ሃፑክ 21 {እን ፓይሼ እያጝካ ኢየሩሳሌም} ¹ ሃላልምቴ ከኦግዬዩጝ ጩዋ ከጋጊ ሃፓይቴያ እያጝካ ቆስ፤ ከዻምዻ እያጝካ ሩድ፤ ከኦይን ሃፓይቴያ እያጝካ ጳጥራጝ። ² ከኦይን ናንዳካጝ ሃጌይቴ ጋጊ ኬና ካካም ፊንቄውጝ፣ ሃሻዋዬ ሃካርሲያያ ጃሌን ጉዋዩ። ³ ቆጵሮስ ከሹ እን ጌይኔ ኦጉዋዩጝ፣ ሃኦቺቴ እሺ ዋርካታዬ ሃሳጊያዬ ሃፓይቴያ እያጝካ ሶርያጝ፤ ጋጊ ጉዋዩ ኣንቲቲ ኔኒ ናንዳካጝ ኣዬካ ጢሮስ ኡፑቴኑጝ፤ ኡዋዻ ሃጎባያ ኦይን። ⁴ ሃጌያ ውር ጊታይካ ዻይኔን ኦይንዻዬ፣ ሃቆባያ ከእንግን ሹ ሶጳ፤ እንግንዻ ጋይኬ መንፈሴ ጳውሎስ ካማሬ እያጝካ ኢየሩሳሌም ኩዬኑጝ ሜይሼያ። ⁵ ሹካ ቆቢኔን ጉዋዩ ከሹ እን ጃክኖጝ፣ ሃኦይዳ እንግኔ ሃካርሲያያ ጃሌን ጉዋዩ፤ ውር ጊታይካ ዻይኔንዻ ከሃኣጚ ጊዬይዬ ሃንታ ጊዬይዬ ቡልሼያ ኡዋው ሌይ ከኦካ ከተማ እን ሹኑክ፤ ከኦካ ላቅካ ኛፓስዻ ሃኮንፓርሲያዬ ሃይሁናያ፤ ⁶ ሃላልምቶጝ ጩዋ ኡዋው ሃሻዋያ ሃምካ ጋጉጝ፤ እንግንዻ ዋክሼያ ሃምካ ቶኦ ጊዬዩጝ። ⁷ ሃናሹጛ ከጢሮሴ ከጃሌን ጉዋዩ ካርሲዬን ሃሄክሻያ ጴጤሌማይስ፤ ሃኳታ ከጋጊ ክያኒዬ ሃጌሲቴ ጪኒጌን ጉዋዩጝ ጩዋ፤ ሃቆባያ ከእንግን ሹ ክየም። ⁸ ከዻም ሃናሹጛ ከኦይኔ ሃሄክሻያ ቂሳርያ፤ ከኦካ ሶጳን ክየም እን ኣይ ውርካ ክያጃ ሹቃ ሃሳወን ሃቦዋያ ኡሲ ኦካ ቶኦካ ፊልጶስ። ⁹ እሺዻ ኣኔ ሃንታካ እጛሽ ዻጵ ኣሁር ጊታኬና ሃሳወን ሃሳዋ። ¹⁰ ከኦይንዻ ሃቆብቴ ሹ ጁዋኑጝ ጩዋ ውርካ ቶካ ባሪዮ ኬና ሺጜ ኣጋቦስ ጎቤና ከይሁዳ፤ ¹¹ ኩን ኦጉዋዩዬ ቦዋ ካቲ እን ጳውሎስ ቁሜ ኣፓላጝ፤ ከቡዋ ኔኒዬ ጃፌ ቁሜን፣ መንፈስ ቅዱስ፣ ¹² ሃዋይቴ እን ኡዋዌ ውር ጊታይ ቆቤን ኦይኔ ጳውሎስ ካማሬ እያጝካ ኢየሩሳሌም ኩዬን ሃይሁናያ። ¹³ ዬ ጳውሎስ ሺጝ፤ ሃናንዳካ ኦ የኦቆርቴ እያጜ የቦፓይቴ ሻን ናኑጝ? ኣን ቁምኔን ሺዽዬ ናንዳካ ሮጝካ ኢየሱስ ታቺ እን ካኣርሼ ኢየሩሳሌሙጝ ሃኣይ ሼኪሚ" ዋይሼ እንግን እያይ። ¹⁴ ናንዳካጝ ማሬ ክሊማ ጉዋዩ ዋዬኑጝ፤ ኣኪ ሃሺጛ ካኣይ ክያጃካ ባሪዮዬ ሃኦይዳያ። ¹⁵ ከኦይን ጩዋ ሃሼክያዬ ሃቱልቴያ እያጝካ ኢየሩሳሌም። ¹⁶ ከውርካ ዻይኔን ክየም ክየም ጊታይ ኣኔን ቂሳርያጝ ቦው ኡዋዌ ቦሼያ ሃምካ ቶኦካ ምናሶን፤ ኦዋዻ ሃቆባያ ኦይን። ምናሶን ኣዬ ውርካ ቆጵሮሱጝ፤ ከኦካ ውርካ ዻይኔን ጊታባካ ሌሜኑጝ ሃክየም። ¹⁷ ከሹ እን ሃሄክሽቴ ኢየሩሳሌሙጝ፤ ጪኒጌን ጉዋዩ ቦዋ ኡዋው ከዋዛ። ¹⁸ ከዻምዻ ጳውሎሴ ከውር ዶኬ ሃፓያያ ያዕቆብ ቶዬን፤ ውር ጌጵሹጋንዻ ፓይላ ጋኔን ኦይን። ¹⁹ ጳውሎስዻ ጌሲዬ እንግን ጩዋ፤ ባሪዮ ከዋድማ ኔኒ ከኦካ ጫቃንካ ውር ጊታይ ማር ይሁኔን ኦይን ኣሽክዮጝ ፓይላ ሜይሼያ እንግን። ²⁰ እንግንዻ ዋዬ እንግኑጝ፤ ጎሺያ ባሪዮ፤ ዋይሼ ጳውሎስ እያጝ፤ ጪኔ ጉዋዩ ዮ፤ ውርካ ኣይሁድ ጁዋኑ ጊታኬና ካኮሜ ከሺ ቶይባ፤ ፓይላ ፕር ሃጊታኬና ቦዊ ናንዳካ ሕግካ ሙሴ። ²¹ ውርካ ኣይሁድ ጊታይ ቆቤን ኦካ ጫቃንካ ውር ጊታይ ማር ይሁኔን ፓይላ ካጎይዴ ሙሴዬ ካማሬ ሃንታ ጊዬይ ቆሬኑጝ፤ ኬካ ዱሲምኔን እን ጉዋዩ ኡፌኑጝ ካማር ቆቤኔ ከእርርሲዮጝ ሃሜይቴያ እንግን ናንዳካ እን። ²² ኩኔን ኑኑ ዋዬን ጊዬይ ሃኬና ማር ሺዺዬኔ፤ ኣኪ ካሻሚ ኦ? ²³ ዬ ሻምባ እን ሃሜይቴ እኑጝ። ውር ኣሁር ጊታኬና ኣኔ [ኦኬ ጫሪ] ኣኔባ ከኡዋው ኦጝ፤ ²⁴ ቦው ውራን ጊታይኔ ኣይኬ እንግኔ ሹዋጵሽባ ኦካ [ጫንቃል ጌዬን] ካካሬ እንግን ኤታጋንዻጝ ቢሬ ካጝ ጋንሺኖጝ ካሺሼ እንግንባ፤ ከይንዻ ውር ጊታይ ሃሜይቴ ናንዳካ እን ፓይላ፣ እን ዋዮጝ ማሬ ኣኩሉክ ኣዬኔ እንዻ የዻዬ ሕግዬ የኣኒኔ የኡፌኑጝ ጊባጅባ። ²⁵ ከውር ጊታይ ኣምኒኬ ኦካ ውር ጊታይ ማር ይሁኔኔ ዬ ሃጌይቶጝ ካማር ምሽ ጊታይ ቡልሼ ጣዖት ጋላጝ፤ ኒያቡዬ ቢህ ጊታይ ጩሌዬ ኣርሹጝ ኣሜኔ፣ ፕርዻ ከኦካ ኩጳሞዻ ካቶይ እንግን ኤታጋኔ ሃቱምያዬ ሃቶኩቴያ እንግን። ²⁶ ጳውሎስዻ ከዻም ቦው ውራኔ ኩያ፤ ጋይኬ ጋጜ ሙና ኦይንካ [ጫንቃል ጌዬኑጝ]። {ከኦይንካ ጫንቃል ጌዬን ካሹዋጵሼ ኣምኔ ጋላካ እንግን ክየም ክየምዻ ካቦፓይኔ ኣምንዻ ሜይሺኔን ሁሉካ ሃምካ ቶኦካ ይሁኔን}። ²⁷ ሹ ሶጳንዻ ካሙኒኖጝ ሄክሾጝ፣ ውርካ ኣይሁድ ጊታይ ፓዬንኬ እስያ ከሹ እን ጌዬ ጳውሎስ ከኦካ ቶኦካ ይሁኔኑጝ፣ ቲትሽ ዛርሲ ፓይላ ጎማ፤ ²⁸ ሺጜን እያጜ ጉቹካ፤ ውርካ እስራኤል ዮ፤ ኬልሺ ኡዋባ/ ዛርሲ ጉዋዩዬ ሕግ ጉዋዩዬ ፕርዻ ከራቁጝ [ጎርሺሼን] ከኦካ ራቅ ካጝ ሄክሾጝ ውር ጊታጝ ጌዬን ፓይላ ውር እን እርርሲዬን ሃይዕጝ፤ ከኦጝ ሳጊ ዾቅሼ ሃምካ ቶኦካ ይሁኔኔ ግያምሺሽ ራቁጝ ይሁሺኖጝ ሃእሺ•። ²⁹ ሺጜ ይንዻ፣ ከሌሜንካ እን ውርካ ኤፍሶን ጥሮፊሞስ ናንዳካጝ ጌዬኬ ጳውሎስ ኦካ ከተማ ቱዎጝ፣ ዋሽኬ ኦኮኑጝ ጳውሎስ ቦወ እሺዻዬ ሁሉኬ ሃምካ ቶኦካ ይሁኔኑጝ። ³⁰ ከተማ እን ፓይላ ዋራቂያ፤ ዛርሲዻ ጉኬ ኦጉዋይ ኣኔዬ ፓዬና፤ ጎም ጳውሎሴ ጁጁሬ ቡልሼያ ከኦይካ ካራምካ ቶኦካ ይሁኔን ሹኑክ፤ ሃጌያ ሃፑካንዻ ይሪካ። ³¹ ዎሼ ኒሼንዻጝ ከተማካ ኢየሩሳሌም ዋራቂያ ካሎን፤ ሃሳዋ ኔኒዻ ሄክሻ ሃምካ ውር ታቺ እንካ ፓርካ ሮም። ³² እንግንዻ ይሪካ ቦው ውር ታታቻንካ ፓር ክየም ክየሜ ፓፃኗኔ ጉኬ ፓያ ሃሚን ጊዬዩጝ፤ እንግንዻ ከሹ እን ጌዬ ታታቻንካ ፓሬ ፓፃኗኔ ጎይዳ ጳውሎስ ሙሬን። ³³ ታቺ እንካ ፓርዻ ኩይ ዲያወ ጎማ እሺ፤ ካቁሜኬ ሰንሳላ ዻውጝ ሜይሼና፤ ከኦይን ኣዬ ኒኔ ሻሜ ኦዬ ኣንሻ። ³⁴ ዛርሲዻ ቶና ሃሳው ክያጃ ክየምያጝ፣ ቶና ፕር ሃሳወን ክያጃ እንቃ፤ እን ናሹጝኬ ባጬን ጊዬዩጝ ታቺ እን ካዋዬ ኦኬ ክየምጵንዻጝ ካኒ ቻሊኬን፤ ዬ ካቦሼ ጳውሎስ ሃምካ ራቅካ ፓሩጝ ሜይሼና። ³⁵ እን ናሹጝኬ [ቻልክሚኔንካ] ዛርሱጝ፣ ጳውሎስ ሄክሼ ሃምካ ቱልሼኑጝ ፓፃኗን ካዼቶጝ ማቲሼያ እንግን ጊዲ። ³⁶ ዛርሲ እን ዻዬኬ ታካ ሁርዻ፤ ሺጜን ቡልባዬ/ ጋኔን ኡቹኬን። ³⁷ ፓፃኗንዻ ሺጜ ሃምካ ራቅካ ፓር ጎሜ ፓዬኑጝ፣ ጳውሎስ ዋይሼ ታቺ እንካ ፓር ካሜይሼ እን ክየሙጝ ናሺሼ ኣንባ? ታቺ እንዻ ሺጝ እያጝ የእባጅያይ ቶካ ግሪክ? ³⁸ እን ከኦካ ሌሜንካ ይጝ የቲትህ [ኦኬ ጋራዬ] ይዕሲሼ ውር ሺ ኣሁር ጊታይካ ኒሽ ናፒሲካ እያጝካ ቦናጝ የማር ግብፃዊዬኒ? ³⁹ ጳውሎስዻ ሺጝ፤ ኤኣንካ ከኦካ እን ኣኔን ኪልቅያጝ ሃኣይ ውርካ ኣይሁድ እንካ ከተማካ ጠርሴስ እን ጊባጆጝ፤ ካሃሳውኔ ዛርሱጝ ናሺሼ ኣንባ። ⁴⁰ ጳውሎስዻ ታቺ እንካ ፓር ናሺሼ እሹጝ ጩዋ፤ ዾር ኦይ ኣይ ዼጌ ዹዋል ዛርሲ ከቡዋዌ፤ ፓይላ ከሹ እን ቆቤ ሹዩጝ፤ ከቶካ ዕብራይስጥ ሺጝ እያጝ፤