣይንካ ቁሜኑጝ ኣይንካ ኣርሼኑጝ ካሄክሺሾጝ ኦኬ ክየምጵንዻ ካኒ ኣሽኪኬኔ ሃሳወኔ። ³² ኣግርጳዻ ዋይሼ ፊስጦስ፤ ዋንቲ ውሩጝ ማር ሁሉኩሻ ኣን ሃምካ ቄሳር ሺጜንያጝ ቻሊሜንባ ኦቼን።