ሃፑክ 22 ¹ ጪኒጌን ናኒዬ ሹቡጌን ናኒዮ፤ ዋይባ ጋን ዋሼንካ ኣን ኤምኑ ኬሌን ናኒ። ² እሺዻ ሃሳወንኬ ቶካ እብራይስጤ ከሹ እን ዋዮጝ ከኦካ ሌሜን ኔኒ ካሎን ቆባ ሹይ። ጳውሎስዻ ሺጝ እያጝ፤ ³ ኣን ከኦይን ጌዬንኬ ኪልቅያ ሃኣዬ ውርካ ኣይሁድ እን ጅሼ ጠርሴሱጝ፣ ዬ ሃጌጵሾጝ ሃኦካ ከተማጝ። ሕግካ ሹቡጌን ጉዋዩ ሃኡፒ ኦካ ጃፍካ ገማልያል ዱቡዬ ሃእርርያ ከሊኪ፤ እየው ሹጝ ከእያይ የሻምቴ እያጙጝ ኣንዻ ሃኣንሼን ባሪዮ እያይ ሻምሼን። ⁴ ጊታይ ዻዬ ጉዋሩጝ ሌይ ሃምካ ሄክሺሼ ኣርሼኑጝ ሃዋኬዬ፣ ሃቁሚ ጁማንዻ ሃኣጛንዻዬ ሃኣኔን ቶኦካ ቁሜን ዾቅሼን። ⁵ ዋድማ ጊታይ ናኑጝ ኣይኒን ታታቻንካ ውርካ ቃሹጝ ውርካ ካራምዻ ፓይላ ካማኝሺዮጝ ቻሊባ። ሃቦኬ ኦግዬይ ወርቀቴ ሃምካ ጊታይ ኣኔን ደማስቆጝ ጪኒጌን ጉዩ ከፓዬን፣ ሃቁምሺሽ ውራን ጊታጜ ካቡሼ እያጝካ ኢየሩሳሌሜ [ካቃጥሲዮጝ] ሃኣኔን ሃሚን ኩይሼን። ⁶ ሃኣኒና ፓዬንዻዬ ሺጜ ቲፓ ማቲዬን ሃሄክሽባ ደማስቆ፤ ሉጉድ ኦሜሌል ታቺ ላሉጛ ማራ ናኒ፤ ⁷ ኣንዻ ሃቡዲያ ዳሊ ክያኒ፤ ከኦይን፣ ሃዋያ ናቂዲ ኬና ዋይሼኣን ሳውል፤ ሳውል ሃናንዳካ ኦ የዋኬ ኣኑጝ? ⁸ ኣንዻ፣ ሃሺጚ ታቹጝ ዮ፤ እን የኣይ ኒን? እሺዻ ዋይሼ ኣን ሃኣይ ኢየሱስ እንካ ናዝሬት የዎኮጝ። ⁹ ውር ጊታይ ኣይኬ ኣንዻ ጌያ ኦሜሌል እኑጝ፤ ኣይባዬ ካኒ ዋይኬን ናቅዲ ውር ሃሳውኔ ኣን ከሊኪ። ¹⁰ ኣንዻ፣ ሃሺጝ ታቹጝ ዮ፤ ካሻም ኦ? «ታቺ እንዻ ዋይሼ እን ናሹጜ ካምሼ እያጝካ ደማስቆጝ፤ ከኦይንዻ ኦይን ኣሽክዬን ካሁሉኩሼ እን ፓይላ ሜይሼ እንባ። ¹¹ እን ናሹጝኬ ሼሽክዬንካ ኦሜሌል እንዻ ናንዳካጝ ካርቡ ናኒ ኣዬ ሙሙዾጝ፤ ውር ጊታና ኣይኬ ኣን ጎም ቡዋናኒዬ እያንሼ ሄክሺሼያ ኣን ደማስቆ። ¹² ከኦይን ውር ኬና ሺጜ ሐናንያ ኩና ሃም ናኑጝ ኣን ቶዬን፤ እሺዻ ሃውር ኬና ዻዬ ሕግ ሹቃዬ ከኦካ ውርካ ኣይሁድ ጊታይ ቆቤን ሃሚን ፓይላ ካሎን ጎቢዬ። ¹³ ዾር ኦካ ቆጩር ናኒዻዬ፣ ሺጝ ጪኔ ናኒ ሳውል ዮ፤ ካሻምሼያ እን ካርቡ ኑኑ ዋጭ/ ኣንዻ [ሃጌይያ ከኦይን] ¹⁴ እሺዻ ጩዋ ዋይሼ ኣን እያጝ፤ ኣምላካ ሹቡጌን ጉዋዩ ከእባጅ ክያጃ ኔኒዬ፣ ከጌይ ጫንቃል ኣዬን ኔኒዬ ክያጃ ኔኒ ከዋይሺሽ ከቶ ኑኑዬ እድያ እን፤ ¹⁵ ናንዳካ ኦይን የጌዬዬ ናንዳካ ዳቢ እን የዋዬዬ ከኦካ ማሪካ ውር ፓይላ የማቲባ ማኝዬ። ¹⁶ ኣኪ፣ ጋን የካሊ ኦ? ናሹጜ ሺው ሮጝ ኔኒዬ ኡፓ፤ ጌይባ ከኦካ ሴሶዻ ጫንቃል። ¹⁷ ሃዋካ ኩይ ኢየሩሳሌሜ ሃይወን ኦካ ቶኦካ ይሁኔንዻዬ [ሃጌርሺኔያ ኣን ኤምኑ] ¹⁸ ታቺ እንዻ ሃሳውኔ ኣኔ ሃጌይያ፤ እሺዻ ዋይሼ ኣን ቱልባ ይሪካ ከኢየሩሳሌም/ ናንዳካ ኣን እን የማኝሺዮጝ ዋይኬኔ። ¹⁹ ኣንዻ ሃሺጚ እያጝ፤ ታቹጝ ዮ፤ ውራን ጊታይ ኣምኒኬ እን ናንዳካ ቁሜኔ ሙሬኔ፤ ሃሺሪያ ጆሌ ኦጉዋይካ ቶኦካ ይሁኔኑጝ ውራን ጊታጝ ጊባጃ፤ ²⁰ ፕርዻ [ሰማዕት] እን ኑኑጝ ከሹ እን ኒያቡካ እስጢፋኖስ እሪኖጝ፤ ሃቱምኪ ዋድማ እንግዬይዬ ሃዾሪ ኦይካ ራቅ እኔ ሃኣኔን ኣፓላካ ውር ጊታይካ ኒሺኔን ባኬን። ²¹ ታቺ እንዻ፣ ዋይሼ ኣን ካምባ፤ ሃይዕሲሼባ እን ኦዹክ ሃምካ ውር ጊታይ ማር ይሁኔኑጝ። ²² ዛርሲዻ ሌይ ሃምካ ሃሳወ ክያጃ እኑጝ ዋያ፤ ዬ ከኦይን ጩዋ ከናቅዲ ጊዬይ ዼግ ሻሜን፤ ሺጝ ካቡልባ ይጝ ከኦካ ፔኑጝ/ ካኡፌኬ ዻቆጝ ሁሉኩሼኬኔ ጉቹኩሼያ እሺ። ²³ እንግንዻ ጉቹኬኔ ባኬን ኣፓላ ጊዬይዬ፣ ጋኔንባ ቡቡኒ ዾዮክ ቲትሼኔ፤ ²⁴ ታቺ እንካ ፓር ካዾቁሼ ጳውሎስ ሃምካ ራቅካ ፓሬ ሃናንዳካ ኦ ዛርሲ ኡቹኩሼ እሹጝ ካሙሬ [ካማርምሪዮጝ] ሜይሼኔ። ²⁵ ጎምሼ ጳውሎስ [ዾዮክዻዬ] ኦና ሺጜ ሙሬኑጝ፣ ታቺካ ዽብ ና ዾሪ ኦካ ቆጩር ኔኑጝ ዋይሼ እንግን፣ ውርካ ሮም ክየም ኮምሼን ኣኔኬኔ ካሙሮጝ ይጝ ናሺሼ እየውባይ? ²⁶ ታቺ እንካ ዽብዻ ዋዬ እኑጝ፣ ኩይ ሃምካ ታቺ እንካ ፓሬ ዋይሼ እሺ የኣሽክዬ ኦጝ የእባጅያይ? ውር እን ይንጌ ሃውርካ ሮም። ²⁷ ታቺ እንካ ፓርዻ ኩይ ሃምካ ጳውሎሴ፣ ሺጝ እን ውሩጝ ይንዳ ሜይሼ ኣንባ፤ የኣይ ውርካ ሮማኒ? እሺዻ ሺጝ «እህ» ²⁸ ታቺ እንዻ ዋሼ ሺጝ፤ ኣን ሃጌዬ ውርካ ኦይኑጝ ሃቡሊ ቢሬ ጁዋኑዬ ጊያ። ዬ ጳውሎስዻ ሺጝ፤ ካርሲኬ ኦባ ጅሼ ኣኔ ሃኣይ ውርካ ሮማን። ²⁹ ዬ ከኦካ ውር ጊታይ ቃቢ እሺ መረምርዬኑጝ ጉካ ይሪካ፤ ታቺ እንካ ፓርዻ ኣዬ ውርካ ሮሜ ከሹ እን እባጆጝ፣ ናንዳካጝ ቁሜኬ ሰንሳላጝ ሪግሼና። ³⁰ ከዻምዻ ታቺ እንካ ፓሩጝ ውርካ ኣይሁድ ክያጃ ልኪ እን ካሲሲዬ ጳውሎሱጝ ኣዬ ኦጝ ናንዳካጝ ዎሼ እባጄኑጝ፤ ከኦይን ታታቻንካ ውርካ ቃሼ ውርካ ካራምካ ኣይሁዴ ፓይላ ካፑኡጭዮጝ ሜይሼና፤ ጎምሽ ጳውሎስዻ [ከኦይን ኣይ ዼጌ] ሪባ ኦካ ማሪ ጊዬይ።