ሃፑክ 24 {ጳውሎስ ኩያ ሃምካ ማሪካ ፊልክሱጝ} ¹ ከሹ ቾን ጩዋ፤ ታታቻንካ ውርካ ቃሼ ሐናንያ ከውር ጌጵሹጋን ክየም ክየሜ ከውርካ ባኬን ክየም ኬና ሺጜ ጠርጡለሴ ጎብሼያ እያጝካ ቂሳርያጝ፤ ካሲሲኔን እን ጊዬይ ኣኔንኬ ጳውሎስዻ ቦሼያ ሃምካ ታቺ እንካ ፔኑጝ። ² ከሹ እን ሺወ ጳውሎሴ ኩኖጝ፤ ጠርጡሉስ ሺጝ እያጜ ሜይሼና ካሲሲኔን፤ ፊልክስ ታቹጝ ዮ፤ ከቦን ኑኑ ሹቃ ኡፓ ከሹ ጁዋኑ፤ ኦኬ ጶቅሲዬን ኑኑዻ ናንዳካ ዛርሱጝ ጌይሻ ላሻዽዬን፤ ³ ኦጉዋይካ ራቄ ዋዳዬ ዴንታጝ ሃቦዋባ ከዋዛ ታቺ። ⁴ ኣይባዬ ከሳጊ ካማር እን ዻቺሼኔ፤ ከቱምኬ ኡዋው ኩንቡሌዬ ሃይወንያ ክያጃ ሹቃ እን ኑኑጝ። ⁵ ውሩጝ፤ ከውርካ ኣይሁድ ጊታጝ ኣኔን ዳሉጝ ክያኒ ፓይላ ጫቃን ክያኒ ማቲ ቡርቂዬ ቲትሼ ጆሌ ኦኬ ጋራጝ፣ ፕርዻ ከውርካ ናዝራዊ ማቲ ውር ታቺዬ ሃጌያያ። ⁶ ከኦይን ሳጊ ታም ቶኦካ ይሁኔን ሴሲዬንያጝ ሃጌያዬ ሃጎማያ። ከእያይካ ክያጃ ጉዋዩጝ ሃቃቢያያ ኮምሼን፤ ⁷ ኣይባዬ ሉስዮስ እን ኣይ ታቺካ ፓሩጝ ኩኔ ከቁዋቅቲ ታቺ ዎችኬ ኦካ ቡዋ ጉዋዩዬ ቦዋ፤ ጊታይ ካሲሲዬንዻ ካፓይኔ ኦኑኑጝ ሜይሼና። ⁸ ኣኪ እንዻ ቶይ እን ኤምኑዬ ክያጃ እን ሃካሲሲቴ እሺ ፓይላ ኣዬ ኣኩሉክ ከእባጆጝ የቻሊባ። ⁹ ውርካ ኣይሁድዻ ክያጃ እን ከእያይ ክያጆጝ ማቲዬ ከካሲሲኔን እን ራጵሼን ኬልሺያ። ¹⁰ ታቺ እንካ ፔንዻ ከሹ እን ኣይኔ ከዹዋልሺኔንካ ቡዋጝ፣ ጳውሎስ ሺጝ እያጜ ዋሻ፤ ካርሲኬ ቦን ጁዋኑዬ ሃማቲዬ ውርካ ኮምሼንካ ዛርሱጝ ሃእባጅያ፤ ዬ ዋሼን እንካ ማርሚኔን ናኑጝ ሃኬ ዋዛ። ¹¹ ናንዳካ ይሁኔን ሃኩኔ ኢየሩሳሌም ኣዬኬ ሌሜንካ ሹ ታጲላማጝ ኣይን እንዻ እባጄን የቻሊባ። ¹² ጊታይካ ካሲሲዬን ከኦካ ቶኦካ ይሁኔን ዜርሜን ከውር ፓይላዬ ወይ ከቶኦካ ይሁኔን ወይ ከከተማ ቱዎጝ ወይ ከኦካ ራቅ ፓይላዬ ቲትሻ ዛርሲዬ ካኒ ጌይኬን ኣን። ¹³ ኣይን ጋን ናንዳካ ክያጃ እን ካሲሲዬ ኣኑጝ ቻሊኬን እን ሜርሜር ኣዬን። ¹⁴ ካኣይባዬ፣ እንግን ከእን ሺጜ [ኑፋቄ] ከጉዋርካ ታቺ እን ሃይወንባ ኣምላክ ካሹኔ ጉዋዩ፤ እን ሜይሺኔ ከክያጃዬ ቶኬ ከውርካ ቶካ ባሪዮዬ ፓይላ ሃኣምኒባ። ¹⁵ ፕርዻ ውራን ጊታጝ ፓይላ፤ ጫንቃሌ ካሴሶዬ ካቲቴ ከኣርሼን ክያኑጝ ከባሪዮ ሃኣኔ ቃቦ ሹቃ። ¹⁶ ዬ ከኦካ ማሪካ ውርካ ባሪዮ ካኣኔ መንፈስ ቅዱሱጝ ሹ ጮል ሃቁዋቅትሽባ። ¹⁷ ከቦን ጁዋኑዻ ጩዋ፤ ናንዳካ ውር ጊታይካ ቡርቁጝ ሃቦው ኦካ ኣይኔኔ መባዬ ሃኩንያ ኢየሩሳሌም። ¹⁸ እንግንዻ ከኦካ ቶኦካ ይሁኔን ሃኣሽኪ ክያጃካ ጫንቃል ጌዬኔ ጌያ ኣን፤ ጋሎካ ዛርሲዬ በጥባጥዬኔ ኣኔኬን። ¹⁹ ኣይባዬ ጋኔ ካሲሲኔንያጝ ካፓዬን ኦካ ማሪ ኑኑዬ ካካሲሲዬ ኣኑጝ ካሁሉኩሼ እንግን ውርካ ኣይሁድ ክየም ክየም ጊታኬና ፓዬንኬ ሃምካ ጎቢሼንካ እስያ ኣኔባ፤ ²⁰ ወይ ጊታጝ ኣኔን ኦጝ ከሹ እን ፓዬ ሃምካ ታታቻንካ ካራሜ ሴሶ ኬና ጌዬ ኦናኒ ኣኔያጝ ካክያጅባ፤ ²¹ ከኦካ ጫቃን ጊዬይ ከሹ እን ጎሮጝ ናንዳካ ናሹጜንካ ኣርሼን ሃሃሳዎጝ ከኦኬ ክየምጵንዻ እንቃ ሹጝ ሃካሲሲዬኔ ኦይን ሃኩኖጝ ኣኔኬን። ²² ዬ ፊልክስ ናንዳካጝ እባጄ ጉዋርካ ታቺ እኑጝ፣ ሉስዮስ ኩናያጝ ናንዳካ ክያጃ ጉዩ ሃኣይባ እየው ቱሙዬን ሺጝ እያይኔ ዎኦሲያ ጊያጃ እን ከቃጣሮ። ²³ ከኦይንዻ ኣይ ጳውሎስ ኣርናሞዬ ካቶዬዬ ውርካ ናሺማ ኔኒ ካማሬ ሻወ ኣንሺኔኑጝ ካናሺሼ እንግባዬ ኤርግታ ታቺ እንካ ዽቡጝ። ²⁴ ከሹዋ ጩዋማ ጩዋ፤ ፊልክስ ኩና ከኝያካ ውርካ ኣይሁድ ድሩሲላ፤ ሺውሽ ጳውሎስዻዬ ክያጄ እን ካጋምኒዬኬ ኢየሱስ ክርስቶስያጝ ኡፔ ዋያ። ²⁵ ጳውሎስ ናንዳካ ጫንቃል ኣዬኔ ናንዳካ እሺ ኤምኑ ኡዋሩጜኔ ናንዳካ ኮምሼን እንካ ኩዋዌ ከሹ እን ሃሳዎጝ፤ ዬ ፊልክስ ሪግሼኔ ሺጝ፤ ካሹጝ ይን ጃኬና ቢያኬሌሜን ኣግሼ ኣንያጝ ሃሺውሽ እንባ፤ ጋን የቻሊባ ኩዬን። ²⁶ ፕርዻ ከኦካ ጳውሎስ ናንዳካጝ ቃቢዬ ጉቦ ቦወኑጝ፤ ሺውሼ ይሪካ ይሪካዬ ኣኔን ሜይሼን። ²⁷ ቦን ዻ ሳጊዮጝ ጩዋ፤ ፊልክስ ሁሉካ ኦካ ባልካ ጶርቅዮስ ፊስጦስ፤ ፊልክስዻ ሺጝካ ውርካ ኣይሁድ ዋዝንሲዬኔ፤ ኦይዳ ጳውሎስ ከውር ኮኑጝ ቁሞጝ።