5 ¹ ከኦካ ጫቃን ጉዩ ሴሶካ ኩጳሞ ኣኖጝ ከኣኩሉክ ሃሳውባ፤ ሴሶ ኬና ኣኔን እያይ ኣይኒን ከታካ ኣረማውያን ሃኬና ማሬ ጌዬን፤ ውር ኬና እያንሽ ኚያጝካ ሹኔ ኣኔባዬ። ² ፕርዻ ጋሽክያ ጃካማ/ ሳጊዻ የሞይካዽያዬ ውር እን ሙን ኦግታኬና ኣኔን እያጝ ከቡልቶጝ ሁሉኩሼኬን እየው? ³ ኣን ከሩዋ ካማር ሃሚን ጉዩ ኣኔኑጝ፤ ዬ ከመንፈስ ሃኣይኬ እየው፤ ሊኪ ሃኣይኬ እያይ ሃኣዬኬ እየወ፣ ሃኮምሼያ ጋን ኦካ ውር እን ኣሽኪ ይኑጝ። ⁴ ከሹካጝ የፑጪቶጝ ኣንዻ ናንዳካጝ ከመንፈስ ቅዱስ ሃኣዬኬ እየውጝ፣ ከታቺ እን ጉዋዩጝ ከሮጝካ ኢየሱሴ ከቁዋቅትካ ኢየሱስ ታቺ እን ጉዋዩ ጌዬን ኦካ ጫቃን ጉዩጝ፣ ⁵ ኣኣሩጝ ኔኒ ካህዬ መንፈስ ኔኒ ከሹካ ታቺ እን ካባይሾጝ፣ ጊታይ ኣኔን እያይ ካጋይ እጁጝ። ⁶ ኦይን ከቃይቶጝ ማር ሹቃዬን። እርሾ ጩዋማ ካቦኩዬ ቡካ ጁዋኑጝ የእባጃኬኒ? ⁷ ጋን የኣይቴ ጊታኬና ማር እርሾ ኣኔኑጝ ፓይላ ከኣይቴ ቡካ ሃሉጝ ቡልባ እርሾ ጌቾ እኑጝ፤ ክርስቶስ እን ኣይ ማድር ጉዋዩካ ፋሲካጝ ቡላ ጋላ። ⁸ ዬ ቶንቶሮ ኔኒ እርሾ እን ቆቃ ጃካማዬ ኦኬ ጋራዬ፣ ማርኬ ኦካ እርሾ ጌቾ እኔኔ ከባላሻ እን ማር እርሾ ኣኔን ካጎቢኬ ኦኬ ሹቃዬ ኣኩሉኬ። ⁹ ከማርቴ ውር ጊታይ ኣሽክኔ ጆል ኩጳሞ ክየም ማቲዬኑጝ ሃቶኩሼያ እየው ከሜርሜር እን ናኑጝ፤ ¹⁰ ሃሺጝያ እያይንያጝ ከውር ጊታይካ ፔኑጝ ኣሽክዬን ኩጳሞ ፓይላ ወይ ጊታይ ኣይ ዛላዬ ጊታይ ዎቼን ውሬ፣ ወይ ከውር ጊታይ ይወን ከኦግታይ ኣይኬ ኦካ ባሪዮ ሹኑኬ ማር ኦይድ ከጋጝ ክየም ኣዬን እያጜን፤ ኣያ እያይንያጝ ሹዋጵ ከኦካ ፔኑጜ ዎሺሻ እየው ዋና ሻሜን። ¹¹ ኣይባዬ ጋን ሃቶኩሼ እየው ሺጝ ሃጪኔ ናኒዬ ከእን ኣሽክዬን ኩጳሞጝ ወይ ከእን ዛላዺ ወይ ከእን ይወን ከኦግታይ ኣይኬ ኦካ ባሪዮ ሹኑኩጝ ወይ ከእን ይሬን ወይ ከእን ጮዬን ወይ ከእን ዎቼን ከጋጝ ክየም ማቲዬኔ ጊያ፤ ከውር ጊታይ ኣኔን እያይ ኣይን ዳዓኖጝ ኦይዲ ኣሜን። ¹² ከውር ጊታይ ኣኔን ከኦካ ቶኦካ ይሁኔን ሹኑኩጝ ኮምሼን ሃኦ ካሁሉኩሼ ኣኑጝ? ከውር ጊታይ ኣኔን ኦካ ቶኦካ ይሁኔን ቱዎጝ እየው የኮምቴኬኒ? ¹³ ዬ ከውር ጊታይ ኣኔን ከኦካ ቶኦካ ይሁኔን ሹኑኩጝ ካኮምሾጝ ሃባሪዮ፤ ኣኪ፣ ቦልባ ውር ጋራ እን ከኦካ ጫቃን ጉዩ።