ሃፑክ 23 ¹ ጳውሎስዻ ከሁቤኔ ሃምካ ውር ጊታይ ቆቢ ቶዬን፣ ሺጝ ጪኒጌን ናኒዮ፤ ኣን ሌይ ሄክሼ ሹ እንካ ሹጝ ሃዋካጆልያ [ከዴንታ] ጫንቃል ኦካ ማሪካ ባሪዮ። ² ከሹ እን ውርካ ቃሽ ታቺ እን ሐናንያ ውር ጊታይ ጎሪ ኦካ ቆጩርካ ጳውሎሱጝ ካሙሬ ቶግ ኔኑጝ ሜይሼና። ³ ጳውሎስዻ ሺጝ፤ እን [ግድግዳካ ኖራ] ባሪዮ ፕር ሙርባ እን፤ ከክያጃካ ሕግ የኡፌ ኣኔባ ኣን ካኮምሼኔ፣ ሕግ ኣኔኬኔ የሙሪያ ኣንያጝ ኣይን እንዻ የኦይድያ ሕግ። ⁴ ጊታና ጎሬ ኣኔን ኦካ ቆጩርካ ጳውሎስዻ ሺጝ፤ «የሾይዽዬ የይሪባይ ውርካ ቃሽካ ባሪዮ? ⁵ ጳውሎስዻ ሺጝ፤ ጪኒጌን ናኒ ዮ፤ ኣዬ ውር ታቺካ ቃሹጝ ሃናንዳካጝ ሃማሬ እባጄኑጝ፤ ሺጝ ኦይ ኦካ ታቺካ ዛርሲ ኑኑ ክያጃ ጋራ ሃሳወኔ ቶኳዬ። ⁶ ጳውሎስዻ ዛርሲ ቶና ኣዬ ሰዱቃውያን፣ ቶና ኣዬ ፈረሳውያን ናንዳካጝ እባጆጝ፣ ሺጝ ጪኒጌን ናኒዮ፤ ኣን ሃኣይ ፈረሳዊ እን ጅሼኬ ፈረሳዊ፣ እን የቦቴ ኮምሼኑጝ ሃኬ ናሹጜንካ ኣርሼን ቃቦ ሻሜን» ሺጝ እያይኔ ኡቹካ ኦካ ማሪካ ውር ጊታይ ቆቡጝ። ⁷ ከሹ እን ሃሳወ እኑጝ፣ ከኦካ ጫቃንካ ፈረሳውያኔ ሰዱቃውያኔ ቲታ ጎሬን፤ ውር ጊታይ ቆቢዻ ካሺያ ጋጝ ዻ። ⁸ ውርካ ሰዱቃውያን ሃጊታኬና ሺጜን ናሹጜንካ ኣርሼን ኣኔን፣ [ውርካ ኤርጎዻ መናፍሳታንዻ ኣኔኬንያጝ፤ ዬ ውርካ ፈረሳውያን ሺጝ ጊታይ ቆቢ ጊታጝ ፓይላ ኣኔ ጊታይ ኣምኒ። ⁹ ማቲያ ጎርኔን ታቺዻ፤ ከኦካ ጊታይ ኣይ ውርካ ፈረሳውያን ክየም ክየም ጊታይ ኣይ ውርካ እርርሲኔንካ ክያጃ ባካ ሌሜኑጝ ናሹጜ ሺጝ፣ ኦካ ውሩጝ ሃካና ጌያኬን ሴሶ ክየምጵንዻ፤ ክያጃ መንፈስ ወይ ውርካ ኤርጎጝ ካጊባጅ ኦ? ሺጝ እያይኔ ዜርሜና ካሎን። ¹⁰ ጎሬን እንዻ ናሹጝኬ ጊታይ ማር ሺጜን ካማር ጳውሎስ ሎጵሎጵ ሻሜኔ ታቺ እንካ ፓር ሪግሼና፤ ዬ ፓፃኗን ካጎቤዬ ካዎቼ እሺ ከኦካ ጫቃንካ ውሬ ካዾቁሼ ሃምካ ራቅካ ፓሩጝ ምውይሼና። ¹¹ ከምክር ኑዋ እን ዻይሼዻ ታቺ እን ዾር ኦካ ቆጩር ኔኒዬ ሺጝ፣ ጳውሎስ ዮ፤ ሃይ/ ከእያይ የማኝሺዬ ኣን ኦካ ኢየሩሳሌሙጝ፣ ፕር ከኦካ ሮምዻ ከማኝሺዬ ኣኑጝ ሁሉኩሼባ። ¹² ከሹ እን ሃሪሼዻ፣ ውርካ ኣይሁድ ፑኡሺሜኔ ከቻልክሚኔን ሌይ ሃምካ ኒሼ ጳውሎሱጝ ካማሬ ሩቡ ዱሜኑጝ ዜርሜና ከጋጝ። ከቻልክሞ እንዻ ¹³ ውር ጊታይ ዜርሜን ሃኬ ውር ኦይታም ሳጊ። ¹⁴ እንግንዻ ፓይ ሃምካ ታታቻንካ ውርካ ቃሼ ውር ጌጵሹጋኔ ሺጝ እያጝ፤ ሃማራ ጳውሎስ ኒሼኔ ካማርቴ ሩቡ ዱሜኑጝ ሃሻማያ ዜርማ ቁዋቃ። ¹⁵ ይንዳ ኣኪ እየው ኣይኬ ውር ጊታይካ ካራሜ፤ ናንዳካ ክያጃ እን ሜርሜርካ ሌሜን ኬና ኣይ ልኪ ሻምኬ ኦኮኑጝ የዎሽቴኬ ኦኔኒዬ ካይዕሲሼ ጳውሎስ ዮጝ ጉዩጝ ይወንባ ታቺ እንካ ፓሩጝ፤ ካኒ ሄክሽኬን ኦጜ ኡዋዻ ካኒሽቶጝ ሃኣያ ሼክሚ። ¹⁶ ኣይባዬ ውዋካ ጪኔካ ጳውሎስ ናንዳካ ቻልክሞ እን ከዋዬን፣ ሁሉክ ሃምካ ራቅካ ፓሬ ሜይሼያ ጳውሎስ ኦይን ሙኔን። ¹⁷ ጳውሎስዻ ከኦካ ታታቻንካ ዽብ ሺው ክየሜ ሺጝ እያጝ፤ «ውዋጝ ኦኬና ካሜይሼ ታቺ እንካ ፓር ናንዳካጝ ኣኖጝ ቦሼ እሺ ሃሚን ኔኑጝ። ¹⁸ እሺዻ ቦሼያ ሃምካ ታቺ እንካ ፓሩጝ፤ ታቺ እንካ ዽብዻ ሺጝ ጳውሎስ እንካ ቁሜን ሺው ኣኔ ሺጝ፤ ባርሻጝ ኦኬና ካሜይሼ እን ናንዳካጝ ኣኖጝ ካቦሼ ዮጝ ኑኑጝ ይወና ኣን። ¹⁹ ውር ታቺ እንካ ፓርዻ ጎም ቡዋካ ባርሻ እኔ ሻም እሺጵን ታራሬ ሺጝ፤ ኦይን የሺጜ ኣን ሜይሼን ሃኦ? ²⁰ ውዋ እንዻ ሺጝ እያጝ፤ ውርካ ኣይሁድ ናንዳካጝ ዎሺሼ ኦኮኑጝ ካጌዬ ሜርሜር ልኪ ሌሜዬ ጌዬኔ ዻሙ ከቦቴ ጳውሎስ ሃምካ ማሪካ ውሩጝ ካይሁኔ እኑጝ ቱሙያ። ²¹ ዬ ኦይድ ሺ ሺጜን፤ ናንዳካ ኦ ከኦካ ጫቃን ጊዬይ ጊታይ ኣይኬ ኦይታም ሳጉጝ ናንዳካ ኒሼን ሱዱሜኔ ጋኔን ኣንሺኔን። ²² ውር ታቺ እንካ ፓርዻ ሺጝ፣ ክያጃጝ የሜይሼ ኣኑጝ ኦይ ውር ክየምጵንዻ ሜይሼኔ ኣጅሺሽ ባርሽ እኔ ይዕሲያ። {{ይዕሲሼያ ጳውሎስ እያጝካ ቂሳርያጝ}} ²³ ከኦይን ከኦካ ታታቻንካ ዽብ፣ ሺው ዻዌ ዋይሼ እንግን እያጝ፤ ከሰዓት ጂያንካ ምክር፣ ጊታይካ ፓይ ቂሳርያ ፓፃኖ ዽብ ዻዌ፣ ውርካ ኡኩሊ ዻዌ ኮርሲሲባ ውርካ ይያሪ ጊታይካ ፓሩጝ፤ ²⁴ ፕርዻ ኣጁጙባ ቢ እን ጳውሎስ ካኡፌዬ ካካሜ ከሹቃ ሃምካ ታቺ ፊልክሴ ካሄክሾጝ። ²⁵ ቶክባ ወርቅትዻ ኬና ሺጚ እያጝ፤ ²⁶ ከቀለውዴዎስ ሉስዩስ፣ ናንዳካ ታቺ እንካ ፔን ጎቢዮጝ ፊልክስ፤ ሹቃ ካኣይሼ እን። ²⁷ ውርካ ኣይሁድ ሺጝካ ውሩጝ ጎሜ ኒሼን፤ ኣይባዬ ኣዬ ውርካ ሮም ናንዳካጝ ሃእባጆጝ፤ ሃኩይኬ ፓፃኗኔ ሃሄክሻ ዻዓሺያ። ²⁸ ሃናንዳካ ኦ ዎሼ ካሲሲዬኑጝ እባጄን ቦሼያ ሃምካ ታታቻንካ ካራሙጝ። ²⁹ ካሲሲዬዻ ሃናንዳካ ክያጃ ጊዬይ ዬ ካማሬ ሃምካ ኣርሼን ወይ ሃምካ ቁሜን ሄክሼን ሃእባጅያ። ³⁰ ዬ ውርካ ኣይሁድ ቻልክምሼን ውሩጜ ከሹ እን ሃዋዮጝ፤ ይሪካ ሃይዕሲሼያ ዮጝ ኑኑጝ፤ ጊታይ ካሲሲዬንዻ ዜርማ እን ጋዬኬ ጋጝ ከእሹጝ ካቦፓይኖጝ ሃሜይሼያ። ³¹ ዬ ፓፃኗንዻ ከእያይ ሜይሼ እንግኑጝ፤ ከምክር ቦው ጳውሎሴ ቦሼያ ሌይ ሃምካ ኣንቲጰጥሪስ። ³² ከዻም ካሄክሺሻ ውር ጊታይካ ኡኩሊጵኑጝ ሻማ፣ ዶክ ዋካ ሃምካ ራቅካ ፓሩጝ። ³³ ውር ጊታይካ ኡኩሊዻ ከሹ እን ሄክሼ ቂሳርያጝ፤ ጋያ ታቺ እንካ ፔን ወርቀት እን ቶኮጝ፤ ጋዬና ጳውሎስዻ። ³⁴ ታቺ እንካ ፔንዻ ኳሜ ወርቀት እን ቶኮጝ ጩዋ፤ ጳውሎስ ኩኔኬ ኦን ኣንሼና፤ ከሹ እን ኣዬ ውርካ ኪልቅያዬ እባጆጝ፤ ³⁵ ሺጝ ክያጃ ኑኑ ውር ጊታይ ካሲሲ እን ቦፓይኔያጝ ሃጌይባ፤ ከኦይን ካባኬ ጳውሎስ ኦካ ካርሚካ ሄሮድስ ቱዎጝ ሜይሼና።