ሃፑክ 14 {ጳውሎሴ በርናባሴ ከኦካ ኢቆንዮን} ¹ ከኦካ ኢቆንዮንዻ ጳውሎሴ በርናባሴ ከጋጝ ሻዋ ሃምካ ቶኦካ ይሁኔንካ ውርካ ኣይሁድ፤ ከኦይን ናንዳካጝ ግርርሲኖጝ፤ ከኦካ ውርካ ኣይሁድዻ ከኦካ ውርካ ግሪክዻ ውር ጁዋኑ ኣምንያ ካሎን። ² ዬ ውርካ ኣይሁድ ጊታይ ማር ክያጃ እጝ ኣምኒዬኑጝ፤ ናሹጙሻ ዛርሲዬ ካሚኔ ጪኒጌኑጝ ሻማ። ³ ጳውሎሴ በርናባሴ ናንዳካ ታቺ እኑጝ ሃሳወን ከሾያሞዬ ቆባ ኦይን ሹ ጁዋኑ፤ ታቺ እንዻ እንካ ሃሳዎጝ ክያካ ኣይኔን ከዹዋልሺኔን ሹቃዬ ዋድማ ሹቃዬ ኬልሺ እንግኔ ኣኔን እንግን ጃ ሻምሼን። ⁴ ዛርሲካ ከተማ እንዻ ካሺያ ጋጝ፤ ቶና ማቲካ ኣይሁድ ቶናዻ ማቲካ ሐዋርያታን። ⁵ ከሹ እን ዛርሲዬ ውርካ ኣይሁድ ከታታቻን ጊዬይዬ ማቲኬ ጋጜ እንግን ጋሊንሺዬኔ ከባይ ሙሬኔ ታማ። ⁶ ዬ እንግን ግባጄ እኑጝ ከልስጥራኔ ሃም ሺጜ ደርቤኔ ከእያጝካ ከተማካ ሊቃኦንያዬ ጎምሼያ ሃምካ ፔን ጊታይ ኣኔን ቋጩር ጉዬይ ክያኑጝ፤ ⁷ ካርሲያ ክያጃ ሹቃዻ ክሊኔን ከታይ። ⁸ ከኦካ ልስጥራዻ፤ ውር ኬና ጃፍ ኣይ ኤላዬ ካሲኬ ኦባ ጅሼዬ ክየምጵንዻ ማርኬ ጃፍ ኔኒ ኩዬ እባጄን ውር ኬና ኣይ ኤላ ኡፌ ኣኔባ ኦይን። ⁹ ውር እን ጳውሎስ ሃሳወንያጝ ኣኔን ዋዬን። ጳውሎስዻ ሁቤኔ ቶይ ሃሚን ኔኒዬ ቃቦካ ዻቆ ኣኔ ኦኔኒዬ ከሹ እን ጌዮጝ፤ ¹⁰ ከናቅዲ ታቺ፤ ዋይሼ እሺ ናሹጜ ዾርባ ከጃፍ ኑኑ/ ከሹ እን ኣሼና ናሹጜ ካርሲያ ከጃፍ ጃሌን። ¹¹ ዛርሲ ከሹ እን ጌዬ ኦይን ጳውሎስ ኣሽክዮጝ፤ ከቶካ ሊቃኦንያ ሺጝ፤ ኣምላክ ሙኔንኬ ውሬ ጎብሼያ ኡዋዌ ጉቹኳ፤ ¹² ዋይሼ በርናባስ <ድያ> ጳውሎስዻ ናንዳካጝ ኣዬ ውርካ ሃሳዋጝ ዋይሼ <ሄርሜን>። ¹³ ውርካ ቃሽካ ቶኦካ ይሁኔንካ ድያ ጊታይ ቱልኬ ከተማዬ ኣኔን ሹኑኩጝ፤ ቦፓይኔ [ቢ ጊታይ ኣይ ኤርዋኬ ኦላዬ] ኦይካ ሃፑክ ሻዎኔ፤ ጋይኬ ዛርሲዬ ዎሼያ እንግን ጋላ ቡልሼን። ¹⁴ ሐዋርያታን ጳውሎሴ በርናባሴ ከሹ እን ዋዬ እኑጝ ሃዽሽ ኣፓላ ጊዬይዬ ጉኩሼያ ሃምካ ዛርሱጝ፤ ሻም ናቅዲ ጊዬይ ዼጌ ሺጝ እያጜ፤ ¹⁵ እየው ውር ሃናንዳካኦ የሻምቴ ይኑጝ? ኡዋዻ ይንጌ ሃኣያ ከእየው ውር፤ እየው ፕር ከዹካትሽ ከኦካ ክያጃጝ ካማሜ ፎላዬ ዳሊዬ፣ ኛፓሴ ጊታይ ቆቤን ቱዎጝ ፓይላዬ ከዋክቴ ሃምካ ባሪዮጝ ሙኒዬ ሃሜይቴባ እየው ክያጃ ሹቃጝ። ¹⁶ እሺ ከጅሼን ጊታይ ሳጊ፤ ዛርሲ ፓይላ ካፓይኬ ጉዋር ጊዬይዬ ኦይዳ፤ ¹⁷ ካኣይባዬ ጎትዻ ከፎላ ፕር ዋዳን ጊታይካ ኮሬ ጴንታዻ ከቱዎጝ፤ ፕር ሻን ጊዬይ ከኦካ ኣሜኔ ከዋዛዬ ዋዳ ጊዬይ ሹቃ ኣሽክዬ እሺጵን ማኝ ኣኔኬኔ ካኒ ኦይድኬን። ¹⁸ ሃሳውባ እን ፓይላዻዬ፤ ዛርሲ ካማርሼ እንግን ጋላ ቡልሼኔ ጊያምሺሾጝ ሃኬ ኦኬ ጁዋኑ። ¹⁹ ዬ ውርካ ኣይሁድ ፓዬንኬ ኣንጾኪያዬ ኢቆንዮኔ፤ ቦሼያ ዛርሲ ኦካ ጋጝ፤ ሙሬ ጳውሎስ ከባይ ጩዋ፤ ዋሽኬ ኦኮኑጝ ኣርሼዬ ጁጁር ከኦካ ከተማ እጜ ቡልሼያ ሹኑጝ። ²⁰ ኣይባዬ ውር ጊታይካ ዻይኔን ጋኔንባ ጱዼኔ ናሹጛ፤ ሁሉካ ሃምካ ከተማዻ። ከዻም እሺዬ በርናባሴ ፓይሼያ እያጝካ ደቤን። ²¹ ጳውሎሴ በርናባሴ ከኦካ ደርቤን ክሊዬና ክያጃ ሹቃ፤ ጌዬ ውርካ ዻይኔን ጁዋኑጝ ጩዋ፤ ዋክሼያ እያጝካ ልስጥራን፣ እያጝካ ኢቆንዮኔ ኣንጾኪያዬ። ²² ከሻንካ ውር ጊታይካ ዻይኔን ሌምሲዬኔ ከቁዋቅትሼን ጎርኬ ይሁኔኔ ከክሊማ ዋይሼ እንግን እያጝ፤ «እያጝካ [መንግሥት] ባሪዮ ሁሉኬን ጋሎ ጁዋኑ ሳጊዬን ኣኔባ። ²³ ከኦይን ዾቅሼ እንግን ኦጉዋይካ ቶኦካ ይሁኔኔ ታታቻንካ ቶኦካ ኣጁጜ እንግን ጩዋ፤ ይወና ካቶሮንዽዬኔ ካይሁኔኔ ታቺ እን ኤልቅሜና እንግን። ²⁴ ሳጊ ጲስድያዬ ፓዬና ጵንፍልያ፤ ²⁵ ሃሳወ ክያጃ ከኦካ ጴርጌን ጩዋ፤ ጎብሼያ እያጝካ ኣጣልያ። ²⁶ ከኦካ ኣጣልያዻ ሌይ ጋን ዋድማ እን ኣሽክዬኑጝ፤ ከኣይኔንካ ባሪዮ ሃም ጋይኔ ኤልቅሞጝ ዋክሼያ እያጝካ ከተማካ ኣንጾኪያጝ ከጋጊ። ²⁷ ከሹ እን ሄክሼ ኦይኑጝ፤ ውር ጊታይካ ቶኦካ ይሁኔን ፑኡሺሜና ክየምጵን፤ ባሪዮ ኦይን ኣሽክዬ ከእንግን ፓይላ፤ ፕር ሻም እያን ቦውሼ ዛርሲ ሃፑካ ቃቦጝ ሃሳዋ። ²⁸ ከኦይንዻ ቆባ ከውር ጊታይካ ዻይኔን ሹ ጁዋኑ።