7 ¹ ናንዳ ክያጃ እን የቶኩቴ ኣኑጝ፣ ውር ማራ ሃምካ ሃኣጚ ሄክሼንያጝ ሃሹቃ፤ ² ኣይባዬ ከኦካ ኩጳሞ ማንክኔን፤ ውር ክየም ክየም ካኣኔ ኚያጝ ኔኒ፤ ሃኣጚ ክየም ክየም ካኣኔ ኡማ ኔኒ። ³ ኡማ ናንዳካ ኚያጝ ኔኒ ኦይካ ዎሺሽ ፓይላ ኣሽክሼባ፣ ኚያጝ ኔኒዻ እያይ ኦይንካ ዎሺሽ ኡማ ፓይላ ኣሽክሼባ። ⁴ ሩዋካ ሃኣጚ ማር ኔኒ ጵኔን፣ ሃካ ኡማዻ፤ ፕር እያይ ሩዋካ ኡማ ማር ኔኒ ጵኔን፤ ሃካ ኚያጝ ኔኒዻ። ⁵ ከይሁኔን ቁዋቅትሺሼን የዋይሺና ጋጜ ማርካ ሹ ጩዋማ ዶክ ኣዬንያጝ ፣ ኦይዲ ጋጝ ሃርጊቴን፤ ከእን የማርቴ ጋጝ ኦካ ጋጝ ሻምሼኑጝ እጁጝ ካማር እየው ፓታኒዬን ፕር ካንዻ ኣይባ ከጋጝ። ⁶ ዬ ሃሺጜ እኑጝ ማርኬ ኤርጎዬኔ ሃኬ ክሊማ/ ⁷ ውር ፓይላ ዋንቲ ኣያኬ ከኣንያጝ ሃባሺ። ኣይባዬ ውር ክየም ክየም ኣይኔን ኔኒ ኬና ቦወኬ ሃምካ ባሪዮጝ ኣኔባ፤ ውር ክየም ኣኔያ ኣይኔን ኬና ኣይ ሃይነት ክየምያጝ፣ ኑዋ ፕር ኣኔ ኣይኔን ሃይነት ኣንቃ። ⁸ ዬ ናንዳካ ውር ጊታይ ማር እያኒሺኔኔ ሃኣጚ ጊታይ እያኒሼኔ ጁማንቴን ጊዬይ ኣርሺዬ ሃሺጚባ እያጝ፤ ማር እያንሺኔኔ ቆባ ከኣን እያጝያጝ ናንዳካ እንግን ሃሹቃ። ⁹ ኣይባዬ ማር እንግን ኤታጋን ማክንዬንያጝ ካጊያኒሼንባ፤ ከኣርግማ እያንሺኔን ሃላሻዬ። ¹⁰ ናንዳካ ጊታይ እያኒሼን ሃሜይሼንባ ኤርጎጝ፤ ኤርጎ እንዻ ሃካ ታቺ እን ዬ ማር ናኒዬን ኚያጝ ክየም ካማርኬ ኦካ ኡማ ላልምኔን፤ ¹¹ ዬ የላልያ ጋጝያጝ ኦይዲ እያኒሺኔኔ ቆቢባ፤ ወይ ማር እያይ ኣዬንያጝ ካቃሺምንቴባ ከኡማ፤ እን ኣይ ኡማዻ ካማር ኚያጝ ኔኒ ቡሌን። ¹² ፕር ናንዳካ ዶክ ሃሺጝባ እያጝ፤ እን ሺጚ እያይኑጝ ሃኣን ዬ ማር ታቺ እኔን። ኚያጝ እን ማር ኣምኒዬን ጁሙ እን ኣኔ ኚያጝዻ ኣኔዬ ኚያጝ ናኒ ካኡፌኬ እሹጝ ሃኬና ናሺዬያጝ፤ ካቡሎጝ ሁሉኩሼኬን። ¹³ ኡማ እን ኣኔ ኚያጝ ኔኒዬ ማር ኣምኒዬኑጝ ኣኔያ ሃኣጚዬ እሺዻ ካኡፌኬ እሹጝ ሃኬና ናሺዬያ፤ ካቡሎጝ ሁሉኩሼኬን እሺ። ¹⁴ ኡማ እን ማር ኣምኒዬኑጝ ናሺሼያ ከኚያጝ ኔኒዬ፤ ኚያጝ እን ማር ኣምኒዬንዻ ከኡማ እን ኔኒ ኣምኒዻ ይሁሼናዬ ዋቲ ማር እያይ ኣዬንያጝ ሃንታ ጊዬይ ኣያካ ሴሶ፤ ዬ ጋን ሃጊታኬና ይሁሺኔ። ¹⁵ ኣይባዬ ሃኦኬና ዎሼ ውር እን ማር ኣምኒዬ ዋና ሻሜንያጝ ካሻምባ ዋና፤ ጪኔ ክየም ወይ ጪኔካ ክየምካ እጛሽ ከዴንታጝ ማር ጊታኬና ቁሜዬን ባሪዮ ሺወ ኡዋውጝ ካቆብኬ ሹቃዬ ጊያ። ¹⁶ እን ሃኣጚ፣ ከባይሺሼ ኡማ ኑኑጝ የእባጂ ኦ? ወይ እን ውር፣ ከባይሺሼ ኚያጝ ኑኑጝ የእባጂ ኦ? ¹⁷ ውር ክየም ክየም ከእያይ ታቺ እን ቱሙሼጵን፤ ውር ክየም ክየምዻ ከእያይ ባሪዮ ሺዎጝ ካኣኒንቴባ ኦይኑጝ፤ ኦጉዋይካ ቶኦካ ይሁኔንዻ ሃሳዎጝ ሃይዕጝ። ¹⁸ ውር ክየም ቆርባዬ ኣኔባዬ ሺውያጝ፤ ካማርኬ ውር ኬና ማሬ ቆሬን ማቲዬን፤ ሃኦኬና ማሬ ቆሬኔ ሺወዻያጝ ካማር ቆርኔን። ¹⁹ ቆርኒኑጝ ማርኒን ቆሬኑጝ ጠቅምኬን፤ ኦይን ኣይ ልኩጝ ሃኤርጎካ ባሪዮ ሹዋጵሺሼን። ²⁰ ውር ክየም ክየም ካቁዋቅትሻ ዾርባ ኦይን ሺወ እሹጝ። ²¹ ከሹ እን ሺወ እኑጝ የኣይ ካይሲህ? ኦይኬ እን ጫንቅዬን፤ ዬ ሃኦኬና የቻሊዬ ነጻ ኣዬን ኑኑ ጌዬንያጝ ቦባ ነጻ ኣዬን ኑኑ። ²² ናንዳካ ኦ የኣይባዬ ካይሲዬ የኣኔባዬ እን ሺወኬ ታቺ እኑጝ ሃውር ነጻካ ታቺ እን፤ ሺዋ እያይንያጝ ውር እን ኣይ ነጻጝ ሃውርካ ዋድማካ ክርስቶስ። ²³ ጉዋሩጛ እየው ከኣንቲቲ፤ ዬ ኦይዲ ካይሲካ ውር ማቲቴን። ²⁴ ጪኒጌን ናኒዮ፤ ውር ክየም ክየም ከዴንታ እን ሺወ እሹጝ ካቁዋቅትሻ ኡፓ ከባሪዮ። ²⁵ [ናንዳካ ዻጳሞ]፣ ኤርጎ ኬና ሃቦወኬ ኦካ ታቺ እን ኣኔኬን፤ ካኣይባዬ እን ናሹጝኬ ሺዕሺኔንካ ታቺ እኑጝ ከውር ሹቃ፣ ሃሜይሼንባ ክሊማ ናኒ። ²⁶ እን ናሹጝኬ ችግር እጝ ኣኖጝ ከኦካ ዴንታ እን የኣንቶጝ የቆባያጝ ሙኒሼንባ ኣን ባሺ። ²⁷ ሃኦኬና የእያኒሺኔያጝ ኦይ ቡሌን ዎሼን፤ ሃኦኬና የማሬ እያኒሺኔንያጝ ኦይ እያኒሺኔን ዎሼን። ²⁸ ዬ ሃኦኬና የእያኒሺኔያጝ የካኔ ኣሽኪኬን ሴሶ፤ የእያኒሽያ እጛሽ እን ኣይ ዻጵያጝ ካኒ ኣሽኪኬን ሴሶ፤ ኣይባዬ ውር ጊታይ እያንሼኑጝ ፔኑጝ ክያኑጝ የክሻ እንግን ችግር ጁዋኑ፤ ኣንዻ ኦግታይ ኣኔን እያይ ካማር እየው ሄክሼኔ ሃዎሺያ። ²⁹ ጪኒጌን ናኒ ዮ፤ ቃቦ ናኒ ሃእያጝ፤ ቦናን ሃጩዋማ፤ ካርሲኬ ጋኔ ጊታይ ኣኔ ሃኣጙጝ ካሻምኬ እያይ ማሬ ሃኣጚ ኣኔኔ ካቆባ። ³⁰ ጊታይ ኦቆሩጝ ካማርኬ ኦኮኑጝ ማሬ ኦቆሬኔ፣ ጊታይ ዋዝንዺዻ ካማቲ ከኦኮኑጝ ማሬ ዋዝንዺዬኔ ካቆባ፤ ጊታይ ኡዋሩጝ ኣንቲቲዻ ኦግታይ ጉዋሩጜዻ ካኮምሼ ከእያይ ማሬ ጊዬይ ኣዬኑጝ፤ ³¹ ኦግታይካ ፔኑጝ ጠቅምዻ ካማቲባ ከእያይ ካማሬ ጠቅምዬን፤ ዴንታካ ፔኑጝ ሃኬናካ ሳጊዬ። ³² ኣንዻ ጪንቀት ክየምጵንዻ ካማር ኦጉዩ ኣኔኔ ከቆብቶጝ የዎሽባ። ውር እን ማር እያኒሺኔኑጝ ታቺ እን ዋዝንሲዬን ቃቢባ ናንዳካ ክያጃካ ታቺ እን፤ ³³ ዬ ውር እያንሼኑጝ ናንዳካ ኚያጝ ኔኒ ዋዝንሲዬን ቃቢባ ኦካ ፔኑጝ፤ ³⁴ ናንዳካ እንዻ ካሺያ ሻን ኔኒ። ኚያጝ እን ማር እንያንሺኔን ወይ ዻጵ ቃቢባ ናንዳካ ታቺ፤ ክያጃ ኔኒዻ ከኣሩጜ ከመንፈሴ ሃካ ቶኦካ ታቺ እን። ዬ ኚያጝ እን እያንሼኑጝ ናንዳካ ኡማ ዋዝንሲዬን ቃቢባ ኦካ ፔኑጝ። ³⁵ ሃሺጜ እንዻ ከቃቢ ኦይካ ኦይሼ እየወ ዬ ማርካ እየው ጫንቅሺዬኔን፤ ክያጃ ናኒዻ ሻን ጉዩ ካማር ካሺዬኔ ከልኪ ከቁዋቅትሼ ቆቢባ ከታቺ እኔ ጊያ። ³⁶ ውር ክየም ሃራ ዻጵ እን ኔኒ ሃራሲዮጝ ማራ ከሹቃ ጎሜንያጝ፣ እሺዻ ቦን ኔኒ ጃኬኔ ኩያያጝ፣ ዎሻ እያኒሺኔንያጝ ካሻምባ ኦይን ዎሾጝ፤ ሴሶ ኣኔኬኔ ካጊያንሽ ጋጝባ። ³⁷ ኣይባዬ ከክያጃጝ ሻም ሻን ኔኒ ሹቃዬ፣ ሪግሼንኬኔ፣ ከእሺ ኤምኑ ማንክዬን እጛ ዻጵ እን እያንሼን ውር እን ቱሚ ሻማ ሹቃ። ³⁸ ዬ ውር እን እያንሺ ዻጵ እኑጝ ሻማ ሹቃ፤ እን ማር እያንሺኔንዻ ሻማ ኬና ኣይ ላሻ። ³⁹ ኚያጝ ክየም ሌይ ሃም ኡማ ኡፌኬ ዻቆጝ ከእሺ ሃኬና ቁሜ፤ ዬ ኡማ ኣርሻያጝ፣ ከውር እን ዎሾጝ እያኒሺኔን ኣኔ ነጻሞ፤ ዬ ውር ካኣዬኬ ታቺ እኑጝ ኣኔባ። ⁴⁰ ዬ ኣያ ከእን ናንያጝ የማራ እያንሺኔኔ የቆባያ እያይንያጝ ሳጊ የኣያባ ጊታኬና ኣይ ዋዛ፤ ኣንዻ ሃዋሽኬ ኦኩኑጝ መንፈስካ ባሪዮ ኣኒኔ ከኣኑጝ።