ሃፑክ 18 {ጵውሎስ ከኦካ ቆሮንቶስ} ¹ ከኦይን ጩዋ ጳውሎስ ናሹጝኬ ኣቴናዬ ኩይሼያ እያጝካ ቆሮንቶሱጝ፤ ² ከኦይንዻ እን ኣይካ ጅሺሼንካ ጰንጦስ፤ ጌያ ውርካ ኣይሁድ እን ሺጜ ኣቂላጝ፤ እሺዻ ውርካ ኣይሁድ ፓይላ ካቱሌኬ ሮሙጝ ከእን ቀላውዴዎስ ኤርግትኖጝ ከኝያ ኔኒ ጵርስቅላ ፓዬና ከዲያው እያጝካ ኢጣሊያጝ። ³ እሺዻ ከእንግን ናንዳካጝ ኣዬ ውር ኬና ቻኬን ዱንካጝ፤ ኡፈኬ እኑጝ ካርሲያ ዋድማ ኬና ኣይ ሃይነት ክየም ኣሽክዬን። ⁴ ከሹ ጊታይካ ሶጵሳዻ ከውርካ ኣይሁዴ ከውርካ ግሪኬ ከኦካ ቶኦካ ይሁኔን ቱዎጝ ኣኔን ሃሳውኔኔ ካሱድዬ እንግኑጝ ኣኔን ዎሼን። ⁵ ሲላሴ ጢሞቴዎሴ ከሹ እን ጎቤኬ መቄዶኒያጝ፤ ጳውሎስ ቁዋቅትሽ ከውር ክያጃ ሜይሼኔ፤ ኢየሱስ እሺ ኣዬ ክርስቶሱጝ ኣኔን ውርካ ኣይሁድ ሜይሼን። ⁶ ኣይባዬ ከሹ እን ሚኔዬ ይሬዬ ትርሺ ኣፓላ ኔኒዬ ሺጝ ኒያቡ ጉዩ ካኣይሼ እየው ኤታጋን/ ኣን ሃኣይ ጫንቃል። ከኦጝ ጩዋ ሃኩይባ ሃምካ ውር ጊታይ ማር ይሁኔኑጝ። ⁷ ጩዋ ቱልኬ ኦይኔ ኩያ ሃም ሺጜ ቲቶስ ኢዮስጦስ ኩያ ሃምካ ቶኦካ ውር እን ይሁኔ ባሪዮጝ፤ ቶኦካ ውር እንዻ ሃኦካ ቆጩርካ ቶኦካ ይሁኔን። ⁸ እን ኣይ ታቺካ ቶኦካ ይሁኔንዻ ቀርስጶስ ኣምኒያ ከውርካ ጶሮክ ኔኒ፤ ጳውሎስ ሃሳወኔ ውር ጁዋኑካ ቆሮንቶስ ጊታይ ዋዩጝ ኣምኒዬ ዱቅያ። ⁹ ታቺ እንዻ ከምክር ከሹካ ዋይሼ ጳውሎስ እያጝ፤ ኦይ ሪግሺኔን ሃሳውባ፤ ኦይ ሹይዻ ኡፌን፤ ¹⁰ ኣን ሃኣይባ ከእኔ ውር ክየምጵንዻ ናሹጜ ቻሊኬን እን ጋራጋራ ሻሜን፤ ኦካ ከተማጝ ሃኣኔ ውር ጁዋኑዬ፤ ¹¹ ዬ ጳውሎስ እርርሲዬን ክያጃካ ባሪዮዬ ኡፓ ቦን ክየም ከጆጊ ከጋጝ። ¹² ጋልዮስ ከሹ እን ኣዬ ታቺካ ኣካይያጝ ውርካ ኣይሁድ ሃሳወን ከጋጜ ናሹጝሼያ ጳውሎስ፤ ቦሼ ሃምካ ካራምካ ኮምሼንዻዬ፤ ¹³ ሺጝ ውሩጝ ከጉዋር እን ሕግ ማሬ ናሺዬኑጝ፤ ውር ካይሁኔ ባሪዮጝ ኣኔን ግያሚሺሼን። ¹⁴ ጳውሎስ ሃሳወንያጝ ካኒ ቦውባ ቶግ ኔኒ፤ ጋልዮስ ዋይሼ ውርካ ኣይሁድ እያጝ፤ ውርካ ኣይሁድ ዮ፤ ክያጃጝ የቦፓይንቶጝ ዋቲ ኣያካ ሴሶያጝ ወይ ናንዳካ[ወንጄል] ቁዋቃያጝ ካዋይሺኔ እየው ዋንቲ ሁሉኩሼያ ኣን፤ ¹⁵ ኣይባዬ ዜርማ ጉዩ ሃናንዳካ ክያጃኔ ናንዳካ ሮጛኔ ፕርዻ ሃናንዳካ ሕግ ጉዩ ኣዬኑጝ እየው ሹዋጵባ ኣን፤ ከኦኬና ኣይ እያጝ ሃቻሊኬን ኮምሼን ኣዬን። ¹⁶ ዬ ከኦካ ሌሜንካ ካራምካ ኮምሼን ቡሊ እንግንባ። ¹⁷ ከሹ እን እንግን ፓይላ ጎም ታቺ እንካ ቶኦካ ይሁኔን፤ ሶስቴንስ ኦካ ሌሜንካ ቶኦካ ኮምሼኔ ሙራ፤ ዬ ጋልዮስ ክያጃ እን ካኒ ዋሼኬን ኦኬ ክያንዻ። ¹⁸ ከኦይን ጩዋ ጳውሎስ ኡፓ ሹ ጁዋኑ ቆሮንቶስ፤ ከኦይን ዋኬ ጪኒጋኔ ከጵርስቅላዬ ከኣቂላዬ ከጋጊ ፓይሼያ እያጝካ ሶሪያጝ። [ናንዳካጝ ኣኔ ኦኬ ጫሪዻጝ ካራ እሺ ኤምኑ ኦካ ራቅ እን ሺጜ ክንክረኦስ። ¹⁹ ከሹ እን ሄክሼ ኤፍሶንዻ ጵርስቅላዬ ኣቂላዬ ኦቼያ እንግን ኦይን፤ ዬ እሺ ኤምኑ ሁሉክ ሃምካ ቶኦካ ይሁኔንካ ኣይሁዴ ኣኔን ከውርካ ኣይሁድ ሃሳውኔን። ²⁰ ካፓዬኬ እንግንዻጝ ከሹ እን ጋንሺኖጝ ካኒ ናሺኬን፤ ²¹ ኣይባዬ እባጄ እንግኑጝ ዋይሼ እንግን፤ ሃኬ ክያጃካ ባሪዮያጝ ሃዋካ ኩንባ፤ ናሹጝኬ ኤፍሲኔ ፓያ ከጋጊ። ²² ከሹ እን ሄክሼ ቂሳሪያዻጝ፤ ቱሌ ጌሲያ ውርካ ቶኦ ጊታይካ ይሁኔኑጝ፤ ጩዋ ጎቢሼያ እያጝካ ኣንጾኪያጝ። ²³ ኡፑኔ ኣንጺኪያ ሹ ጩዋማጝ ጩዋ፤ ከኦይን ናሹጝኬ ፔንካ ገላትያዬ ፈርግያዬ ሺሪ ኦጉዋይካ ቁዋቅትሺሻ ውር ጊታይካ ዻይኔን ፓይላ። ²⁴ ከሹ እን ከኣንጾኪያ እን ኣይካ ጅሺሼኔን እን ሺጜ ኣጵሎስ ውርካ ኣይሁድ ክየም ኩና ኤፍሶን፤ እሺዻ ሃውር ኬና እርርዬ ኣባጅ ወርቀት ጊታይካ ይሁኔን ካሎን። ²⁵ ውሩጝ ሃኬና እርር ጉዋርካ ታቺ እን ናንዳካ ኢየሱስዻ ሃኬና ኩይኬ መንፈሴ እርርሲዬን፤ ካኣይባዬ እን እሺ እባጆጝ ሃዱቅዬንካ ዮሐንስጵን። ²⁶ እሺዻ ከኦካ ቶኦካ ይሁኔን ካርሲያ ናሹጜ ሃሳውኔን፤ ጵርስቅላዬ ኣቂላዬ ከሹ እን ዋዮጝ፤ ቦሼ ሃምካ ቶኦ ጊዬይዬ ጉዋርካ ባሪዮ ሳጊ ሻም ልኪዬ ሜይሼያ እሺ። ²⁷ ኣጵሎስ ከሹ እን ዎሼ እያጝካ ኣካይያ ኩይሼኑጝ ቁዋቅትሺሻ ጪኒጌኔ፤ ውርካ ዻይኔን ኦይን [ ካቦዎጝ ቶካ ወርቀት]፤ ሄክሼ ኦይንዻጝ እን ናሹጝኬ ኣይኔን ጊታይ ኣምኒዬ ኣኖጝ ማቲያ ኮልሾ ታቺ። ²⁸ ክሊዬንኬ ወርቀት እንካ [ቅዱሳኔ]፤ ኢየሱስ እሺ ኣዬ ክርስቶሱጝ ከውርካ ኣይሁድ ከዜርማ ኬና ኣይ ቁዋቃ ከኦካ ማሪካ ዛርሲ ጋኒሼን እሺ ጫጂሼን።