6 ¹ ከኦካ ጫቃን ጉዩ ውር ክየም ኣኔያ ክትሞ ከኑዋያጝ፣ ክያጃ እን ኦናካ ቦሼ ሃምካ ውር ጊታይካ ይሁኔኑጝ ሻም እያን ናንዳካ ኮምሼን ናሹጜ ቦሼ ሃምካ ውር ጊታይ ማር ኣምኒዬኑጝ? ² ውር ጊታይካ ይሁኔን ካኮምሼ ውርካ ፔኑጝ የእባጃኬኒ? ሃኦኬና ካኮምሼ ውርካ ዳሉጝያጝ፣ ከእያይ፣ ናንዳካ ኦኬ ዺኒ እጝ ኣይኬን ጊታኬናካ ኮምሼ? ³ ማርኬ ዻቆካ ዳሉጜኔ፣ ኣይኒን ኦካ ውርካ ኤርጎካ ባሪዮጝ ካኮምሾጝ የእባጃኬኒ? ⁴ ኣኪ ኦኬ ኬና ኣይ እያይ ሌምኔያ እየውያጝ፣ ከኦካ ቶኦካ ይሁኔን ውር ጊታይ ቦውዮጝ ሻምካ ኮምሺኔኔ ጌጳሲያባ/ ⁵ ሃሺጌ እንዻ ካቦኩንሲ እየውባዬ። ካኣይባዬ ከኦካ ጫቃን ውር ኬናካ ጶቅሲ ኦኬዬ ካቃሺ ጪኒጌን ኣኔኬኒ? ⁶ ኣይባዬ ጪኔ ኩይባ ጪኔ ኔኒ ሃምካ ቶኦካ ኮምሼን ካሲሲዬን፤ እንዻ ከኦካ ሌሜንካ ውር ጊታይ ማር ኣምኒዬን/ ⁷ ኣኪ እን ኦካ ጫቃን ጉዩ ኣኔ ጋጝ ካሲሲዬኑጝ ዹዋልሼን ቡዴን ጉዩ፤ ኤ የጊያምሻያጝ ኣይኬኒ ባሺ? ኤ [የቱዋና ጋጝያጝ] ኣይኬኒ ባሺ? ⁸ ዬ እየው ኦይዲ እየው ኤታጋን ጊያምሼን፤ ኦይዲ ቱዋኔንዻ፤ ይንዻ ሃጪኒጌን። ⁹ ውር ጊታይካ ሴሲጝ ካማሬ ሃምካ ጶሮካ ባሪዮ ሻወኑጝ የካኔ እባጃኬኒ? ከዳቢ እን ኦይዲ ጊያምሼን፤ ጊታይ ኣሽክዬን ኩጳሞጝ፣ ጊታይ ይወን ኦግታይ ኣይኬ ኦካ ባሪዮ ሹኑኩጝ፣ ጊታይካ ኩጳሞጝ፣ ጊታይ ኣሽክዬን ከጁሙ ኩጳሞጝ፣ [ቀላጫን]፣ ¹⁰ ወይ ጎርጓን፣ ዛላን፣ ጊታይካ ጪዩጝ፣ ጊታይ ይሪኔ ጆል ውሬ ጊታይካ ዎቺኔኔ ሻውኬን ሃምካ ጶሮካ ባሪዮጝ። ¹¹ ከኦጉዩ ውር ክየም ክየም ጋይ እያይን፤ ዬ ጋን ከሮጝካ ኢየሱስ ክርስቶስ ታቺ እኔ፣ ከመንፈስካ ኣምላክ እን ጉዋዩጝ ጉዋና እየው፤ ይሁሼና እየው፣ ሻማ እየው ጫንቃል። {ሴሶካ ኩጳሞ} ¹² " ኦኬ ፓይላ ጋያ ኣን "ኣይባዬ ኦኬ ፓይላ ሃማም እያይ፤" ኦኬ ፓይላ ጋያ ኣን ኣይባዬ ኦኬ ክየምጲንጳ ኣኔኬን ኦናኒ ጌጳሞ። ¹³ ፕርዻ፣ ዳዓኖ ሃካ ክያጝ፤ ክያጝዻ ሃካ ዳዓኖ፤ ዬ ባሪዮ ካይሲባ እንግን ዻዋን። ሩዋ ሃካ ታቺ እን ዬ ማርካ ኩጳሞዬን፤ ታቺ እንዻ ሃካ ሩዋ። ¹⁴ ባሪዮ ከእያይ ቲቴ ታቺ እን ከኣርሼን ክያኑጝ፣ ቲትባ ኡዋዻ ፕር ከኣርሼን ክያኒ ከቁዋቅቲ። ¹⁵ ሩዋ ጉዋዩ ኣዬ ሩዋካ ኣሩጝካ ክርስቶሱጝ የእባጃኬኒ? ኣኪ፣ ሃቦው ኣሩጝካ ሩዋካ ክርስቶሴ ከሩዋ እን ኣይካ ኩጳሞጝ ካሻም ክየሚ? ክየምጵንዻ ሁሉኩሼኬን/ ¹⁶ ወይ ውር እን ኣይኬ ኚያጝ እን ኣሽክዬን ኩጳሞጝ ኣዬኬ እሺ ኣሩጝ ክየሙጝ የእባጃኬኒ? እንግን ዻዋን ማቲባ ኣሩጝ ክየም። ¹⁷ ኣይባዬ እን ኣይኬ ታቺ እኑጝ ከእሺ ኣይባ መንፈስ ክየም። ¹⁸ ፓይባ ከኦካ ኩጳሞ ኣሽክዬን ዹክ። ውር ሴሶ እን ኣሽክዮጝ ሃኬ ኦካ ሩዋ ሹኑክ፤ ዬ ውር እን ኣሽክዬን ሴሶጝ ሻምሼባ ኦካ ሩዋ ኔኒ ሴሶ። ¹⁹ ኣይባዬ ሩዋ ጉዩ እንካ ኡፍ ኦጉዩ ቱዎጝ ኣዬ ቶኦካ ይሁኔንካ መንፈስ ቅዱሱጝ የእባጃኬኒ? መንፈስ እንዻ ሃእን የቦቴኬ ኦካ ባሪዮጝ። እየውዻ የማራካ እየው ኤታጋኔን፤ ²⁰ ጉዋሩጛ እየው ከኣንቲቲዬ፤ ዬ ጎቢባ ባሪዮ ከሩዋ