ሃፑክ 25 {ጳውሎስ ኩያ ኦካ ሌሜንካ ፊስጦስ} ¹ ፊስጦስዻ ሁሉኬ ሃምካ ጎብሼን ከሹ ጂያን ጩዋ፤ ከቂሳሪያ ኩና ኢየሩሳሌም። ² ታታቻንካ ውርካ ቃሼ ውር ጊታይ እያኒሼ ጆሌ ውርካ ኣይሁዴ ጊታይ ፑጪ ኦካ ማሪ ጊዬዩጝ ካሲሲያ ጳውሎስ። ³ ናንዳካጝ ዎሼ ጳውሎስ ጉዋር ክያኒ ጎሜ ኒሼኑጝ፣ ፊስጦስ ካቶይሼ እንግንባዬ ካቦሼ ኢየሩሳሌም ይወና ካሎን። ⁴ ፊስጦስዻ ሺጝ እያጜ ዋሼያ እንግን፤ ጳውሎስ ቁሜ ጌዬንባ ከኦካ ቶኦካ ቁሜንካ ቂሳሪያ፣ ኣንዻ ከዲያው ሃኩይባ ሃሚኑጝ። ⁵ ዬ ከኦካ ጫቃንካ ውር ታታቻን ጊዬይ ክየም ክየም ሺጝ ካፓዬንኬ ኣኔ ውር እን ኣኔ ሴሶያጝ ካቦፓይኔ ኦይን። ⁶ ፓዬኬ እንግን ሹ ሎንካይ ወይ ታጱጝ ጩዋ፤ ጎብሼያ እያጝካ ቂሳሪያጝ፤ ከዻምዻ ቆብ ካራምካ ኮምሼን ክያኒዬ ካቦፓይኔ ጳውሎሴ ሜይሼና። ⁷ ከሹ እን ጳውሎስ ኩኖጝ፤ ውርካ ኣይሁድ ጊታይ ፓዬንኬ ኢየሩሳሌም ጱዻ እሺ፤ ሃሳዋ ክያጃ ጁዋኑ ጊታኬና ማሬኬ ክያጃ ራጵሼን። ⁸ ጳውሎስዻ ሺጝ፤ ኣን ኣይን ከክያጃካ ኣይሁድ ኣይን ከቶኦካ ይሁኔን ወይ ኣይን ኦካ ቄሣሩጝ ሴሶ ኬና ቶኬ ኣኔኬኔ ዋሻ ክያጃካ ዳርኔን። ⁹ ፊስጦስዳ ሺጝካ ኣይሁድ ክያጃ ሹቃ ሻምሼኔ፣ ዋይሼ ጳውሎስ ናንዳካ ክያጃጝ ቱልሼ እያጝካ ኢየሩሳሌሜ ከኦካ ማሪ ናኒ ናንዳካ ኮምሼን ሺጝ የናሺያይ? ¹⁰ ጳውሎስዻ ሺጝ እያጝ፤ ኣይን ጋኑጝ ከቻሊዬ ቡሌኑጝ፣ ሃዾርያ ኦካ ሌሜንካ ካራምካ ቄሳር፤ እንዻ ከእያይ የእባጆጝ ከኦካ ውርካ ኣይሁድ ሃካና ኣሽክኬን ሴሶ ክየምጵንዻ፤ ¹¹ ካኣይባዬ ኦናኒ ሴሶ ኬና ካሄክሼ ሃምካ ኣርሼንያጝ፣ ሃሺጝኬን ሃኣርሽኬን፣ ውርካ ኣይሁድ ጊታጝ ካሲሲኔን እን ቦሼ ኣኑጝ ዬ ማር ኣኩሉክ ኣዬንያጝ፤ ውር ኬና ካሳስክያ ኣይ ኣን እንግን ኣኔኬን፣ ሃሺጝያ ካዾቅሼ ኣን ሃምካ ቄሳሩጝ። ¹² ፊስጦስዻ ሃሳውኔ ከውር ጊታይካ ሃሳውኖጝ ጩዋ፤ ናንዳካጝ ሺጜ ዾቅቴ ኣን ሃምካ ቄሳሩጝ ዋይሼ እሺ የኩይባ ሃምካ ቄሳሩጝ። ¹³ ከሹ ጩዋማ ጩዋ፤ ቢቲ እን ኣግርጳዬ በርኒቄዬ ካቲቴ ቡዋካ ፊስጦሱጝ ጎብሼያ እያጝካ ቂሳርያጝ፤ ¹⁴ ቆባ ኦይንዻ ሹ ጁዋኑ፤ ፊስጦስዻ ቲት ክያጃካ ጳውሎሴ ዋይሼ ቢቲ እን እያጝ፤ እን ፊልክስ ኦቼ ኦካ ቶኦካ ቁሜኑጝ ውር ክየም ኣኔባ ኦጝ፤ ¹⁵ ከሹ እን ፓይሼ እያጝካ ኢየሩሳሌሙጝ፤ ታታቻንካ ውርካ ቃሼ ጌጵሹጋንካ ውርካ ኣይሁዴ ካኮምሾጝ ካሲሲያ። ¹⁶ ኣንዻ እን ካሲሲዮጝ ዾር ኦካ ሌሜንካ ውር ጊታይ ካሲሲ እሺዬ ናንዳካ ክያጃ እን ካሲሲዬ እሹጝ ቃቦ ኣይኔን ካኒ ጌይኬን ባሊዬ፣ ሳስክዬ ኣይኔን ናንዳካጝ ማሬ ዱሱሚኔንካ ሮማን ኣዬኑጝ ሜይሼያ እንግን። ¹⁷ ዬ ውር ጊታይ ካሲሲዬን ከሹ እን ፓይኔኬ ኣን ዮጙጝ፤ ክያጃ ኔኒ ሃካና ኬንሺያኬኔ ከዻም ውር ጊታይ እባጄ ቆቡጝ ካቦሼ እንግን ውር እኑጝ ሜይሼና። ¹⁸ ውር ጊታይ ካሲሲዬንዻ ናሹጜ ጎሬ ሃሳወንያጝ፣ ከእያይ ሃቃቢዮጝ ካኒ ቦፓይኔኬን ካሲሲኔን ቁዋቃ፤ ¹⁹ ሳጊ ናንዳካ ይሁኔን ጊዬይዬ ናንዳካጝ ኣርሼን ኣኔዬ፤ ዬ ናንዳካጝ ሺጜ ጳውሎስ ሃእያይኑጝ ውር ኣኔን ናንዳካ ኢየሱስ ዜርምኔን። ²⁰ ኣንዻ ክያጃጝ ሻም እያን ካቡሎጝ ናንዳካጝ ሃካቢምኖጝ፤ ፓይሼ እያጝካ ኢየሩሳሌሜ ካኮምሼ ክያጃጝ ኣንሼና እንካ ናሺሼ እሹጝ። ²¹ ኣይባዬ ጳውሎስ ከሹ እን ሺጜ ክያጃጝ ካቶይ ሃምካ ቢቲካ ቢቱጝ ሁሉኩሼባጝ፤ ኣንዻ ሌይ ሃምካ ይዕሲሼ እያጝካ ቄሳሩጝ፣ ካጌዬ ኦካ ቶኦካ ቁሜን ካፑጝ ሃሜይሼንያ። ²² ኣግርጳዻ ዋይሼ ፊስጦስ «ይንጌ ኣንዻ ውሩጝ ሃሳወንያጝ ዋዬን ሃዎሺያ። እሺዻ ሺግ ኣኪ ዻሙ የዋይባ። ²³ ከዻምዻ ኣግርጳዬ በርኒቄዬ ፓዬንኬ ጌጳሞ ታቺዬ፤ ከውር ታታቺ ጊታይ ኣኔን ዼጌ ከውር ታታቺ ጊታይ ኣኔን ከተማ ክያኒዬ ሻዋ ሃምካ ኡልማ እን ፑጪዬ ጃሎጝ፤ ከርጎካ ፊስጦስዻ ካቦፓይኔ ጳውሎሱጝ ሻማ። ²⁴ ከሹ እን ፊስጦስ ሺጝ እያጝ፤ ቢቱጝ ኣግርጳ ዮ፤ ፕር ከውር ጊታጝ ኣኔን ኦጝ ፓይላ፤ የቶያባይ ውሩጝ? ከኢየሩሳሌሜ ከቂሳርያ ኦጜ ውርካ ኣይሁድ ፓይላ፤ ካርሲኬ ጋኔ ውሩጝ ካኡፔኬ ዻቆጝ ሁሉኩሼን ሺጝ እያይኔ ጉቹኬ ይወና ኣን። ²⁵ ኣንዻ ኦይንካ ሄክሼ ሃምካ ኣርሼኑጝ ኦኬ ክየምጵንዻ ማሬ ኣሽክዬኑጝ ሃእባጅያ፤ ኣይባዬ ናንዳካጝ ሺጜ ካሁሉኩሼ ኣን ሃምካ ቢቲካ ቢታኑጝ ሃቱምያ ሃምካ ሮም ይዕሲሼን። ²⁶ ኣይባዬ ናንዳካ እሺ ካቶኩሼ ሃምካ ታቺ እን ሃካና ጌይኬን ኦኬና ግባጄ፤ ዬ ግያሜ ክያጃ እን ጩዋ ኦይንካ ቶኮጝ ናንዳካ ጌዬን ኦካ ማሪካ እየው ፓይላ ወይ ካሎን ፕር ቢቱጝ ኣግርጳ ዮ፤ ሃቦሼባ ኦካ ሌሜን ኑኑ፤ ²⁷ ሃኦጝ ውርካ ቁሜን ክየም ይዕሲሼያ ሃምካ እን ኣይ ሳጊያጝ ክያጃ እን ካሲሲዬ እሹጝ ሃሳወን ኔኒ ኣኔባ