ሃፑክ 17 {ጳውሎሴ ሲላሴ ከኦካ ተሰሎንቄ} ¹ ጳውሎሴ ሲላሴ ሳጊኬ ኣንፊጶሌ ኣጶልንያዬ ፓያ እያጝካ ተሰሎንቆጝ፤ ከኦይንዻ ኣና ቶኦካ ይሁኔንካ ኣይሁድ። ² ጳውሎስ ከእያይ ዱሲዮጝ ሁሉካ ሃምካ ቶኦካ ይሁኔኑጝ፤ ሹካ ሶጵሳ ጅያንዻ ዹዋል ወርቀትዻዬ ሃሳወና ከእንግን፤ ³ ክርስቶስ ካጌዬ ጋሎጝ ኣኔዬ ከኣርሼን ክያኒ ናሹጜን ካሁሉኩሾጝ ሜይሼ እንግኔ ከኣኩሉክ ሻሜን፤ ሺጝ ኢየሱስ ይጝ ኣን ሃሜይሼ እየው እሺ ሃክርስቶስ። ⁴ ውርካ ኣይሁድ ክየም ክየምዻ ጊታይ ዋዩጝ ከቦወን ጋያ ከጳውሎሴ ሲላሴ፤ ፕርዻ ጊታይ ኮሜን ኣይ ጁዋንጁጝ ውርካ ግሪክ ጊታይ ሪግሼን ባሪዮዬ [ሃኣጚ ጊታይ እባጅዬ ዋዩጝ] ቦወ ጋያ ከጋጝ። ⁵ ዬ ውርካ ኣይሁድ ናንዳካጝ ቦውዮጝ ፑኡሺያ ውር ጊታይካ ሜርሜ ኣይካ ራቅካ ኦኬ ኡዋሩጝሺኔኑጝ፤ ቲትሽ ዛርሲዻዬ ከኦካ ከተማ እጝ ቱዎጝ ሙና ኦኬ ጋራ፤ ቦፓይኔ ጳውሎሴ ሲላስዻዬ ኦካ ማሪካ ዛርሲ ቦፓይኔን ቆሬ ቦሼያ እያጝካ ቶኦካ ኢያሶን፤ ⁶ ኣይባዬ ካጌዬ እንግኑጝ ካኒ ቻሊኬን፤ ዬ ከኦካ ኢያሶኔ ጪኒጌን ኔኒ ዶኬ ታታቻንካ ከተማ እኔ ጁጁር ማሪ ጊዬይ ክያኒዬ ሺጝ እያጜ ጉቹኳ፤ ውራን ጊታይጝ ዾንካሲ ፔን ፓይላዬ ቆቤኔ፤ ፕር ጋን ፓዬና ዮጝ፤ ⁷ ኢያሶንዻ ቦዋ እንግን ሃምካ ቶኦ ኔኑጝ፤ ጊታይዻ ፓይላ፤ ጊታይ ሺጚ ከኦካ እን ሺጜ ኢየሱስ እንቃ ቢቲ ኣኔባዬ ፓቂ ሕግካ ቄሳሩጝ። ⁸ ዛርሲዬ ታታቻንካ ከተማ እኔ ከሹ እን ዋዬ እኑጝ ጊያሜና፤ ⁹ ከኦይን ኢያሶኔ ዶክ ¹⁰ ጪኒጌን ጊዬይዻ ይሪካ ይዕሲሼያ ጳውሎሴ ሲላሴ እያጝካ ቤርያ ከምክር፤ እንግንዻ ከሹ እን ሄክሼ ሃሚኑጝ፤ ሁሉካ ሃምካ ቶኦካ ይሁኔንካ ውርካ ኣይሁዱጝ። ¹¹ ውርካ ቤርያዻ ከኦካ ውርካ ተሰሎንቄ ሳጊ ጋይ ጊታኬና ጶቅሲዬን ናንዳካ ኦ ክያጃ እንካ ኣይ እያይ ሺጜን እያይኔ ሹ ጮል ቶዬን ወርቀቴ ጋኔን ክያጃ ከፎሽካዽዬን ካሊዬን። ¹² ዬ ከኦግዬይ ውር ጁዋናን ኣምኒያ፤ ፕርዻ ከእንግን ጊታይ ኮሜን ኣይ ዼጉጝ ሃኣጚካ ግሪኬ ጁማኔ ጋምኒያ። ¹³ ውርካ ኣይሁድ ጊታይ ኣኔን ተሰሎንቄዻ፤ ጳውሎስ ክያጃካ ባሪዮ ሜይሺኔ ቤርያዻ ፓይላጝ ከሹ እን ግባጆጝ፤ ዛርሲ ጬይሼኔ ቲትሼኔ ፕር ፓያ ሃምንዻ። ¹⁴ ከሹ እን ጪኒጌን ይዕሲሼያ ጳውሎስ ይሪካ ሃምካ ላቅካ ኛፓሱጝ ዬ ሲላሴ ጢሞቴዎሴ ሺዽያ ኦይን። ¹⁵ ውር ጊታይ ይዕሲ ጳውሎስዻ ሄክሺሻ ኣቴና፤ ከኦይን ቦው ሜርሜር እን ሲላሴ ጢሞቴዎሴ ይሪካ ካፓይኔ ሃሚን ኔኒዬ ዋካ። ¹⁶ ጳውሎስዻ ኣኔን ኣቴና እንግን ካሊዬን፤ ከተማ እን ክያኒ ቆቄኬ ኮይሞጝ ከጌዬን መንፈስ [ማኒሻ]። ¹⁷ ዬ ኣኔንባ ቶኦካ ይሁኔን ክያኒዬ ከውርካ ኣይሁዴ ግሪክ ጊታይ ሪግሼን ባሪዮዬ፤ ፕርዻ ከኦጉዋይ ጉዋሩጝሺኔ ጆሎጝ ሹ ጮል ከውር ጊታይ ጌዬ ጋጙጝ ኣኔን ሃሳውኔን። ¹⁸ ጊታይ ኣይኬ ውርካ ኤፊቆሮሴ ኢስጦኢክ ውር ጊታይ [ኣይካ ሄክንሲዬን] ጊዬዩጝ ፓዬን ሃሚን ኔኒዬ ጋኔን ዜርምኔን፤ ውር ክየም ክየም ሺጝ [ይጝካ ሃሳዋጝ] ሺጝ ኦ ዎሼን? ጋኔን እያይ ሺጜን፤ ዶክ ፕር ሺጝ ሜይሼን ናንዳካ ክያጃ ሹቃካ ኢየሱሴ ናሹጌኔ ዋዬ፤ ሺጝ ሙኔን ውር ጊታይ ሃሳወን ኣማልክት ሃሊሃሊ ጊታይካ ጪጮጝ። ¹⁹ ጎምዻዬ ከሃምካ ራቅ እን ሺጜ ኣርዮስፈጎሲ ይዕሲሼን ሺጝ እያጝ፤ እን እርርሲኔን ሃሉጝ የእርርሲዮጝ ኣዬ ኦጝ ካእባጅቶጝ የናሺባይ? ²⁰ ፕርዻ ኦግታይ የዋይሺሼ ናቡ ጉዋዩ ክያኑጝ ናንዳካጝ ኣይሼ ኡዋው ኦኬ ኮማናጝ፤ ኣዬ ኦጝ ሃዎሻያ እባጄን። ²¹ ውርካ ኣቴና ፓይላ ፕርዻ ውርካ ሹኑክ ጊታይ ቆቤን ኦጝ ሳስክዬ ሹዋን ጊዬዩጝ ሃናንዳካ ኦኬ ሃሊሃሊ ሃሳወኔ ከዋዬኔ ዬ ኦኬ እንቃ ካኒ ኣኔኬን። ²² ዬ ጳውሎስ ዾር ኦካ ጫቃንካ ዛርሲ እን ፑኡሺሜን ኣርዮፋጎሴ ሺጝ እያጝ፤ ውርካ ኣቴና ዮ፤ ከኦኬ ክየምጵንዻ፤ ካሎን ሃኣይቴ ቶኦካ ይሁኔኑጝ ሃቶይባ፤ ²³ ኣኔንባ ሺሪዬኔ፤ ሃቶይ ኦግታይ የይሁንቴዬ፤ ቶኬን ኬና ሺጜ ኣማላክት ጊታይ ማሬ እባጄን ሃጌያ ጋላ ክየሜ፤ ኣኪ የካኔ እባጃኬን ይጜ የይሁንቶጝ [ሃሜይሼ እየውባ]። ²⁴ ኣምላክ እን ሙኑ ኦካ ፔኔ ኦግታይ ኣኔን ቱዎጜ ፓይላጝ እሺ ሃታቺካ ፎላዬ ዳሊዬ፤ ዬዻ እሺ ኡፍኬን ኦካ ቶኦካ ይሁኔን እን ሃንታካ ውር ኣሽክዮጝ። ²⁵ እሺ ናንዳካ ውር ፓይላ ካኣዬ ዻቆዬ ኡሲዬ ፕርዻ ኦኬ እንቃ ፓይላጝ፤ ኦኬና ጆጊ ማሬ ኣኔኑጝ ዋድሚኬን ከዋድማካ ውር። ²⁶ ቢዛካ ውር ፓይላ ሙንኬ ውር ክየሜ ካቆቤ ዳሊ ፓይላ ክያኑጝ ሻማ፤ ልኪካ ቦን ጉዋዩዬ ማራካ ቆቤን ጉዋዩዬ ቱምሼያ እንግን። ²⁷ ይንዻ ውር ዎሽ ባሪዮዬ [ኬንሺዬ] ካ ሺጝ ከኦኮኑጝ ጌዬዬ ጊያ፤ ይን ኣያ እያይንያጝ እሺ ማር ኬና ከኦካ ኡዋው ክየም ክየም ኣኔን ዹኬን፤ ²⁸ እን ሃቆብቴዬ ሃጃላጆልቴዬ፤ ሃኣንቴዻጝ ሃኬ እሺዬ።[ከእንግን ጊታይካ ቦውንታጝ] ክየም ክየም ኣኖጝ፤ ኡዋው ፕር ሃኣያ ሃንታ። ²⁹ ኣኪ ሃኣያያ ሃንታካ ባሪዮያጝ፤ ኣምላክ ከኦካ ኦከ ኣሽክዬንካ ውሬ ፓካልማሞዬ ኦግታይ ጋሽክዮጝ ወርቄ ወይ ቢሬ ወይ ባይ ሙኔን እያይ ሃሺጛ እያይኔ ቃቢዬን ሁሉኩሼኬን ኡዋው። ³⁰ ከሌሜንካ ይጝ እን ባሪዮ ሺጜ እያጙጝ ሃማርቴ እባጄኑጝ ሳግያ ከዶንሺዬን፤ ዬ ጋን ውር ጊታይ ኣኔን ኦይካ ራቅ እኑጝ ፓይላ ካሻወ ይሁኔኑጝ ኤርግትባ፤ ³¹ ከውር እን እድዮጝ ከኦካ ፔኑጝ ቱምያ ሹ እን ካኮምሼኬ ጫንቃሉጝ፤ እሺዻ ከኣርሼን ክያኒ ናሹጜን ኔኒ ሜይሼያ ውር ፓይላ ይጝ። ³² እንግንዻ ናንዳካ ናሹጜንካ ኣርሼን ከሹ እን ዋዮጝ ውር ክየም ክየም ኦልቲያ፤ ዬ ዶክ፤ ናንዳካ ክያጃጝ ከኦኑኑ እንቃ ሃዎሻባ ዋዬን ሺጝ እያይ። ³³ ከሹ እን ጳውሎስ ቱልኬ ኦካ ጫቃን ጊዬይዬ ኩያ፤ ³⁴ ዬ ውር ክየም ክየም ኦይን ጳውሎስ ኣኖጝ ከክያጃካ ጋጝ ዋዬን ዻዬያ፤ ጋምኒያዻ ከኦካ ግታግዻ እን ሺጜ ዲዮናስዮስ ውርካ ኮምሼንካ ቶኦካ ኣርዮስፈጎስ፤ ኣና ኝያ እን ሺጜ ደማሪሴ ውር ዶኬ።