ሃፑክ 13 {ይዕሲያ በርናባሴ ሳውሌ} ¹ ከኦካ ቶኦካ ይሁኔን እን ኣኔን ኣንጺኪያ ኣና ውርካ ቶኦካ ባሪዮዬ ካእርርሲኔኔ፤ እንግንዻ፤ በርናባስ፣ እን ሺጜ ኔጌር ስምዖን፣ ሉክዮስ እንካ ቀሬናጝ፣ ታቺ እንካ ኦይድሳ ሄሮድስ ኣና ውር ጊታይ ጌጵሼ ከጋጝ ምናሔዬ ሳውሌ። ² ጊታጝ ጋኔንባ ታቺ እን ይሁኔኔ ቶሮንዽዬኔ፤ ኡሲካ ባሪዮ ሺጝ፤ «በርናባሴ ሳውሌ ናንዳካ ዋድማ እን ኣን ሃሺወ እንግን ሻምቴ ኣንባ ዋና። ³ እንግንዻ ቶሮንዽዬዬ ይሁኖጝ ጩዋ ጋይሼ እንግን ቡዋ ጊዬይዬ ይዕሲያ እንግን። ⁴ በርናባሴ ሳውሌ ይዕሲ እንግን ከመንፈስ ቅዱሴ ጎባ እያጝካ ሴሌውቅያ፤ ከኦይን ፓያ ከጋጊ እያጝካ ቆጵሮሱጝ። ⁵ ከሹ እን ሄክሼ ስልማናጝ ከኦካ ቶኦካ ይሁኔንካ ውርካ ኣይሁድ ክሊዬና ከክያጃ ሹቃካ ባሪዮ፤ ዮሐንስዻ ኣኔን ከእንግኔ ኣኔን እንግን ኬልሺዬን። ⁶ ጎልዹካ ቆጵሮስዻ ቱሙዬን ከማሬ ሌይ ማራ ቶኗዬ ከሹ እን ሄክሼ ጳፉጝ፤ ጌያ ውር ክየም ካኣይሁድ ኬና ኣይ ሞራዬ ኬና ኣይ ውርካ ሾሮዬ ኬና ሺጜ በርያሱስ፤ ⁷ እሺዻ ኣኔን ከእን ሺጜ ሰርግዮስ ጳውሎስ ኬና ጶቅሲዬን ኦኬዬ ኬና ኣይ ታቺካ ፔን። ታቹጝካ ፔንዻ ዎሽ ክያጃካ ባሪዮ ዋዬኔ ሺውሻ በርናባሴ ሳውሌ። ⁸ ዬ ሞራ እን ኤልማስ፤ ሆኮልካ ሮጝ ኔኒ ሃእያጜ፤ ታቺ እንካ ፔን ካማር ኣምኒዬኔ [ናንዳካጝ ዎሼ ኮፎቺዬኑጝ ኖኩያ እንግን። ⁹ እን ሺጜ ጳውሎስ ሳውል ቋቁሼ መንፈስ ቅዱሴ፤ ሁቡኔ ቶዬ ሺጝ እያጝ፤ ¹⁰ እን ይጝ ኣይ ጋልካ ጫንቃላን ፓይላጝ፤ ይን ቋቁሼ ጃካማዬ ክያጃ ጋራዬ ፓይላ ውዋካ ዲያብሎስ/ ከጉዋር ሹቃ እንካ ታቺ እን ቆሮ ሻሜን የሪግሼንኬኒ? ¹¹ ካንዻ ቡዋካ ታቺ እን ኣኔንኬ እን፤ የማቲባ ሙሙዾ፤ ካርሲኬ ጋኔ ሜሌል ኣዬንካ ሹሽ ኣይንካ ክያጝ ክየም የጌይኬን፤ ይሪካ ጪጮዬ ድሙጉዬ ጎብሼያ እሺ፤ ጎም ቡዋ ኔኒዬ ውር እንካ እያንሻ ጆሌ እሹጝ ካርሲያ እያጜ ዮጜ ዋክሼጆሌን። ¹² ታቺ እንካ ፔንዻ ከሹ እን ጌዬ ኦይን ሙኔን፤ ከኦካ እርሮ እንካ ታቺ እጝ ከጎሺዬን ኣምኒያ። ¹³ ጳውሎሴ ባይዳን ኔኒዬ ናሹጝኬ ጳፋዬ ከኦይን ጌዬንኬ ጵንፍልያ ፓያ እያጝካ ጴርጌን፤ ዮሐንስዻ ጌይኬ ኦግዬይ ዋናዬ ዋክሼያ እያጝካ ኢየሩሳሌሙጝ። ¹⁴ ዬ እንግን ናሹግኬ ጴርጌኔ ከኦይን ጌዬንኬ ጵስድያ ቱዎጝ ፓያ እያጝካ ኣንጾኪያጝ፤ ከሹ እንካ ሶጵሳዻ ሻው ሃምካ ይሁኔኔ ቆባ። ¹⁵ ኮሜ ወርቀት እንካ ክያጃዬ ካውርካ ቶካ ባሪዮጝ ጩዋ፤ ታታቻንካ ቶኦካ ይሁኔን ዋይሼ እንግን፤ ጪኒጌን ጉዋዩዮ፤ የኣንቴ ክያጃ ኬና ከኪሊቴ ዛርሱጝ ሃሳውባዬ ይዕሲሼያ ሃሚን ጊዬዩጝ። ¹⁶ ጳውሎስዻ ናሹጜ ዹዋልኬ ቡዋ ኔኒዬ ሺጝ እያጝ፤ ውርካ እስራኤል ዮ፤ ፕር እየው ጊታይ ሪግሼን ባሪዮ ፓይላ ዋይባ። ¹⁷ ኣምላክ ካዛርሲካ እስራኤል ጊታጝ፤ ሹቡጌን ጉዋዩ እድያ እንግን፤ ጋኔንባ ኦካ ዳሊካ ግብፅዻዬ ሻማ እንግን ዼግዼግ፤ ከካንታ ቁዋቃዻ ቡላ እንግን ከታይ። ¹⁸ ከቦን ኦይታምዻ ዶንሺሼያ እንግን ከቦና ክያኒ፤ ¹⁹ ጊታይ ኣኔን ዳሊካ ከነዓን ካይሲ ውር ጊታይ ጌጳዽ ሶጳዬ፤ ዳሊ ጊዬይ ሳስክዬ ጋያ ዛርሲ ጊዬይ ካሮጉምንቴባዬ። ²⁰ ይን ፓይላ ሙኒኖጝ ሃኬ ክያጝካ ቦን ዽብ ኣሁሬ ዶጝታሜ። «ከኦይን ጩዋ ሌይ ሃም ኣይ ቦንካ ውርካ ቶካ ባሪዮ ሳሙኤል ጋያ ጋያ ውር ጊታይ ጌጳዺ። ²¹ ጩዋ ካሜይሼ ዛርሲ ቢቲዬ ናንዳካ ጊታይ ኣምኒ ክያጃካ ባሪዮጝ፤ ባሪዮ ከኦካ ውርካ ቢኒያም፤ ኣያ እንግን ውዋካ ቂስ ሳኦል፤ እሺዻ እያንሼ ጆሌያ እንግን ቦን ኦይታም። ²² ጎብሼ ሳኦሉጝ ጩዋ፤ ጌጳሲሼያ እንግን ዳዊት፤ ናንዳካ እሺዻ፤ እን ኣይኬ ሳን ናኒዬ እን ሃዎሾጝ ፓይላ ካኣሽክኪ ሃጌይያ ውዋካ እሴይ ዳዊቴ ክሊዬና። ²³ ባሪዮዻ ከእያይ ሁሉኬ ቃቦጝ ከኦካ ቢዛጝ ቦሼያ ውርካ እስራኤል ኢየሱስ እን ኣይካ ዻቆጝ። ²⁴ ከሌሜንካ ኩኔንካ ኢየሱስ፤ ዛርሲካ እስራኤል ፓይላ ካሁሉኬ ሁኔኔ ካዱቅዮጝ ዮሐንስ ኣኔን ክሊዬን። ²⁵ ዮሐንስ ኣኔንባ ክያጃ እን ይዕሲዬ እሺ ሹዋጴን ክይንኒዬ ክያኒዬ ሺጝ፤ ኣን ሃሙኒሼን እየው ኒን? ኣን ሃማር እሺዬን፤ ኣይባዬ ጫውካ ጃፍ ኔኒ ቡሌን እን ማር ኣን ሁሉኩሼን ከኣን ማ ኩንባ ኣኔን እያይ ሺጜን። ²⁶ እየው ጪኒጌን ጊታጝ ናኒ ጅሼኬ ቢዛካ ኣብርሃም፤ ፕር ከኦካ ጫቃን ጉዩ ጊታይ ሪግሼን ባሪዮ ፓይላ፤ ሜርሜሩጝ ካዻቆ ይዕሲዮጝ ሃካ ኡዋው ፓይላ። ²⁷ እየው ውርካ ኢየሩሳሌሜ ታታቻኔ የካኔ እባጃኬን ኢየሱስ፤ ካኣይባዬ ከሹ ጊታይካ ሶጵሳ ክያጃካ ውር ጊታይካ ቶካ ኮሞጝ ካሙኒኖጝ ኮምሼያ ከእሺ። ²⁸ ኦይን ካሄክሼ ሃምካ ኣርሼን ማሪን ክያጃ ክየምጵንዻ ጌዬኑጝ ጲላጦስ ካኮምሼ ኮምሼ ኮምሼንካ ኣርሼኑጝ ቁዋቅትሻ። ²⁹ እን ቶኬ ናንዳካ እሹጝ ሙኒኖጝ ጩዋ፤ ሃንቺሺ ከኦካ ሻሪ እን ፃጵዬ እሺዬ ዾቅሼያ ሃምካ ሌሱጝ። ³⁰ ዬ ባሪዮ ቲታ እሺ ከኣርሼን ክያኒ። ³¹ ካርሲኬ ገሊላዬ ሌይ ኣይ ኢየሩሳሌም ጌዬና ሹ ጁዋኑ ከውር ጊታባ ጋዬኬጋጝ፤ እንግንዻ ጋን ጋይ ማኝካ ዛርሲ። ³² ኡዋዻ ክያጃ እን ባሪዮ ሁሉኩሼ ሹቡጌን ጉዋዩ ቃቦጝ ክያጃ ሹቃ እን ሃሜይቴባ እየው፤ ³³ ከእን ቲቴ ኢየሱስ ከኣርሼን ክያኑጝ ቃቦ እን ሁሉኩሼ እንግንዻ ናንዳካ ኡዋው ሃንታ ጉዩዻ ሙኔና፤ ይንዻ ከይያሪ እንካ ላንሳጝ ሺጝ እያጜ ቶኳ፤ «እን የኣይ ውዋ ናኒ፤ ኣን ሃጅሺያ እን ሹጝ። ³⁴ ፕርዻ እሺ ካማር ጫፒዬኔ ባሪዮዻ ከእያይ ቲቴ እሺ ከኣርሼን ክያኑጝ እባጄን ሺጛ እያጝ፤ «እን ይሁሺኔዬ እን ጌርሚኔዬ፤ [ሃኣይባ እየው ኡዋኒኔንካ ዳዊት]። ³⁵ ዬ ከኦካ ራቅ እንቃዻ፤ ጊታይ የይሁሺኔ ፑጪዬ ከጌዮጝ የናሺኬን ሺጝ እያይ። ³⁶ ዳዊት ከቦን ኔኒ ኣሽክዬ ክያጃካ ባሪዮጝ ጩዋ ሞትያ፤ ቱቱካ ከሹቡጋኔ ኣሩጝ ኔኒ ጫፒያ። ³⁷ ዬ እን ባሪዮ ቲቴ ከኣርሼን ክያኑጝ እሺ ካኒ ጌይኬን ኣርሼን። ³⁸ ኣኪ ጪኒጌን ናኒ ዮ፤ ሺዕሺዬን ካሴሶ ጌዬን ኣዬኬ ዻርካ ኢየሱስጵኑጝ ከእያይ ሜይሼ እየው እባጅባ። ³⁹ ጊታይ ይወን ከእሹጝ ፓይላ ጫንቃል እን ማሬኬ ታካ ዻርካ ክያጃካ ሙሴ ጌዬን ቻሊዬኑጝ ጌይባ። ⁴⁰ ዬ እን ውርካ ቶካ ባሪዮ ሺጜ እያጜ ሃሳዎጝ ካማር እየው ሄክሼኔ ኣጅቴባ፤ ⁴¹ «እየው [ጊታጝካ ኦልቱጝ፤] ቶይባ፤ ጎሺባ ካይባዻ፤ ውር ክየምጵንዻ ሜይሼያ እየውያጝ፤ ዋድማ እን የማርቴ ኣምኒቴኑጝ፤ ኣን ሃኣሽክባ ከቦን ጉዩዬ። ⁴² ጳውሎሴ በርናባሴ ቱልኬ ቶኦካ ይሁኔንያጝ፤ ናንዳ ክያጃ እን ከሹካ ሶጵሳ እንካ ኩዋው ካሜይሼ እንግንባዬ ይወና። ⁴³ ውር ጊታይ ፑጪዻ ላልምኖጝ ጩዋ፤ ውርካ ኣይሁድ ጁዋኑዬ ውር ጊታይ ሻው ሃምካ ቶኦካ ይሁዳዬ ከክያጃካ መንፈስ ቁዋቅትሺሹጝ ዻዬያ ጳውሎሴ በርናባሴ፤ እንግንዻ ሃሳዋ ጊዬይ ኣዬ ቁዋቃ ከኣይኔንካ ባሪዮጝ፤ ክሊያ እንግን። ⁴⁴ ሹካ ሶጵሳ ኑዋ ሄክሾጝ ዛርሶካ ከተማ እጝ ውር ጩዋማጵን ሺዽያጝ፤ ፓይላ ፑኡሺሜና ክያጃካ ባሪዮ ዋዬን። ⁴⁵ ውርካ ኣይሁድ ከሹ እን ጌዬ ዛርሲ ጁዋኑጝ፤ ቆቃ ከቦውንታ፤ ሚኔ ሃሳዋካ ጳውሎሴ ጋኔን ይሪኔን። ⁴⁶ ጳውሎሴ በርናባሴ ከሾያሞ ዋይሼ እንግን እያጝ፤ ክያጃካ ባሪዮ ከሌሜን እየው ሜይሼን ኣኔባ፤ ዬ እየው የቦውያያ፤ ከይንዻ ዻቆካ ቦን ጮል ካማርሼ እየው ሁሉኩሼኔ ናንዳካጝ የኮምቴ እየው ኤታጋኑጝ፤ ኡዋዻ ሃዋክቴባ እያጝካ ዛርሱጝ። ⁴⁷ ፕር ታቺ እን ሺጝ እያጜ ኤርግታ ኡዋው፤ «ባይሺሼን ከሄክሺሺቴ ሃም ዳሊ ዶኩዬዬ፤ ከማቲ ኦሜሌልካ ዛርሲዬ ዛርሲዬ ሃሻምያ እየው። ⁴⁸ ዛርሲዻ ከሹ እን ዋዬ እኑጝ ዋዝንሲያ እንግን፤ ጋያ ክያጃካ ባሪዮ ጎቢንታ፤ ጊታይ ሼኪ ናንዳካ ዻቆካ ቦን ጮል ፓይላ ኣምኒያ። ⁴⁹ ክያጃካ ታቺ እንዻ ከኦካ ክራ ኣኔን ኦካ ክራ እን ፓይላ ሆሮርዽያ። ⁵⁰ ዬ ውርካ ኣይሁድ ውር ጊታይ ከክያጃካ መንፈስ ቁዋቅሺሺዬ ከቆቤን ሃኣጚ ጌጳሲዬዬ ፕር ጁሙ ታታቺ ጊታይካ ከተማዬ ጬይሼ ቲትሼያ ጳውሎሴ በርናባሴ ዋክሺሼን፤ ቡላ ከኦካ ፔን ጊዬይዻ። ⁵¹ ጳውሎሴ በርናባሴ እን ሚኔ እንግን ዹዋልሺኔን ትርክሲ ቡቡኒካ ጃፍ ጊዬይዬ ፓያ እያጝካ ኢቆንዮን። ⁵² ውር ጊታይካ ዻይኔንዻ ቆቋ ከዋዛዬ ከመንፈስ ቅዱሴ።