ሃፑክ 16 {ጢሞቴዎስ ኩያ ከጳውሎሴ ሲላሴ} ¹ ጳውሎስ ሄክሻ እያጝካ ደርቤኔ እያጝካ ልስጥራኔ። ከኦይን ኣና ውር ኬና ጁዋኔ ኣይኬ ውርካ ኣይሁዴ ጎም ኣምኒኬ ታቺ እን፤ ዬ ሹኔ ኬና ኣይ ውርካ ግሪክ ኣና ውርካ ዻይኔን ክየም ኬና ሺጜ ጢሞቴዎስ። ² እሺዻ ከኦካ ጪኒጌን ጊታይ ኣኔን ልስጥራኔ ኢቆንዮኔ ኣኔ ማኝ ሹቃ። ³ ጳውሎስዻ ውር እን ካካሜኬ እሹጝ ዎሻ፤ ዬ ውርካ ኣይሁድ ጊታይ ኣኔን ራቅ እኑጝ ናንዳካ ቶግ ጎሜን ቋራ፤ ውርካ ኣይሁድ ጊታይ ፓይላ ሹኔካ ጢሞቴዎስ ኣዬ ግሪኩጝ ጊባጃ። ⁴ እንግንዻ ከሹ እን ከኦካ ከተማ ክየም ሳጊሼ ከተማ እንቃጝ፤ ሐዋርያታኔ ውር ጌጵሹጋኔ ክያጃ እን ይዕሲዬኬ ኢየሩሳሌም ዋዬ ከዻዮጝ ጋኔን ውር ኣዬን። ⁵ ውርካ ቶኦ ጊታይካ ይሁኔንዻ ቁዋቅትሻ ከክያጃካ ባሪዮ ኣምኒዬኔ ሹ ጮል ጋኔን ጁዋንትሼ ፓዬን። ⁶ ጳውሎሴ ባይዳን ኔኒዬ ካማር ክያጃካ ባሪዮ እስያ ሜይሺኔኔ ናንዳካጝ መንፈስ ቅዱስ ሃርጌ እንግኑጝ፤ ሳጊኬ ፍርግያኔ ፔንካ ገላቲያዬ ፓያ። ⁷ ከሹ እን ሄክሼ ሚስያም፤ ታማ ቢታኒያ ሻወን ኣይባዬ መንፈስካ ኢየሱስ ካኒ ናሺሼኬን እንግን፤ ⁸ ዬ ሻምኬ ዻርካ ሚስያዬ ጎብሼያ እያጝካ ጢሮኣዳ። ⁹ ጳውሎስዻ ከምክር ከሹካ ውርካ መቄዶንያ ክየም ዾሬ ሺጝ፤ ቁዋልሺንቴ እያጝካ መቄዶንያዬ ኬልሺ ኡዋባዬ ይወኔ ጌያ። ¹⁰ ጳውሎስ ጌዬ ሹካ እኑጝ ጩዋ ሺጝ፤ ካሜይቴ እንግን ክያጃ ሹቃጜ ባሪዮ ሺዋ ኡዋው ሺጝ እያይኔ ከቱምዬን ይሪካ ዎሻ እያጝካ መቄዶንያ ኩይሼን። ¹¹ ከጋጊ ሃናሹጛ ከጢሮኣዳዬ ሃጃላ ታሴ ሃፓይና ሳሞትራቄ፤ ከዻም ጃሌን ጉዋዩ ሃፓይቴያ እያጝካ ናጵሌጝ፤ ¹² ጩዋ [ከቡዎንካ ሮማውያኔ ክራካ መቄዶንያዬ ሃሻዋያ ሃምካ ዻር ኔኒ ካፊልጵስዩሱጝ] ከኦይንዻ ሃቆባያ ሹ ጁዋኑ። ¹³ ከሹ እንካ ሶጵሳዻ፤ ሃዎሺና ኦካ ራቅካ ይሁኔኔ ሃቱላ ከሃፑካ ከተማ እጜ ሃጎብቴያ ኦካ ዳራ ክየም፤ ሃቆባያ ኦይንዻ፤ ሃካርሲያ ሃኣጚ ጊታይ ፑኡሺሜኔ ቆቢ ኦይንዳ ሜይሼን። ¹⁴ ከኦካ ጫቃንካ ሃኣጚ ጊታይ ኣኔን ዋዬን ኣና ኝያ ክየም ኬና ሺጜ ልድያ፤ እሺዻ ሃኬና ይሁኒ ባሪዮዬ ኩንኬ ከተማካ ትያጥሮኔ ኣይ ናጋዴካ [ሐር ጫጩጉ ኡዋሩጝሺኔን]፤ ታቺ እንዻ፤ እን ጳውሎስ ሃሳዎጝ ካዋዬኬ ጶቅሲዬን ቦውሼያ እሺ ሻን ኔኒ። ¹⁵ ዱቅዬ እሽዬ ውራን ኔኑጝ ጩዋ፤ ሺጝ ሃኣምኒዬ ከታቺ እን የእባጃያ ከኣኩሉክያጝ ፓዬን ሃምካ ቶኦ ናኒዬ ቦዊ ኡሲ ሺጝ እያይኔ ካሎን ይወና ኡዋው። ¹⁶ ሹ ክየም ሃፓያ ሃምካ ራቅካ ይሁኔንያጝ፤ [ከመንፈስካ ጋቲማ] ኝያ ኬና ኣይ ውርካ ዋድማካ ቶኦ ሃሳወን ሃሳወዬ ጌያ ኡዋው፤ እሺዻ ከዋድማ እን ኔኒ ካዻርቲሞጝ ናንዳካ ውር ጊታይ ራጴ እሹጝ ኣኔን ቢሬ ጁዋኑ ጌይሼን። ¹⁷ ይጝ ዻዬ ውርካ ዋድማ ጳውሎሴ ኡዋዌ ሺጜን ውራን ጊታጝ ክያጄን ጉዋርካ ዻቆጝ፤ ሃውርካ ዋድማካ ባሪዮ ልዑል እኑጝ/ ሺጝ እያይኔ ኣኔን ኡቹኬን። ¹⁸ ሌሜዬ እንዻ ሹ ጁዋኑ፤ ዬ ጳውሎስ ኑሼን ሻኔ ሁቤኔ ቶዬ ሺጝ መንፈስ እጝ፤ ከኦኔኒ ካቱሎጝ ከታቺ እን ከሮጝካ ኢየሱስ ክርስቶስ ሃኤርግትያ/ መንፈስ እንዻ ከሹ እን ኦቼዬ ቱላ። ¹⁹ ውር ጊታይ ራጴ ጆሌ እሺዻ ቃቦ ኑጝ ጊዬይ ጌዬ ጆሌ ቢሮጝ ቱሌ ኩዬ ከሹ እን ጊባጆጝ ጎም ጳውሎሴ ሲላሴ ጁጁሬ ፓዬዬ ኦይን ውር ታታቻን ኣኖጝ ቦሼያ ሃምካ ራቅካ ኡዋሩጝሺኔኑጝ። ²⁰ ቦሼ ሃምካ ሌሜንካ ውር ታታቻኔ ሺጝ እያጝ፤ ውራን ጊታጝ ጋይባ ውርካ ኣይሁዴ ጋኔባዬ፤ ዋራቅሲያ ከተማ ጉዋዩ፤ ²¹ ፕር ኦይን ኡዋው ኡዋው ሃማርቴ ውርካ ሮማውያን ቦወን ወይ ሙኒሼን ማር ኡዋው ሁሉኩሼኑጝ ጋኔን ኦካ ጫቃንካ ዛርሲ ዹዋልሺኔን። ²² ዛርሲዻ ጉሙሼያ ናሹጝሼያ ጳውሎሴ ሲላሴ፤ ውር ታታቻንዻ ኬል ኣፓላ ጊዬይዬ ካሙሬኬ ሴጋጝ ጌርግታ። ²³ ሙሬ ካሎን ጋራጝ ጩዋ፤ ዾቅሼያ እንግን ቶኦካ ቁሜን፤ ውር እንካ ባክ ቶኦካ ቁሜንዻ ካኣጅሼዬ ካባክ እንግንባዬ ሜይሼያ። ²⁴ እሺዻ ቦወ ኤርጎ እን ኣኔን እያይኑጝ ጩዋ፤ ዾቅሼ እንግን ቶኦካ ቁሜን ኦካ ቆፓና እንካ ቱዎጜ ቁምሼያ ጃፍ ጊዬይ ሻሪ ክያኒ ካሎን። ²⁵ ከምክር ጫቃን ጳውሎሴ ሲላሴ ክወን ይያሪዬ ጋኔን ባሪዮ ጌጳሲዬን፤ ውርካ ቁሜን ዶክዻ ጋኔን ቆቤ ዋዬን። ²⁶ ሉጉድዻ ካላሊ ኣሽክዬንካ ቶኦ ማቲያ ይንግሺኔንካ ቶኦ ታቺ፤ ይሪካ ሃፑካ ቶኦካ ቁሜን ቡሌና ቁሜን ጊዬይ ፓይላ ቡሌና። ²⁷ ውር እን ባኬን ቶኦካ ቁሜን ጬዬንኬ ሩዋቱክ ክያኒዬ ከሹ እን ሃፑክ ኣዬ ቦወኔ ጌዮጝ፤ ዋሽኬ ኦኮኑጝ ውርካ ቁሜን ዻቄዬ እሺ ኤምኑ ኒሼን። ²⁸ ዬ ጳውሎስ ሻም ናቅዲ ኔኒ ዼጌ ሺጝ እያጝ፤ «ኡዋው ፓይላ ናንዳካጝ ሃኣኒንቴ ኦጝ ኦይ እን ኤምኑ ኦኬ ጋራ ኣሽክሼኔ ኡቹካ። ²⁹ ውር እን ባኬን ቶኦካ ቁሜንዻ ይወን ፓኖሴ ኣሼኔ ሁሉካ ቱዎጝ፤ ራጵዻዬ ቶኬያ ኩዋሚን ኦካ ጃፍካ ጳውሎሴ ሲላሴ፤ ³⁰ ጎሜ እንግኔ ቱሎጝ ጩዋ፤ ሺጝ እየው ውር ጊታጝ፤ ካባይሾጝ ካሻም ኦ? ³¹ እንግንዻ ሺጝ፤ ኣምኒባ ከኢየሱስ ታቺ እኑጝ፤ እንዻ ውር ኑኑዻ የባይሻባ። ³² ከኦይን ናንዳካ እሺዬ ውር ጊታይ ኣኔን ኦይኔ ፓይላ ሜይሼያ ክያጃካ ታቺ እጝ። ³³ ውር እን ባኬን ቶኦካ ቁሜንዻ ከምክር ዋዳ እን ቦወ ኡዋንሼያ እንግን ጊዬይ፤ ይሪካ እሺዬ ውር ኔኒዬ ፓይላ ዱቅዬና። ³⁴ ውር እን ባኬን ቶኦካ ቁሜንዻ ቦሼ ሃምካ ቶኦ ኔኒዬ ኣሽክሼያ እንግን ኦካ ቆቤን፤ ከውር ኔኒዻ ፓይላ ከክያጃካ ባሪዮ ኣምኒዬን ዋዝንዽያ። ³⁵ ሃሪሾጝ፤ ታታቻን ሺጝ፤ ቡሊ ውር ጊታይኔ ይዕሲባዬ ይዕሲሼያ ሃሚን ጊዬይ ውር ታታቻን። ³⁶ ውር እን ባኬን ቶኦካ ቁሜን ዋይሼ እንግን፤ ካቡሌ እየው ታታቻን ሜይሼና፤ ዬ ቱልኬ ሹቃዬ ፓይባዬ ሜይሼያ ጳውሎስ። ³⁷ ዬ ጳውሎስ ሺጝ ኡዋው ሃኣያባ ውርካ ሮሜ ሃኣንቴባዬ፤ ኦካ ማሪካ ዛርሲ ኮምሼን ኣኔኬኔ የሙራ ኡዋዌ የፓቅቴ ኡዋው ቶኦካ ቁሜን፤ ኣኪ ጋን ካቡሌ ኡዋው ከራሼን ዎሽባይ? ይንያጝ ኣይኬን፤ እንግን ካፓይኔ ካቡል ኡዋባ። ³⁸ ውር ጊታይ ይዕሲዬዻ ክያጃ እን ሜይሼያ ታታቻን፤ እንግንዻ ዋዬ እን ጳውሎሴ ጋዬ ውርካ ሮም ቴርጋዽያ፤ ³⁹ እንግንዻ ፓዬኔ ጋንሼና ኦግዬይ ሺዕሺኔኔ ቡላ እንግን ከኦካ ቶኦካ ቁሜን፤ ካጎይዴ ከተማ እጜ ካፓዮጝ ይወና። ⁴⁰ ጳውሎሴ ሲላሴ ቱሌኬ ቶኦካ ቁሜን ጩዋ ፓያ ሃምካ ቶኦካ ልድያጝ፤ ከኦይን ጌይ ጪኒጋኔ ሌምያ፤ ከኦይን ጩዋ ፓያ።