ሃፑክ 28 {ጳውሎስ ከኦካ ጎልዹካ መላጥያ} ¹ ከሹቃ ሃሄክሽቴ ሃምካ ዳሉጝ ጩዋ፤ ጎልዹ እን ሺጜ መላጥያዬ ሺዎጝ ሃእባጃያ። ² ውር ጊታይ ቆቤን ኦይካ ጞልዹ እኑጝ ዹዋልሼያ ኡዋው ሹቃቲ ኬና ኣይ ዋና፤ ኣኔ ጎቴ ጪራቲዬ ጉዋጝ ጉዌ ቦዋ ኡዋው ፓይላ። ³ ጳውሎስዻ ፑኡሺ ድሮዬ ሃክሼ ጉው ክያኑጝ፤ ናንዳካ ቄጪቲካ ጉው ዱብቴን ቱሌ እንዻ ቡዋ ኔኒ። ⁴ ውር ጊታይ ቆቤን ኦይካ ጎልዹ እኑጝ ከሹ እን ዱብቴን ቁሪዬ ቡዋ ኔኒዬ ጌዮጝ፤ ሺጝ ውሩጝ ከኣኩሉክ ሃውር ኬና ኒሺኔ ጆል ውር፤ ዻቅኒን ከኛፓስ ክያኑጝ ኣምላክ እንካ ኮምሼኑጝ ካኡፔኬ ዻቆጝ ካኒ ናሺኬን» ሺጝ እያይኔ ሃሳወና። ⁵ ዬ ጳውሎስ ይፓቲሼያ ቻች እን ኦካ ጉው፤ ካኒ ሄክሺሽኬን እሺ ኦኬ ጋራ ክየምጵንዻ። ⁶ ውራን ሺጝ ጋን ጋን ሩዋ ኔኒ ናሺባ ወይ ሉጉ ኣርሼ ቡድባ ሺጝ እያይኔ ጋኔን ካሊዬን፤ ኣይባዬ ቆቤ ቶይ ሹ ጁዋኑዬ ማሬ ኦኬ እንቃ ማር እሺ ሄክሼኔ ከሹ እን ጌዮጝ፤ ዋሽ ቃቦ ጊዬይዬ ሺጝ ይጛ ኣምላክ። ⁷ ኦካ ቋጩርካ ራቅ እንዻ ኣና ዳሊካ ታቺ እንካ ጎልዹ ፑፕልዮስ፤ እሺዻ ቦሼ ኡዋው ሃምካ ቶኦ ኔኒዬ ከሹቃቲ ቾችንሺያ ኡዋው ሹ ጂያን። ⁸ ሹኔካ ፑፕልዮስ ዴሜንካ ቄጪቲካ ሩዋዌ ጬሬሪዬ ኡጜ ኣኔባ፤ ጳውሎስዻ እሺ ኣንሺኔን ሁሉኬ ይሁኖጝ ጩዋ፤ ኣይሼ ቡዋ ኔኒዬ ባይሺሻ እሺ። ⁹ እንዻ ከሹ እን ሙኒኖጝ፤ ውር እንቃካ ቡርቂ ጊታይ ኣኔን ኦይካ ጎልዹ እን ፓዬኔ ባይሺሼና። ¹⁰ ጎቢያ ኡዋው ከጉዋር ጁዋኑ፤ ሹ እን ሃሼክቴ ከጋጊ ፓዬኑጝ፤ ኦግታይ ዎሺሽ ኡዋው ፓይላ ጋይሼያ ጋጊ ክያኒ። ¹¹ ከትጌሽ ጂያንዻ ጩዋ፤ ከኦካ ጎልዹ እን ባርጊን ዾሬ ከጋጊ ክየም ሃካርሲያያ ጃሌን። ጋጊ እንዻ ኣዬካ እስክንድርያ [ከዾዮክ ኔኒ ኣዬ ታጵሼኑጝ ኣኔ ኦኬ ታቺካ ዲዮስቆሮስ]። ¹² ሃሁሉካ ሃምካ ከተማ ሰራኩሴ ሃቆባያ ሹ ጂያን። ¹³ ጩዋ ሃፓያ ከጋጊዬ ሃሄክሻያ ሬጊዩም፤ ከዻምዻ ናንዳካጝ ፑጉ እንካ ታካ ቶጉ ናሹጞጝ ሃሄክሽቴ ፑቲዮሉስ ሃሹ እን ዻይሾጝ። ¹⁴ ሃጌያያ ሃሚን ጪኒጌን ጉዋዩ፤ እንግንዻ ካቆብቴ ከጋጝ ሹ ሶጳጝ ይወና ኡዋው፤ ከኦይን ጩዋ ሃፓይቴያ እያጝካ ሮም። ¹⁵ ጪኒጌን ጊታይ ጉዋዩ ኣኔን ኦይኑጝ ናንዳካጝ ዋዬ ፓይኔን ጉዋዩጝ፤ ሌይ ኣፍዩስ ፋሩስ፤ ፕር ሃም ሺጜ ኦካ ራጴን ጅያኑጝ ሄክሼ ቱላ ኡዋው ቦወን፤ ጳውሎስዻ ከሹ እን ጌዬ እንግኑጝ ጌጳሲያ ባሪዮ፣ ሌምያዻ። ¹⁶ ሹ እን ሃሄክሽቴ ሮም፤ ከፓፃኖ ጊታይ ባኬን ጳውሎሱጝ፤ ካቆብቴ ኡዋጵን ኦይኑጝ ናሺሼያ ኡዋው። {ጳውሎስ ኣኔን ባክኔን ክያኒዬ ክሊዬና} ¹⁷ ከሹ ጅያንዻ ጩዋ፤ ጳውሎስ ሺዋ ውር ታታቻንካ ኣይሁድ ክየምጵን፤ ከሹ እን ፑጪዬዻ ዋይሼ እንግን እያጝ፤ ጪኒጌን ናኒ ዮ፤ ኣን ክያጃካ ዛርሲ ጉዋዩ ወይ ካሹቡጌን ጉዋዩ ኦኬና ሃሚኔ ክየምጵንዻ ሃካና ሻምኬኔ፤ ቁማን ከኢየሩሳሌሜ ሳስክዬ ጋያ ኣን ውርካ ሮማን። ¹⁸ እንግንዻ ቶዬ ናንዳካጝ ማሬ ሴሶ ኬና ካሄክሼ ኣን ሃምካ ኣርሼን ጌዬኑጝ፤ ዎሻ ኣን ቡሌን። ¹⁹ ዬ ከሹ እን ውርካ ኣይሁድ ሚኖጝ፤ ሃሺጜ ሁሉኩሼባ ኣን ሃምካ ቄሳር ማቲሼ ኣን ጊድዬ፣ ኦኬ ኬና ካካሲሲዬ ዛርሲ ኣኔኬን ኦናኒ። ²⁰ ሃሺወ እየውዻ ናንዳካ ቶዬኔ ናንዳካ ሃሳውኔኑጝ ሃናንዳካ ክያጃጝ፤ ሃቁሙኔ ናንዳካ ሰንሳላጝዻ ሃናንዳካ ቃቦ እን ጋዬ እስራኤሉጝ። ²¹ እንግንዻ ሺጝ እያጝ፤ ናንዳካ እን ወርቀት ኬና ቶኬ ይሁዳዬ ክየምጵንዻ ካኒ ሄክሽኬን ኡዋው፤ ጪኒጌን ጊታይ ጉዋዩ ፓዬንኬ ሃሚኑጝ ናንዳካ እን ኦኬና ቦፓይኔ ወይ ኬና ሃሳወ ክያጃ ጋራ ክየምጵንዻ ኣኔኬን። ²² ካኣይባዬ፣ ውር ናንዳካ ፑልታጝካ ይሁኔኑጝ ኦጉዋይካ ራቅ ፓይላጝ ካሃሳወ ኦኬ ጋራጝ ሃእባጃያ፤ ፕር ቃቦ ኑኑ ኣዬ ኦውጝ ሃዎሻያ ዋዬን። ²³ ጎምሼ እንግን ሹዻጝ ጩዋ፤ ማቲ ጁዋኑዬ ፓይና ኦይንካ ራቅካ ኡሲ ቦወኑጝ፤ እሺዻ ቦኬ ዻሜ ሌይ ኣይ ቃዩጝ ናንዳካ ጌጳሞካ ባሪዮ ክሊዬን እንግኔ ኣኔን እንግን ፓትሼን፤ ካርሲኬ ክያጃካ ሙሴዬ ውርካ ቶካ ባሪዮዬ ከፑሪዬን ናንዳካ ኢየሱስ ታማ እንግን ሱዱዬን። ²⁴ ውር ክየም ክየም ኣምኒ ክያጃ እን እሺ ሺጜዬ ቦዋ፤ ዬ ውር ዶክ ካኒ ኣምኒኬን፤ ²⁵ ካኒ ዋይሼንኬን ጋጝዻ፤ ጳውሎስዻ ቱንሲ ክያኒ ሜይሼ እንግን ክያጃ ኬና ሺጝ እያጝ ጩዋ ፓያ፤ መንፈስ ቅዱስ ከታካ ውርካ ቶካ ባሪዮ ኢሳይያስ ከሊኪ ሺጝ እያጜ ሜይሼያ ሹቡጌን ጉዋዩ፤ ²⁶ ካምባ ሃምካ ዛርሲ ጊታጝ፤ ዋይሼባ እንግን እያጝ «ዋዬን የዋያባ ኣይባዬ የጶቅስያኬን፣ ቶዬን የቶያባ፣ ኣይባዬ የጌያኬን። ²⁷ ሻንካ ዛርሱጝ ሹሙሜና ናቡ ጊዬይዻ ሹፔና፤ ካርቡ ጊዬይዻ ሙሙዼና፣ ሃእያይንያጝ ጌይኬ ካርቡ ጊዬይዬ፣ ዋይኬ ናቡ ጊዬይዬ፣ ጶቅሲኬ ሻን ጊዬይዬ ዋኬ ሃባይሺሽ እንግንባ። ²⁸ ዬ ባይሺሼንካ ባሪዮ ይዕሲሼ ዛርሱጝ ከእባጅቶጝ ሃዎሺያ፤ እንግንዻ ዋይባ። ²⁹ ሃሳወ እን ጩዋ፣ ውርካ ኣይሁድ ዜርሜንኬ ጋጜ ፓያ። ³⁰ ጳውሎስዻ ከቶኦ እን ኔኒ ጎሜ ኡፎጝ ኦፓ ቦን ዻ ፓሲ፤ ውር ጊታይ ፓይ ሃሚን ኔኒ ፓይላ ኣኔንኬ ዋዛ ቦወን፤ ³¹ ውር ክየምጵንዻ ካኒ ሃርጌኬን እሺዬ ክሊዬን ጌጳሞካ ባሪዮዬ፣ ናንዳካ ኢየሱስ ክርስቶስ ታቺ እን ካሎን ከሊኪ ኣኔን እርርሲዬን።