ሃፑክ 15 {ጉባይ እንካ ኢየሩሳሌም} ¹ ውር ክየም ክየም ካይሁዳ ጎብሼ ኣንጾኪያዬ፤ ከክያጃካ ሙሴ ሺጝ ውር ማር ቆርኔንያጝ ቻሊኬን ባይሼኔ ካርሲያ ጪኒጌን እርርሲዬን። ² ይንዻ ከእንግን ዾቅሼያ ጳውሎሴ በርናባሴ ዜርማ ክያኒዬ ጎሮዬ፤ ዬ ጳውሎሴ በርናባሴ ከውር ዶክ ኮትሼ እያጝካ ኢየሩሳሌሜ ናንዳካ ክያጃ እን ካጋንሼ ሐዋርያታኔ ውር ጌጵሹጋኔ ቱምያ። ³ ውርካ ቶኦካ ይሁኔንዻ ካሳጊዬ ከጉዋርካ ፈንቄዬ ካሰማሪያዬ ይዕሲያ እንግን፤ እንግንዻ ናንዳካ ዛርሲ ጊታይ ኣኔን ኦካ ራቅ ጊታይ ከዋኬ ጃሌን ከእንግን ሜይሼኔ ጪኒጌን ጊዬይዻ ፓይላ ከእን ክሎን ዋዝንዽያ። ⁴ ከሹ እን ሄክሼ ኢየሩሳሌምዻጝ፤ ውርካ ቶኦ ጊታይካ ይሁኔኔ ሐዋርያታኔ ፕር ውር ጌጵሹጋኔ ቾቺዬ ቦዋ እንግን፤ ጊታይ ይዕሲዬዻ ባሪዮ ኣኔን ከእንግኔ ጊታይ ኣሽክዮጝ ፓይላ ሜይሼያ እንግን። ⁵ ከኦካ ውርካ ፈረሳውያን ክየም ክየም ጊታይ ኣምኒ ከናሹጜ ጎሬን ሺጝ፤ ዛርሲ ካቆርኔዬ ካዻዬ ክያጃካ ሙሴ ሻሜን ዎሺሹዋ። ⁶ ሐዋርያታኔ ጌጵሹጋኔ ክያጃጝ ቶዬን ፑጪባ። ⁷ ከኦካ ዜርማ ጁዋኑ ጩዋ ጴጥሮስ ናሹጜ ዋይሼ እንግን እያጝ፤ ጪኒጌን ናኒዮ፤ ባሪዮ ከኦካ ሌሜንካ ሹ ጩዋማ እዲህ ኣን ከኦካ ጫቃን ጉዩዬ፤ ዛርሲ ካዋይኬ ኦናኒ ክያጃ ሹቃዬ ካባይሽባዬ ካሻሞጝ የእባያ። ⁸ ኣምላክ እን እባጅ ሻኑጝ ከእያይ ኣዬ ኡዋው ፓይላ፣ ከእንግንዻ መንፈስ ቅዱሱጝ የቦቶጝ ሃክሊ እየውባ። ⁹ ሻን ጊዬይ ከኣምኒዬን ጫንቃን ሻሜን ከኦካ ጫቃን ጊዬይዬ ጉዋዩዬ ካኒ ሻምኬን ዋና ዋና። ¹⁰ ኣኪ፤ ሹቡጌን ጉዋዩዻ ኡዋዻ እን ሃማርቴ ዼቴን ቻሊዬኑጝ ካጋይሼ ኦካ ካፓናካ ውር ጊታይካ ዻይኔኔ ሃናንዳካኦ ጋን የፓታንሲቴ ባሪዮጝ? ¹¹ ኡዋዻ ሃባይሽቶጝ ከእንግን እያይ ኣዬኬ ኣይኔንካ ታቺ እን ከኢየሱሱጝ ሃኣምኒያያ። ¹² ውር ጊታይ ፑጪዻ ፓይላ ቆብ ሹዬ፤ በርናባሴ ጳውሎሴ ባሪዮ ከእንግን ከኦካ ጫቃንካ ዛርሲ ናንዳካ ኦይን ሻሞጝ ዹዋልሺኔን ሹቃዬ ኦኬ ሹቃኔ ሃሳውያጝ ጋኔን ዋዬን። ¹³ እንግንዻ ሃሳውኔ ሹዋጶጝ፤ ያዕቆብ ናሹጜ ዾሬ ሺጝ እያጝ፤ ጪኒጌን ናኒዮ፤ ዋይሼን ኣንባ። ¹⁴ ባሪዮ ከኦካ ውርካ [ኣሕዛብ] ዛርሲ እንካ ኣይ ኔኑጝ ሌምሼ ሻም እያን ቶዮጝ ስምዖን ሜይሼያ ኡዋው። ¹⁵ እን ሺጜ እያጜ ቶኮጝ ክያጃካ ውርካ ቶኳ ባሪዮ ሄክንዽባ ከይጝ፤ ¹⁶ ከኦጝ ጩዋ ሃዋክባ፤ ቶኦ እንካ ዳዊት ኮሲዮጝ ሃኣሽክባ። እን ኮሲሜንዻ ሃዋሺዬ ሃሪቢባ፤ ሃኣሽክባ እንቃዻ፤ ¹⁷ ይንዻ ውር ጊታይ ሺዺ ካዎሽ ታቺ እኔ፤ ጊታይ ናሪ ሮጝ ናኑጝ ዛርሲ ካዎሽ ኣንባዬ ጊያ፤ ጊታይ ሻሚ እያጝ ታቺ እን ሺጝ እያጝ፤ ¹⁸ እንግንዻ ካርሲኬ ኦባዬ ሃጊታኬና ጊባጄ። ¹⁹ ዬ ዛርሲ ጊታይ ዋክሼ ሃምካ ባሪዮጝ ካጋሊንሺ እንግንባዬ ይጛ ቢቶ ናኒ። ²⁰ ሳጊ ኦይን ጮይኬ ኮይሞጝ፣ ከጮይካ ኩጳሞ፣ ኣሩጝካ ዳቢ እን ጩሌዬ ኣርሹጝ ቃወኔ ከኒያቡ ኣሜኔ ካቶክቴ እየው ሁሉኩሼባ። ²¹ ሃክያጃክ ሙሴያጝ ካርሲኬ ኦባዬ ከሹ ጊታይካ ሶጵሳ ኦጉዋይካ ቶኦካ ይሁኔን ኮሜ ኦካ ከተማ ጊታይ ጌዬ ክሊዬ ሃዋያዬ። ²² ከሹ እን ሐዋርያታኔ ውር ግውጵሹጋኔ ከኦጉዋይካ ቶኦካ ይሁኔን ጋይኬ ጋጜ ከኦካ ጫቃን ጊዬይ ጊዲህ ውር ክየም ክየሜ፤ ካይዕሲዬኬ ጳውሎሴ በርናባሴ እያጝካ ኣንጾኪያጝ ቱምያ፤ ከኦካ ጫቃን ጊዬይዻ ጊታይ ኣይ ካሎን እን ሺጜ በርሲያን ጊድያ ይሁዳዬ ሲላሴ፤ ²³ ከቡዋ ጊዬይዻ ይዕሲያ ወርቀት እን ዻይሾጝ፤ ከኦካ ጊታይ ኣይ ጪኒጌን ጊዬዩጝ ከኦካ ሐዋርያታኔ ውር ጌጵሹጋኔ፤ ጋምኒኬ ኦካ ኣሕዛባኔ ከኣንጾኪያዬ፤ ከሲሪያዬ ጪኒጌን ጊታይ ጌዬንኬ ኪልቅያዬ ሄክሺሻ ጌሶ ጉዋዩ። ²⁴ ውር ክየም ክየም ማርኬ ክያጃ ጉዋዩ ኣዬኔ ቱልኬ ኦጉዋዩዬ ከሃሳዋ ጊዬይ ሻን ጉዩ ካኑሽባዬ የሪግሺንቶጝ ሃዋያያ። ²⁵ ዬ ሃእድያ ውር ጩዋማዬ ከውር ጊታይ ናሺዬ ከበርናባሴ ከጳውሎሴ ካይዕሲቴ ሃሚን ጉዩጝ ኡዋው ፓይላ ሃቱምያያ፤ ²⁶ በርናባሴ ጳውሎስዻ ናንዳካ ታቺ እን ጉዋዩጝ ናንዳካ ሮጝካ ኢየሱስ ክርስቶስ ሃውር ጊታኬና ሳስክዬ ኣዬን ዻቆ ጊዬይ። ²⁷ ዬ ኡዋው ክያጃ እን ሃቶክቶጝ ካሜይሼ እየውባዬ፤ እየዎ፤ ሃይዕሲያያ ይሁዳዬ ሲላሴ። ²⁸ ከኦካ ኦግታጝ ዎሺሽ እየው እንቃ ካጋይሼ እየው ናሬን እንቃጝ፤ ናንዳካ መንፈስ ቅዱስዻ ናንዳካ ኡዋዻ ማቲ ሹቃዬ ሃጌያያ፤ ይንዻ፤ ²⁹ ኦይን ጋሽክዬኬ ሞራጝ፤ ኣሩጝካ ዳቢ እን ጩሌ ከኒያቡዬ ኣርሹጝ ፕር ከኩጳሞ ኣሽክዬን ከፓይ ዹኬ ጊያ። ከኦካ ኦግታጝ የፓያያ ዹክያጝ ናንዳካ እየውዻ ሃሹቃ። ³⁰ ውር ጊታይ ይዕሲዬዻ ፓዮጝ ጩዋ፤ ጎባ እያጝካ ኣንጾኪያጝ፤ ከኦይንዻ ፑኡሺ ዛርሲ ጉባይ ክያኒዬ ጋያ ወርቀት እን ቶኮጝ። ³¹ ዛርሲዻ ኮሞጝ ጩዋ ጎሺያ ከክያጃ እን ሙኔን ዋዝንዽያ። ³² ይሁዳዬ ሲላሴ እንግንዻ ናንዻካጝ ጋዬ ውርካ ቶካ ባሪዮጝ፤ ጪኒጋን ከሃሳዋ ጁዋኑ ሻሜን ክሊያ እንግን፤ ቁዋቅትሺሻ እንግንዻ። ³³ ቆቤ ሹ ጩዋማ ኦይን ጩዋ ከጪኒጋን ይዕሲኬ ሹቃዬ ዋካ ሃምካ ውር ጊታይ ይዕሲ እንግኑጝ። ³⁴ ዬ ሲላሳ ቱሙያ ኦይን ሺዽዬን። ³⁵ ጳውሎሴ በርናባሴ ከውር ጁዋኑ እንቃ ጊርርሲዬን ክያጃካ ታቺ እኔ ሜይሼኔ ቆባ ኣንጾኪያ። ³⁶ ጳውሎስ ከሹ ጩዋማ ዋይሼ በርናባስ፤ ናሹጝጋ ካፓይባ ኦካ ከተማ ጊታይ ሃክያጅቴ ክያጃክ ታቺ እን ፓይላ፤ ጪኒጌን ጊታይ ጉዋዩ ኣኔን ሃምዻ ጋኒኔ ከዴንታካ ኦጝ እባጄን ካቶይ እንግንባ፤ ³⁷ በርናባስዻ ማርቆስ እን ሺጜ ዮሐንስ ካካሜኬ እንግን ዎሻ፤ ³⁸ ዬ ጳውሎስ ካኒ ዎሽኬን እሺ ጎሜ ፓዬን፤ ናንዳካኦ ናንዳካጝ ሺዽዬ ቀሬናጝ ሃምካ ዋድማ ናንዳካጝ ማሬኬ እንግን ኩዬን ጊያ። ³⁹ ዜርሜን እያይኔ ዋራቅ ናንዳካጝ ሙኒኔ ጫቃን ጊዬዩጝ ላልሜና ከኦካ ጋጝ፤ ዬ በርናባስ ቦው ማርቆሴ ከጋጊ ኩያ ቆጵሮስ። ⁴⁰ ዬ ጳውሎስ እዲያ ሲላስ፤ ጪኒጌንዻ ናንዳካ ኣይኔንካ ታቺ እን ጌልቅምሺኖጝ ጩዋ ጌይኬ ኦጊዬይ ዋናዬ ፓያ፤ ⁴¹ ቶኦን ጊታይካ ይሁኔንዻ ቁዋቅትሺሽ እንግኔ ሳጊያ ከዻርካ ሶሪያዬ ኪልቅያዬ።