8 ¹ ፕር ናንዳካ ኣሩጝ እን ቡልሼ ኦግታይ ኣይኬ ባሪዮ ሹኑክ ጋላጝ ሃሺባ እያጝ፤ ኡዋው ፓይላ ሃእባጅቴ ኦኮጝ ሃእባጃያ። ኦኬ እባጄን ፎኮርሲባ፤ ዬ ናሺማ ሻምባ ጫንቃል፤ ² ውር እን ሺጚ ሃባጅያጝ፣ እንካ ሁሉኩሼ እባጄኑጝ ካኒ እባጅኬን። ³ ዬ ውር እን ናሺ ባሪዮጝ ከታካ ባሪዮ ሃኬና ጊባጄ። ⁴ ኣኪ፣ ናንዳካ ኣሩጝ እን ቡልሼ ኦግታይ ኣይኬ ኦካ ባሪዮ ሹኑክ ቃወን ሃሺጝባ እያጝ፤ ኦግታይካ ፔኑጝ ኣይኬ ኦካ ባሪዮ ሹኑኩጝ ኣዬካ ማም እያይኔ ከኦካ ባሪዮ ክየም እን እንቃ ኣምላክ ዋና ማሬ ኣኔኑጝ ሃእባጃያ። ⁵ ኣይኒን ኦኑጝ ኣማልክት ጁዋኑዬ ታታቺ ጁዋኑዬ ኣኔባ፤ ኣይኒን ከፎላ ዾዮኩጝ ኣይኒን ከዳሉጝ ጊታይ ሺጜ ኣምላኬ ሺዎጝ ኣማልክት ኣኔያጝ፤ ⁶ ዬ ናንዳካ ኡዋው ኦኬ ፓይላ ኣያ ከእሺ፤ ኡዋዻ ሃኣያ ኔኒዬ ሃኣንቴ ሹኔ ጉዋዩ ኣምላክ ክየም፤ ፕርዻ ኦኬ ፓይላ ኣይኬ ታይ ኔኑጝ፣ ኡዋዻ ሃኣይቴኬ ታይ ኔኑጝ ሃኣንቴ ኢየሱስ ክርስቶስ ታቺ ክየም። ⁷ ኣይባዬ ጊታይ እባጅ ይኑጝ ማር ፓይላዬን፤ ውር ክየም ክየም ሌይ ኣይ ጋኑጝ ናንዳካጝ ዱሲዬን ኦግታይ ኣይኬ ኦካ ባሪዮ ሹኑክ ይሁኔኑጝ፣ ቃዋ ኣሩጝ ኬና ኣይ እያይንያጝ ከኣኩሉክ ቃቢኬ ኦኮኑጝ ቡልሼ ኦግታይ ኣይኬ ኦካ ባሪዮ ሹኑክ ጋላጝ፤ መንፈስ ጊዬይዻ ናንዳካጝ ኣዬ ዻቹጉጝ [ዻችባ]። ⁸ ኣይባዬ ዳዓኖ ቦሼኬን ሃምካ ባሪዮዬ፤ ካማር ኣሜኑጝ ኦኬናካ ጆግሼ ኡዋው ኣኔኬን፤ ካኣሙጝ ኦኬናካ ትርፊሲቴ ኣኔኬን። ⁹ ኣይባዬ እን ናሹጝኬ ነጻ ኣዬን ጉዩጝ ኦግታይ የኣሽክቶጝ ካማርሼ ጊታይ ኣይ ዻቹጉ ኦኬ ጋራ ኣዬኔ ኣጅቴባ። ¹⁰ እን የኣኔ ኦኬ እባጄን ኬና ኣይ እያጜ፤ ውር እን ኣኔ መንፈስ ኬና ኣይ ዳቹጝ፣ የኣሜን ኦካ ቶኦካ ውር ጊታይ ኣይካ ኦግታይ ኣይኬ ኦካ ባሪዮ ሹኑኬ ጊያ እንያጝ፣ ኣሩጝ እን ቡልሼ ኦግታይ ኣይኬ ኦካ ባሪዮ ሹኑክ ጋላጝ ቃወን ሾይንሺኬኒ እን? ¹¹ ዬ ጪን ዻቹጉ እን ኑኑ ክርስቶስ ኣርሺሾጝ ናንዳካ ኦኬ እባጄን ኑኑ ካይያ እያጝጌ። ¹² ከጉዋር ይጝ ሴሶካ ጪኒጌን ጉዩዬ መንፈስ እን ጊዬይ ኣይ ዻቹጉጝ ከጴቅሼን፣ የሴስያባ ክርስቶስ። ¹³ ዬ ኦይን ኣን ካኣሞጝ ሃኦኬና ካካቲንሲዬ ጪኔ ናንያጝ፣ ሃሺጝ ጪኔ ናኒ ካማር ካቲምኔኔ ሃቃውኬን ኣሩጝ ክየምጵንዻ።