ሃፑክ 20 {ጃሌን እያጝካ መቄዶኒያዬ ግሪኬ} ¹ ዋራቅዻ ጪራትሽባ፤ ጳውሎስ ሺውሺሽ ውር ጊታይካ ዻይኔኔ ክሊያ እንግን፤ ይዕሲ እንግንዻዬ ናሹጛ እያጝካ መቄዶኒያ ኩይሼን። ² ከኦካ ራቅ ጊታይ ሳጊዮጝ ክሊዬን ዛርሲ ከክያጃ ጁዋኑዬ ሄክሻ ፔንካ ግሪክ፤ ³ ኡፓ ኦይንዻ ትጌሽ ጂያን። ሼክኒን እያጝካ ሶሪያ ከጋጊ ኩይሼኑጝ ናንዳካጝ ውርካ ኣይሁድ ድኮጝ፤ ከዻርካ መቄዲኒያ ሻሜ ዋኬን ቱምያ። ⁴ ውዋካ ጳይሮስ ሱሲጳጥሮስ እንካ ቤርያጝ፤ ኣርስጥሮኮንስ እንካ ተሰሎንቃኔ ሲኮንዱስ፣ ጋይዮስ እንካ ደርቤኔ፣ ጊታይ ፓዬንኬ ሃምካ ጎብሼንካ እስያ ቲኪቆሴ ጥሮፊሞሴ፣ ፕርዻ ጢሞቴዎስ ኩያ ከእንግን። ⁵ ውራን ጊታጝ ከታካ ሌሜን ሌሜ ፓይ ኡዋዌ ካሊያ ኡዋው ጢሮኣዳ። ⁶ ዬ ኡዋው፣ ቶንቶሮካ ባላሻ ሳጊዮጝ ጩዋ፤ ከኦካ ፊልጵስዩስ ሃናሹጛያ ከጋጊ፤ ከሹ ቾንዻ ጩዋ ሃጌያያ ጋጝ ከውር ዶክ ከኦካ ጢሮኣዳ፤ ከኦይን ሃቆባያ ሹ ሶጳ። ⁷ ከሳምንትዻ ከሹ እንካ ሌሜን ባላሻ ጩኬን ሃፑጪያ ኣንቴባዬ፣ ጳውሎስ ናንዳካጝ ቃቢዬ ከዻም ኩዬኑጝ፤ ኣኔን ከእንግን ሃሳውኔን፤ ሃሳዋ ኔኒዻ ራጅምሻ ሌይ ምክር ጫቃን። ⁸ ኦካ ቶኦ እን ፑኡጪዬዻ ኣና ፓኖስ ጁዋኑ። ⁹ ክየም ኬና ሺጜ ኣውጤኪስ [ኣይካ ዋድማዻ] ኡፌ ኣኔባ ኦይካ መስኮት፤ ጳውሎስ ከሹ እን ራጅምሼ ሃሳዋ ኔኑጝ፤ ካርቡ ኔኒ ጎጄ ኡጛ፤ ከኦካ ፎቅ እንካ ማክንሳጝ ቡዳ ሃምካ ይግን ኣርሽዻዬ ቲታ። ¹⁰ ጳውሎስዻ ጎቤ ኡጜ እሺ ዾዮኬ ናጌ፤ ዋይሼ እንግን ዻቆ ኔኒ ናንዳካጝ ኣኒኔ ቱዎጝ ኔኑጝ ኦይድ ኦኬ ክየምጵንዻ ሙንቴን። ¹¹ ዋክ እንቃዻዬ ሌፓ ሃምካ ፎቅ፤ ፓች ባላሻ እንዻዬ ኣማ፤ ሌይ ሃምካ ሃርሾጝ ሃሳውኔ ጁዋኑጝ ጩዋ ናሹጜ ኩያ። ¹² ውርዻ ውር እንካ ዋድማጝ ማቲ እያይኔ ቦዋ፤ ከእንዻ ካሎን ሌምያ። ¹³ ዬ ኡዋው ጳውሎስ ቦወን ሃሌማዬ ሃፓያያ ሃምካ ጋጉጝ፤ ከኦይን ከጋጊ ሃፓይቴያ እያጝካ ኣሶን፤ ሃሻምቴ ይንዻ ጳውሎስ ሃናንዳካጝ ቃቢዬ ዳሊ ክያኒ ከጃፍ ኩዬኑጝ። ¹⁴ ሃጌይቴ ጋጝ ከኦካ ኣሶን ጩዋ፤ ሃቦዋ እሺዬ ሃፓያያ ከጋጝ ከጋጊ እያጝካ ሚጢሊኑጝ። ¹⁵ ከዻምዻ ሃፓያኬ ጋጊዬ ሃሄክሻያ ኦካ ጎልዹ እን ኣኔን ኦካ ዻርካ ኪዩጝ። ከሹ እንካ ዻይሼዻ ሃቁዋልሺናያ እያጝካ ሳሞን፤ ከዻም ሃሄክሻያ ሚሊጢን። ¹⁶ ጳውሎስዻ ከኦካ ጎብሼንካ እስያ ናንዳካጝ ማሬ ሹ ጁዋኑ ኡፍኔን ዎሼኑጝ፤ ማር ኤፍሶን ሁሉኬኔ ቱምያ ሳጊዬ ኩዬን፤ ቻሊያጝ ከቶንቶሮ እንካ ሹካ ዶጝታጝ ጊቢ ኢየሩሳሌም ኩዬ ድቢኔን። ¹⁷ ከኦካ ሚሊጢንዻ ይዕሲሼ ውር እያጝካ ኤፍሶኔ ሺውሺሻ ጌጵሹጋን ካቶኦካ ይሁኔን፤ ¹⁸ ከሹ እን ፓይኔዻ ዋይሼ እንግን እያጝ፤ ከሹ እን ሃሁሊኬ ሃምካ ጎብሼንካ እስያ ናሹጝኬ ሹ እንካ ሌሜኔ ሹ ጮል ሃሻም እያን ሃኡፌኬ እየው የእባጃያ። ¹⁹ ኦኬ ክየምጵንዻ እን ናሹጝኬ ቻልክምኔንካ ውርካ ኣይሁድ ሄክሺሼያ ኣን ኦኬ ጋራጵንዻያጝ ታቺ እን ከቃጃልማሞ ታቺዬ ከጪራው ዋድምዬኔ ሃካና ዺያኒኬን ²⁰ ኣይን ከኦጉዋይካ ጳሉጝ ከኦጉዋይካ ቶኦ ሺሪዬን፤ ከእየው እርርሲዬኔ ሃሺጚ ጠቅምሼባ እየወ እን ሃቃቢዮጝ ከሜይሺኔን ሃዋክሼኬን ሁር። ²¹ ከይሁኔን ከዋክቴ ሃምካ ባሪዮዬ ካጋምኒዬኬ ኢየሱስ ታቺ እኑጝ ናንዳካ ኣይሁድዻ ናንዳካ ውርካ ግሪክዻ ሃሻሚ ሹቃዬ ሃሜይሼያ እንግን። ²² ጋንዻ ሃሄክሺያ ሃሚንያጝ ካማር እንካ ሄክሽ ኣን እባጄኑጝ፤ መንፈስ ቅዱስ ካካምሼ እያጝካ ኢየሩሳሌም ኣናን ጊዲ ሻሜን። ²³ ኣይባዬ ኦካ ከተማ ጊታካጝ ካካሞጝ ፓይላ ቁምኔኔ ጋሎዬ ካካሊዬ ኣኑጝ መንፈስ ቅዱስ ሜይሼ እንባ። ²⁴ ካኣይባዬ ሪሼን እን ሃቦወኬ ኦካ ታቺ እን ኦካ ኢየሱሱጝ ኣይኔንካ ባሪዮ ክያጃ ሹቃ ካማኝሺዬን ሃሹዋጵያ ዋድማ ናኒያጝ፤ ናንዳካ ኣን ዻቆ ናኒ ካማሬኬ ኦኬ ክየምጵንዻ ኮሜኑጝ ²⁵ ኣይኒን ጋኑጝ፣ ሃዋካ ጆል ኦካ ጫቃን ጉዩዬ ሃሜይሼ እየው ጌጳሞካ ባሪዮጝ፣ እየው ፓይላ እባ ከሌሜን የማርቴ ማሪ ናኒ ጌዬኑጝ ሃእባጅያ። ²⁶ ዬ ከኦካ ውር ፓይላ ሃኣዬ ኒያቡ ጫቃንቃሉጝ ከሹ እንካ ሹጝ ሃሜይሼ እየውባ፤ ²⁷ ክያጃካ ባሪዮ ፓይላ ከእየው ሜይሼን ከሹ ኬና ሃዺያኔ ኣኔኬን። ²⁸ ናንዳካ እንግን ኤታጋኔ መንፈስ ቅዱሴ ሻም ኤጲስቆጶሳት ጌጳሲ ኦኔኒ ዾዮኩጝ ዜሌ ፓይላ ኣጅቴባ፤ ከኒያቡ እን ኔኑጝ ቶኦካ ባሪዮ እን ኬራፎጝ ቶይባ። ²⁹ ኣን ሃኩይያጝ ጩዋ፣ ዮዮ ጊታይካ ሆቺኔኑጝ ፓዬኔ ከኦካ ጫቃን ጉዩ ካማር ሁሉኬኔ ካማርሺኔ ዜሌ እን ዻዹጝኔኑጝ ሃእባጅያ። ³⁰ ኣይን ከኦካ ጫቃን ጉዩጝ ውርካ ዻይኔን ጊዬይ ፑኡሺዬን ጊታይካ ቆራሲ ኣኩሉክ እኑጝ ናሹጝጋ። ³¹ ዬ ኣጅቴባ፤ ቦን ጂያን ፓሲ ከምክሬ ሹሼ ሃካና ጱዽሽኬን ኦኬ ክየምጵንዻዬ ሃክሊዬ እየው ክየም ክየም ከጪራው ጶቅሲባ። ³² ካንዻ ናንዳካ ባሪዮ፤ ካሌምሲዬ እየው እያጝ ከኦካ ጫቃንካ ውርካ ይሁኔን ፓይላ ካሮጉምሺሺኔ እየው [ኦኬ] ቻሊዬኑጝ ናንዳካ ክያጃ እንካ ኣይኔን ሃኤልቅምሼን እየውባ። ³³ ሃካና ኣንግርዽኬን ቢሬካ ውር ክየምጵንዻ ወይ ወርቅ ወይ ኣፓላ፤ ³⁴ ቡዋ ጊታጝ ናኑጝ ናንዳካ ኣኔ ውር ጊታይ ኣይኬ ኣኔ ከኦካ ኦግታይ ካዎሺሽ ኡዋው ካዋድምሼ ኡዋው ኣይን እየውዻ የእባጃያ። ³⁵ ሃዻቻኬ ካንታ ጉዋዩዬ ውር ጊታይ ኣኔን ጋሎ ክያኒ ኬልሺዬን ጉዋዩ ካኣኖጝ ከኦካ ኦግታይ ሃኣሽክዮጝ ፓይላ ሃዹዋልሼያ እየው፤ ከኦካ እን ቦውጝ ሳጊ እንካ ኣይንቶጝ ሃጫንቃል፤ ክያጃካ ኢየሱስ ታቺ እን ሺጚ እያይ ካጶቅሲባ። ³⁶ ሺጜ እን ጩዋ፤ ቶኬ ኩዋምኔ ይወና ከውር ፓይላ። ³⁷ ውር ፓይላ ኦቆራ ካሎን፤ ጎም ቦሉካ ጳውሎስዻዬ ሹንቃ፤ ³⁸ ከኦካ ፓይላ ሳጊ ዱሚ ሻን ጊዬዩጝ፤ ሃክያጃ እን ሺጜ ካርሲኬ ሹጜ የጌያኬን ማሪ ናኒዬ ክያጆጝ። ከኦይንዻ ቡልሼያ እሺ ሌይ ሃምካ ጋጉጝ።