9 ¹ ኣን ሃማር ውር ነጻዬኒ? ሞ ሃማር ሐዋርያቴኒ? ካኒ ጌይኬኒ ኢየሱስ ታቺ እን ጉዋዩጝ? ኤ እየውካ ከታቺ እን የማራ ካርቡካ ዻቾ ናኒዬኒ? ² ካማር ሐዋርያካ ዶክ ኣዬኑጝ ዬ ከኣኩሉክ ሃኣይ ሐዋሪያ ጉዩ፤ ናንዳካኦ ናንዳካ ታቺ ኣይ ማኅተምካ ሐዋርያ ኣዬን ናኑጝ ሃእየው። ³ ናንዳካ ውር ጊታይ እያሜን ኣኑጝ ቶግ እን ካዋሼ እንግን ሃይዕጝ። ⁴ ኣይባዬ፣ ሃኣንቴኬኒ መብትካ ኣምኔኔ ካማትኔኔ? ⁵ ከሐዋርያት ዶክ፣ ከጪንጌን ጊታይካ ታቺ እኔ ኬካ ኬፋ ፓይላ፣ ኤ ኡዋካ ሃኣጚ ጊታይ ኣይካ ይሁኔን ቦወ ሺሪዬን ሃኣንቴኬኒ መብት? ⁶ ወይ ዋድማ ኦይዴን ማር መብት ኣኔን ሃኣኔ በርናባስጵኒ? ⁷ ኣይባዬ ከቢሬ ኔኒ ሃኒን ካማቲ ፓፃኖጝ? ሞ ኮሪዬ ማር ካርቡ ኔኒ ኣሜን ሃኒን? ዻወንባዬ ማር ሼቴካ ቢ ማቴን ሃኒን? ⁸ ሃሳወ ይኑጝ ሃኬ ቃቦካ ውሪ? ይግ ባካ ሌሜኑጝ ሺንኬኒ ይጝ? ⁹ ከሕግካ ሙሴ፣ ቢ እን ባጜ ትርኪሲዬን ሩቡጝ ኦይ ቶግ ኔኒ ቆሜኔ ቶኳዬ። ኣይባዬ፣ ባሪዮ ሺጜ እያይኑጝ ሃናንዳካ ቢዊ? ¹⁰ ሃሳወ እኑጝ ኣኩሉክ ማር ናንዳካ ኡዋውኒ? እን ቶኮጝ ከሊኪ ሃናንዳካ ኡዋው፤ እን ኮወን ሃሙጝ እንካ ኮዎጝ፤ እንካ ሙሩጝ ከኦካ ሩቡ ጊታይ ካኣኔ ድርሻ ኔኑጝ ሃኬ ቃቦ ሻሜን። ¹¹ ኡዋው ከኦካ ጫቃን ጉዩ ሃኦኬና ሃኮርቴ ጴንታካ መንፈስያጝ ሃፓትያያ ኦኬ ኬና ኣይካ ኣሩጝያጝ ሃኦኬ ኬና ኣይ ታቺ እያጝኪ? ¹² ዶክ ሃኦኬና ቻሊዬ መብቱጝ ከኦጉዩ ጌዬንያጝ፣ ኡዋው ካጌይቴ ሳጉጝ ሁሉኩሼኬን ኡዋው? ዬ ኡዋው ሃካና ጠቅምናኬን ከመብቱጝ፤ ሳጊዻ ናንዳካ ክያጃ ሹቃካ ክርስቶስ ካማር ኦኬ ጋራ ማቲዬኔ ሃዶንሺያባ ኦኬ ፓይላ። ¹³ ጊታይ ዋድምዬን ኦካ ቶኦካ ይሁኔኑጝ ከእያይ ጌዬ ዳዓኖ ጊዬይ ኦካ ቶኦካ ይሁኔኑጝ፣ ጊታይ ዋድምዬን ከጋላ ቡሌንዻ ከእያይ ካካሽምኔኬ ጋላ ቡሌኑጝ የእባጃኬኒ? ¹⁴ ከእያይ ጊታይ ሜይሼን ክያጃ ሹቃጝ ኦይን ካዎሺሽ እንግን ካቦወኬ ኦካ ክያጃ ሹቃጝ ታቺ እን ሜይሼና። ¹⁵ ዬ ኣን ከኦካ መብት ጊታጝ ኣይኒን ክየሙጝ ሃካና ጠቅምኔኬን፤ ኣይን ጋኑጝ ሃቶኩሼ እየው ይኑጝ ማርኬ ኬና ሺጝ የኣሽክያባ ኦግታኬና ኣኔን እያይኔን ውር ክየምጵንዻ ናንዳካጝ ካሻሜ ክሊማ ናኒ ማም እያይንያጝ ኣርሼን ሼድሼ ኣንባ። ¹⁶ ከክያጃ ሹቃ ሜይሺኔን ናኒ ቃይሲኬን ኣን፤ ሃሜይሺኖጝ ሃናንዳካጝ ኣይሼ ኣን ግድዬ ጊያ፤ ዬ ሃማርያ ክያጃ ሹቃ ሜይሺኔንያጝ ሃይ። ¹⁷ ሜይሼንያ ከናሺዬንያጝ ሃኣኔ ሽልማት፤ ዬ ማራ ከናሺዬን ኣዬንያጝ፣ እንካ ሹዋጵሾጝ ማቲባ ኤልቅሜ እን ጋዬ ኣንጵን። ¹⁸ ኣኪ ሽልማት ናኒ ሃኦ? ሽልማት ናኒ ሃሜይሼንያ ክያጃ ሹቃያጝ ሃጠቅምኔኬን መብት ናኒዬ ሃእን ካሺዬን ኣኔኬኔ ሃሜይሺኔ ክያጃ ሹቃ። ¹⁹ ኣን ሃኣይ ውር ነጻ ሃማር ካይሲካ ውር ክየምጵንዻዬን፤ ኣይባዬ ካሙኒኔ ውር ጁዋኑጝ ሃሻምሼባ ውር ፓይላ ኣን ኤምኑ ካይሲ። ²⁰ ካሙኒኔ ውርካ ኣይሁዱጝ ከውርካ አይሁድ ሃማቲ ኣይሁዴ፤ ኣንዻ ሃማርኬ ሕግ ዱቡ ኣዬኔ፣ ካዋሼ ጊታይ ኣኔን ከኦካ ሕግ ዱቡጝ ሃማቲኬ ኦኮኑጝ ሃኣዬኬ ሕግ ዱቡዬ። ²¹ ኣንዻ ሃኣይ እን ከኦካ ሕግ ባሪዮ ነጻ ኣዬኔ፣ ካኣይኒን ኬናካ ሁሉኩሼ ሕግካ ክርስቶሱጝ፣ ካዋሼ ጊታይ ማር ሕግ ኣኔኑጝ፣ ሃማቲኬ ውር ኮኑጝ ማር ሕግ ኣኔኔ። ²² ካዋሼ ጊታይ ዻቹጝ፣ ካውር ጊታይ ዻቹጝ ሃማቲ ኬና ኣይ ዻቹጉዬ። ከጊታይካ ቻሊዮጝ ፓይላ ካባይሺሼ ክየም ክየሙጝ፣ ከኦካ ፓይላ ሃማቲባ ኦኬ ፓይላ። ²³ ሃሻሜ ይጝ ፓይላጝ፣ ካካሺዬኬ ኦካ ኡዋኒኔንካ ክያጃ ሹቃጝ፣ ሃሺጝ ናንዳካ ክያጃ ሹቃዬ ጊያ። ²⁴ ጋዬ ውር ጁዋኑ ጊታይ ፓልሜንኬ ዜርማካ ጉኬኑጝ፣ ዬ እንካ ቦው ሼሽክዬኑጝ ኣዬ ክየምጵኑጝ የእባጃኬኒ? ዬ ጉኪባ ኬውር ኮኑጝ ካቦው ሼሽክዬኑጝ። ²⁵ ውር ክየምጵንዻ ካጝ ሼክሼ ፓልምኔኑጝ ኡዋሩጝጋ እሺ ኤምኑ ከኦኬ ፓይላ እንግን ዻችባ ናንዳካ ጎሺ እንካ ሳጊ እንካ ካይህ ጌዬን፤ ዬ ኡዋው ሃዻቻባ ናንዳካ ጎሺ እንካ ቦን ጮል ማር ካይዬኑጝ። ²⁶ ዬ ኣን ሃሪሽኬን ማም እያይ ከውር ኮኑጝ ማር ቃቦ ኣኔኑጝ፤ ፕርዻ ሃዳርጊኬን ከውር ኮኑጝ [ማር ነፒሲ ኔኒ ማክዬኑጝ]፤ ²⁷ ኣይባዬ ሃሜይሼያ ውር ዶክያጝ ጩዋ ካማር ቡዴ ሺዽዬኔ፣ [ሃማንኪ ሩዋ ናኒዬ ሃሻሚባ ኬናካ ጉዋሩጜ።