ሃፑክ 19 {ጳውሎስ ከኦካ ኤፍሶን} ¹ ኣጵሎስ ከሹዋን ጊታይ ኣኒኔ ቆሮንቶሱጝ፤ ጳውሎስ ሳጊኬ ፔን እንካ ጋላጜ ኩና ኤፍሶን፤ ኦይንዻ ጌይ ውርካ ዻይኔን ክየም ክየሜ፤ ² ዋይሼ እንግን ከሹ እን የኣምኒቶጝ የቦዋያይ መንፈስ ቅዱስ? እንግንዻ ሺጝ፤ ሃካና ቦዋኬን፤ ፕርዻ እን መንፈስ ቅዱስ ኣኖጝ ሃካና ዋያኬን። ³ ጳውሎስዻ ዋይሼ እንግን እያጝ፤ ኣኪ የዱቅናኬ ኦ? እንግንዻ ሺጝ ዱቅኔንካ ዮሐንስ። ⁴ ጳውሎስዻ ሺጝ ሃዱቅኔንካ ዮሐንስያጝ ሃዱቅዬንካ ይሁኔን፤ ዮሐንስዻ እሺ ኤምኑ ውር ከእሺ ጩዋ ካጝ ኩኑጝ ካኣምኒዬ ከኢየሱሱጝ ክያጃ። ⁵ እንግንዻ ከሹ እን ዋዬ እኑጝ ዱቅዬና ከሮጝካ ኢየሱስ ታቺ እን። ⁶ ጳውሎስዻ ከሹ እን ኣይሼ እንግን ቡዋ ኔኑጝ፤ መንፈስ ቅዱስ ጎብሼያ እንግን፤ ሃሳዋ ቶግ እንቃዻ፤ ሃሳዋ ሃሳዋዻ። ⁷ ውራንዻ እንግን ፓይላ ጋይ ታጵላማ። ⁸ ጳውሎስዻ ሁሉክ ሃምካ ቶኦካ ይሁኔንካ ውርካ ኣይሁዴ፤ ናንዳካ ጌጳሞካ ባሪዮ ሃሳወኔ ሱድዬን እንግኔ ትጌሽ ጂያን ፓሲ ሪግሼን ኬኔ ኣኔን ኦካ ማሪ ጊዬይ ሃሳውኔን፤ ⁹ ዬ ውር ክየም ክየም ጊዬይ ጌይ ጋስኩቴ፤ ናንዳካ ኣምኒዬን ካኒ ናሺኬን፤ ጉዋርካ ታቺ እንዻ ጋኔን ካሎን ሚኔን። ዬ ጳውሎስ ኦይድ እንግኔ ኩያ፤ ቦው ውር ጊታይካ ዻይኔንዻ እንግንጵኔ ከኦካ ቶኦካ እርርሲኔን እን ኣኔን ጢራኖስ ቱዎጝ ሹ ጮል ኣኔን ከእንግን ሃሳውኔን። ¹⁰ ከይን ሻሜን ናንዳካጝ ሌሜ ዻውጝ፤ ውርካ ኣይሁድ ጊታይ ቆቤ ኣኔን ሃምካ ጎብሼንካ እስያዬ ውርካ ግሪኬ ፓይላ ቻሊያ ክያጃካ ታቺ እን ዋዬን። ¹¹ ባሪዮዻ ከቡዋካ ጳውሎስ ካሎን ኣኔን ኦግታይ ካጎሺሺ ሻሜን፤ ¹² ጫርቄ እን ዱሚ ኣፓላ ወይ ሩዋጝ ቦሼያ ሃምካ ውር ጊታይ ዴሜንያጝ ቡርቂ ጊዬይ ኣኔን እንግን ኦቼን፤ ኡሲ ጊታይካ ጮዩዻ ኣኔን ቱሌን። ¹³ ከውርካ ኣይሁድ ጊታይ ሺሪዬ ቡልሼን ቤሮ ክየም ክየም፤ ከሮጝካ ኢየሱስ እን ጳውሎስ ሜይሺኖጝ ካቡሎጝ ሺጝ ሃሜይቴያ እየወ ሮጝካ ኢየሱስ ታቺ እን ኡሲካ ጮዩ ከኦካ ውር ጊታይ ሜይሺኖጝ ታማ ካቡሌን። ¹⁴ ውር ታቺካ ቃሽ እንካ ውርካ ኣይሁድዻ [ኣስቄዋ] ሃንታካ ጁማን ሶጳን ጋኔን ይጝ ሻሜን። ¹⁵ ኡሲ እንካ ጮዩዻ ሺጝ፤ ሃእባጅያ ኢየሱስ፤ ሃእባጅያ ጳውሎስዻ፤ ዬ እየው የኣያ ግታጝካ ኒን? ዋይሼ እንግን እያይ። ¹⁶ ከኦይን ውር እን ኡሲካ ጮዩ ጎሞጝ ኣሼኔ ጎማ እንግን፤ ቁዋቅትሼያ እንግንዻ ካሎን ናንዳካጝ ማሬ እንግን ጌዬኑጝ ኦይድ ቶኦዬ ሪሻ እንግን ቡንዱርቆ። ¹⁷ ይንዻ ከጊታይ ቆቤን ኤፍሶን፤ ከሹ እን እባጅኔ ከኦካ ውርካ ኣይሁዴ ግሪኩጝ ሪጊ ጎማ እንግን ፓይላ፤ ከእንግንዻ ጎቢያ ሮጝካ ኢየሱስ ታቺ እን። ¹⁸ ከኦካ ውር ጊታይ ኣምኒዻ ጁዋናን ፓዬኔ ዋድማ ጋራ ጋራ ጊታይ ጊዬዩጝ ክያጃ ጃ፤ ¹⁹ ከኦካ ጫቃንካ ኣሽክዬን ጋጊማዬ ኣኔዻ ጅጁዋናን ከወርቀት ጊዬይ ፑኡሺዬ ቦፓይኔን ጉዱባ ኦካ ማሪካ ዛርሲ፤ [ኬንሺዬ ዋጋ ጊዬይዻጝ ማቲ ሹ ዶጝታሜ ጌያ]። ²⁰ ከዴንታ እንዻ ክያጃካ ታቺ እን ጌጳዽዬ ኩይኬ ቁዋቅቲዬ ባሺሜኔ ኩያ። ²¹ ይን ፓይላ ማቲዮጝ ጩዋ፤ ጳውሎስ ሳጊኬ ዻርካ መቄዶኒያዬ ኣካይያዬ እያጝካ ኢየሩሳሌም ኩይሼን ቱምኬ መንፈሴ፤ ሄክሼ ሃሚን ጩዋ ሺጝ፤ ሮም ቶዬን ናኒ ኣኔባ። ²² ከኦካ ውር ጊታይካ ኬልሾ ኔኒዻ ዻዋን፤ ጢሞቴዎሴ ኤርስጦኔ፤ እያጝካ መቄዶኒያጝ ዬ እሺ ኡፓ ሃምካ ጎብሼንካ እስያ ሹ ጩዋማ። ²³ ከሹ እን፤ ናንዳካ ጉዋርካ ታቺ ሻማ ዋራቅ ታቺ። ²⁴ ውር ክየም እን ፑኡሺኔ ጆል ቢሬ ሺጜ ዴሜጥሮስ ዋይሼ ቶኦካ ይሁኔንካ ኣርጤዎስ ኦግታይ ሙኔን ሻምኬ ቢሬዬ ጋሽክዮጝ ኦግታይ ካጌይሺሾጝ ካኒ ማር ባዶዬን። ²⁵ እንግንዻ ውርካ ዋድማ ጊታጜ ውርካ ዋድማ ጊታይ ዋድምዬን ከዋድማ ሃይናቲ ክየሜ ፑኡሺሜን ክየምጵኔ ዋይሼ እንግን እያጝ፤ ውር ዮ፤ ዋድማጝ ጌይሺሼ ኡዋው ኦኬ ሹቃጝ የእባጃያ። ²⁶ ውሩጝ ሺጜ ጳውሎስ ማርኬ ኤፍሶንጵኔኔ፤ ሱድዬን ዛርሲ ጁዋኑካ እስያ ጊታይ ቆቤን ሃምካ ጎብሼን ፓይላዬ ጊያምሺሼ እንግኑጝ ሃኦይን ሃጌይቴዬ ሃዋይቴዬ፤ ኣማልክት ጊታይ ጋሽክዬ ከቡዋካ ውሩጝ ክየምጵንዻ ማሬ ኣማልክት ኣዬኑጝ ሜይሼያ ኡዋው። ²⁷ ከሮጝ ሹቃጝካ ዋድማ ጉዋዩ ጊያምሺሼን ሳጊ፤ ውርካ እስያ ፓይላዬ ቶኦካ ይሁኔን ታቺ እን ውርካ ፔን ይሁኖጝ ማቲያ ካማም እያይ፤ ፕርዻ ጎቢንታ ታቺ እን ኔኑጝ ጎባ. ²⁸ ውራንዻ ከሹ እን ዋዬ እኑጝ ማኒሻ ካሎን ጋራዬ፤ ሺጜን ኣርጤምስ እንካ ኤፍሶን ሃታቺዬ ካርሲያ ኡቹኬን። ²⁹ ይሪካ ከኦካ ከተማ እን ፓይላ ዋራቅ ናሹጛ፤ ዛርሲዻ ከኦካ ጋጝ ማቲዬን ጊታይ ጅሼ መቄዶኒያዬ ውር ጊታይ ኣኔን ከጳውሎስ ጃሌኔ ኣይ ባይዳን ኔኑጝ፤ ጎም ጋይዮሴ ኣርስጥሮኮሴ ጉኬ ሻዋ ሃምካ ራቅ እንካ ዹዋልሺኔ ዎርግኑጝ። ³⁰ ጳውሎስዻ ቱሌ ዎሻ ሃምካ ማሪካ ዛርሲ ቱሌን፤ ዬ ውር ጊታይካ ዻይኔን ሃርጌያ እሺ። ³¹ ከኦይንካ ጎብሼን ውር ጊታይ ጌጳሲዮጝ ክየም ክየም ኣይን ውርካ ናሺዺ ኔኑጝ፤ ጳውሎስ ካማሬኬ ሾያሞ ሃምካ ራቅ እንካ ዎርጊን ዹዋልሺኔን ቱሌኑጝ ይዕሲ ውሬ ይወና። ³² ጉባይ እንዻ ጎሬኔ፤ ክየም ሃሳው ኦኬ ክየምያጝ ኑዋ ሃሳው እንቃዬ ጋኔን ኡቹኬን፤ ውር ጁዋኑዻ ሃናንዳካ ኦ ፑኡሺምኔ ኦይኑጝ ካኒ ግባጅኬን። ³³ ውርካ ኣይሁድዻ ከሹ እን ይቄ እስክንድሮስ ከኦካ ጫቃንካ ዛርሲዬ ቡልሼ ሌሜኑጝ፤ ውር ክየም ክየም ካሜይሼ እንግኑጝ ጉቹካ፤ እሺዻ ዎሻ እን ካዜርምኔ ናንዳካ እንግኔ ካቆቤ ሹዩጝ [ጠቅሲያ እንግን]፤ ³⁴ ኣይባዬ እሺ ኣዬ ውርካ ኣይሁዱጝ ከሹ እን ግባጆጝ እንግን ፓይላ ከናቅዲ ክየም ሺጝ ኣርጤምስ እንካ ኤፍሶን ሃታቺዬ ጉቹካ ከሰዓት ዻ። ³⁵ ዾርካ ከተማ እን ቶኩኔ ጆል ወርቀት ኡፑሺሽ ዛርሲ ሹዬ ሺጝ እያጝ ውርካ ኤፍሶን ዮ፤ ቶኦካ ይሁኔን ታቺ እንካ ኤፍሶን ኣርጤምሴ እን ሙኔኔ ጎብኬ ፎላጝ ካባክ ኣዬ ዛርሲካ ኤፍሶን ማር እባጄን ሃኒን ኣኖጝ? ³⁶ ዬ፤ እን ማር ኣኩሉኩጝ ቡድዬን ከእያይ ኣዬውጝ፤ ከጌይቴ ካፌ ኦኬ ክየምጵንዻ ከይሪካ ሙኔን ከዺያንቶጝ ሁሉኩሼ እየውባ። ³⁷ ውራን ጊታጝ ካኒ ቡሪኬን ቶኦካ ይሁኔን ጉዋዩዬ ወይ ካኒ ሜይሼኬን ኣምላክ ጉዋዩ ክያጃካ ይሬኔ የጎማዬ የቦፓይንቴያ ሌይ ኦጝ እያጝ። ³⁸ ኣኪ፤ ድሜጥሮሴ ከውር ጊታይ ኣኔን ከእሺዬ ከኦካ ውር ክየምጵንዻ ጋኔ ሜርሜርያጝ፤ ቶኦካ ኮምሺኔን ሃቦወን፤ ጊታይካ ኮምሼዻ ኣኔባ፤ ቻሊባ ካሲሲዬን ቦፓዬን። ³⁹ ከኦጝ ኦኬ እንቃ ኬና የዎሽቴ ቦፓይኔን ኣኔያጝ፤ ቶይባ ኦጝካ ጉባይካ ሕጉጝ። ⁴⁰ ወይዻ ከናንዳካ ኦይን ማቲ ሹጙጝ፤ ከቲቴንካ ዋራቅ ካማርቴ ካሲሲህንቴኑጝ ካብንሺ ኡዋባ ኦኬና ኣይ ልኪዻ ናንዳካጝ ማሬ ኣኔኑጝ ናንዳካ ዋራቁጝ ጋንሻ ኡዋያጝ ካዋሽቶጝ ሃቻሊያኬን። ⁴¹ ሃሳወ እንዻ ጩዋ፤ ውር ጊታይ ፑጪ ካላልምኖጝ ሻማ።